Deuteronomio 4:6 - Biblia Dc en Mixe de Quetzaltepec

⁶ Yë'ë jëtu'un jot'at winma'any'atë ets patuntë, jëtu'un'äämpy nëjkx ja wiinkëtypë ja naax kajpn mëj'äämpy myajnaxëtë. Ets nëjkx y'ëna'antë, ko ma ya'atë kajpnën jam'ajtp ja wijyajtën ets ijxkujk ja'aykyujkën. Ko ënety yë'ëjëty tnijawëtë ya'atë ënä'ämën tëyajtën jyëkyäpëp y'ëna'antëty: Ma ya'atë naax kajpnën janty jam'ajtp yë wijy'ajt kujk'ajtën ets ja'aykyujkën.

Biblia Mixe de Quetzaltepec

⁶ Yë'ë jëtu'un jot'at winma'any'atë ets patuntë, jëtu'un'äämpy nëjkx ja wiinkëtypë ja naax kajpn mëj'äämpy myajnaxëtë. Ets nëjkx y'ëna'antë, ko ma ya'atë kajpnën jam'ajtp ja wijyajtën ets ijxkujk ja'aykyujkën. Ko ënäty yë'ëjëty tnijawëtë ya'atë ënä'ämën tëyajtën jyëkyäpëp y'ëna'antëty: Ma ya'atë naax kajpnën janty jam'ajtp yë wijy'ajt kujk'ajtën ets ja'aykyujkën.

Deuteronomio 4:6 ပူးပေါင်းရင်းမြစ်များ

1 Reyes 4:34

Oymyaatsowëty ma wiinkëtypë naax kajpnën, tëkokyë ja ja'ayëty mëti'ipë nyija'awëtyën ja Salomón ja wyijy'ajtën, maajëty ojts muum tnitsoontë ets tnimiintë tmëtoow'itë ja Salomón ja kyäjpxy myëtyä'äky.

Job 28:28

Ets Dios t'ënëmaay yë naaxwiinyëtë ja'ay: Ko yë Dios oy yajmëtuny, yë'ë ënety yajmëët'ajtp yë ixpëkyajtën; ko yajmëjëkämke'eky yë ëxëëkpë, yë'ë ënety yajmëët'ajtp yë wijyajtën.

Salmos 111:10

Yë wijyajtën ets nija'awën, jam yaj'ixy ma ënety yë Wintsën yajwinkutsë'ëkën. Pën yë Dios wyinkutsë'këpën myëët'ajtyp yë wijyajtën. Dios mëj'äämpy y'ita'any.

Salmos 19:7

Yë Wintsën yë y'ijxpëjkën tëy yë'ë, jä'ä ko yäjkpy jempyë juukyajtën. Yë Wintsën yë y'ënä'ämën aak tëyajtën yë'ë, paaty yë ja'ay mëti'ipë yu'unk naxym juukyajtpën wijy tyaj'awinpity.

Salmos 19:8

Yë Wintsën yë y'ënä'ämën wa'ats yë'ë, paaty tyajminy yë xoontakën ma jot winma'anyën. Yë Wintsën yë y'ënä'ämën yë'ë mëti'ipë oyën, paaty oy yaj'ixy ko yajpatuny.

Proverbios 1:4

ets ja ëna'ktëjkëty ja nija'awën tpaatëty, mëti'ipë ka'ap yajxon tii tuntën, ets yajmo'otëty ja winma'any ets yajxon myäytyëty tyajtëty.

Proverbios 1:5

Pën këpetyën ets wijyën, y'amëtoow'ijtyp yë jëtu'unpë ets pyaat'ëtëtyp ni'ikyë nija'awën ets ja winma'any,

Proverbios 1:7

Yë wijyajtën yë'ë mëët tsyo'ontä'äky ko nwinkutsë'këmëty yë Dios. Yë tsuuja'aytyëjk ka'ap tuntë këwentë yë wijyajtën ets nätyu'uwinwow nätyu'uwinwitsë.

Proverbios 14:34

Ko jyam'aty ja oypyë ja nipaye'eyën ma naax kajpnën, mëj'äämpy jëtu'unpë naax kajpn nyäxy; e ko ka'ap jëtu'unpë jyam'aty tsëtyu'unmëët naax kajpn yajpaaty.

Proverbios 14:8

Yë wijyajtën yë'ë wijyjyä'äy tyukja'akyujkëp ma tii tunyën; e yë tsuuja'ay yë'ë nätyukwin'ë'ënëp ko tsyuujëty.

Isaías 42:21

Yë Wintsën mëti'ipë yaj'ëwaatsëpëtsëëmpën, mëjwiin këjää ja oyajtën të tjayaka'any ma ja y'ijxpëjkënën;

Jeremias 8:9

E tääpë ja'ayëty mëti'ipë nätyijëtëpën ixpëkyjyä'äy, o'ktëy jyata'antë, wintsëtyu'un jëjptsëtyu'un kyukëxëja'antë, tsuu poj jyata'antë tä jëyujk muum kyukääkën o'këntuuy. ¿Maatën ja y'ijxpëky'ajtënëty? tëëjës t'ixtij t'ëxwa'antë ja n'aaw n'ayukës.

Ezequiel 5:5

Ëjts, mëti'ipë Wintsën'ajtpën, jëtu'unës n'ëna'any: Ixtë ja Jerusalén kajpn. Ëjts ojts mpëjktä'äky ma wiinkëtypë ja naax kajpnën ets wiinkëtypë ja it naaxwiinyëtën.

Daniel 1:20

Ma ja jotmayën ets ja winma'any ma tsyokyën ja këpetyajtën ets ja ixpëkyajtën, yë yajkutujkpë xëmë ojts yajtëwëtë ets t'ijxy ko tääpë ja ëna'këty majknipät ijty kyëpety'ajnëtë këtiinëm ja wijyjyä'äytyëjkëty ets ja najtsja'apëtëjkëty mëti'ipë jam tuuntëpën ma ja yajkutujkpën.

Daniel 4:9

Mijts Beltsasar, mëti'ipë nyiwintsën'ajtypyën yë wijyjyä'äytyëjkëty, wa'atsës nijawë ko mijts Dios mnë'ëwinwoow mtu'uwinwoowëp ets mnija'awëtyääpy mëti'ipëjaty tsipën. Mëtoow'it mëti'ipë nwinkuma'ayën ets xytyukmëmëtya'akëtyës wi'ix nyiwijyën.

Oseas 8:12

Oyës të njatuknijayë may yë n'ijxpëjkënës, yë'ë jëtu'un të tmëët'aty tä jeexyë ka'ap tjä'äjëtyën.

Malaquías 3:12

Nëjkxëp nitëkokyë ja naax kajpn mtijëtë, ko jotkujk miits myajpaatë. Ëjts Wintsën mëti'ipë maaytyääyëpën winë, ëjts ënaanp.

Deuteronomio 29:9

E paaty yam n'ënëëmëtë ets xypyatuntëty ya'atë aaw ayuk, tä yam yaj'ëëwkëxy yajkajpxkëxyën ya'atë käjpxytyu'unën, mtuntëp jëtu'un ets jotkujk mjuuky'atëty ets aak'oy wyimpëtsëm jyëjpëtsëmëty ja mëti'ipë ënety mtuknipëjktakëtëpën.

Deuteronomio 32:46

Ko y'ëëwtaaytyë ënät yë Moisés t'ënëmaay ja naax kajpn: Mëmay mëtajtë tyam mëti'ipë të ntukmëmëtya'aktën, nëjkxëp näjyëtu'un xytyukmëmëtya'aktë ya'atë aaw ayuk, mëti'ipë ja ënä'ämën tëyajtën nyimëtyäkpyën.

Deuteronomio 32:47

Ya'atë aaw ayuk ka'ap tjëkyepy namaa natii xyjyawëtëty, ya'atë ënä'ämën yë'ë nëjkx myajjuuky'atëtë ko xypyatuntëty. Ko xytyuntëty ijxtëm y'ëne'emyën, jeky nëjkx mjuuky'atë ma ja it naaxwiinyëtën jampë yajpaatyën nëë awinaxy, ma Jordán mëjnëëjën, mëti'ipë miitsëty mniwa'akantëpën.

2 Timoteo 3:15

Ja'amyäts ko mutsknëm të xynyijawë ja Dios ja y'aaw y'ayuk mëti'ipë të myajwijy të myajkejyën, mëti'ipë mtu'uwinwowanëpën ets xypaatëty ja nitsokën ko ja Kristë Jesús të xymyëpëky.

Santiago 3:13

Pën jää pën wijypyë kejypyë ma miitsëtyën ëkë ja'akyujkëpë mëtoowkujkëpë, wä'än tyajkwinkëxë'ëky mëët ja y'oyjä'äyajtën, yujy tëtä'äky jyuuky'atëty ijxtëm tii tnijawën.