Jeremias 30:16 - Biblia Dc en Mixe de Quetzaltepec

¹⁶ Je'eyëp tëy ko pën ëxaty mtunëtëty, ëxëëk jyata'any, tëkokyë yë mmëtsiptëjk nëjkxta'ajantëp tsumy matsy wiink naax wiink kajpn, yajpëjkëtya'ajantëp mëti'ipë të mpëjkëtyën ets yajmä'tsta'ajantë mëti'ipë të mmäätsëtën.

Biblia Mixe de Quetzaltepec

¹⁶ Je'eyëp tëy ko pën ëxaty mtunëtëty, ëxëëk jyata'any, tëkokyë yë mmëtsiptëjk nëjkxta'ajantëp tsumy matsy wiink naax wiink kajpn, yajpëjkëtya'ajantëp mëti'ipë të mpëjkëtyën ets yajmä'tsta'ajantë mëti'ipë të mmäätsëtën.

Jeremias 30:16 ပူးပေါင်းရင်းမြစ်များ

Jeremias 10:25

Yajkëta'ak ja mtsip m'äkë ma ja naax kajpnën mëti'ipë ka'ap m'ixy'ätyën, ma ja naax kajpn mëti'ipë ka'ap mmëkäjpxyën, jä'ä ko tëë ja Jacob ja nyaax kyajpn ëxëëk tuunëtë, tëë yajxon timyajkutëkoytyë ets xit ko'ow të t'ëxmatstë.

Isaías 33:1

Janty mon janty tuk mijts myajpaaty mëti'ipë naax kajpn mye'tsypyën ets mits ka'ap myajmeetsy; mëti'ipë jyiiky myëku'uk kyë'ëyäjkpyën ets mijts ka'ap pën mkë'ëyäkyë. Ko ënety tëë xyajkutëkooytyä'äy ja naax kajpn, tääts nëjkx mijts mkutëkoy, ko ënety tëë ja mmëku'uk xy'ayäky xykyë'ëyäky, tääts nëjkx mijts myajkë'ëyäky.

Éxodo 23:22

E pën mëmëtoopy ets mtuumpy jëtu'un ijxtëm yam n'ënëëmën, ëjts nmëtsip'atëpës ja mëti'ipë mmëtsip'ajtëpën ets njëjpkuwa'akëjäämpyës ja mëti'ipë mjëjpkuwa'këyëpën.

Zacarías 2:8

Yë Wintsën mëti'ipë maaytyääyëpën winë tëëjës yë aaw ayuk xytyukmëkäxë ma ja naax kajpnën mëti'ipë ojts määtsëtën: Pënës yë nkajpn ëxaty tyuunpy, ëjts yë nwintsaa yajtsëtyujtyp, paaty tääpë naax kajpn kë'ëmës mëët ntsiptuna'any etsës nyajkutëkoyä'äny, ëxëëk nëjkx tyunyë mëti'ipë ënety yaj'ëyoopy yajmëtuumpyën. Jëtu'un yë Wintsën yë myëj'ajt y'oyajtën tyajnikëxë'ëka'any ets xyjyä'äkyukëtëty ko yë'ëjës të xykyexy.

Apocalipsis 13:10

Mëti'ipë nitëjkëyëpën yajtsumëty, nëjkxëp ja yajtsumy; pën nitëjkëyëp yajkupuxëty, nëjkxëp ja yajkupuxy. Yaa yaj'ixa'any pën jotmëkën ets pën mëpëjkpën ma ja Dios ja nyaax kyajpnën.

Zacarías 12:2

Ëjts jëtu'unës yë Jerusalén kajpn nyaj'awinpita'any tä tu'uk yë a'ukënën mëti'ipë ujtsën mëët yë nëë mëti'ipë mukpën ets t'a'ukëtya'aja'any yë naax kajpn jënu'un mëët tyu'ktsëpa'anëtyën. Ko ënety yë'ëjëty tyajnatuktë yë Jerusalén kajpn näjyëtu'un yë Judá kajpn nëjkx nyätujkta'atë.

Joel 3:8

Ntookäämpyës yam yë m'u'unk m'ëna'këty ma jutië ja'ayëtyën ets yë'ë to'knaxtëty ma sabejë ja'ayëtyën, mëti'ipë wiink naaxwiinyëtë juuky'ajtëpën. Ëjts Wintsën, ëjts ënaanp.

Isaías 14:2

May nëjkx ja ja'ay tpatsoontë ja Israel ja'ayëty ets nëjkx najtswowëtë ma nyaax kyajpnëtyën; ja Israel ja'ayëty wyoownëjkxantëp ja ja'ay mëti'ipë mëtuunëtëpën jam ma ja Wintsën ja it nyaaxwiinyëtë të myo'ojëtën. Ja Israel ja'ayëty tsumy matsy nëjkx tyajnëjkxtë ja ja'ay mëti'ipë ënety të tsyum të myatsëtën, nëjkxëp ëxëëk tuntë mëti'ipë ënety ëxëëk të tyunëtën.

Salmos 129:5

Wä'än tsëtyu'unmëët twë'ëmta'atë ets wä'än tkä'äktë mëti'ipë myëtsip'ajtëpën yë Jerusalén kajpn.

Sofonías 2:8

Jëtu'un yë Wintsën të y'ënä'äny mëti'ipë maaytyääyëpën winë, mëti'ipë Tyios'ajtypyën yë Israel ja'ay: Tëës nmëtoy wi'ix yë Moab ja'ayëty nyëxi'ik tyukxi'iktën ets wi'ix yë Amón ja'ayëty ëxëëkjaty kyajpxtën. Yë'ëjëty tëëjës yë nnaax nkajpn t'ojtë tya'axtë ets të tpëjkëtë nyaax kyam. Ëjts jëtu'unës yam n'ëna'any ets njuukyajtënës ntukajpxpejtyp ko yë Moab ja'ayëty jëtu'un jyata'antë tä yë Sodomë kajpnën ets Amón ja'ayëty tä yë Gomorra kajpnën; äpny nëjkx jam yoontä'äky ets kaanjoty y'awinpitëty, ni pën jam kyatsëënëty, tukwa'ats nëjkx y'awinpity. Yë nnaax nkajpnës yë'ë nëjkx myä'tsta'ajëtë ets jatëkok tpaatëty yë nyaax kyajpn.

Habacuc 2:16

Jëtu'un tä jeexyë mëj'äämpy mnaxyën, ni'ikyë nëjkx wintsëtyu'un jëjptsëtyu'un mjajnë, jä'ä ko yë Wintsën jëtu'un mtuna'anyë tä jeexyë tii ta'am myajtuk'uukyën ets ënät mwinma'any tyëkoyëty ets niwa'ats ëxwa'ats mjëtijnëty, jëtu'unts ja mmëj'ajt m'oyajtën nëjkx jaamteeny naaxteeny jyajnë.

Nahúm 1:8

E ko pën yajjoot'anpëkyë jëtu'un ëxëëk y'ëti'itsy y'ënä'äny tä mëj nëëkomën; yë myëtsip jëtu'unyë tyajkukootsëja'any.

Miqueas 7:10

Y'ixäämpy näjyëtu'un yë nmëtsipës ets tsëtyu'unmëët wyë'ëma'any. Jëtu'unës ijty xy'ënëëmë: ¿Maa ja mWintsën, mëti'ipë mTios'ajtypyën?, e tyam n'ijxypyës ko jëtu'un jyajnë tä mo'onts yajtukteenyën tu'ujoty.

Miqueas 4:11

Tyam tëë may yë naax kajpn mnitu'ukmukëty ets myajnipëtë'ëka'any, jëtu'un y'ëna'antë: Tsojk Jerusalén kajpn n'ijxëmë wi'ix ëxëëk jyäty kyëpetyën.

Ezequiel 35:5

Mijts xëmë mëtsip të mnäyajnaxyë ma Israel ja'ayëtyën ets jää të xynyipëtë'ëky ma ënety jam yajtëytyuntën, ma ja pyoky tkumëtowtën.

Ezequiel 29:6

Tëkokyë yë Egiptë ja'ayëty nëjkxëp tnijawëtë ko ëjts Wintsën. Ojts yë Israel kajpn jam yë näypyutëkë tja'ixta'ay ma mijtsën, mijts tsajpkäpnyën mnäpyëjktakë:

Lamentaciones 1:21

Njamëtoowtëp yë ja'ayës koos n'ëjy ntu'uky, je'eyëp ko ni pënës xykyaniminy mëti'ipës xyajjotkujkta'akëpën. Nyija'awëtyääytyëp yë nmëtsipës koos o'ktëy njaty nkëpety ets nmëtsipës je'eyë xyoontä'äky ko tnijawë'aty mijtsës xytyuunp. Yajmin ja xëëw po'o mëti'ipë të xynyikäjpxyën ets wä'än näjyëtu'un tjatë tkëpätë tä njaty nkëpetyën.

Jeremias 2:3

Israel wa'ats ijty yajpaaty ma ëjtsën, jëtu'unës ijty njawë tä ni'ik oypyë npëjktä'äkyënës. Ko ijty pën wi'ix tyunyë, pojënës ntukumëtoy ja pyoky mëti'ipë ëxaty tuunëpën ets ntuknikexyës ja ëyo'on jotmay. Ëjts Wintsën, ëjts ënaanp.

Isaías 54:17

Je'eyëp ko ka'ap ni pën myäyë tyajkojëty ja tujn pujxn mëti'ipë jeexyë mijts myaj'atëkooyëpën. Aak amonyë nëjkx ja'ay xyajwë'ëmta'ay mëti'ipë ënety mni'ë'ënëyëpën. Nyajmëtäkpyës ja ja'ay mëti'ipës oy xymyëtuunpën. Jëtu'un ja Wintsën y'ënä'äny.

Isaías 54:15

Ko pën mnipëtë'ëkëtëty, ka'ap ënety y'ëjtsëty të ntuknipëjktaakë, mijts nëjkx mmëtä'äky.

Zacarías 14:2

Jä'ä xëëw yë Wintsën tyajmuka'any may yë naax kajpn ets tnipëtë'ëktëty yë Jerusalén kajpn. Ets nëjkx ja Jerusalén kajpn tyajtëkoytyë ets tpëjkëtya'atëty tiijaty myëët'ajtypyën, nëjkxëp ëxëëk tuntë ja to'oxytyëjkëtëjk ets kujkwä'kxynyäxy nëjkx tyajnëjkxtë tsumy matsy ja ja'ay. Niwäänë nëjkx jyaak wë'ëmtë ja'ayëty kajpnjoty.

Zacarías 1:14

ets ja tsajpjotmëtë kukäjpxy xytyuknipëjkyës ets nimëtya'akëtyës ja aaw ayuk: Jëtu'un yë Wintsën y'ënä'äny, mëti'ipë maaytyääyëpën winë: Ëjts nëkooyës ntsojknë nja'awënë yë Jerusalén kajpn ets Sión kopk.

Jeremias 50:28

Ja'ay mëti'ipë jam Babilonyë të kyä'äktën tëë yaa myintë Sión ets të tnimëtya'aktë wi'ix yë Wintsën Tëyajtën ëxëëk të tunyën yë Babilonyë kajpn, mëët ko ëxëëk tuuny yë tsajptëjk yaapë yajpaatyën.

Jeremias 25:12

Ko ënety kyä'pxy tëkë'px majk jëmëjt, jääjës yë Babilonyë yajkutujkpë yë nyaax kyajpn mpatëkëjanë yë tyëko'oyën, yë Caldeo ja'ayëty wa'atsës mpaye'eyä'äny yë nyëë pyoky ets nëjkxëpës xëmëkyëjxm nyajkutëkoy. Ëjts Wintsën, ëjts ënaanp.

Jeremias 12:14

Jëtu'un yë Wintsën të tnikäjpxy jyata'any yë naax kajpn mëti'ipë ëxëëk ëtëtsp ënaanpën, mëti'ipë myëwinkon'ajtëpën yë Israel kajpn, mëti'ipë të tyajma'ta'atën ja naax kam mëti'ipë yë Wintsën myooyën yë Israel kajpn: Ëjts njëpëkäämpyës tääpë naax kajpn naaxwiinypë ets nyajpëtsëma'anyës yë Judá ma yë'ëjëtyën.

Jeremias 8:16

Tää ja mëtsip myiny. Jëtu'un të yajmëtoy'äty ko kwaaykyijxy myintë atë'kx ajajp jam ma Dan y'itjotmën. Ko y'ajëjtë, yu'kxp yë naaxwiinyëtë. Yë'ë yajkutëkoyantëp yë naax kajpn ets tëkokyë jënu'un jap winë yajpaatyën, ja naax kajpn ets mëti'ipë jap juuky'ajtëpën.

Jeremias 30:15

¿Wi'ix ko m'ëjy mtu'uky ko të mtsëtyuty? Yë mtsëtyut ka'ap tsyo'oka'any. Mëët ko je'eyë të mtuuntëkoy të mkajpxtëkoy ets nëë poky të xytyuny të xykyäjpxy, paaty jëtu'un nyajjaty.

Deuteronomio 30:7

Yë Wintsën mëti'ipë miits mTiosajtëpën tyajkëtä'äky ja jotmay ma mmëtsipëtyën jëtu'un tä të yajnikäjpxyën ets mëti'ipë ënety të m'ëxëëk'ixëtën ets të m'ixjëtit të mpajëtitëtën.

1 Samuel 17:53

Ko tpapooytyääytyë ja filistejë ja'ayëty, ënät ja Israel ja'ayëty wyimpijtë jam ma ënety të y'itën ja filistejë ja'ayëty ets winë tpëjktaaytyë mëti'ipë ënety jëtu'unyë të tnikäkta'atën.

Proverbios 22:23

jä'ä ko Dios yë'ë kuwanëp yë ëyoopëja'ay ets ëxëëk tuna'any ja mëti'ipë ënety ja ëyoopëja'ay ëxëëk tyuunpyën.

Lamentaciones 1:22

Wä'än jam ma mijtsën tja'ajta'ay ja y'ëxëëktu'unënëty; näjyëtu'un xytyukkumëtowëty yë nyëë pyokyëty tääjës yë njä'ä të xytyukkumëtoyënës, jä'ä ko nëkooyës njëëynyë nyaxnë; pëjkëp yë njuukyjotës.

Zacarías 1:15

Paatyës të ntukjoot'anpëky tääpë naax kajpn mëti'ipë ka'ap tii tmaytyën tajtën, mëti'ipë ojts ni'ikyë ja jotmay t'ixkukëtën maas ënety ëjts të njoot'anpëkyën.

Zacarías 2:12

Nëjkxëp ja Wintsën jatëkok tjä'äpëky yë Judá kajpn ets nëjkx wa'ats tyajnaxy yë Jerusalén kajpn, mëti'ipë të twin'ixyën.