Efesios 5:6 - Biblia Dc en Mixe de Quetzaltepec

⁶ Këtii pën mnätyukwin'ëënëtëty mëët ja aaw ayuk mëti'ipë ka'ap tyunyën; jä'ä ko yë'ëkyëjxm jëtu'un ja Dios ja tsyäätsy tyu'unën myina'any ma ja ja'ayëtyën mëti'ipë ka'ap të myëmëtoyën.

Biblia Mixe de Quetzaltepec

⁶ Këtii pën mnätyukwin'ëënëtëty mëët ja aaw ayuk mëti'ipë ka'ap tyunyën; jä'ä ko yë'ëkyëjxm jëtu'un ja Tios ja tsyäätsy tyu'unën myina'any ma ja ja'ayëtyën mëti'ipë ka'ap të myëmëtoyën.

Efesios 5:6 ပူးပေါင်းရင်းမြစ်များ

Romanos 1:18

Dios yajnikëxë'kpy ja tsyip y'äkë ko tyajtsoony jam tsajpjotm ja ëyo'on ets tëytyuny ja ëxëëkja'aytyëjk ko ka'ap oy tii tnipaye'eytyë, mëti'ipë tsumy matsy yaj'ijtëpën ja oyajtën ets ja tëyajtën ets këtiipë ja ja'ay tnijawëtëty.

Mateo 24:4

Ënet ja Jesús y'ëtsoowëtë: Näkyëwent'atëtë ets ka'ap pën mwin'ëënëtëty.

Colosenses 2:8

Näkyëwent'atëtë këtiipë mwin'ëënëtëty mëti'ipë yaj'ijxpëjktëpën tëkatsy ets je'eyë mwin'ëënëtë; jä'ä ko yë'ëjëty ka'ap ja wyinma'any jam tpëjkta'aktë ma ja Kristën, jam ja wyinma'any tpëjkta'aktë ma ja ja'ay ja jyot wyinma'anyëtyën ets ma ja mëti'ipë mëj këjxm ijtëpën naaxwiiny.

1 Juan 4:1

Mëku'uktëjkëty jënu'un miitsëty myajtsok myajjawëtën, këtii aak xymyëpëktëty mëti'ipë ënantëpën ko ja Dios yajkajpxëtë, jëwyiin xy'ixtëty xytyuntëty yajxon pën myëët'ajtëp ja Kënu'kxymyëkajtën ëkë pën ka'ap. Jä'ä ko tää may naaxwiiny yë win'ë'ëmpë mëti'ipë nëkoo nätyijëtëpën ko Dios tmëtuntë.

Colosenses 3:6

Jä'äkyëjxm ja Dios tkäxa'any ja ëyo'on ma ja ja'ayëtyën mëti'ipë ka'ap myëmëtoyën,

Marcos 13:5

Tääts ja Jesús y'ëtsooy: Näkyëwent'atëtë, ijxkëm pën mwin'ëënëtë.

Mateo 24:24

Jä'ä ko minantëp ja ja'ayëty mëti'ipë nëjkx nyätyijëtën Kristë ets mëti'ipë nätyijëtëpën Dios kyäjpxynyajxpë; nëjkxëp tyaj'ixëtë ja mëj'ajtën ets wi'ix kawi'ixëty nëjkx winë tuntë ets yë'ëpaat nëjkx yajwin'ëëntë mëti'ipë ënety ja Dios të twin'ixyën.

1 Pedro 2:8

Ets näjyëtu'un jatu'kpëky y'ënä'äny: Jëtu'un yë'ë ijxtëm tu'uk ja tsaajën ma ja ja'ay kyunäpëtën. Jam ja ja'ay kyunäpëtë mëti'ipë ka'ap tkupëktën ja Dios ja y'aaw y'ayuk; ets jëtu'un ëxëëk jyatë kyëpätë.

2 Tesalonicenses 2:3

Këtii myajwin'ëëntëty niwi'ix'äämpy, jä'ä ko jëyëjp ja Dios yajnipëtë'ëka'any, ja ja'ay mëti'ipë pokyën jä'ä jëtu'un ëtë'ëtsaanp.

Colosenses 2:4

Paaty miits ya'atë ntuk'ëwaanëtë ets ka'ap pën mwin'ëënëtëty mëët ja aaw ayuk mëti'ipë oy tsuj je'eyë yajmëtoopën.

Marcos 13:22

Jä'ä ko minantëp mëti'ipë nätyijanëtëp Kristë ets mëti'ipë nätyijanëtëp Dios käjpxynyajxpë, yaj'ixëtëp näjyëtu'un ja ijxpäjtën ets mëj'ajtën, ets yë'ëpaat yajwin'ëëna'any mëti'ipë ja Dios të wyin'ixyën.

Colosenses 2:18

Ka'ap mëpaat mtuk'ëxmatsëtë Kristë mëti'ipë nätyijëtëp yujy tëtä'äky ets mëti'ipë wyintsë'këtëp ja tsajpjotmëtë kukäjpxy; jä'ä ko yë'ëjëty yë'ë kyajpxtëp mëti'ipë ka'ap nijëna'a t'ixtën, yi'iyë nätyukmëjpëjktakëtëp ja wyinma'anyëty.

Salmos 78:31

ko ojts ja Dios tnajtsmatsë ja tsyip y'äkë ma yë'ëjëtyën, ets ojts tyaj'ooky ja ja'ay aakjä'ä mëti'ipë mëkëtyën, ojts tyaj'ooky ja ja'ayëty mëti'ipë ënety mëj'äämpy yajëkyäjptëpën ma ja Israel kajpnën.

Hebreos 3:19

Jëtu'unts nwinja'awëmëty ko paaty ka'ap tyëjkëtyë jä'ä ko ka'ap myëpëjktë.

Miqueas 3:5

Ja nnaax nkajpnës jä'ä pyaye'epy ja në'ë tu'u ka'apë myëtëyëtyën jä'ä ko yë'ë win'ë'ënëtëp yë käjpxynyajxpëtëjkëty, mëti'ipë tyukwinwa'anëtyëpën ja jotkujk'ajtën ko pën yajkayëtë ets tsyipwinkajpxëtyëp ko pën tii kyamo'ojëtë. Jëtu'un yë Wintsën t'ënëmaay tääpë käjpxynyajxpëtëjkëty:

Jeremias 29:31

Tuknikäx yë ayuk tëkokyë yë ja'ayëty mëti'ipë wiink naax wiink kajpn yajpatëpën tsumy matsy ets xy'ënëëmëty ko ëjts Wintsën, ëjts ënaanp: Mëët ko yë Semaías të m'ënë'ëmxëtë mëët ëjts nxëëwkyëjxmës ets ka'ap y'ëjtsëty të nkexy ets ko ka'ap y'ëjtsëty të nmo'oy ja ayuk mëti'ipë oy të xymyëtowtën ets ka'ap myëtëyëty,

2 Reyes 18:20

¿Ëkë jä'äjën m'ëna'any ko ja aaw ayuk oypyë yajmëtoyën näjyëtu'un yë tsyowpaaty tä ja jot winma'anyën mëti'ipë yajmëët'ajtpën ko ja jëën tsip yajniwinmayë? ¿Pën mtuk'ijxpejtyp ets ënät ka'ap mëj xy'ëk'ijxnëtyës?

Jeremias 27:9

Paaty n'ënëëmëtë këtii nëkoo xymyëpëjkëtëty yë y'aaw y'ayuk tääpë käjpxynyajxpëtëjkëty, najtsja'apëtëjkëty ets ja'ayëty mëti'ipë yajkuma'aynyiwijtëpën; yë'ëpaat mëti'ipë kajpxpojktëpën, mëti'ipë yajmëtoopën tii t'akajpxtën mëti'ipë tunan jatanëpën; mëti'ipë ënantëpën ets ka'ap mnäkyë'ëyakëtëty ma ja Babilonyë yajkutujkpën.

Jeremias 37:9

Ëjts mëti'ipë Wintsën'ajtpën, ëjts ënaanp: Këtii nëkoo mjot mwinma'any xyaj'ëna'antë ko yë Caldeo ja'ayëty tu'ukyë të nyëjkxtë, jä'ä ko ka'ap jyëtu'unëty.

Hebreos 13:9

Këtii myajwin'ëëntëty mëët ja wiinkëtypë ja ijxpëjkën ets mëti'ipë wiinktsow tso'onpën. Yë'ë ni'ik oy ko amëk jotmëk nyajpatmëty ma ja Dios ja tsyojkën jya'awënën ets këtii ko npatu'unmëty ja ënä'ämën mëti'ipë nyikäjpxypën wi'ix ja ka'ayën ukën mëpaat yajjë'kxy yajpëkyën; jä'ä ko tääpë ënä'ämën ka'ap nimaa tyuny.