Deuteronomio 31:20 - Biblia Dc en Mixe de Quetzaltepec

²⁰ Ko ënety jam të mjajnëtë ma ja it naaxwiinyëtën mëti'ipës ja m'ap m'ok ntukwinwa'anëtyën mëët ja aaw ayuk ja kutujkënmëëtpë, jam ma ja jë'kxy pëky ka'ap y'ëmaaytyä'äkyën, ënät nëjkx ja wiink wintsën xypyanëjkxtëjkënëtë ets jä'ä xy'ëwtajnëtëty, ëjts nëjkxëpës ja nyaj'ixtijnë ets ja käjpxytyu'unën mëti'ipë ënety të njayaj'apatëmën ka'ap nëjkx pën t'ëkja'amyäjtsnë.

Biblia Mixe de Quetzaltepec

²⁰ Ko ënäty jam të mjajnëtë ma ja it naaxwiinyëtën mëti'ipës ja m'ap m'ok ntukwinwa'anëtyën mëët ja aaw ayuk ja kutujkënmëëtpë, jam ma ja jë'kxy pëky ka'ap y'ëmaaytyä'äkyën, ënät nëjkx ja wiink wintsën xypyanëjkxtëjkënëtë ets jä'ä xy'ëwtajnëtëty, ëjts nëjkxëpës ja nyaj'ixtijnë ets ja käjpxytyu'unën mëti'ipë ënäty të njayaj'apatëmën ka'ap nëjkx pën t'ëkja'amyäjtsnë.

Deuteronomio 31:20 ပူးပေါင်းရင်းမြစ်များ

Oseas 13:6

E ko miitsëty ja mjë'kxy mpëky may xymyëët'ajtë ets nyatëjkëy, amëj akëjxm ojts m'aaw mjot xyjyawëtë ets xyjyä'äytyëkoytyës.

Éxodo 3:8

Paatyës yaa naaxwiiny të nkëtä'äky etsës nyajtso'oka'antë ma Egiptë ja'ayëtyën, nyajpëtsëmantëpës yam ma tääpë kajpnën etsës nyajnëjkxa'antë ma ja oypyë ja it naaxwiinyëtë, ma myëjwiin y'ëwaatsëtyën ets ma ja jë'kxy pëky ka'ap ninu'un y'ëmaaytyä'äkyën; jam jëtu'un ma tsyëënëtën yë Canaán ja'ayëty, Hit ja'ayëty, Amor ja'ayëty, Ferez ja'ayëty, Heve ja'ayëty ets Jebús ja'ayëty.

Ezequiel 34:20

Paaty ëjts maas nWintsën'atyën, jëtu'un n'ënëëmëtë: Mpaye'eyäämpyës yam wi'ix ko jää kupixyny ni'kxpë ets tää xyëëpëpë.

Ezequiel 34:16

Nëjkxëpës n'ixta'ay ja kupixyny tëëpë tyëkoyën, mpatäämpyës ja mëti'ipë tëkoy'ijtpën, mpitäämpy nmotsäämpyës mëti'ipë tsëtyutën, mputëkëjäämpyës mëti'ipë ëmaay paki'ixën ets nkëwent'atäämpyës mëti'ipë mëkën ets ni'kxën. Jëtu'unës nkëwent'ata'any ijxtëm pyaat'atyën.

Jeremias 5:28

je'eyë ni'kx të y'awinpijnë ko jyi'kxy janaam jatsojk. Ka'ap yajnijawë naak ok të tyuuntëkoy të kyajpxtëkoy: Ko ja ku'ooky u'unk yajnipaye'eyä'äny, ka'ap tnipaye'eytyë mëtëy, mëti'ipë ja ëyoopëja'aytyëjk ja paatë'ajtëtëp, ka'ap tmëmay tmëtajy ets ka'ap tputëkë.

Jeremias 50:11

Miitsëty Caldeo ja'ayëty mëti'ipë mä'tstën yë nnaax nkajpnës, ätstë xoonta'aktë. Nëpëkax yujkpëkaxtë jëtu'un tä tu'uk tsajpkaani'kxën mëti'ipë ujtsjoty tënääpyën ets m'ajëjtëty tä tu'uk kwaayën.

Salmos 119:70

Yë'ëjëty tëë yë jyot wyinma'any jyo'ptaaynyëtë, e ëjts ntukxoontäkpyës mëti'ipës mijts xytyukni''ijxëpën.

Salmos 73:7

je'eyë janty ni'kxëty kyëxë'knëtë, mëpaatëp wyiintsaa pyëtsëëmnëtë; kanaak yajxon mëti'ipë ëxëëk myëmaay myëët'ajtëpën.

Salmos 17:10

Je'eyë nyämyëjawëtë, amëj akëjxm kyajpxtë myëtya'aktë.

Nehemías 9:35

Ni'ikyënëm jam ma ja kyutujktaknëtyën, oy winë mëj këjää xyjyamooy, ja wit meeny, ja naax kam ma winë y'ity wyintëyën ma ja naax kajpnën mëti'ipë mtukë'ëtëkëyën ka'ap ojts mëjjawëty ets ka'ap ja y'ëxëëknë'ë y'ëxëëktu'u t'ëxmajtstë.

Deuteronomio 8:7

Yë Wintsën tëë tuknipëjktaakë, ko jam myajnëjkxa'anëtë ma ja oy'it oynyaaxën, ma ka'ap tii y'ëmaaytyä'äkyën. Jam'ajtp mëjwiin këjää ja nëë, wä'än tjamëty joyjyotm ets kopkjotm.

Deuteronomio 7:1

Yë Wintsën mëti'ipë miits mTiosajtëpën yë'ë mputëkëjanëtëp ets jam mja'tëty ma ja it naaxwiinyëtën mëti'ipë mjä'ä'atantëpën, ënät nëjkx xyajkutëkoytyë ja wëxtujkpë ja naax kajpn jampë yajpaatën mëti'ipë mëj'äämpy ijtëpën ma jotmëkja'ay tsyëënëtën. Yë'ë yajtijtëp ja Hit ja'ayëty, gergeseos ja'ayëty, Amor ja'ayëty, Canaán ja'ayëty, Ferez ja'ayëty, Heve ja'ayëty ets Jebús ja'ayëty.

Éxodo 3:17

Näyjyëtu'unës të xy'ënëëmë, ko mmo'oja'anëtë ëwaatsëtuuy'ajtën yaa Egiptë ma ëxëëk mjatën mkëpätën, ets myajnëjkxa'anëtë jam ma nyaax kyajpnëtyën yë Canaán ja'ayëty, Hit ja'ayëty, Amor ja'ayëty, Ferez ja'ayëty, Heve ja'ayëty ets Jebús ja'ayëty; jam ka'ap yë jë'kxy pëky y'ëmaaytyä'äky, jam jëtu'un yë jë'kxy këtii y'ëmaayëty, tä tu'uk yë komnëë pyëyi'ikyën.

Deuteronomio 8:19

E pën mja'atyëkooynyëtëp ja mWintsënëty ets ja wiink wintsën xypyanëjkxnëtëty ets jä'ä xy'ëwtajnëtëty, tyam miits yajxon n'ënëëmëtë, ko nëjkxëp mkutëkooytya'atë.

Deuteronomio 11:16

E miitsëty mëk mnäkyëwent'atëtëty, këtii myajwin'ëëntëty, këtiipë Wintsën nijëna'a xy'ëxmatstëty ets wiink wintsën xypyanëjkxtëkëtëty, xy'ëwtatëty, ëkë xywyinkoxtänëtëty.

Deuteronomio 11:17

Jä'ä ko jëtu'unpë ja winma'any xypyaatëty, yë Wintsën nëjkxëp mëk mtukjoot'anpëkëtë ets ka'ap nëjkx yë nëë tuu t'ëkkäjxnë ma ja kam tu'ujën, jëtu'un'äämpy nëjkx mjë'kx kyutëëtsëtë ets ka'ap xy'ëkmëët'ajnëtëty tii mkaytyëp m'uuktëp ets m'o'kta'a mtëkooytya'atëty ma ya'atë oynyaax oykyamën, mëti'ipë ja Wintsën mo'ojanëtëpën.

Proverbios 30:9

Jä'ä koos nëkooyë mëj këjää winë nmëët'atëty, tsojk mijts nja'atyëkoya'anëty ets n'ënanëtyës ko ka'ap n'ixy'äty; e koos ntim'ëyoowni'ikëty tsojkës ntëjkënëty mä'tspë ets jëtu'un nyajtëkooynyëtyës ja wintsë'kën ma mkënu'kxyxyëëwën.

Isaías 6:10

Jëtu'unyë ja naax kajpn nëjkx xyajwinkumon xyajjotkumonë, wiinkutsum wiinkumotsëpën nëjkx yajpaatë ets ka'ap nëjkx jyä'äkyukë, oy tii tja'ix tjamëtowtëty, ka'ap nëjkx t'ijxkuk tja'akyukëtë.

Deuteronomio 6:3

E paaty yam n'ënëëmëtë miits Israel ja'ayëty, ko yë'ë mpatuntëp. Jëtu'un oy mjuuky'atëty ets nëjkx m'awinpitë tu'uk mëj kajpn ma ya'atë it naaxwiinyëtën, ma ka'ap yë jë'kxy pëky y'ëmaaytyä'äkyën, jëtu'un ijxtëm yë Wintsën mëti'ipë m'ap m'ok Tyiosajtën ojts twinwanën.

Jeremias 31:32

Tyaapë käjpxytyu'unën ka'ap jyëtu'un'ata'any tä ja mëti'ipës ntuunën mëët ja y'ap y'okëty, koos nmajtstë kyë'ëkëjxy etsës nyajpëtsëëmtë jap Egiptë; jä'ä ko yë'ëjëty ka'ap ojts tpatuntë ja käjpxytyu'unën oy ënety ëjts Wintsën xyatijtë. Ëjts Wintsën, ëjts ënaanp.

Oseas 6:7

E ëjts yë nnaax nkajpnës, nän timjëtu'un të y'ëti'itsy Adankën, tëë tkäjpxykyumëtoownaxtë ja käjpxytyu'unën ets wiink winma'any të tpatnëtë.