Gálatas 4:14 - Biblia Dc en Mixe de Quetzaltepec

¹⁴ Oy ojts miits n'ëk'atsiptë yë'ëkyëjxm koos ënety npëkyë, kä'äp ojts xypyäxtës, ni'ikyë xykyupëjktës ijxtëm ja Dios ja y'anklësën, ëkë ijxtëm jeexyë ja Jesukristë kë'ëmën.

Biblia Mixe de Quetzaltepec

¹⁴ Oy ojts miits n'ëk'atsiptë yë'ëkyëjxm koos ënäty npëkyë, kä'äp ojts xypyäxtës, ni'ikyë xykyupëjktës ijxtëm ja Tios ja y'anklësën, ëkë ijxtëm jeexyë ja Jesukristë kë'ëmën.

Gálatas 4:14 ပူးပေါင်းရင်းမြစ်များ

2 Samuel 14:17

Ëjts Wintsën, akujk jotkujkës nwë'ëmy mëët koos të xyjyotmëk wiinkajpxë, mijts Wintsën tyamës n'ixy ko wa'ats xynyijawë mëti'ipë oy ka'oyën, jëtu'un tä jeexyë tu'uk Dios kukexyën. Yë Wintsën mkënu'kxëtëp.

2 Samuel 19:27

Yë'ë ojts xywyin'ëënyës, ma mijtsën mëj'ënä'ämpë. E mijts mëj'ënä'ämpë mëti'ipë jëtu'un tä tu'uk yë Wintsënën, yë'ë tun mëti'ipë m'ijxypyën ko myëtëyëty,

Job 12:5

Mëti'ipë ja'ay jotkujkën nyëxikpy tyukxikpy ja ja'ay mëti'ipë ka'ap jyotkujkëtyën, ka'ap tmëkjawë oy ni'ikyë tnajtstijë mëti'ipë jam tim këtawanëpën.

Salmos 119:141

Ëjts ëmaay amutskës nja'ay'äty ets ixtijy ëxwa'anyës n'ity; e yë m'aaw m'ayuk ka'apës nijëna'a nja'atyëkoy.

Eclesiastés 9:16

Ëjts jëtu'un n'ëna'any ko ni'ik mëpaat tsyowpaaty yë wijyajtën këtiinëm yë jotmëk'ajtën, oy yë oyoopë ja'ay wijypyë pën kyatunëtëty këwentë ets oy pën kyamëj'ixëtëty ets tkämëtoow'itëty yë y'aaw y'ayuk.

Zacarías 12:8

Ëjts Wintsën, nkuwa'anäämpyës yë Jerusalén ja'ayëty. Mëti'ipë ëmaay paki'ix yajpatëpën mëk nëjkx y'itë tä Davidjën ets David yë y'u'unk y'ok jëtu'un nëjkx yajpaatë Tiosën, jëtu'un tä yë Wintsën yë tsyajpjotmëtë kukäjpxyën mëti'ipë tu'uwinye'eyëtëpën.

Malaquías 2:7

Kopkpëky ko yë teetytyëjkëty jëtu'un mëpaat tyuntë ets ja'ay tuk'ëwaanëtëty wi'ixës mëpaat xy'ixy'atën ets ja'ayëty kopkpëky ko tyajtëwtëty yë teetytyëjkëty wi'ix mëpaat tnijawëtën ëjts yë n'ijxpëjkënës, jä'ä ko yë'ëjëty, yë'ë nyikajpx nyimëtyaktëp yë aaw ayuk mëti'ipë yë Wintsën, mëti'ipë maaytyääyëpën winë y'aaw'ajtyp y'ayuk'ajtypyën.

Mateo 10:40

Pën miits mkupëjkëtëp, nän xykyupëjkpës ënety ëjts; ets pën xykyupëjkpës, nän kyupëjkpy ënety mëti'ipës xykyäjxpën.

Mateo 18:5

Ets pën kyupëjkpy ëjtskyëjxm tu'uk ja pi'k ëna'k ijxtëm ya'atën, nän ëjts ënety xykyupëjkp.

Mateo 25:40

Ënet ja yajkutujkpë y'ëtsowa'any: Tëy miits n'ënëëmëtë, ko të xytyuntë tu'kë'ëyë ja oypyë ja tu'unën kajpxën ma ja'ayëtyën mëti'ipë ënety yajpatëpën ëmaay amutsk, ëjts jëtu'un të xymyëtuntë.

Lucas 10:16

Ënet ja Jesús t'ënëmaay ja y'ijxpëjkpëtëjk: Pën myëtoow'ijtëp mëti'ipë miits mnimëtyaktëpën, nän ëjts ënety xymyëtoow'ijtëp; pën kyamëtoow'ijtyp mëti'ipë ënety miits mnimëtyaktëpën, nän ëjts ënety xykyamëtoow'ijtp; pën xykyakupëjkpës, näjyëtu'un ja nteetyës ka'ap tkupëky mëti'ipës të xykyexyën.

Juan 13:20

Tëy miits nëëmëtë, pën kyupëjkpy mëti'ipës nkejxypyën, nän ëjts ënety xykyupëjkp; ets pën xykyupëjkpës, nän yë'ë ënety kyupëjkpy mëti'ipës xykyäjxpën.

1 Corintios 1:28

Dios tëë ja ja'ay twinwitsy mëti'ipë ka'ap yajtsoktën ets mëti'ipë ka'ap yajmëjjaw yajjaantyjyawëtën yaa naaxwiiny ets këtiipë yë'ë mëj'äämpy y'itëty mëti'ipë mëj këjxm näyajnajxëtëpën yaa naaxwiiny,

1 Corintios 4:10

Koos ja Kristë nmëpëktë, tsuuja'ayës nyajtijtë; nkukajpxëpës ja Kristë ko miits myajtijtë wijy kejy; ëëtsëty ka'apës njotmëk'atë, e miitsëty amëk jotmëk myajpaatë. Ka'apës ja'ay xytsyoktë, e miitsëty myajtsojktëp.

2 Corintios 5:20

Yë'ë të xytyuknipëjkëm ets ja Kristë nkutënä'ämyëty, ets jëtu'un tpaaty ijxtëm jeexyë miits mmënu'kxta'akëtën ja Dios, je'eyëp ko ëëts xyajkajpxtëp. Jëtu'un miits nmënu'kxta'aktë mëët ja Kristë ja xyëëw ets mnämyë'oypyëkëtëty mëët ja Dios.

Gálatas 3:26

Dios miits tyam ni'ëmukë m'u'unk'ajtënëtëp ko të xymyëpëktë ja Jesukristë,

Gálatas 3:28

Ka'ap ma y'ëktuunnë pën jutiis kajutiis, mëtuunpë ëkë kamëtuunpë, ye'etyëjk ëkë to'oxytyëjk, jä'ä ko tu'ukyë miitsëty ijxtëm ja ja'ay tu'ukpën, jä'äkyëjxm ko tu'ukyë mëët ja Kristë Jesús m'itë.

Gálatas 4:13

Ijxtëm xynyijawëtën, pa'amkyëjxmës ojts ëka'any nkajpxwä'kxy ja oy aaw oy ayuk ma miitsëtyën.

Gálatas 4:15

¿Wi'ix të mjatë ko tyam ka'ap jotkujk m'ëkyajpatnëtë? Tëëyëp ojts miits xypyutëkëtës, oy yë'ëpaatëty mwiin ojts xyajuuta'antë ets xyamo'ojantës ëjts ets jeexyë ntso'okyës.

1 Tesalonicenses 2:13

Paatykyëjxmës xëmë ja Dios nkukajpxëtë, jä'ä ko miits xymyëtowtë ja Dios ja y'aaw y'ayuk mëti'ipës nkajpxwa'kxtën. Jëtu'un ojts xy'ëxajëtë tä Dios yë'ë t'aaw t'ayukëtyën ets ka'ap jyëtu'unëty tä jeexyë nyaaxwiinyëtë ja'ay t'ayukëtyën. E mëtëy jëtu'un, Dios jyänty ayuk'ajtyp, ets jam wyinkëxë'ëky ma miitsëtyën ko mmëpëktë.

1 Tesalonicenses 4:8

Paaty n'ënëëmëtë, pën ya'atë ijxpëjkën kyamëjpëjktäkpy, ka'ap nyaaxwiinyëtë ja'ayëty tkamëjpëjktä'äky; Dios ënety kyamëjpëjktäkpy, mëti'ipë miits mmooyëtëpën ja Kënu'kxymyëkajtën.

Hebreos 13:2

Këtii xyjyä'ätyëkoytyëty ja oyjä'äyajtën; oyjyawëtë mëti'ipë ja'ajtëpën ma ja mjëën mtëjkëtyën; jä'ä ko jëtu'un jënaakën të tuntë, ka'ap tnijawëtë ko tsajpjotmëtë kukäjpxy të tyajjajta'aktë.