Isaías 1:29 - Biblia Dc en Mixe de Quetzaltepec

²⁹ Nëjkxëp xytyuktsëtyuntë tääpë xoj kepy, tääpë pëjykyam mëti'ipë m'oy ijxtëpën, ma xywyintsë'ëkëtën ja tsaa ets kepy ëkë oynatii.

Biblia Mixe de Quetzaltepec

²⁹ Nëjkxëp xytyuktsëtyuntë tääpë xoj kepy, tääpë pëjykyam mëti'ipë m'oy ijxtëpën, ma xywyintsë'ëkëtën ja tsaa ets kepy ëkë oynatii.

Isaías 1:29 ပူးပေါင်းရင်းမြစ်များ

Isaías 66:17

Jëtu'un yë Wintsën y'ënä'äny: Mëti'ipë näyaj'ëmaay'ijtëpën ets näpyujëpën ko t'ëwtata'any ja wiink tios jampë pëjykyamjotm yajpaatyën, mëti'ipë pyaye'epyën ja tu'u itkujkpyë nyijkxyën, mëti'ipë tsyu'typyën ëtsëmtsu'utsy, tsuk tsu'utsy ets wiinkëtypë jëyujk ka'apë yajtsu'utyën, tu'ktonyë nëjkx kyutëkooytya'atë, jä'ä ko nija'apës wi'ix myäytyën tyajtën ets wi'ix tii tuntën.

Isaías 65:3

ja naax kajpn mëti'ipë ëjts nwintuuyës të xymyëtëkoyën; mëti'ipë ja wintsë'kën të tmo'oyën ja wiink tios jam muum aayjyotm ujtsjotm; ets të tukwintoy tukwinjoky ja poom ma ja wintsë'këntyaknën mëti'ipë muutsy pyotsyën;

Isaías 57:5

je'eyë xy'ixta'atë kepypya'tk mëjëtypë tääts jam m'ëtë'ëtstë m'ëna'antë tëkatsy, jap muum wokjoty m'u'unk mmëxu'unkpë xykyujëpijpnaxtë, jap muum tsaajutjoty xy'atijëtë.

Oseas 4:13

Jam muum tunkëjxm kopkëjxm jam nëjkx nyo'oktë xyamtë ets nëjkx tyaktë wyintsë'kën ets näjyëtu'un nyëjkxnë muum ma kepypya'tkën mëjpë, ma mëj xojën, ma mëj tsiinën. Paatykyëjxm yë mnëëxëty jyot nyini'kx të tooktë ets mxäkxyëty tëë tyajtëkoytyë pëjkën ukën wyintsë'kën.

Ezequiel 16:63

Ko xyjyä'äymyätsëty mëk nëjkx mtsëtyuny ets ëxëëkëm nëjkx mnäjyawëty, ka'ap xy'ëknimëtya'akanëty ja mtuuntëko'oy mkajpxtëko'oyën ko ënety të nmä'äkxta'ayës ja mpoky. Ëjts Wintsën, ëjts ënaanp.

Romanos 6:21

¿E tii jap të xypyaatë? Tyam je'eyë mtsëtyuunëtë ko jëtu'un të mjuuky'atë, jä'ä ko je'eyë ja o'kën të mtukpaatëtë.

Oseas 14:8

Ets Efraín nëjkx y'ënä'äny: ¿Tiijës nyajwa'anëty yë awinax? Kë'ëmës winë n'ixy ets kë'ëmës n'ijx'ity yë nnaax nkajpn. Jëtu'unës ëjts tä tu'uk yë tsiin kepyën xëmëpë tsyuxk'ityën, ma ëjtsën tpaata'any yë nnaax nkajpnës yë jyi'kxy pyiky.

Oseas 14:3

Yë Asiria ja'ayëty ka'ap tjëkyepy xyajtsokmëty ets ka'ap tjëkyepy kwaaykyijxy nkäkmëty. Ka'ap mëpaat n'ëkmëkäjxënë wintsën mëti'ipë kë'ëm nyajkojëmën, jämyë ma mijtsën Wintsën, jämyë yë ku'ooky u'unk tpaatë yë näpya'ëyow nänyajts'ëyowë.

Ezequiel 36:31

Ets ko xyjyä'ämyätstëty wi'ix ëxëëk të mjuuky'atën ets wi'ix winë ëxëëk të xytyuntën, kë'ëm nëjkx xytyëtyu'unjawëtë ja mnëëjëty mpokyëty ets ja ëxëëkpë ja mjuukyajtënëty.

Ezequiel 6:13

E ko ënety t'ixtë ja o'kpë ma ja y'awinaxëtyën ets ma ja wyintsë'këntyaknëtyën, jam tunkëjxm kopkkëjxm, ma ja tsaatunën, ma ja kepypya'tkën, ma ja xoj pa'tkën ets maajaty ja wiinkëtypë ja awinax të t'ëwtatën ets të tmo'otën yë wyintsë'kën, ënät nëjkx xy'ixkaptës ko ëjts Wintsënajtp.

Jeremias 3:6

Ma ënety yë Josías y'ëne'emyën, jääjës ojts yë Wintsën xymyëkäjpxy ets xy'ënëmaayës: ¿Tëë xy'ixy wi'ix yë Israel kajpn y'ëti'itsyën mëti'ipë käjpxy kyumëtoownajxpën? Yë'ë wiink tios të tpanëjkxtëkë jam muum ma kopkën, ma kepypya'tkën y'ëti'itsy y'ënä'äny, tä tu'uk to'oxytyëjkën xim yampë ye'etyëjk tmëët'atyën.

Jeremias 2:20

Tëëyëp xyajtso'ontä'äky maas je'eyë xykyäjpxykyumëtoownaxyën, maas ka'ap xymyëmëtoyën. Je'eyë m'ënany: Ëjts ka'apës tii ntuna'any. Jam muum kepypya'tkë'ëm, jam muum kopkëjxm, je'eyë ojts jam mpokytyuny, ko wiink tios xy'ëwtajty, jëtu'un tä to'oxytyëjk jyot nyini'kx tookyën ets kanaak yë ye'etyëjk tmëët'aty.

Isaías 45:16

Tëkokyë ja'ayëty mëti'ipë yajkojtëpën awinax, tsëtyu'unmëët nëjkx wyë'ëmtë, tukxi'iky ets o'ktëy nëjkx jyatë.

Isaías 31:7

Jä'ä ko jä'ä xëëw ma ënety miitsëty ka'ap xy'ëktsojknëtën ja m'awinaxëty mëti'ipë oytyunyën mëët yë pu'ts pujxn ets poop pujxn, mëti'ipë kë'ëm myajkojtën mëët ja mkë'ë m'aawëty mëti'ipë të tyuuntëkoyën.

Isaías 30:22

Nëjkxëp xy'ëxëëk'ijxnë ja m'awinax, ja mtsaapotsy ets mkepy tsyetsy mëti'ipë ja ja'ay y'oytyuuntëpën mëët yë poop pujxn ets pu'ts pujxn. Ëxëëk nëjkx xy'ijxnë ets pu'uxmën putsta'akën nëjkx xyajnajxnë.

Isaías 42:17

Mëti'ipë ja'ay awinax tyuk'ijxpäjtëpën ets mëti'ipë myëkajpxtëpën yë tsaatsetsy, kepy tsyetsy ets t'ënëëmëtë: Miits myaj'ëwtajtp, nitsëtyu'un kutsëtyu'un nëjkx kyäkta'atë.

Oseas 4:19

Jëtu'un wyimpapoja'antë tä joon wyimpapojyën ets nëjkxëp tjamëtsëtyuunëtë ko ënety wiink tios t'ëwtatë.