Hechos 12:23 - Biblia Dc en Mixe de Quetzaltepec

²³ Ënet ajotkumonë ojts ja Wintsën ja y'anklës yajpa'ampetyë, jä'ä ko ka'ap tmëjja'aw tjaantyja'awëy ja Dios. Ënet tyënë'këy ets y'o'ky.

Biblia Mixe de Quetzaltepec

²³ Ënät ajotkumonë ojts ja Wintsën ja y'anklës yajpa'ampetyë, jä'ä ko ka'ap tmëjja'aw tjaantyja'awëy ja Tios. Ënät tyënë'këy ets y'o'ky.

Hechos 12:23 ပူးပေါင်းရင်းမြစ်များ

2 Reyes 19:35

Jä'ä tsu'um ja Wintsën ja kyukäjpxy ojts tyaj'o'kta'ay ja Asiria ja'ayëty ma ënety jam jyajta'aktën, mëko'px ja tëkë'px mëkoxk mil ja Asiria tsyiptuunpëja'ayëty y'o'ktë, komjëpom may o'kpë ojts kyuxëënyë.

2 Crónicas 32:21

Ënet ja Wintsën tkexy ja kyukäjpxy ets tyaj'o'ktaay ja Asiria ja'ayëty ja wyintsëntëjkëty ets ja ja'ayëty mëti'ipë ënety tsip'ixyëtyën ets ja kopktëjkëty mëti'ipë ja myëku'ukëty tyu'uwinye'eytyëpën. Tä ja Senaquerib ojts wyimpijnë wintsëtyu'un jëjptsëtyu'un ma kyajpnën, jam jyäjty ma ja tsajptëjkën ma jap tmëët'atyën ja tyios, ka'apë Tiosëtyën, e wäänë y'ijty tä jäpyë kyë'ëm u'unk yaj'o'kë.

Job 19:26

Oyës jeexyë njot nini'kx jyatim nyëka'atääpyë wäänjaty, ëjts koonëmës yë Dios n'ixa'any wiinxë jëjpxë.

Job 7:5

Nitënë'k kutënë'kës yë njot nini'kxnë, aak putsp xii yaanë ets tëë tyukko'omëtyääynyë yë ni'akës.

Salmos 115:1

Wintsën, ja oyajtën ets ja mëj'ajtën mijts yë mpatëp, ets ka'ap y'ëëts'atë. Ja oyajtën ets ja mëj'ajtën mijts mpatëp mëët ko xymyëët'aty ja tsojkën ja'awën ets ja tëyajtën.

Éxodo 10:3

Moisés ets ja Aarón ojts jam nyëjkxtë ma ja yajkutujkpën ets t'ënëmaaytyë: Jëtu'un y'ënä'äny ja Wintsën mëti'ipë yë hebreo ja'ayëty Tyios'ajtëpën ¿jëna'a jëtää miitsëty yu'unk naxym m'ëk näpyëjkta'akëtëty maas ëjtsën? Ëxmajtskës yë nnaax nkajpn wä'änës min xy'ëwtaty.

Éxodo 12:12

Näy jä'ä tsu'umës ëjts njëtita'any jap Egiptë winjëën wintëjk etsës nyaj'o'kta'aja'any tëkokyë yë kä'äxkopktëjk maajaty yë jëën tëjkën. Näyjyëtu'unës nyaj'o'kta'aja'any tëkokyë yë jëyujkëty yë kyä'äxkopkëty etsës ntëytyuuntaja'any tëkokyë mëti'ipë tios'ajtëpën Egiptë. Ëjts, mëti'ipë Wintsën'ajtpën, ëjts ënaanp.

Éxodo 12:23

Ko ja Wintsën jam nyaxëty, mëti'ipë yajja'ay'o'kpën ma ja Egiptë kajpnën, ja ne'pny jä'ä y'ixëp mëti'ipë ënety jamën ma ja mtëjk'aawëtyën ets jëkäm mnanaxëtëty. Jëtu'un'äämpy ka'ap tjëkyäpëty wi'ix nyatëkëtyën ma ja mjëën mtëjkëtyën ets yajja'ay'ookëty.

Éxodo 12:29

Kujktsyu'um ënety, ko ja Dios tyaj'o'ktaay ja kä'äxkopktëjk jap Egiptë, ojts y'ooky ja mëj'ënä'ämpë ja myaank mëti'ipë ënety kä'äxkopkën, yë'ëpaat ojts y'ooktë ja myaankëty ja ja'ayëty mëti'ipë ënety jap tsumy ijtëpën ets näjyëtu'un ja jëyujkëty ja kyä'äxkopkëty ojts y'o'kta'atë.

Éxodo 9:17

E oy jyajëtu'unëty, mijts je'eyë yowë nëkoo mtimjäntykyujuun'o'knë, oy xyjya'ixy ko yë ëyo'on jyatuny jyajatyë.

Proverbios 12:8

Yë'ë muum yë ja'ay yajtuk'oyjya'ap ko wyijyëty kyujkëty; e yë ja'ay mëti'ipë winma'anytyukën, ixtijy ëxwa'any nyäxy.

Isaías 14:11

Yaa ja mmëjajtën mkëjxm'ajtën jyëjpkukëxë ets ja m'ëëpëty myaxpëty. Ja maapäjn tëë pyutstëkooynyë, ja mwit mëti'ipë mtukwinyä'pëpën ja maapäjn, tëë tyënë'këtyääynyë.

Isaías 37:23

¿Pën xyjyëjp'ixy të xynyëxi'iky të xytyukxi'iky? ¿Pën xyjyëjp'ixy wyintsë'kën të xyajtëkooyë ets mëj këjxm mnäyajnaxyë ma yë'ëjën? Yë'ë Dios, Wa'atspë yajpaatyën ma Israel kajpnën.

Isaías 51:8

jä'ä ko yë'ëjëty jëtu'un jyata'antë tä tukwit kyiitsyën, tä tukwit tyënë'kën. Ëjts ja nmëk'ajtënës xëmë y'ita'any, ets nitsokënës xëmëkyëjxm yajpaata'any.

Isaías 66:24

Ko myintëty, tääts nëjkx t'ixtë wi'ix ja ja'ay y'ooktën mëti'ipës të xykyäjpxy kyumëtoownaxtën. Nëjkxëp t'ixtë wi'ix ja o'kpë tyënë'kën ets ko ja tënë'k ka'ap y'ooktë; näjyëtu'un ja jëën ma ënety nyitoytyën ja o'kpë, ka'ap nyäkpyi'itsa'any. Ëxëëk nëjkx yaj'ixy naaxwiinyëtë apëtsëmy.

Ezequiel 28:2

Mijts ye'etyëjk, ënëëmë yë Tirë yajkutujkpë: Jëtu'un yë Wintsën y'ënä'äny: Tëë mjot mwinma'any y'uty mëët yë amëj'ajt akëjxmajtën, tä tiosën të mnäjyawëty, jam m'u'unyë ma y'u'unyëtën ja tiostëjkëty ets mejy'akujk të myajpaaty. Je'eyëp ko mijts ka'ap mtiosëty, mijts mnaaxwinyëtë ja'ay mëti'ipë jëtu'un määpy tajpën tä tiosën.

Ezequiel 28:9

¿Jëtu'un je'eyëm m'ëna'ana'any ko mijts mjëtu'unëty tä tu'uk tiosën ko ënety jam ma mëtsipën myajpatnë?. Ko ënety myajpatnë ma ja'ayëtyën mëti'ipë myaj'ookanëpën mijts nitii mëk'ajtën xykyamëët'ata'any ma mnaaxwinyëtë ja'ay'ätyën.

Hechos 12:22

Ënet ja mayjyä'äy tyëjkëtyë yaxpë jojkpë ets y'ënantë: Ya'atë kyäjpxyën ka'ap yë jyä'äyëty, tios yë'ë.

Hechos 5:19

Tu'uk ojts ja Wintsën ja y'anklës myiny ets ja pujxntëjk tyaj'ëwatsy ets pyëtsëëmtë. Tääts y'ënëmaayëtë:

2 Tesalonicenses 2:4

Ya'atë jëtu'un mëtsip'ajtp mëti'ipë y'ëxëëk'ijxypyën tëkokyë mëti'ipë Dios jyä'ä'ajtypyën ets mëti'ipë yajwintsë'ëkëjaanpën; yë'ë tsyojkpy ets yajmëjpëjkta'akëty këtiinëm ja wiinkpë. Jampaat jya'ta'any ma ja Dios ja myëj tsajptëjkën ets jap yajpaata'any nyätyija'anyë ko Tyiosëty.

1 Samuel 25:38

Kom majk xëëw tääts jatëkok ojts ja pa'am myätsyë ets y'o'ky.