Isaías 57:15 - Biblia Dc en Mixe de Quetzaltepec

¹⁵ Yë Wintsën këjxmëpë yajpaatyën, mëti'ipë winë xëëw winë jëmëjt juukyajtpën, ets jä'ä txëëwaty Wa'ats, jëtu'un y'ënä'äny: Këjxmës nyajpaaty ets jamës nyajpaaty ma kyënu'kxyëtyën, yajpatpës näjyëtu'un ma ja'ayën mëti'ipë yu'unk naxym juukyajtpën ets mëti'ipë jëëpy yaxpën, täätsës nyajjotkujktä'äky ets njotmëkmo'oy.

Biblia Mixe de Quetzaltepec

¹⁵ Yë Wintsën këjxmëpë yajpaatyën, mëti'ipë winë xëëw winë jëmëjt juukyajtpën, ets jä'ä txëëwaty Wa'ats, jëtu'un y'ënä'äny: Këjxmës nyajpaaty ets jamës nyajpaaty ma kyënu'kxyëtyën, yajpatpës näjyëtu'un ma ja'ayën mëti'ipë yu'unk naxym juukyajtpën ets mëti'ipë jëëpy yaxpën, täätsës nyajjotkujktä'äky ets njotmëkmo'oy.

Isaías 57:15 ပူးပေါင်းရင်းမြစ်များ

Génesis 21:33

Jam ma ja nëëjut txëëwatyën Beerseba, jam ojts tu'uk kepy tkojy yë Abraham, najëtu'untëkë kyëxë'ëky tä tamarintë kepyën. Jamts ojts yë Wintsën tmëkäjpxy mëti'ipë ijtëëpën winë xëëw winë jëmëjt.

1 Reyes 8:27

Je'eyëp ko ¿Wä'än jëtää tyiyëty ko yë Wintsën jyëkyejpy jyuuky'atëty naaxwiiny naaxkëjxyë? Ix yë tsajp, ix jënu'un myëjëty ets ka'ap myäyë nyikojta'ajëtëty. E ya'atë tsajptëjk mëti'ipës yam të nkojyën tim yi'inëm yë'ë.

2 Crónicas 34:27

ets ko tëë xyjyotmaypyiky ja aaw ayuk mëti'ipë të xymyëtoyën mëti'ipë ënety tunan jatanëpën ma mijtsën ets ma ya'atë naax kajpnën ets mëët ko tëë xyjyotmayjyawë ets të mjë'ëy të myä'äxy; ëjts nän tyamës n'ijxkuk nja'akyukë tëkokyë ya'atë. Jëtu'unës ëjts n'ëna'any, mëti'ipë Wintsën'ajtpën.

Job 22:29

Jä'ä ko yë Dios nyaaxkutij nyaaxkumajtsëp mëti'ipë amëj akëjxm näjya'awëyëpën ets yajtsokpy mëti'ipë yu'unk naxym yajpatpën.

Job 6:10

Oy jeexyë jënu'un yë pëjkën ijxën xytyimtëytyuunpës. Ëjts je'eyëmës jotkujk näjyawëja'anyë, jä'ä ko xëmës yë Wintsën wa'atspë të npatuunë y'ënä'ämën tyiyajtën.

Salmos 111:9

Ojts yë nyaax kyajpn tyaj'ëwaatsëpëtsëmy ma ënety yajpaatyën pokyjyotm ets ojts ja kyäjpxytyu'unën tnikäjpxy mëti'ipë ojts tyajwë'ëmyën ets y'itëty xëmëkyëjxm. Dios wa'ats yë'ë ets kutsë'ëkë.

Salmos 115:3

Yë Dios jam yajpaaty tsajpjotm; yë'ë winë të tyajkojy të tpëjktä'äky ijxtëm yë'ë të tsojkën'atyën.

Salmos 123:1

Ma mijtsën Wintsën jamës nkëx'ixy mëët tu'uk yë nnu'kxtakën ma mijtsën mëti'ipë ënä'ämpën jam tsajpjotm.

Salmos 138:6

Oyxyëp yë Wintsën jam y'ëkyajpaaty këjxm, yë'ë wa'ats t'ixy tuny mëti'ipë ja'ay yu'unk naxym juukyajtpën, ets nän jëkämpaat t'ixy tuny yë ja'ay mëti'ipë amëj akëjxm ja'ay'ajtpën.

Salmos 138:7

Koos muum nyajpaaty o'këntum, mijts kë'ëm mpëjk'ijtyp mmajts'ijtyp yë njuukyajtënës. Pojën yë mmëkajtën xyajkëtä'äky maas yë nmëtsiptëjkën ets jëtu'unës xyajtso'oky.

Salmos 147:3

Yë'ë yajtsokpy mëti'ipë jya'apën yë y'aaw jyot amo'ots tukmo'otsë ets tnipijt tnimojtsë ja tsyëtyut.

Salmos 34:18

Yë Wintsën winkon yajpaaty ma ja'ayëtyën mëti'ipë jya'awëtëpën yë jyot wyinma'any ama'ats tukma'atsë ets ka'apë tii t'ëkjëjp'ijxnëtën.

Salmos 34:19

Yë ja'ay mëti'ipë oy juukyajtpën kanaakpëky yë ëxëëkpë tmënaxy tyajnaxy, e yë Wintsën yë'ë putëjkëyëp ma tëkokyë ëxëëkpën.

Salmos 51:17

Yë'ë Dios wyintsë'kën'ajtyp jot ja'awën yu'unkpë naxymyëpë, Mijts Dios, ka'ap xy'ixtijy yë jot ja'awën mëti'ipë näjya'awëyëpën piw nuuk.

Salmos 51:19

Jäänëm xy'ëxajëty ja wintsë'kën mëti'ipë myajmoopyën, tä yë jëyujk tsajpkaajën, jëëntë'ëtspë; jäänëm myajtukwintsë'ëkëty ja tsajpkaa ayääkë ma mwintsë'këntyaknën.

Salmos 83:18

Jëtu'un nijawëtëty ko mijts tu'ukyë mWintsën'ajtp, ko mijts tu'ukyë Ni'ik Këjxmëpë ma tëkokyë yë naaxwiinyëtë y'ëwtityën.

Salmos 90:2

Tyimtso'ontäky jëtu'un ma ënety ka'ap ja tun kopk kyojynyëmën, ets ma ënety ka'ap ja naaxwiinyëtë jyää'atynyëmën, ko jyeky'äjty ets tyampaat mijts jëtu'un mTios'ajtp.

Salmos 93:2

Wintsën, yë mkutujktakn tëëyëp yë ta'tspëky yajpaaty ets tyampaat je'eyëm y'ity. Mijts Wintsën winë xëëw winë jëmëjt myajpaaty.

Salmos 97:9

jä'ä ko mijts Wintsën këjxmëpë, mijts tëkokyë m'ijxtääpy mtuuntääpy yë naaxwiinyëtë ets jaakwäänë këjxm mijts myajpaaty këtiinëm jyëtu'unëty wiinkëtypë tios.

Salmos 99:3

Wä'än tyajwin'ëy tyajwinyä'äxy yë xyëëw, jä'ä ko yë'ë mëj'äämpy y'ity ets kutsë'ëkë; Dios, wa'ats yë'ë.

Éxodo 15:11

Wintsën; nimëti'ipë tios mijts mkamëpaatëtëty. Nimëti'ipë tios winë tëyajtën tkatuny, tä mijts winë tëyajtën xytyunyën. Mijts mëj këjää winë xytyuny ets atsë'ëk ajawë. Mijts mpatëp myajmëjjaw myajjaantyjyawëty.

Éxodo 15:13

Yë'ë mëët yë mtsojkën mja'awën ya'atë naax kajpn xytyu'uwinwoy mëti'ipë të xyajtso'okyën. Yë'ë mëët yë mëk'ajtën jam xyajnëjkxy jam ma mtsajptëjkën.

Éxodo 15:18

Yë Dios yë'ë jëtu'un ënä'ämp yajkutujkp winë xëëw winë jëmëjt.

Éxodo 40:34

ënät ja yoots nëma'a ojts tyajnituky ja wit tëjk ma ja näpyaatë y'ityën mëët ja Dios ets tyajtuktujktaay mëët ja myëj'ajt y'oyajtën.

Éxodo 40:35

Jëtu'un'äämpy ojts ka'ap t'ëkjëkyäjpnë ja Moisés jap tyëkëty ma ja wit tëjkën ma ja näpyaatë y'ityën, jä'ä ko ja yoots nëma'a jä'ä ënety jam të nyäkyo'ktaayënë tëjknëkëjxm ets ja Dios ja myëj'ajt y'oyajtën yë'ë ënety të tyajtuktujkta'ay ja tëkot.

Proverbios 16:19

Jaakni'ik y'oyëty ko yë ja'ay nyäpyëjktä'äkyë yu'unk naxym, jëtu'un tä yë ëyoopëja'ayën; ets këtiinëm ko kumeeny y'awinpitëty mëët ja ja'ayëty mëti'ipë je'eyë nämyëjja'awëtëpën.

Proverbios 8:23

Tëëyëpës xyajkojnë, më''ëka'any ma ënety ka'ap ja naaxwiinyëtë kyojynyëmën.

Isaías 18:4

Ëjts jëtu'unës yë Wintsën të xy'ënëëmë: Ëjts wa'atsës n'ixy ntuny winë jam maas nyajpaatyën, jëtu'un tä jëënën ko pyotm'aty, jëtu'un tä myaanikyën ko xyëkopk'aty, ma ja pëjktä'äky pyëti'ikyën.

Isaías 33:5

Yë Wintsën myëët'ajtyp ja mëj'ajtën jä'ä ko jam tsajpkëjxm jyuuky'äty; yë'ë Sión kajpn të tyaj'utsy mëët ja mëtëypyë nipaye'eyën ets ja tëyajtën.

Isaías 40:28

¿Tii këtii ënety xynyijawë? ¿Këtii të xymyëtoyë? Yë Wintsën, yë'ë Dios xëmëpë y'ijtëyën, mëti'ipë yajkojën yë naaxwiinyëtë, ka'ap nijëna'a y'ënu'kxë ets myëjaawkëxy; yë wyijy'ajtën xëmëkyëjxm yë y'ity.

Isaías 52:13

Ja ntuunpës oy ja tyuunk wyimpëtsëma'any; mëj'äämpy y'ita'any ets kumay nyaxa'any.

Isaías 6:1

Jä'ä jëmëjt ma ja yajkutujkpë Ozías y'o'kyën, jääjës ojts yë Wintsën n'ixy kuma'ayjoty; jamtëm y'u'unyë ma ja yajkutujktaknën. Jam këjxm ets janty'oy janty tsuj jam, ja wyit janty yonytyëm, jä'ä wa'ats të tyajnitujkta'ay ja tsajptëjk.

Isaías 6:3

Ets xim yam nyäy'ëna'anëtë: Wa'ats, wa'ats, wa'ats ja Wintsën mëti'ipë maaytyääyëpën winë; ujts ja naaxwiinyëtë yajpaaty mëët ja myëj'ajt y'oyajtën.

Isaías 63:15

Ix Wintsën, ma myajpaatyën jam tsajpjotm, jam ma kënu'kxy mëjjawë m'ityën. ¿Maa ënät tyam ja mtsojkën mja'awën ets ja mjot mmëjaaw? ¿Maa ënät tyam ja mjot mja'awën? ¿Ëkë wä'än të kyixyë ja mpa'ëyo'ow mnajts'ëyo'owënë?

Jeremias 10:10

Yë Wintsën yë'ë Tios'ajtp mëtëy, yë Dios mëti'ipë juukyën, mëti'ipë xëmë yajkutujkpën. Ko jyoot'anpëky, yu'kxp yë naaxwiinyëtë; yë naax kajpn pojyën yu'kxpëky.

Lamentaciones 3:41

Tsojk Wintsën tsajpjotmëpë nmënu'kxtakëmë.

Ezequiel 16:63

Ko xyjyä'äymyätsëty mëk nëjkx mtsëtyuny ets ëxëëkëm nëjkx mnäjyawëty, ka'ap xy'ëknimëtya'akanëty ja mtuuntëko'oy mkajpxtëko'oyën ko ënety të nmä'äkxta'ayës ja mpoky. Ëjts Wintsën, ëjts ënaanp.

Ezequiel 9:4

ets të t'ënëëmë: Tukjëtijtëtya'a yë Jerusalén kajpn ets xypyëjkta'akëty tu'uk yë ijxpäjn ma wyimpokëtyën yë ja'ayëty mëti'ipë moontëp tujktëpën ko ja ja'ay ëxëëk y'ëtë'ëtstë y'ëna'antë jap kajpnjoty.

Daniel 2:11

Mëti'ipë yë yajkutujkpë y'amëtoopyën tsip ets pën tnikajpxëty, yë'ë tëy yë tiostëjkëty mayëtëp yë'ë; je'eyëp ko yë tiosëty ka'ap yajpaatë ma naaxwiinyëtë ja'ayën.

Daniel 4:17

Ya'atë tëytyu'unën të yajnikäjpxy, mëti'ipë yë anklëstëjk këwent'ajtpë të t'awitstën ets tëkokyë naaxwiinyëtë ja'ay nijawëtëty ko yë Dios Ni'ik Këjxmëpë myëët yë mëk'ajtën ma naaxwiinyëtë ja'ay kyutujktaknëtyën, myoopy yë kuttujkën yë ja'ay mëti'ipë tyuk'më'a'ijxëpën ets yajwintsën'ajtyp ja ja'ay yu'unkpë naxymyëpë ma ja naax kajpnën.

Daniel 4:34

Ko ojts ja kyäjpxy ja xëëw jëmëjt jënu'un ënety të yaj'awitsyën ja tëytyu'unën, ëjts Nabucodonosor ojts mpa'at'ixy tsajpkëjxm etsës näjya'awëypyätë ko tëëtëmës ntso'oky; ënät ojts ja Dios Ni'ik mëti'ipë xëmë juukyajtpën, ojts nmëjjaw njaanty jawës ets nkukajpxës mëët ya'atë aaw ayuk: Yë myëj'ajtën xëmë y'itëty; yë kyutujkën xëmë yajpaatëty najts'ook najtskä'äxë.

Joel 2:13

Niwinpitë yë mWintsën Tyiosëty ets m'aaw mjot këëtstë jëtu'un tä jeexyë mwit xykyëëtstën. Jä'ä ko yë Wintsën yu'unk naxym yë y'aaw jyot ets pa'ëyoop najts'ëyo'owëp, mä'kxtujkp ets tsojkp ja'ap, xëmë jyëjp'ixy jëna'a n'ënëma'ayëmë ets këtii tyiytyunëty.

Miqueas 5:2

E mijts Belén, mëti'ipë näjyëtu'un yajtijpën Efrata, mutskpë kyajpn'atyën ma Judá kyajpnën, jam tu'uk ënä'ämpë pyëtsëma'any mëti'ipë nëjkx yajkutukyën Israel, yë'ë jyä'äy yë tëëyëpë jyuuky'atën.

Miqueas 6:8

Tëë yë Wintsën m'ënë'ëmxëty mijts naaxwiinyëtë ja'ay, mëti'ipë oyën ets tii y'ëwxijtypyën jeexyë xytyuny: oy winë xypyaye'eyëty, mëtëy mja'ay'atëty ets mwinkutsë'ëkëp, yu'unk naxym ja Dios xymyëtunëty.

Zacarías 2:13

Wä'än ni'ëmukë ja'ay t'ëmoonta'atë yë'ë wyintuuy, jä'ä ko yë'ë jam të tsyoony ma y'ijtaknën wa'atspë ets të xynyimi'inëmë yaa ëëts'ajtëmë.

Zacarías 9:9

Xoonta'ak mëjwiin këjää mijts Sión kajpn. Akujk jotkujk m'ëwëty mya'axëty, mijts Jerusalén kajpn. Jä'ä ko tää mniminyë mëti'ipë mkutujkpë'atäämpyën, oypyë jyä'äy'ätyën ets mëti'ipë xëmë mëtakpën; je'eyëp ko yu'unk naxym myiny, krukts tyuk'ënyääpy, kyërukts këjxy myiny, yë'ë krukts mëti'ipë nän krukts të yajmëxu'unk'atyën.

Mateo 6:9

Jëtu'un ja Dios xymyëkajpxtëty: Tatë Dios tsajpjotmëpë m'ityën, wintsë'ëkë ja mxëëw y'itëty.

Lucas 1:49

Yë'ë ko ja Dios mëti'ipë maaytyääyëpën winë mëj këjää ja mëyajtën të tuny maas ëjtsën. Wa'ats ets kënu'kxy yë xyëëw nyaxëty.

Lucas 4:18

Ja Dios ja Jyot jya'awën ëjts nmëët'ajtëp, etsës të xypyëjktä'äky ma ja ëyoopëja'ayën etsës ntuk'ëwaanëtëty ja oy aaw oy ayuk, tëëjës xykyexy etsës n'ëwaanëty wi'ix tu'ukyë y'itëty mëti'ipë ijtëpën ijxtëm ja ja'ay pujxn tëkotypyën, ets y'ijxë'ëktëty ja kupi'its kukootspë, ets y'ëwaatsëpëtsëmtëty mëti'ipë yajtëytyuun yajtsaatsytyuuntëpën.

Hechos 3:14

Miitsëty yë'ë ojts xyajnitukëtë ja wa'ats ja'ay mëti'ipë ka'ap tii poky tmëëtëtyën ets xyaj'ëwaatsëpëtsëëmtë ja yaja'ay'o'kpë.

Romanos 1:20

jä'ä ko ja Dios ja jyä'ä mëti'ipë ka'ap yaj'ixyën, pën yajmëmääpy yajmëtajp mëti'ipë yë'ë të tunyën. E mëtëy jëtu'un, jä'ä ko maju'unëm ja naaxwiinyëtë kyojyën, yë'ë të yajtuk'ijxy ko yë'ë Tyiosëty ets ko ja myëk'ajtën ka'ap kyukëxë. Paaty ka'ap ja ëxëëkja'aytyëjkëty yajpokymyä'kxantë.

2 Corintios 1:4

Yë'ë xyjyotmëkmo'oyëm ko nyajpatmëty ëyo'onjoty ets jëtu'un nyajjotkujk'ajtmëty näjyëtu'un mëti'ipë ëyoowtëpën ijxtëm ja Dios Teety të xyajjotkujk'ajtëmën.

2 Corintios 2:7

Mëti'ipë tëy tyam mtuntëp, nimä'kxtë ets putëkëtë, ko nëjkx ja ma'ayën tajën tkamëmëtä'äky.

2 Corintios 7:6

E ja Dios mëti'ipë yajjotkujk'ajtypyën ja mon tukpë yajpaatyën, tëëjës xyajjotkujkta'aktë ko të jyä'ty ja Tito.

Deuteronomio 33:27

Yë Tiosën xëmëpë y'ityën yë'ë mtsoktakn'ajtyp, yë myëk'ajtën yë'ë mnätyukputëkëtëp. Jä'ä ko yë'ë ojts tyajke'eky tyajputy yë mmëtsip, ets mnëmaayë ets xytyimyajkutëkooytya'ajëty.

1 Timoteo 1:17

Mëjjaw jaantyjawë ja Dios y'itëty, yë'ë tu'ukyë Tios'ajtp, mëti'ipë xëmëkyëjxm ijtpën, mëti'ipë ka'ap y'ookyën ets ka'ap yaj'ixyën. Oy jyëtu'un'atëty.

1 Timoteo 6:16

Yë'ë tu'kpajk ka'ap ja o'kën të myëmëtä'äkyë mëti'ipë juukyajtpën të'kxëntyuuy ets ka'ap tjëkyepy pën myëwinkonëtëty. Ni pën të kya'ixyë ets ka'ap tjëkyepy pën y'ixëtëty. Yë'ë xëmëkyëjxm jyä'ä'ajtyp ja mëj'ajt oyajtën ets ja kuttujkën. Oy jyëtu'un'atëty.

Hebreos 9:14

Pën jëtu'un, ni'ik ja Kristë ja nye'pyny. Jä'ä ko mëët ja Kënu'kxymyëkajtën xëmëkyëjxmëpë y'ityën, ojts ja Kristë nyäkyë'ëyäkyë ets wyintsë'kën'atëty ma Tiosën wa'ats pëk, ets ja nye'pny yë'ë yajwatsyp ja njoot'ajt nwinma'any'ajtëmë oy ënety të njatu'unëmë mëti'ipë yaj'o'kpën, ets jëtu'un npatmëty ja juukyajtën.

Santiago 4:6

Ets ka'ap yi'iyëty ya'atë, wäänëni'ik ja Dios ja mëyajtën tuny ma ëëtsajtëmën ets xypyutëjkëmë, paaty ja Dios ja y'aaw y'ayuk këxja'aypyë y'ënä'äny: Dios tyukjoot'anpëjkpy ja ja'ay mëti'ipë mëj këjxm nnäyjya'awëyëpën ets pyutëjkëp mëti'ipë yujy tëtä'äky ja'ay'ajtpën.

1 Pedro 5:5

Näyjyëtu'un miits ëna'ktëjkëty, mëmëtowtëp ja mëjja'aytyëjk ja y'ënä'ämën tyiyajtënëty. Nixim niyam mëpaat yu'unk naxym mnämyëmëtowëtë. Jä'ä ko yë Dios ka'ap t'oyjyawë mëti'ipë nämyëjja'aw näjyääntyjya'awëyëpën, yë'ë pyutëjkëp mëti'ipë yu'unk naxym ja'ay'ajtëpën.

Apocalipsis 15:4

¿Pën jëtää mkatsë'ëkëtëp, Wintsën, pën jëtää mkamëjjawëtëp mkajaantyjyawëtëp? Mijts tu'uk mwa'ats. Mmëjja'aw mjantyjya'awëyëp ni'ëmukë yë naaxwiinyëtë ja'ay, jä'äkyëjxm ko mtëyajtën xyaj'ixyë.

Apocalipsis 3:7

Nnijayë yë tsajpjotmëtë kukäjpxy jampë yajpaatyën Filadelfia: Jëtu'un y'ënä'äny mëti'ipë wa'atsën, mëtëyën, mëti'ipë myëët'ajtypyën ja David ja y'ëwatsn; ka'apë pën mëpaat tyaj'ëtukyën mëti'ipë yë'ë yaj'ëwatsypyën ets mëti'ipë yë'ë yaj'ëtujkpyën ka'ap mëpaat pën tyaj'ëwa'atsy:

Apocalipsis 4:8

Aak tëtujk ja kyäkn tmëët'atë nitu'ukjaty. Nëkëjxy'tsyow ets käkn pa'tkë'ppaat ja wyiin tmëët'atë. Xëëny koots ja Dios tja'amyätstë ets y'ëna'antë: Wa'ats, wa'ats, wa'ats ja Wintsën, Dios Mëti'ipë Maaytyääyëpën Winë; tëëpë y'ityën, mëti'ipë tää'ajtpën ets mëti'ipë itaanpën.

1 Samuel 2:2

Ni pën jëtu'un kyawa'atsëty tä mijtsën Wintsën. Ni pën jëtu'un kyakëwent'aty, tä mijtsën, Dios mëti'ipës n'ëwtajtëpën, ka'ap ma wiinkpë jëtu'unpë tä mijtsën.