Deuteronomio 12:31 - Biblia Dc en Mixe de Quetzaltepec

³¹ E miitsëty këtii jëtu'un winë xytyuntëty ma mWintsën Tiosëtyën, tä yë'ëjëty y'ëtë'ëtstën. Jä'ä ko yë'ëjëty aakjëtu'un winë tuntë tä yë Wintsën t'ëxëëk'ixyën. Yë'ëjëty ëxëëk y'ëtë'ëtstë y'ëna'antë ko yë tyiosëty tmëjjawëtë; yajknëtëp ja y'u'unk y'ëna'këty ko ja wyintsënëty ja wyintsë'kën tmo'oja'antë.

Biblia Mixe de Quetzaltepec

³¹ E miitsëty këtii jëtu'un winë xytyuntëty ma mWintsën Tiosëtyën, tä yë'ëjëty y'ëtë'ëtstën. Jä'ä ko yë'ëjëty aakjëtu'un winë tuntë tä yë Wintsën t'ëxëëk'ixyën. Yë'ëjëty ëxëëk y'ëtë'ëtstë y'ëna'antë ko yë tyiosëty tmëjjawëtë; yajknëtëp ja y'u'unk y'ëna'këty ko ja wyintsënëty ja wyintsë'kën tmo'oja'antë.

Deuteronomio 12:31 ပူးပေါင်းရင်းမြစ်များ

Jeremias 32:35

Tëë jam näjyëtu'un yë Baal wyintsë'këntyakn tkojëtë ma Ben-hinom Joyjyotën. Jamts yë y'u'unk y'ëna'k të tyaktë kë'ëy xo'oxy ye'etyëjkpë to'oxytyëjkpë ets të tukwintsë'ëkëtë ja Moloc ets jëtu'un tyajpokytyuntë ja Judá ja'ayëty; tëë tuntë ja mëti'ipës ënety ka'ap të ni'ënä'ämën ets mëti'ipës ënety ka'ap të nmay të ntajyën.

Jeremias 7:31

Ma ja Ben-hinom joyjotmën, jam të tkojtë yë Tofet wyintsë'këntyakn ets jam nino'oka'antë ja y'u'unk y'ëna'këty ye'etyëjkpë to'oxytyëjkpë, mëti'ipës ka'ap nijëna'a ojts ni'ënä'ämën ets ka'apës ojts nijënu'un ntimmyäy ntimtyäjy jëtu'un y'ëtë'ëtstëty.

2 Reyes 21:2

Je'eyëp ko ja tyu'unën kyajpxën ka'ap ja Wintsën ojts oy t'ixy, jä'ä ko näjyëtu'un winë tuuny ëxëëkjaty tä ja kajpnëtyën mëti'ipë ënety ja Wintsën të t'ëxwopyën ko ja Israel ja'ayëty jam jyajtë:

Deuteronomio 12:4

Jä'ä ko yë Wintsën mëti'ipë Tios'ajtpën, ka'ap jyëtu'unëty yaj'ëwtaty.

Deuteronomio 9:5

E paaty ka'ap yë'ëkyëjxmëty ko miitsëty oy mja'ay'atë ets ko mëtowtë myajmo'otë ja kuma'ayën; yë Wintsën paaty t'ëxwojpta'ay tääpë ja'ay jä'äkyëjxm ko ja tyu'unën kyajpxënëty ka'ap myëtëyëty ets näjyëtu'un mëët ko tniwa'aka'any ja y'ayuk, mëti'ipë tyukwinwa'anëyën ja Abraham, Isaac ets Jacob, miits ja m'ap m'okëty.

Éxodo 23:2

Këtii xymyëjwa'kpätëty ja mayjyä'äy ko ëxëëkjaty winë tuntëty tkajpxtëty. Ko muum ja m'ayuk tëyajtënpë xykyë'ëyaka'anëty oy jëtu'un xyjya'ixëty yë mayjyä'äy këtii mtsë'ëkëty ets këtii jam mnäkyë'ëyakëtëty ma ja ka'apë myëtëyëtyën.

Miqueas 6:7

¿Tyukxoonta'akëp jëtää yë Wintsën koos ntukwintsë'ëkëty tu'uk mil yë tsajppax ayääkë ëkë may olivë onë? ¿Ëkë ko ntukwintsë'ëkëtyës yë nmaankës kä'äxkopk ets yë'ë ntukkunaxëtyës yë n'ëxëëk winma'anyës ets nnëë npokyësë?

Ezequiel 23:27

Jëtu'un nëjkx nyajjëjpkëxyës ja mjuukyajtën ma të mkujeny'ätyën jap Egiptë, ka'ap nëjkx nijëna'a ja Egiptë ja'ay xy'ëk'ijxnë ets ka'ap nëjkx xy'ëkjot'ajnë.

Ezequiel 20:31

Ko yë m'ayajk m'ako'onën ets m'u'unk m'ëna'këty jëënjoty xyajwinkë'ëwtë ets yë'ë xytyukwintsë'ëkëtë, je'eyëm miitsëty ëxëëk tu'u xypyanëjkxtë ko tääpë awinax yë'ë xymyëjpëjkta'aktë. ¿Ets ënät m'ëna'antë koos xynyimina'antë ets winë xyajtëwa'antë? Ëjts Wintsën, njuukyajtënës yam ntukajpxpejtyp, ko ka'apës nkupëka'any ets miitsëty tii winë xyajtëwtëtyës.

2 Crónicas 36:14

Näyjyëtu'un ja Judá ja'ayëty ets ja teetytyëjkëty, ojts ja jyot wyinma'any tyajtëkooynyëtë ets ka'ap ja Wintsën ojts t'ëkmëj'ijxnëtë; jëtu'un winë tuunëtë tä ja ja'ayëtyën mëti'ipë ka'ap ja Wintsën t'ixy'atën ets ka'ap t'ëkwitsë'kënëtë ja Wintsën ja jyëën tyëjk, mëti'ipë ënety ja Wintsën të tnikäjpxyën ko yë'ë tëjk'ata'any mëti'ipë jam Jerusalén yajpatpën.

2 Crónicas 33:2

Je'eyëp ko yë'ë ka'ap ojts winë oy tuny ma Wintsënën, ojts t'ëwtaty ja tsaapotsy, ja awinax ets oynatii ka'apë Tiosëtyën; näjyëtu'un ojts winë tuny tä ja naax kajpnëtyën mëti'ipë ka'ap ja Wintsën t'ëwtatën, ja naax kajpn mëti'ipë ja Wintsën wyojpëtsëëmën ko jam jyajtë ma ja Israel ja'ayëtyën:

Deuteronomio 9:4

Ko ënety ja Wintsën të tyajjëwa'kta'ay ja ja'ay, mëti'ipë jam tsënaaytyëpën, këtii nëjkx m'ëna'antë: Tioskujuuyëp mëët ya'atë mëjnäkyumayë, ma ya'atë Wintsën të xymyo'oyëmën yë naax kam. Jä'ä ko pën yë Wintsën y'ëxwojptääpy tääpë yë naax kajpn, yë'ëkyëjxm jëtu'un tuny, ko ja nyëë pyokyëty mëj këjää oy të wyinku'ujtnë jam Dios wintum.

Deuteronomio 20:18

Këtiipë mtukjatëtëty ja ëxëëktu'un ëxëëkajpxën ma ja wyintsën tmëjjaw tjaantyjyawëtën ets ja mWintsën xymyëtëkooynyëtëty.

2 Reyes 16:3

jëtu'un ojts winë ëxëëkjaty tuny tä ja wiinkëtypë yajkutujkpëtëjk y'ëtëtstën, ni'ikyë ojts tu'uk ja myaank tkë'ëyajknë ets wyintsë'kën'atëty, ëxëëkjaty winë tuuny tä ja naax kajpnën mëti'ipë ja Wintsën yajkutëkooyën ko ja Israel ja'ayëty jam jyajtë.

Salmos 106:37

jä'ä ko ojts ja y'u'unk y'ëna'këty, ye'etyëjkpë, to'oxytyëjkpë tukwintsë'kënëtë ja ku'oypyë.

2 Reyes 3:27

Ënet ojts tmajtsë'ëky tu'uk ja myaank mëti'ipë ënety kutëkëjanëpën ma ja kyutujktaknën ko y'ookëty ets tuktsujk tukjë'tëy ets tnino'ky jam potsykyëjxm, jëtu'un tyäjky tä tu'uk ja wintsë'kënën. Yë Israel ja'ayëty wiink ojts t'ixtë ets jyoot'anpëjktë, paatykyëjxm tsyo'ontaaytyë jam ma ja jya'ajtaknëtyën ets wyimpijtaaynyëtë ma ja nyaax kyajpnëtyën.

2 Reyes 17:31

E ja mëti'ipë tso'ontëpën jam Avá, ojts tyajnikojtu'utë ja tyiosëty mëti'ipë tyijtëpën Nibhaz ets ja Tartac; ja mëti'ipë tso'ontëpën jam Sefarvaim nyo'ktëp xyaamtëp ja y'u'unk y'ëna'këty ets tukwintsë'ëkëtë ja tyiosëty mëti'ipë tyijtëpën Adramélec ets ja Anamélec.