Éxodo 22:14 - Biblia Dc en Mixe de Quetzaltepec

¹⁴ Pën y'amëtoopy ënu'kxy tu'uk yë jëyujk ets y'o'kxëtëty, ëkë tsyëtyutëty wyintëkoyëty, ma jam ka'ap yë wyintsën y'ixyën. Ja ja'ay mëti'ipë ënety të jyëyujk'ënu'kxyën, nëjkxëp tnikëpäjtu'uty ja jëyujk ma ja wyintsënën ko ënety të tsyëtyuty të wyintëkoy.

Biblia Mixe de Quetzaltepec

¹⁴ Pën y'amëtoopy ënu'kxy tu'uk yë jëyujk ets y'o'kxëtëty, ëkë tsyëtyutëty wyintëkoyëty, ma jam ka'ap yë wyintsën y'ixyën. Ja ja'ay mëti'ipë ënäty të jyëyujk'ënu'kxyën, nëjkxëp tnikëpäjtu'uty ja jëyujk ma ja wyintsënën ko ënäty të tsyëtyuty të wyintëkoy.

Éxodo 22:14 ပူးပေါင်းရင်းမြစ်များ

Nehemías 5:4

wiinkpë y'ënä'äny ko may të nyu'kxnë jä'ä ko ja yajkutujkpë tjanty amëtoy ja ayajk ako'onën, may mëti'ipë tëë tnimeenykyo'onënyën ja nyaax kyajpn kyamtëjk. Tam wiinkpë mëti'ipë ënaanpën:

Salmos 37:21

Yë ëxëëk ja'ay je'eyë winë t'amëtoy nu'kxy ets ka'ap t'ëk këpäjnë, yë ja'ay mëti'ipë winma'any jyëkyejpyën pya'ëyoopy yë myëku'uk ets nyayäjkpy winë.

Éxodo 21:34

Ja mëti'ipë ënety nyiwintsën'ajtypyën ja nëëjut, yë'ë jëtu'un kyujuyëp ja jëyujk tsajpkaa ma ja nyiwintsënën, e ja jëyujk'ooky oy ja tmëwë'ëmëty.

Éxodo 22:11

Ja ja'ay mëti'ipë ënety jëtu'un të y'ëyo'onpaatyën, nëjkxëp tmëëtmëtyä'äky ja kujëyujk ets Dios tyukkajpxpätëp, ko ka'ap ënety wi'ix ja jëyujk të tuny, mëti'ipë ja myëku'uk tukmëët'ajtëpën. Ja mëti'ipë kujëyujk'ajtpën ja'akyukëp näjyëtu'un ets kyupëkëp tä ënety yaj'ënëëmën ets ja tu'ukpë ka'ap nitu'kjënu'un tkujuyëty.

Éxodo 22:13

Pën tääpë jëyujk ëwa'anjëyujk ënety të yaj'ookyë ets të tsyu'utsyë, ets ka'ap tkujuyä'äny ja jëyujk'ooky, yë'ë myënëjkxëp ja jëyujk tsu'tstuk jam ma ja kujëyujkën.

Éxodo 22:15

E pën jamts ja nyiwintsën y'ixyë, ko tsyëtyutëty wyintëkoyëty, yë'ë ka'ap nitu'kjënu'un tkujuyëty. Pën ja jëyujk je'eyë ënety të yaj'ënu'kxy, je'eyë nëjkx tmëjuy, mëët ko ënety të pyutëkëty.

Mateo 5:42

Pën tii m'amëtoowëp, mo'o; ets pën tii tsyojkpy ënu'kxy, tuk'ënu'kx.

Lucas 6:35

Mtsoktëp miits ja mmëtsip, tuntë ja oypyë, tuntë ja mëyajtën; tuk'ënu'kxtë winë mëku'uk ets këtii xyjyëjp'ixtëty ets jatëkok mooywyimpitëtëty. Jëtu'un miits mëj nëjkx myajkumaytyë ets nëjkx m'u'unk'atëtë ja Dios tsajpjotmëpë, jä'ä ko yë'ë oy Tyios'aty ma ja ja'ayëtyën mëti'ipë ka'ap tii tkukajpxën ets ëxëëkpë jyä'äy'ätyën.

Deuteronomio 15:2

Yë'ë yaj'antijp: Pën tëë tu'uk yë ja'ay tii yë jyiiky myëku'uk tuknu'kxtsoy, nyimä'kxëp oy ënety tka'ëkëpäjnë. Oy ënety ja jyiiky myëku'uk ëkë ja myëkunaax myëkukajpn mëj këjää myënu'kxy'ätyë, ka'ap tukëpätëty. Jä'ä ko tääpë jëmëjt jää mëpaat yë ja'ay yë myëku'uk yë nyu'kxy tnimä'kxë, mëët ko ja Wintsën jëtu'un yajmëjjawë.