Isaías 22:12 - Biblia Dc en Mixe de Quetzaltepec

¹² Jä'ä xëëw yë Wintsën mëti'ipë maaytyääyëpën winë, m'ënëmaayëtë ets mjë'ëtëty mya'axtëty, ets mwaay xykyääptëty ets xytyuktëkëtëty ja wit mëti'ipë kuumpën u'kxpën.

Biblia Mixe de Quetzaltepec

¹² Jä'ä xëëw yë Wintsën mëti'ipë maaytyääyëpën winë, m'ënëmaayëtë ets mjë'ëtëty mya'axtëty, ets mwaay xykyääptëty ets xytyuktëkëtëty ja wit mëti'ipë kuumpën u'kxpën.

Isaías 22:12 ပူးပေါင်းရင်းမြစ်များ

2 Crónicas 35:25

Ojts yë Jeremías tu'uk yë ëy tyuknijayëty ko y'oky tyëkooy. Mëti'ipë tyampaat je'eyëm y'ëëwtëpën ko pën y'ooky mëti'ipë tyukja'amyäjtstëpën ja Josías. Ya'atë ëy xëmë t'ëwtë yë Israel ja'ayëty ets aak myëët'ajtëp yë ja'ayëty ma y'iynyokyëtyën.

Esdras 9:3

Ko jëtu'un nmëtooyës ënät ja nwit ntukë'tsëyës ets ja nwiinwaay n'aawaay nka'ptaayës, mëët ko jëtu'un nmëtoowpatyës, janty tim pëjkë'k ntimy ja'awëyës ja njot nini'kxës, jëtu'unyës ntimy wyä'tskëtäky mëët ja monyëtukyë.

Nehemías 9:9

Mijts wa'ats xy'ijxy xynyija'awëy wi'ix ënety jap Egiptë y'ëyowtën ëëts ja n'ap n'okëty ets mnija'awëy näjyëtu'un ko jyiiytyë yaxtë jam nëë'ëkë'ëm ma yajtijyën Tsapts nëëpë'am.

Job 1:20

Ënet ja Job pyëti'ky ets tkë'tstëëy ja wyit, jä'ä mëk jya'ap ko ënety jëtu'un të tyuny të jyätyë, ojts ja wyääy kyopk tkä'pta'ay ets tmënu'kxtäky ja Wintsën.

Eclesiastés 3:11

Yë Wintsën aak nyixëëw nyijëmëjt ojts tukpata'ay ets oy winë kyëxë'ëkëty ets aak oyëty t'oytyuuny; ojts näjyëtu'un yë naaxwiinyëtë ja'ay tyajkojy mëët yë jyot wyinma'any ka'apë kyixy tyukyën, oy yë naaxwiinyëtë ja'ay tkaja'aykyujkëtyä'äy wi'ix'äämpy myëjwiin kyëjääjëtyën mëti'ipë Dios të tuny të tkäjpxyën ets mëti'ipënëm tyunäämpy kyajpxäämpyën.

Eclesiastés 3:4

Nyixëëw nyijëmëjt pyätyp ko jyi'iy yä'äxy ets ko pën xyi'iky y'ëwë'ëky. Ko pën o'kpë tnimony tnituky ets ko pën xyëëwtuny.

Isaías 15:2

Jëëpy yaxp yë Dibón ja'ay jam nyëjkxtë kopkëjxm ma yajpaatyën ja tsyajptëjkëty. Yajxon yë Moab tmëmony tmëtuky ko yë Nebo ets Medebá të kyutëkoy. Tu'kë'ëyë ja naaxwiinyëtë ja'ayëty tëë ja wyinwaay y'awaay tjäjpta'atë.

Isaías 26:10

Mijts oy jënu'un xypya'ëyowëty yë ëxëëkja'aytyëjk, yë'ëjëty ka'ap nijëna'a oypyë tja'akyukëtëty; yë'ëjëty ëxëëk yë jyot wyinma'any tyaj'ixëtë ma nyaaxjotmën yë oyjyä'äytyëjkëty ets ka'ap nijënu'un myäytyë tyajtë ets tmëjjaw tkënu'kxyjyawëtëty yë Wintsën.

Isaías 29:1

Janty mon janty tuk yajpaaty yë Ariel kajpn, ja kajpn ma ojts tëkok ja David pyo'kxyën. Ja kajpn ma ja xëëw, winjëmëjt tyunyën,

Isaías 3:24

Je'eyë nëjkx tyokxu'knëtë ijxtëm jeexyë pya'akxuuktën, tejpxy nëjkx yajtukyo'ktsumtë tä jeexyë pyo'owëën yajkëxpëktën, ni'ikyë nëjkx wyääy yajnëkä'pta'atë ijxtëm jeexyë yenyjyäty tmëët'atën; tä jeexyë oywyit tuktëkëtën, këëts wit nëjkx tyajtuntë, tä jeexyë yaj'oytyuntën, anpujxn nëjkx yajtuktsa'atë.

Isaías 32:11

Mëti'ipë tyam ka'ap tii xymyëmay xymyëtajtën, je'eyë nëjkx mtsëyuytyë; miitsëty mëti'ipë tyam akujk jotkujk mnäjya'awëtëpën, mëët'atë ja amay jotmay, ijxpëktë ja mjemywyitëty, yë'ë këëtspë tuktëkëtë mëti'ipë kuumpën u'kxpën, mmontë tuktë jë'ëtë ya'axtë.

Isaías 37:1

Ko ja yajkutujkpë Ezequías tmëtoowpaty jëtu'unpë ja ayuk, ojts tkë'ëtswä'kxy ja wyit ets nyätyukxojxë ja wit mëti'ipë kuumpën u'kxpën mëët ko ëxëëk nyäjyawëty ets ojts nyijkxy ma ja Wintsën ja tsyajptëjkën.

Isaías 37:2

Tä tkejxy ja Eliaquim mëti'ipë wiinkëëpy kujkëëpyën ma ja kutujkëntëjkën, ja Sebná mëti'ipë kujääpyën ets ja teetytyëjkëty, mëjja'aytyëjkëty ojts ja wyit tuktëjkëtya'atë mëti'ipë kuumpën u'kxpën mëët ja amay jotmay ets ojts ninëjkxtë ja käjpxynyajxpë Jeséas, yë Amós yë myaank,

Isaías 58:3

ets ënät jatëkok kyajpxwinpitë ets y'ëna'antë: ¿Tii ko n'ayuu'ajtmëty pën ka'ap ja Wintsën t'ixy? ¿Tii ko ni'ikyë nnäyaj'ëyo'owëmëty pën ka'ap tii tmëjpëjktä'äky? Ma m'ayuu'atën jää miitsëty mtooktë myaktë ets jää mtuunpë wäänë mëk xyajtuntë.

Jeremias 16:6

Mëj mutsk nëjkx ja'ay y'ooktë ma ya'atë naax kajpnën; ka'ap pën tyajnaaxtëkëja'any ja o'kpë ets ka'ap nëjkx pën ja o'kpë tniyä'äxy ets ka'ap ma pën nyäyajtsëtyuta'anyë ëkë ja wyääy tkääpa'any mëët ko ënety ja o'kpë tnimony tnituky.

Jeremias 16:8

Këtii mtëkëty ma jëën tëjkën ma ja'ay kyäytyën y'uuktën, këtii nëjkx jap mkääpyë m'ukpë,

Jeremias 4:8

Paaty miitsëty, tuktëkëtë ja mwit mëti'ipë kuumpën u'kxpën ets jë'ëtë ya'axtë tä jeexyë mpëkëtën, jä'ä ko yë Wintsën yë y'äkë ka'ap tu'ukyë të xytyim'ëxmajtsëmë.

Jeremias 7:29

Miitsëty Jerusalén ja'ayëty, nëkä'pta'atë yë mkuwaayëty ets xy'ixpotstëty. Ëw tu'uk yë ëy mon tukpë jam tunkëjxm të'ëts'itjotm, jä'ä ko yë Wintsën tëë tukjoot'anpëky yë mja'ay, tëë tnike'eky ets tëë t'ëxmatsy.

Ezequiel 27:31

Mëët ko ënety o'ktëy mjaty mkëpety nëjkxëp nyäkyutë'kxn kä'pta'ajëtë, nëjkxëp tuktëkëtë wit tujkxy monpë tukpë ets nëjkx jyë'ëtë ya'axtë mëët ja pëjkën ato'onën.

Daniel 5:1

Ënet yë Belsasar tnipëjktakëy tu'uk ja ka'ayën ukën ets twoomujktaay yë wintsëntëjk mëj'äämpyëtypë y'itën mëti'ipë jamëtyën Babilonyë; yajxon ojts kom y'uknëtë ma ja ka'ayën ukën y'ijtyën.

Oseas 9:1

Israel, këtii mxoontä'äky; këtii mnëputy myujkputy tä wiinkëtypë kajpnëtyën, jä'ä ko mijts jëtu'un të m'ëtë'ëtsy tä tu'uk yë to'oxytyëjkën mëti'ipë yë jyot nyini'kx tyo'kpy yäjkpyën ko të xy'ëxmatsy ja mTios. Ma pyajk'atyën yë tsajpmok jää xyjyëjp'ixy myajmëjuyëty ko xytyooky xyäky yë mjot mnini'kx.

Joel 1:13

Miitsëty teetytyëjkëty, mëti'ipë wintsë'kën myajktëpën ma wintsë'këntyaknën, tuktëkëtë mwitëty mëti'ipë kuumpën u'kxpën ets mjë'ëtëty mya'axtëty mëët ja pëjkën ato'onën, jä'ä ko jap ma tsajptëjkën ka'ap jap tiinë yë tsajpmok ets tsatym nyëë mëti'ipë wintsë'kën'ajtpën.

Joel 1:8

Tä tu'uk yë to'oxy'ëna'k jyi'iy yä'äxyën mëti'ipë pëkaanpën ko tëë y'ooky ja naaxwiinyëtë ja'ay mëti'ipë ënety mëët të jyapëka'anyën,

Joel 2:12

E tyam jëtu'un yë Wintsën y'ënä'äny: ëjts niwinpijtëk winë aaw winëjot. Ëyuu'atë, ya'axtë joktë ets jë'ëtë ya'axtë.

Joel 2:17

Wä'än yë teetyëjk tjë'ëtë tya'axtë, mëti'ipë jap tsajptëkoty tuuntëpën, mëti'ipë yajpatëpën itkujky ma ja wintsë'këntyaknën ets ma ja tëjkëtyaknën, wä'än t'ëna'antë: Mä'kx, Wintsën yë mnaax mkajpn; këtii xyajkutukëty ets mnaax mkajpn pën tyukxi'ikëtëty; këtii xy'ëwa'atsëty ets wiinkëtypë naax kajpn myëmëta'akëtëty ets y'ëna'antë mëti'ipë ka'ap yë Wintsën t'ëwtatën: ¿Maa ënät ja Tyiosëty?

Amós 8:10

Ma ënety ja xëëw tyunyën jää nëjkx ja'ay tyëkëtë yaxpë mëët ko ënety t'ixtë may ja ja'ay y'o'knëtë, ja mëti'ipë ënety ëëwtëpën nän nëjkxëp tyëjkënëtë yaxpë mëët ko ënety may ja o'kpë; nëjkxëp ja wit xytyuktëkëtë monpë tukpë ets nëjkxëp ja mkuwaay xynyëkääptë mëët ko ënety ja ëyo'on jotmay të y'ity. Jëtu'un nëjkx mya'axtë tä ja'ay yä'äxyën mëti'ipë ja y'u'unk të y'ookyën tu'kpajkpë t'u'unk'atyën ets jëtu'un nëjkx jyëjpkukëxë mëët ja monyëtukyë.

Jonás 3:6

Ko ja Nínive yajkutujkpë tnija'awëy ojts ënätyë tsyoony ma ja kyutujktaknën ets nyätyuknijääntutë ja wyit mëti'ipë myë''ëne'emypyën ets tuktëjkëy ja wit mëti'ipë kuumpën u'kxpën ets nyaaxwe'tsy naaxkëjxy.

Miqueas 1:16

E mijts Sión kajpn, nëkä'pta'a yë mkuwaay ets xyaj'ixëtëty ko ëxëëk mjaty mkëpety, mëët ko të m'ëxëëktunyë yë m'u'unk m'ëna'k mëkpë xytsyokyën. Jëtu'un mnäkyukääpëtëty tä majkwejkxyën, jä'ä ko yë m'u'unk m'ëna'k wiink naax wiink kajpn tsumy matsy yajmënëjkxa'antë.

Santiago 5:1

Mëtowtë miits, kumeenyjyä'äyëty. Mëjë'ë mëya'axtë ja m'ëyo'on mjotmayëty mëti'ipë mpaatantëpën.