Hechos 14:22 - Biblia Dc en Mixe de Quetzaltepec

²² Ko ja Pablo ets Bernabé jyajtë ma tu'uktu'uk ja kajpnën, ojts tyajjotmëkpëktë mëti'ipë ënety ja Jesús të tmëpëktën ets tjotmëkwinkajpxëtë ets tu'ukyë myëpëktëty. Jëtu'un t'ënëmaaytyë: Ko nnëjkxa'anmëty ma ja Dios ja kyutujkënën, kopkpëky ko nku'ëyo'owëmëty.

Biblia Mixe de Quetzaltepec

²² Ko ja Pablo ets Bernabé jyajtë ma tu'uktu'uk ja kajpnën, ojts tyajjotmëkpëktë mëti'ipë ënäty ja Jesús të tmëpëktën ets tjotmëkwinkajpxëtë ets tu'ukyë myëpëktëty. Jëtu'un t'ënëmaaytyë: Ko nnëjkxa'anmëty ma ja Tios ja kyutujkënën, kopkpëky ko nku'ëyo'owëmëty.

Hechos 14:22 ပူးပေါင်းရင်းမြစ်များ

Isaías 35:3

Yajjotmëkpëktë ja pa'amja'ay, mëjaawmo'otë ja tëëpë y'ënu'kxëtën,

Mateo 10:38

Ka'apës xypyaat'aty n'ijxpëjkpë'atëty yë ja'ay mëti'ipë ka'ap ja wyinma'any mëk tpëjktä'äkyën ets y'ëyowëty ijxtëm tu'uk ja ja'ay jeexyë ja kyëruuts tpatsëmyën.

Mateo 16:24

Tääts ja Jesús t'ënëmaay ja y'ijxpëjkpëtëjk: Pën tsyojkpy etsës n'ijxpëjkpë'atëty, wä'än ja kyë'ëm winma'any tja'atyëkoy ets ja wyinma'any mëk tpëjkta'akëty ijxtëm tu'uk ja ja'ay kyëruuts tpatsëmyën ko ja y'o'kën t'anëjkxë, etsës xypyatsoonëty.

Mateo 19:24

Jëtu'un jatëkok n'ënëëmëtë, nikë tsojk tu'uk ja jëyujk jëku'ux nyaxëty xu'uny jutjoty këtiinëm ko tu'uk ja kumeenyjyä'äy tyëkëty ma Dios kyutujktaknën.

Marcos 10:30

wäänëni'ik t'ëxajëja'any winë tyam ma jyuuky'ätyën, pyatäämpy mëko'px'am ja tyëjk, y'uty, y'äjty, tsyë'ë, tyaak, y'u'unk y'ëna'k ets nyaax. Oy yajpajëtijta'aktëty, ok nëjkx jyuuky'äty xëmëkyëjxm ko ënety tpaaty ja nyixëëw nyijëmëjt.

Marcos 9:47

Ets pën yë mwiin myajpokytyuunëp, juut. Nikë oy ko wiintu'uk mtëkëty ma ja Dios ja kyutujkënën ets këtii ko mwiin mëët kä'pxy myajpëjkta'akëty ëyoowtaknjoty,

Lucas 24:26

Ko jëwyiin ja Jesús y'ëyowëty ets ok tpëkëty ja myëj'ajt y'oyajtën.

Juan 15:18

Ko miits mka'oy'ixëtëty ja mëti'ipë yajtuuntëpën ja naaxwiinyëtë winma'any, jëtu'un xynyijawëtëty koos ënety jëyëjp të xykya'oy'ixtë.

Juan 15:20

Ja'amyätstë ijxtëm të nëëmëtë: Ni pën tuunpë wyintsën tkawinaxy. Pën tëëjës xypyajëtijta'aktë, näjyëtu'un miits myajpajëtijta'aka'antë; ets pën tëëjës ëjts ja n'aaw n'ayuk xykyupëjkëtë, näjyëtu'un miits ja m'aaw m'ayuk yajkupëka'antë.

Juan 16:33

Ntuk'ëwa'anëtëp miits tyam ya'atë tu'kë'ëyë ets ja kijpxyajtën jyää'atëty ma miitsëtyën. M'ëyowantëp miits yaa naaxwiiny, je'eyëp ko amëk jotmëk myajpaatëty, ëjts tëëjës nmëmëtä'äky ja naaxwiinyëtë winma'any.

Juan 3:5

Ënet ja Jesús y'ëtsoowë: Tëy mijts t'ënëëmë, pën ka'ap myëxu'unk'aty mëët ja nëë ets ja Dios ja Myëjaaw myëk'ajtën, ka'ap tjëkyepy tyëkëty ma ja Dios ja kyutujktaknën.

Hechos 11:23

Ko jam jyä'äjty ja Bernabé ets t'ijxy wi'ix ja antioquiiëtë ja'ay ënety tëë ja Dios kyënu'kxëtën, ënät ojts jotkujk nyäjyawëty ets tjotmëkwinkajpxëy ets ëmuumtu'ukjot ja Wintsën tmëpëktëty.

Hechos 11:26

Ko tpaty, tää ojts twoy jam Antioquía. Jam ojts y'itë kä'pxy tu'kjëmëjt mëët ja mëpëjkpëtëjkëty ets ja ja'ay may tyaj'ijxpëjktë. Jam Antioquía ojts ja mëpëjkpëtëjk ëka'any yajtijtë Cristianë.

Hechos 11:29

Ënet ja mëpëjkpëtëjk tkäjpxy'ajtë ko ja myëku'uktëjk tuknikäxa'antë ja putëjkën mëti'ipë tsënaaytyëpën jam Judea; jëtu'un tyajktë winë ijxtëm pën myëtä'äkyën.

Hechos 13:43

Ko ye'eywya'kxnëtë tsajptëkotm, nimay ënety ja jutiis ja'ay jam ets näjyëtu'un ja ja'ayëty mëti'ipë ënety të tmëpëjknëtën ja jutiis ja'ay ja myëpëjkënëty, jä'ä pyanëjkxtë ja Pablo ets ja Bernabé. Ënet ja Pablo ets ja Bernabé ojts tkajpxwijtë ja ja'ayëty ets nyäyaj'itëtëty mëët ja Dios ja tsyojkën jya'awën.

Hechos 14:20

Ënet jam myujktë mëti'ipë ja Jesús myëpëjktëpën ma ja Pablo ënety jamën. Ets ja Pablo pyëti'ky ets wyimpijty jatëkok nän jam kajpnjotm, komjëpom ojts nyijkx Derbe mëët ja Bernabé.

Hechos 14:28

E ja Pablo mëët ja Bernabé wë'ëmtë jeky mëët ja mëpëjkpëtëjkëty.

Hechos 15:32

Dios kyäjpxynyajxpëtëjk ja Judas ets ja Silas, jä'ä ojts tjotmëkwinkajpxëtë ets tyajjotmëkpëjktë ja mëpëjkpëtëjkëty.

Hechos 15:41

jam nyëjkxtë Sirië ets Cilicia, tyajjotkujkta'aktë ja mëpëjkpëtëjk maajëty ye'eymyuktën.

Hechos 18:23

Jekyjawë jam pyoxy. Tääts ojts tsyoony jatëkok ets ojts t'aye'ey maajëty ënety të y'ëknajxpën, jam Galacia ets Frigia ets ni'ëmukë ja mëpëjkpë tjotmëkwinkajpxëy.

Hechos 6:7

Ja Dios ja y'aaw y'ayuk ni'ikyë ënety myëjwiinë kyëjääjë ets ja mëpëjkpëtëjkëty ni'ikyë myäyëtë jam Jerusalén, yë'ëpaat ja teetytyëjkëty ojts may myëpëjknëtë.

Hechos 9:16

Ntuk'ix ntuknijawëpës wi'ixës xykyu'ëyowëtyën.

Romanos 8:17

Ets ko yë'ë xy'u'unk'ajtëmë, näjyëtu'un ja Kristë mëët xypyaat'ajtëmë ja kuma'ayën mëti'ipë ja Dios të xytyukwinwa'anëmën, jä'ä ko tu'ukyë ja Kristë mëët nyajpatëmë ja myëj'ajt jyääntyajtën, jä'ä ko tu'ukyë mëët n'ëyo'owëmë ets jam nyajpatmëty ma myëj'ajt y'oyajtënën.

1 Corintios 1:8

Dios miits myaj'itëtëp tu'ukyë koonëm tpaatëty ja tiempo, ets këtiipë ënety mpokymyëët'atë ko wyimpitëty yë Wintsën Jesukristë.

Filipenses 1:29

Kristë mëët ja Dios të tuny ja mëyajtën ka'ap yi'iyëty ko xymyëpëktë ja Kristë, näjyëtu'un ko Kristëkyëjxm xymyënax xyajnaxtëty ja ëyo'on jotmay.

Colosenses 1:23

Je'eyëp ko mëk mëpaat myajpaatë ma mëpëktën, këtii xymyajtstu'utëty mëti'ipë të xymyëpëktën ets mëti'ipë të xymyëtowtën. Yë'ë jëtu'un ya'atë aaw ayuk mëti'ipë të yajkajpxwä'kxyën oy tyimmaajëty ma ja it naaxwiinyëtën, ëjts Pablo je'eyës të nputëkë ets të yajkäjpxywä'kxy.

1 Tesalonicenses 3:13

Wä'än yë Wintsën tu'ukyë tyaj'ity ja mjot mwinma'anyëty, wa'ats, ka'ap tii poky xymyëët'attëty Dios wyintum ko ënety myiny ja Wintsën Jesús mëët ni'ëmukë mëti'ipë jyä'ä'ajtypyën. Jëtu'un y'itëty.

2 Timoteo 1:8

Këtii mtsëtyunëty ko ja Jesukristë xynyikajpx xynyimëtya'akëty ets ëjts nän këtiis xytyuktsëtyunëty koos yap tsumy nku'itë ja Wintsën. Nikë yë'ë mmëmay mmëtaj ja mëk'ajtën mëti'ipë ja Dios mmooyëpën ets xymyëmëta'akëty ja ëyo'on jotmay mëti'ipë mpatypyën mëët ko ja oy'aaw oy'ayuk të xypyääty.

2 Timoteo 3:12

Tëyajtën yë'ë ko ni'ëmukë mëti'ipë ja ja'ay juuky'atantëpën oy ma Kristë Jesusën näjyëtu'un yaj'ixjëtita'an yajpajëtita'antë;

1 Pedro 2:21

Paaty ja Dios të mmëkajpxëtë, jä'ä ko tëë ja Kristë mku'ëyowëtë ets të najtstunë mëti'ipë miits xykyuuy'ixtëpën.

1 Pedro 5:10

E ko ënety të m'ëk'ëyowtë, ko wäänë ja tiempo nyaxëty, ënät ja Dios mpokymyä'kxa'anëtë ets jotmëk m'itëty ets mëtëy winë xytyuntëty. Yë'ë ja Dios mëti'ipë të xyaxtso'owëmën ets xëmëkyëjxm nyajpatmëty mëët ja Kristë.

1 Pedro 5:9

Winkuwa'akëtë mëk mëët ja mëpëjkën ja mëjku'u, mnija'awëtëp miits ko ja mmëku'uktëjkëty näjyëtu'un tmënax tyajnaxtë ja ëyo'on jotmay mëti'ipë ijtëpën yajpatëpën oymyaajëty.

2 Pedro 1:11

Jëtu'un akujk jotkujk mtëkëtëty ma ja Wintsën Jesukristë Yajnitsokpë kyutujktaknën ets jam m'itëty xëmëkyëjxm.

Judas 1:3

Mëku'uktëjkëty, janty jotkujkës näjyawëty ko miits ya'atë noky ntuknijayëtë, jä'ä ko yë'ëjës jap nnikäjpxy nimëtyäkpy ja nitsokën mëti'ipë nmëët'ajtëmën; e paaty ya'atë noky yam ntuknijayëtë ets nmënu'kxta'aktë ko tu'ukyë xyaj'itëty ja mëpëjkën mëti'ipë ja Dios të mo'ojëtën.

Apocalipsis 1:9

Ëjts Juan, miits yë mmëku'ukëty, ets koos tu'ukyë nyajpaaty mëët yë Jesús, xypaat'ajtpës mëët miitsëty ja Dios ja kyutujkën, ma n'ëyo'onpatëmën ets ma akujky jotkujk n'ijtëmën ets tu'ukyë jotmëk nyajpatmëty. Jä'äkyëjxm koos ja Dios ja y'aaw y'ayuk të nimëtyakë mëti'ipë ja Jesús ojts nimëtyä'äkyën, jamës ënety nyajpaaty Patmos, ma tu'kkëëyi'ikpyën ja naax jam mejyjyotm.

Apocalipsis 2:10

Këtii mtsë'ëkëty ko m'ëyowa'any, jä'ä ko ja mëjku'u tëë tuknipëjktaakë ko tsuma'an tmatsa'any ja mmëku'uktëjk ets t'ixa'any pën mëk mëpëktë; ets majk xëëw jëtu'un m'ëyowa'antë. Mëk m'itëty oy mtimy'ooktëty, ëjts mijts nmo'ojäämpy ja juukyajtën tä tu'uk ja kuma'ayënën.

Apocalipsis 7:14

Ets n'ëtsooyës: Wintsën, mijts mnija'ap. Ets xynyëmaayës: Yë'ë mëti'ipë mëj ëyo'on të tyajnaxtën ets të pyokywya'atstën mëët ja nye'pyny ja Kupixyny U'unk.