Génesis 5:22 - Biblia Dc en Mixe de Quetzaltepec

²² Yë Henoc xëmë ojts jyuuky'äty ijxtëm ënety yë Dios tsokyën. Ko ënety jëtu'un yë Matusalén të myëxu'unk'aty yë Henoc, jä'ä ojts jyaakjuuky'äty tëkëëk mëko'px jëmëjt ets ojts jyaak mëxu'unk'atë y'u'unkëty y'ëna'këty ye'etyëjkpë ets to'oxytyëjkpë.

Biblia Mixe de Quetzaltepec

²² Yë Henoc xëmë ojts jyuuky'äty ijxtëm ënäty yë Tios tsokyën. Ko ënäty jëtu'un yë Matusalén të myëxu'unk'aty yë Henoc, jä'ä ojts jyaakjuuky'äty tëkëëk mëko'px jëmëjt ets ojts jyaak mëxu'unk'atë y'u'unkëty y'ëna'këty ye'etyëjkpë ets to'oxytyëjkpë.

Génesis 5:22 ပူးပေါင်းရင်းမြစ်များ

Génesis 17:1

Ko ënety yë Abram yë jyëmëjnë majkta'px majkmokx majktaxk, ënety yë Wintsën nyänyikëxë'kë ma yë'ëjën ets y'ënëmaayë: Ëjts jëtu'un Tios'ajtp. Ëjts nmëët'ajtypyës yë mëk'ajtën ets mjuuky'atëty wa'ats, m'itëty oy tsuj ëjts nwintum.

Génesis 24:40

Ënet ojts yë'ë xy'ëtsoyës: Ëjts Wintsënës yë nyë'ë tyu'u të npaye'eyë. Yë'ë kyäxäämpy yë tsajpjotmëtë kukäjpxy ma mijtsën ets oy wyimpëtsëm jyëjpëtsëmëty ma mnëjkxa'anyën. Ets xyajminëty tu'uk ja to'oxytyëjk mëti'ipë najëkäm yajjëëky'ajtp yajmëku'uk'ajtpën ets yë'ë mëët ja n'u'unkës nmaayës pyëkëty y'uukëty.

Génesis 48:15

Ënet ojts yë José yajkënu'kxy mëët ya'atë aaw ayuk: Yë Dios mëti'ipë ojts t'ëwtatën tmëmëtowtën yë Abraham ets Isaac, mëti'ipës nteetyajtën, Ja Dios mëti'ipës të xykyënu'kxyën xëmë, koos nmiiny naaxwiiny ets tyampaat.

Génesis 5:21

Henoc jä'ä ënety yë jyëmëjt tëkë'px mëkoxk, ko myëxu'unk'ajty yë y'u'unk myääy mëti'ipë xyëëwajtypyën Matusalén.

Génesis 5:23

Paaty yë Henoc jä'ä ojts kä'pxy jyuuky'äty tëkëëk mëko'px ja tëkë'px mëkoxk jëmëjt.

Génesis 5:24

Yë'ë jëtu'un ënety xëmë të jyuuky'äty ijxtëm yë Dios tsokyën, tu'kxëëw tu'kjëmëjt ojts jëtu'unyë tyëkooynyë. Jä'ä ko Dios ënety të yajnëjkxyë.

Génesis 6:9

Ya'atë jëtu'un nyimëtyä'äky'äjtyp yë Noé. Ko yë Noé jyuuky'äjty, jëtu'un ojts winë tuny ijxtëm ja Dios y'ëne'emyën. Yë'ë tu'uk ojts oy jyuuky'äty ma ja naaxwiinyëtë ja'ayëtyën.

1 Reyes 2:4

Jëtu'un ja Wintsën tyaj'atëwëty ja mëti'ipë të xytyukwinwanënës, ko y'ënäny: Pën ja n'u'unk n'ëna'kës oy ets mëtëy winë tuntë ma yë'ëjën, winë aaw winëjot ets tu'ukyë winma'any tu'ukyë winma'any, ka'ap nëjkx tyëkoy'äty pën ja kuttujkën wyinkuwa'akëpën ma ja Israel ja nyaax kyajpnën.

2 Reyes 20:3

Wintsën tyam mijts n'amëtoy npëjktsoy ets xyjyä'ämatsëtyës, xyjyä'ämyätsëty näjyëtu'un wi'ix mijts oy të nmëtunyën, tëë nmëmëtoy, tëëjës ntuny winë tä mijts xy'oy ixyën. Tääts tyëjkëy jëëpyë yaxpa.

Salmos 116:9

Ëjts nmëmëtoowäämpyës yë Wintsën yaa naaxwiiny ma ja'ayëty tsyëënëtën jyuuky'atën.

Salmos 128:1

Janty jotkujk mijts myajpaaty mëët ko ja Wintsën xytsyoky xyjyawë ets ko xymyëmëtoy.

Salmos 16:8

Yë Wintsën yë'ëjës xëmë ntukjotkujk'ajtyp; ko yajpaaty mëët ëjts maas n'a'oykyë'ëjën ni pënës xykyatsuu'ixëty.

Salmos 26:11

Yë njuukyajtënës ka'ap tii ëxëëkpë tmëëtëty. Yaj'ëwaatsëpëtsëëmkës ets pa'ëyoow najts'ëyo'owëkës.

Salmos 56:13

jä'ä ko mijts tëës xyajtso'oky jam o'kënjëjp'am, ets tëës xyajpëtsëmy maas ënety nka'ajanën etsës njuuky'atëty kutë'kxy kujajy ma Tiosën.

Salmos 86:11

Mijts Wintsën, tukni''ijxëkës yë mnë'ë mtu'u etsës yë'ë tu'ukyë npaye'eyëty. Mijts m'a'ixëp ets njot nwinma'anyës y'ëwa'atsëty, täätsës nmëjpëjkta'akëty yë mxëëw.

Éxodo 16:4

Ënet ja Dios t'ënëmaay ja Moisés: Ntuknikäxantëp yam yë ka'ayën ukën may'äämpy mëti'ipë tso'onpën tsajpjotm, winjopy yë ja'ay tpëjkmujkojtëty yë jyi'kxy pyikyëty, jëtu'un tä t'a'ixëtën naje'eyë nyipaatëty tu'kxëëw. Ëjts n'ixäämpyës pën jyänty kuuytyuuntëp jëtu'un tääjës yam nikäjpxyën.

Cantares 1:4

Yajjaamkojkës pojën. Japës yajnëjkxk mijts yajkutujkpë ma m'ityën mtsëënën. Mëët mijts jotkujkës nyajpaata'antë, yë'ëjës ni'ik n'oyjya'awëtyëp yë mwiin mjëjp këtiinëm yë tsatym nyëë. Paatyëmën to'oxytyëjk mtsokëtë.

Oseas 14:9

Mëti'ipë ja'ay wijyën ets këpetyën wyinja'ap ya'atë aaw ayuk: Mëti'ipë yë Wintsën tyu'u'ajtypyën tëy yë'ë, yë wa'ats ja'aytyëjkëty yë'ë jëtu'unpë pyanëjkxtëp; e yë pokyjä'äytyëjkëty ko jää jyaye'eya'antë pojën y'anäpëtë.

Amós 3:3

Pën nimäjtsk yë ja'ay tyu'uye'eytyë jä'äkyëjxm jyëtu'unëty jä'ä ko jëtu'un të tkäjpxy'atë;

Miqueas 4:5

Wiinkëtypë naax kajpn myëmëtoowtëp yë tyiosëty, e ëëtsajtëm yë'ë nmëmëtowa'anëmë yë Wintsën, mëti'ipë nTios'ajtëmën.

Miqueas 6:8

Tëë yë Wintsën m'ënë'ëmxëty mijts naaxwiinyëtë ja'ay, mëti'ipë oyën ets tii y'ëwxijtypyën jeexyë xytyuny: oy winë xypyaye'eyëty, mëtëy mja'ay'atëty ets mwinkutsë'ëkëp, yu'unk naxym ja Dios xymyëtunëty.

Malaquías 2:6

Yë Leví mëtëy ijty jyuuky'äty ets ka'ap nëkoo ëxëëkjaty kyäjpxy myëtyäky. Oy ijty jyuuky'äty ëjts nwintuuyës ets may yë ja'ay tputëjkëy ets tyaj'oyëtëty yë jyuukyajtën.

Lucas 1:6

Nimäjtskëty oy ijty yë Dios tmëtuntë, pyatuuntëp ja Wintsën ja y'ënä'ämën ets ka'ap tii poky tmëët'atë.

Hechos 9:31

Jotkujk ja mëpëjkpëtëjk yajpaatë mëti'ipë tsënaaytyëpën jam Judea y'itjotm, Galilea ets Samaria. Wimpäjt'ëtëtstëp ja myëpëjkën, xëmë ja Wintsën twintsë'ëkëtë ets nyimayë'ëtë'ëtstë, näjyëtu'un ja Kënu'kxymyëkajtën ojts yajjotkujk'ätëtë.

Romanos 8:1

Paaty tyam ka'ap pën poky y'ëk'ijnë, mëti'ipë ja Kristë Jesús mëët tu'ukyë yajpaatyën,

1 Corintios 7:17

Oy jyawi'ix'ajtpë, jëtu'un njuuky'ajtëmë ijxtëm ja Wintsën ja tuunk nitu'ukjaty të xymyo'oyëmën; jëtu'un ijxtëm ënety ja Dios të xyaxtso'owëmën. Jëtu'unës nnëëmë ja mëpëjkpëtëjkëty ni'ëmukë.

2 Corintios 6:16

Ka'ap tjëkyepy tu'ukyë yajpaatëty yë Dios yë jyëën tyëjk mëët yë awinax. Jä'ä ko jëtu'un ja Juukpyë Dios xyajwa'anëmë tsyënaaytyaknën. Jëtu'un ijxtëm ja Dios y'ënä'änyën: Tsëënëjaanpës ets juuky'ataanpës ma yë'ëjëtyën, yë'ëjës xyWyintsën'attëp, ets yë'ëjës nja'ay'attëp.

Efesios 5:15

Paaty nëëmëtë niwijy nikejy winë xytyuntëty. Ka'ap jëtu'un mjuuky'atëty tä tsuuja'ayën, wijy kejy myajpaattëty.

Deuteronomio 13:4

Yi'iyë yë Wintsën mëti'ipë mTiosajtëpën tim panëjkxtëkëtë; tuntë ijxtëm ja y'ënä'ämën myinyën ets yi'iyë ja y'aaw y'ayuk mëtoow'ijtëtë. Yë'ë mka'ëxmatstëp ets jam xëmë mjot mwinma'any xypyëjkta'aktëty ma yë'ëjën.

Deuteronomio 28:9

Pën mtuumpy ijxtëm ja y'ënä'ämën tyiyajtën y'ënä'änyën ets mye'epy mnajxp ma ja nyëë tyu'ujën, yë mWintsën yë'ë tu'ukyë mjä'äpëkanëp jëtu'un tä të tnikäjpxyën.

Deuteronomio 5:33

Yë'ë ja në'ë tu'u panëjkxtë mëti'ipë ja Dios të mtukni''ixëtën ets jëtu'un jotkujk mjuuky'atëty jeky ma ja it naaxwiinyëtën mëti'ipë ja Wintsën të mmo'ojëtën ets xyjyä'ä'atëty.

Colosenses 1:10

Yë'ë miits ntukni'amëto'owëtëp ets mjuuky'attëty ijxtëm pyaat'atyën mëti'ipë myëpëjktëpën ja Wintsën; yë'ë mtuntëp mëti'ipë yë'ë tyukjotkëtäkpyën, mëti'ipë oy tsuj winpëtsëëmpën ets ja Dios oy xynyijawëtëty.

Colosenses 4:5

Oy mja'ay'atëty mëët ja ja'ay mëti'ipë ka'ap Kristë tmëpëktën. Yajtuunk'paatë ja xëëw.

1 Tesalonicenses 2:12

Tëë njotmëkwinkajpxëtë, tëë nyajjotkujk'atë ets tëë ntukmënu'kxta'aktë wi'ix mja'ay'atëty ijxtëm pyaat'atyën mëti'ipë jä'ä''ajtëtëpën ja Dios, mëti'ipë të myaxtsowëtë ma yajkutukyën ets ma ja myëj'ajt y'oyajtënën.

1 Tesalonicenses 4:1

Mëku'uktëjkëty, yë'ë miits ntuk'ënëmaaytyëp wi'ix mjuuky'attëty ijxtëm ja Dios tukjotkëtä'äkyën, ets tam jëtu'un xytyuntë. Tyam miits njaaktuknipëktë ets nmënu'kxta'aktë ma Wintsën Jesús yë xyëëwën ets jëtu'un mjuuky'atëty.

1 Juan 1:7

E ko njuuky'ajtmëty ma jyäjy tyi'kxyën, ënät nixim niyam ja winma'any tu'knax nmëët'ajtmëty ets ja Jesukristë ja jyot nye'pyny xyajwatsmëty.