Deuteronomio 15:10 - Biblia Dc en Mixe de Quetzaltepec

¹⁰ Mijts mpatëp ets xypyutëkëty yë mjëëky mëku'uk mëti'ipë ëyoop jotëkoopyën. Jä'ä ko yë mWintsën yë'ë y'ixäämpy wi'ix mijts oy winë xytyuny.

Biblia Mixe de Quetzaltepec

¹⁰ Mijts mpatëp ets xypyutëkëty yë mjëëky mëku'uk mëti'ipë ëyoop jotëkoopyën. Jä'ä ko yë mWintsën yë'ë y'ixäämpy wi'ix mijts oy winë xytyuny.

Deuteronomio 15:10 ပူးပေါင်းရင်းမြစ်များ

Proverbios 22:9

Mëti'ipë ja'ay oy yë jyiiky myëku'uk jya'apën, nëjkxëp mëj këjää ja näkyënu'kxë tpaaty, mëët ko ënety ja jyiiky myëku'uk t'akaaytyuky t'a'uktuky.

Hebreos 13:16

Ka'ap xyjyä'ätyëkoytyëty ets xytyuntëty ja oypyë ets tu'knax xyajtuntëty mëti'ipë mmëët'ajtëpën, jä'ä ko ya'atë jëtu'unpë wintsë'kën Dios tyukjotkëtäkpy.

Isaías 58:10

Ko xyajkay xyaj'uukëty ja ja'ay mëti'ipë yuu'o'këpën, ko xypyutëkëty ja ja'ay mëti'ipë amaayjoty jotmayjoty yajpatpën, ja mjuukyajtën jëtu'un yaj'ixa'any tä jëën koots tyi'kxyën ets tä xëëw y'aantä'äkyën ko wyintuky'äty.

Deuteronomio 14:29

Yë'ë mo'otëp yë Leví ja'ayëty, ko ënety mnimin mnija'tëtë. Miits tëë xynyijawëtë, ko yë'ëjëty ka'ap tii nyaax kyamëty jëtu'un tä miitsëtyën; yë'ë nëjkx xymyo'otë yë jaaypyaat jaaypyo'kxyëty, ku'ooky'u'unkëty ets ku'ooky tyo'oxyëty ets jëtu'un näjyëtu'un yajpaatëty ku'uxyë jotkëtä'äky. Yë Wintsën nëjkxëp mkënu'kxëtë ets mjuuky'atëty mëjwiin këjää ko ënety jëtu'un xytyuntë.

Deuteronomio 24:19

Pën yë'ë yë tsajpmok myajmujktëp jam mkamjotm, ko mtso'onëtëty ets xyjyä'äytyëkoytyëty tu'k'atsumy, këtii xynyiwinpitëty. Ixmatstë jam, yë'ëts jyä'ä'atëp yë jaaypyaat jaaypyo'kxy mëti'ipë yajpatëpën ma miitsëtyën, ëkë ku'ooky'u'unk ku'ooky tyo'oxyëty. Jëtu'un'äämpy ja Wintsën ni'ik tkënu'kxëty ja mkam mtu'ujëty ets miits näjyëtu'un myajkënu'kxtëty.

Isaías 32:8

E ja'ay mëti'ipë oy ja jyot wyinma'anyën, myëmääpy myëtäjpy ja oypyë ets jä'ä tyuunpy.

Hechos 20:35

Xëmë të ntuk'ijxpëktë ko jëtu'un winë xytyuntëty, ets ja mmëku'uk xypyutëkëtëty mëti'ipë tii yajmëyajtëpën. Ja'amyätstë ja Wintsën Jesús ja y'aaw y'ayuk ko jëtu'un y'ënäny: Wäänë jotkujk mëti'ipë ja ja'ay putëjkëpën ets këtiinëm mëti'ipë yajputëjkëpën.

Deuteronomio 15:4

Jëtu'un'äämpy ka'ap ni pën y'ëyowëty ma mnaax mkajpnën, yë mWintsën yë'ë nëjkx mkënu'kxyë mëj këjää ma ja it naaxwiinyëtën mëti'ipë mo'ojanëpën.

1 Pedro 4:11

Pën jää pën kyäjpxy myëtyä'äky, jëtu'un kyajpxëty ijxtëm ja Dios ja y'aaw y'ayuk y'ënä'änyën. Pën jää pën myëku'uk tii tukputëkëja'any, yajtunëp ja myëjaaw mëti'ipë ja Dios mooyëpën. Tu'kë'ëyë tiijaty mtuuntëp mkajpxtëp, tuntë winë ijxtëm mëpaat ja Dios yajmëjjaw yajjaantyjawën ma ja Jesukristë ja xyëëwën, mëti'ipë ijta'ayxyëyëp ja mëj'ajt oyajtën. Jëtu'un y'itëty.

Romanos 12:8

mëti'ipë jotmëkwinkajpxëpën, wä'än tjotmëkwinkajpxë; mëti'ipë tii yäjkypyën, wä'än tyäky; mëti'ipë nyikopk'ajtypyën ja mëpëjkpëtëjk, wä'än tuny yajxon ets mëti'ipë oyjyä'äy'ajtpën, wä'än t'oyjyä'äy'äty.

Mateo 25:40

Ënet ja yajkutujkpë y'ëtsowa'any: Tëy miits n'ënëëmëtë, ko të xytyuntë tu'kë'ëyë ja oypyë ja tu'unën kajpxën ma ja'ayëtyën mëti'ipë ënety yajpatëpën ëmaay amutsk, ëjts jëtu'un të xymyëtuntë.

Deuteronomio 14:19

Tëkokyë yë tsukts aak ëxëëk yë nyäxy, ka'ap mëpaat xytsyu'utstë.

Deuteronomio 23:20

Yë jaaypyaat jaaypyo'kxy jyëkyejpy xy'amëtowtëty ja meeny'u'unk, pën tëë tii xytyuk'ënu'kxtë; yë'ë tëy mëkunaax mëkukajpnëty ka'ap mëpaat mëktä'äky xy'amëtowtë ja meeny'u'unk. Jëtu'un'äämpy yë Wintsën nëjkx mëj'äämpy mkënu'kxëtë.

Deuteronomio 28:8

Yë Wintsën yajkëta'akäämpy jam yë kyënu'kxën, ma ënety xypyëjkë'ëkyën ja mjë'kxy mpëky ets ma winë xytyunyën, jëtu'un nëjkx jotkujk mmëët'atyë ma ja it naaxwiinyëtën mëti'ipë të mmo'oyën.

Eclesiastés 11:1

Yajkay yë ja'ay, mëti'ipë yuu'o'këpën; ko ënety mijts myu'ookyë nëjkxëp tääpë ja'ay myajkayë.

Deuteronomio 15:18

këtii xywyiinkja'apëty ko xy'ëxmatsëty ja mtuunpë ëwaatsëtuuy. Yë'ë tëë mëtunyë tëtujk jëmëjt ets ka'ap jëtu'un tmëpaaty ejxtëm jeexyë të xymyëjuyën tu'uk ja mëtuunpë mëti'ipë ja mtuunk jeexyë të tyaj'apaatën. E yë'ëts jëtu'un mja'amyätsëp xëmë, ko yë mWintsën jëtu'un mkënu'kxa'anyë tä ënety mijts oy winë xytyunyën.