Deuteronomio 6:5 - Biblia Dc en Mixe de Quetzaltepec

⁵ Tsok jawë yë Wintsën Dios winë aaw winëjot, mëët tu'kë'ëyë mjot mja'awën ets tu'kë'ëyë mjot mmëjaaw.

Biblia Mixe de Quetzaltepec

⁵ Tsok jawë yë Wintsën Tios winë aaw winëjot, mëët tu'kë'ëyë mjot mja'awën ets tu'kë'ëyë mjot mmëjaaw.

Deuteronomio 6:5 ပူးပေါင်းရင်းမြစ်များ

1 Reyes 3:3

Salomón tsyojkpy jya'ap ënety ja Wintsën ets tyuunpy tä ja David të ënety të tyuk'ëne'emyën, oy jam ja wyintsë'kën xëmë tyäky ma ja tun kopkën,

2 Reyes 23:25

Ka'ap ojts nitu'uk jëtu'unpë yajkutujkpë y'ëk'ijnë tä ja Josías ëmuumtu'ukjot jyotwinpijtyën ets ja Wintsën tmëtuuny winë aaw winëjot ets mëët tu'kë'ëyë ja jyot wyinma'any; jëtu'un tä ja tëyajtën myinyën kuja'ay mëti'ipë ja Moisés yajmooyën.

2 Crónicas 15:12

Ets ëmuumtu'ukjot tukkajpxpäjtë ja Wintsën ja xyëëw ets y'ënantë ko yë'ë xëmë tmëkajpxa'antë winë aaw winëjot, ja Wintsën mëti'ipë ja tyeety y'apëty y'ëwtajtën.

2 Crónicas 34:31

Ënet ja yajkutujkpë wya'akë'ky jam ma ja potsy'ëjxën ets y'ënäny ko tpatuna'any ja Wintsën ja y'ënä'ämën kyutujkën ets ko winë aaw winëjot tmëmëtowa'any ja Wintsën ja y'ënä'ämën tyiyajtën, y'aaw y'ayuk ets y'ëëwtë'ëw kyajpxtë'ëwën, mëti'ipë jap miinpën kuja'ay ma ja nokyën.

Salmos 119:2

Janty jotkujk yë ja'ay jyuuky'atë mëti'ipë jyä'äkyujkëtëpën ja Wintsën ja y'ënä'ämën tyiyajtën,

Salmos 31:24

Yajotkujk'atë yë mjot mwinma'anyëty miitsëty ninu'un yë Wintsën xytyuk'ijxpätën.

Mateo 10:37

Pën ja tyaak tyeety wäänëni'ik tsyojkpy këtiinëm ëjts, ka'ap pyaat'atyë etsës nja'ay'atëty; ets pën ja nyëëx ets ja myaank ni'ik tsyojkpy këtiinëm ëjts, ka'ap pyaat'atyë etsës nja'ay'atëty.

Mateo 22:37

Ets ja Jesús y'ëtsooy: Tsok ja Wintsën mëët tu'kë'ëyë ja mjot mja'awën, mjot mwinma'any ets mma'ayën mtajën.

Marcos 12:30

Tsok ja Wintsën mëët tu'kë'ëyë mja'awën, mëët tu'kë'ëyë mjot mwinma'any ets mëët tu'kë'ëyë ja mmëkajtën. Ya'atë ni'ik kopkpëky.

Marcos 12:33

Ets ko ja Dios tu'ukyë ntsojkmëty mëët tu'kë'ëyë ja'awën ets mëët tu'kë'ëyë jot winma'any ets mëët tu'kë'ëyë mëk'ajtën; ets ko nmëku'uk'ajtëm ntsojkmëty ijxtëm kë'ëm nätsyojkëmën, nikë oy jëtu'un këtiinëm ko jëyujk ëkë tii ntukwintsë'këmëty ja Dios ets ko tii ntukwino'k ntukwinxa'amëty.

Lucas 10:27

Tääts ja tsajptëkotyëtë yaj'ijxpëjkpë y'ëtsooy: Tsok ja Wintsën mëët tu'kë'ëyë ja mja'awën, mëët tu'kë'ëyë ja mjot mwinma'any, mëët tu'kkë'ëyë ja mmëkajtën ets tsok yë mmëku'uk ijxtëm kë'ëm mnätsyokyën.

Deuteronomio 10:12

E tyam miitsëty Israel ja'ayëty. ¿Tii ja Dios m'amëtoowëtëp? Dios yi'iyë y'amëtoopy ets xymyëjjawëtëty ets xypyanëjkxëtëty yë nyë'ë tyu'u, ko xytsyoktëty xyjyawëtëty ets xy'ëwtatëty winë aaw winëjot.

Deuteronomio 11:1

Tsoktë jawëtë yë mWintsënëty ets patuntë yë y'ënä'ämën tyiyajtën, yë y'aaw y'ayuk ets kyutujkën.

Deuteronomio 11:13

Pën miitsëty mkuuytyuuntëp ja y'ënä'ämën tyiyajtën mëti'ipë tyam të nmo'otën, pën mtsojktëp mja'awëtëp ja Wintsën mëti'ipë miits mTiosajtëpën ets pën m'ëwtajtëp winë aaw winëjot.

Deuteronomio 13:3

Këtii nëkoo xymyëpëktëty, jä'ä ko yë Wintsën mëti'ipë mTiosajtëpën je'eyë nëkoo mwinma'any'ixëtë ets t'ëkjanty'ixa'any pën mjantytsyojk mjantyjya'awëtëp winë aaw winëjot.

Deuteronomio 13:4

Yi'iyë yë Wintsën mëti'ipë mTiosajtëpën tim panëjkxtëkëtë; tuntë ijxtëm ja y'ënä'ämën myinyën ets yi'iyë ja y'aaw y'ayuk mëtoow'ijtëtë. Yë'ë mka'ëxmatstëp ets jam xëmë mjot mwinma'any xypyëjkta'aktëty ma yë'ëjën.

Deuteronomio 19:9

näjyëtu'un nëjkx tëkëëk ja tsoktakn kajpn xyajni'ikëtë, ëpëky ja tëkëëkpë mëti'ipë jamën. Ënet jyëtu'un'atëty pën mpatuuntëp ja ënä'ämën tëyajtën mëti'ipë yam nmooytyëpën, ko xytsyoktëty xyjyawëtëty yë Wintsën mëti'ipë mTiosajtëpën ets ja nyë'ë tyu'u xëmë xypyanëjkxëtëty.

Deuteronomio 30:10

E ënät jyëtu'un'atëty, pën mëmëtoowtëp yë Wintsën ets pën mpatuuntëp ja y'ënä'ämën tyiyajtën, mëti'ipë jap jaaypyety miinpën ma ja nokyën ma këxja'ay myiinta'ayën ja y'aaw y'ayuk ets ko ënety të mjootwinpitë winë aaw winëjot.

Deuteronomio 30:16

Pën mtuuntëp ijxtëm yam ntuk'ënä'ämtën ets pën mtsojktëp mja'awëtyëp ja mWintsën mëti'ipë mTiosajtëpën ets pën mpanëjkxtëp ja nyë'ë tyu'u ets pën mpatuuntëp ja y'ënä'ämën tyiyajtën ets ja y'aaw y'ayuk, jotkujk nëjkx mjuuky'atë ets Wintsën mëti'ipë miits mTiosajtëpën nëjkxëp mkënu'kxëtë näjyëtu'un ja m'u'unk m'ëna'këty jam ma ja it naaxwiinyëtën mëti'ipë mjä'ä'atantëpën.

Deuteronomio 30:20

Tsoktë jawëtë yë mWintsën, mëmëtowtë ets tu'ukyë yë'ë xypyanëjkxtëkëtëty. Jä'ä ko, ënät mjuuky'atëty ets jeky jam mtsëënëtëty ma ja it naaxwiinyëtën, mëti'ipë ojts tukwinwanën mëët ja aaw ayuk ja kutujkënmëëtpë ja Abraham, Isaac ets Jacob mëti'ipë miits m'ap'ajt m'ok'ajtëpën.

Deuteronomio 30:6

Nëjkxëp jap tpëjktä'äky ja oy'aaw oy'ayuk ma ja mjot mwinma'anyëtyën ets ma ja m'u'unk m'ok ja jyot wyinma'anyëtyën. Yë'ë nëjkx tu'ukyë xytsyoktë xyjyawëtë winë aaw winëjot, tu'ukyë jot tu'ukyë winma'any ets nëjkx jotkujk mjuuky'ajnëtë.

Deuteronomio 4:29

E pën miitsëty mja'amyäjtstëp jatëkok ja mWintsënëty mëti'ipë mTiosajtëpën ets winë aaw winëjot xymyëkajpxtë, nëjkxëp xypyaatë.

Josue 22:5

Mëti'ipë tëy miits n'amëtoowtëpën ets xytyuntëty, yë'ë ko xypyatuntëty xëmë ja ënä'ämën tëyajtën mëti'ipë ja Moisés yajmooyën, yë Dios yë myëtuunpë. Mtsoktëp mjawëtëp xëmë ja mWintsën Tiosëty ets yë'ë ja nyëë'aaw tyu'u'aaw mtimpyanëjkxëtëp, mëtowtëp ets mkäjpxyjyä'äkyukëtëp; yë'ë mka'ëxmatstëp ets winë aaw winëjot xymyëtuntëty ets tu'ukyë winma'any tu'ukyë winma'any.

1 Juan 5:3

Ko ja Dios ntsojkmëty, ja y'ënä'ämën ënety npatu'unëm ets ja y'ënä'ämën ka'ap tsyiptä'äky,