Deuteronomio 1:8 - Biblia Dc en Mixe de Quetzaltepec

⁸ Tääpë it naaxwiinyëtë mijts të nmo'otë, nëjkxtë jam ets jä'ä'atë tääpë naax kam, ëjts maas nWintsën'atyën, yë'ë ojts ntukwinwanëtës yë m'ap m'okëty tä yë Abraham, Isaac ets Jacob ets näjyëtu'un yë y'u'unk y'okëty.

Biblia Mixe de Quetzaltepec

⁸ Tääpë it naaxwiinyëtë mijts të nmo'otë, nëjkxtë jam ets jä'ä'atë tääpë naax kam, ëjts maas nWintsën'atyën, yë'ë ojts ntukwinwanëtës yë m'ap m'okëty tä yë Abraham, Isaac ets Jacob ets näjyëtu'un yë y'u'unk y'okëty.

Deuteronomio 1:8 ပူးပေါင်းရင်းမြစ်များ

Génesis 15:18

Jä'ä xëëw ojts ja Dios tuny tu'uk ja käjpxytyu'unën mëët yë Abram, ets t'ënëmaay: Ya'atë naax kam yë'ëjës nmo'ojäämpy yë m'u'unk m'ok. Jampaatës nmo'oja'any ma ja nëë'aawën Egiptëpë ets jampaat ma ja Éufrates mëjnëë'aawën.

Génesis 12:7

Ënet ojts jam yë Dios nyänikëxë'ëky ma Abramkën ets y'ënëmaayë: Ya'atë naaxwiinyëtë yë'ëjës yë m'u'unk m'ok nmo'ojäämpy. Ënet ojts yë Abram pojën t'oytyuny tu'uk ja wintsë'këntyakn, jä'ä ko ënety jam yë Dios të nyänyikëxë'ëkyë.

Génesis 15:16

Koonëm ënety të myintë naaxwiiny ja m'u'unk m'ëna'k, taxk'oknipety täänëm jatëkok wyimpitëty ma ya'atë it naaxwiinyëtën. Jä'ä ko ka'anëm ënety kyukëxënëm ma ja Amor ja'ayëty ja ëxëëkpë tuntën tkajpxtën.

Hebreos 6:13

Ko ja Dios tyaj'apatëy ja waantakën ma ja Abrahamën, kë'ëm ojts nyäxyëëwkukäjpxyë, jä'ä ko ka'ap ënety pën wiinkpë wäänë mëjpë ijxtëm yë'ëjën.

Hebreos 6:14

Jëtu'un yajnëmaay ja Abraham: Nmo'ojäämpy ja kënu'kxën mëjwiin këjää ets nyajmayëjä'änyës ja m'u'unk m'ok.

Éxodo 23:31

Yë mtsëpa'anëty jam tsyoonëty ma mëjnëë jyënäkyën mëti'ipë xyëëwajtypyën Tsaptsmejy ets jam jya'tëty ma myëjnëë nyaxtën yë filistejë ja'ayëty; jam tsyoonëty yë wiinkpë ma të'ëts'itjotmën ets jam jya'tëty ma Éufrates mëjnëëjën. Ëjts nkë'ë'ëjotyës tääpë ja'ayëty të mpëjktakta'atë, mëti'ipë jam tsënaaytyëpën ma tääpë it naaxwiinyëtën ets mijts nëjkx jam xy'ëxkäjxtaaynyë.

Éxodo 33:1

Tä yë Dios t'ënëmaay yë Moisés: Nëjkx ënät tyam, tsoon yaa ma ya'atë it naaxjotmën, woownëjkx ya'atë naax kajpn mëti'ipë jap mju'tën Egiptë. Jam tyam nëjkxtë ma ja it naaxjotmën mëti'ipës ojts ja Abraham, Isaac ets Jacob ntukwinwanëtën, koos yë y'u'unk y'okëty nmo'oja'antës tääpë it naaxwiinyëtë.

Deuteronomio 1:11

Yë Wintsën mëti'ipë yë m'ap m'ok Tyios'ajtëpën, yë'ë y'a'ixëp ets miitsëty jaakni'ik mnimayëtëty ets mkënu'kxëtëty jëtu'un tä yë'ë të tnikäjpxyën.

Deuteronomio 11:24

Ma ënety miitsëty mnajtswa'akëtën, jam nëjkx mtsënaaytyaknpëktë, yë mtsëpa'anëty jam nëjkx y'ëwtity të'ëts'itjotm, nyaxëty jam Líbano ets tsyoonëty jam ma Éufrates mëjnëë jyënäkyën ets tyimja'tëty ma ja mejyën naax akujkpë.

Nehemías 9:15

Mooyë näjyëtu'un tsajpkääky ets ku'uxyë kyäytyëty y'uuktëty ets nëë tsaajotypë pyëtsiimyën ets nyëëtëëtsë tyajmontëty. Ets ok xy'ënëmaay ko tniwäänta'atëty ja it naaxwiinyëtë ma ënety të xytyukwinwa'anëmën.

Jeremias 32:22

Ets xymyooy yë Israel ja'ayëty ya'atë it naaxwiinyëtë ma tsi'tsknëë ets uuxpa'ak pyëyi'ikyën tä nëëjën, timjëtu'un tä ojts xytyukwinwanën yë y'ap y'okëty.

Ezequiel 47:14

Ëjts ojtsës n'ënëëmë yë m'aptëjkëty ets nxëëwës ojts ntukajpxpety. Ko wä'än tyajwa'kxtë yë naax tu'knax. Ya'atë naax kajpn yë'ë nëjkx tkuma'ayën'atë.

Deuteronomio 1:35

Nitu'uk yë ja'ay nëjkx kyaja'ty jam ma ja itjotmën ja oypyë, tyampë jyuuky'atën mëti'ipë je'eyë ja ëxëëk jot ëxëëk winma'any myëët'ajtëpën, mëti'ipës ntukwinwa'anëyën ja m'ap m'okëty.

Deuteronomio 2:29

Jëtu'un tä ëëts të xyajnaxtën yë Esaú yë y'u'unk y'ëna'k jampë tsyëënëtën Seir ets tä yë moapja'ayëtyën jampë tsyëënëtën Ar ets koonëm ntuknaxtëtyës ja Jordán mëjnëë ets nja'tëtyës jam ma ja naax kamën mëti'ipë ja Wintsën ëëts xymyo'ojantëpën, mëti'ipës nTios'ajtëpën.

Deuteronomio 4:1

Miitsëty Israel ja'ayëty mëtoow'itë ya'atë tëyajtën ets ënä'ämën mëti'ipë yam ntukni''ixëjantëpën ets xykyuuytyuntëty. Yë'ë mtukjuuky'atëp ko ënety jam myajpaatë ma ja naax kamën mëti'ipë yë Wintsën mo'ojanëtëpën, yë Dios mëti'ipë ja m'ap m'ok Tyiosajtën.

Deuteronomio 6:10

Yë Wintsën mëti'ipë miits mTiosajtëpën, yë'ë jam myajtëkëjanëtëp ma ja naax kamën mëti'ipë ja Abraham, Isaac ets Jacob tyukwinwa'anëyën ko mo'oja'anëtë. Tääpë it naaxwiinyëtë myëët'ajtyp oyëtypë naax kajpn, mëti'ipë miits nijënu'un xykyanijawëtën wi'ix ojts kyojyën.

Deuteronomio 7:8

E yë Wintsën tëë jap myajpëtsëmëtë Egiptë ma ënety mëtun m'ëyowtën, ko jap myajpëtsëëmëtë mëj këjää yë myëj'ajtën tyaj'ijxë ma yajkutujkpën, jä'ä ko mëk ënety mtsokëtë mjawëtë ets niwa'aka'any ja y'ayuk mëti'ipë tyukwinwa'anëyën ja m'ap m'okëty.

Deuteronomio 7:12

Pën mkuuytyuuntëp ya'atë aaw ayuk, mëti'ipë të xy'ixtën. Yë mWintsën Tiosëty, nëjkxëp tniwä'äky ja y'aaw y'ayuk ets tunëty tä ojts tukwinwanën ja m'ap m'okëty.

Deuteronomio 7:13

Nëjkxëp mtsokëtë mjawëtë, mkënu'kxëtë ets myajmëj myajmayëtë; nëjkxëp tkënu'kxy ja m'u'unkëty m'ëna'këty, mpëjktä'äkyëty, mjë'kxyëty mpëkyëty, mka'ayënëty m'ukënëty, m'uukyëty mtojkxëty ets ja mjëyujk mtsajpkaajëty jam ma ja it naaxwiinyëtën ma ojts Dios ja m'ap m'ok tukwinwanën.

Deuteronomio 8:1

Mpatuntëp ya'atë ënä'ämën tëyajtën mëti'ipë tyam të ntuk'ënä'ämtën, jëtu'un mjuuky'atëty, mnimayëtëty ets m'awinpitëty tu'uk mëj kajpn ets xynyiwa'aktëty ya'atë naax kam, mëti'ipë ja Wintsën tyukwinwa'anëyën ja m'ap m'okëty.

Deuteronomio 9:5

E paaty ka'ap yë'ëkyëjxmëty ko miitsëty oy mja'ay'atë ets ko mëtowtë myajmo'otë ja kuma'ayën; yë Wintsën paaty t'ëxwojpta'ay tääpë ja'ay jä'äkyëjxm ko ja tyu'unën kyajpxënëty ka'ap myëtëyëty ets näjyëtu'un mëët ko tniwa'aka'any ja y'ayuk, mëti'ipë tyukwinwa'anëyën ja Abraham, Isaac ets Jacob, miits ja m'ap m'okëty.

Deuteronomio 10:11

Tyaajës ojts xy'ënëëmë: Nëjkx ets tuknipëjktaakë, tääts tääpë kajpn xywyoowtsoonëty wä'än tniwa'aktë ja it naaxwiinyëtë mëti'ipës ja y'ap y'okëty ojts ntukwinwanëtën.

Deuteronomio 11:9

Ets jëtu'un'äämpy nëjkx jam jeky mtsëënëtë mjuuky'atë, ma ja it naaxwiinyëtën mëti'ipë ojts ja Wintsën tukwinwanën ja m'ap m'okëty ets ja y'u'unk y'ëna'këty, jam jëtu'un ma ja jë'kxy pëky ka'ap y'ëmaaytyä'äkyën.

Deuteronomio 26:3

Ets mnäkyajpxkëxë'ëkëtëty ma ja teetyën, mëti'ipë ënety jam tuunpën; xy'ënëëmëty: Ëjts yë'ëjës yam nikäjpxyp nWintsën wintum ko tëëjës nja'ty ma ya'atë it naaxwiinyëtën mëti'ipë yë Wintsën ojts tukwinwanën yë n'ap'ajt n'ok'ajtëmë, ko t'ënëmaay koos ya'atë naax kam xymyo'oja'antë.

Deuteronomio 26:15

Mijts Dios mëti'ipë jam ijtpën tsajpkëjxm, ma ja m'ijtaknën wa'atspë, ku'ijxnax yaa naaxwiiny, kënu'kx yë mnaax mkajpn, yë Israel kajpn ets kënu'kx näjyëtu'un yë naaxwiinyëtë mëti'ipës të xymyo'otën ma ja jë'kxy pëky ka'ap y'ëmaaytyä'äkyën ets jëtu'un y'atëwëty ja m'aaw m'ayuk tä ojts xytyukwinwanën ëëts ja n'ap n'okëty.

Deuteronomio 28:11

Yë Wintsën nëjkxëp mtuk'ixyë yë y'oyjyot y'oywyinma'any ets m'u'unk m'ëna'k nëjkxëp tyajnimayë, nëjkxëp tyajnimayë näjyëtu'un yë mjëyujk mtsajpkaa ets ja kyënu'kxën yajkëta'akäämpy jam ma ja mkam mtu'ujën, tëkokyë ya'atë kënu'kxën jam tyaka'any ma ja it naaxwiinyëtën mëti'ipë ja m'aptëjk tyukwinwa'anëyën, ko miits mo'oja'anëtë.

Deuteronomio 29:12

E paaty ya'atë käjpxytyu'unën tpa'atwa'akëtë, mëti'ipë ja Wintsën tyam tyuunpyën mëët miitsëty.

Deuteronomio 30:20

Tsoktë jawëtë yë mWintsën, mëmëtowtë ets tu'ukyë yë'ë xypyanëjkxtëkëtëty. Jä'ä ko, ënät mjuuky'atëty ets jeky jam mtsëënëtëty ma ja it naaxwiinyëtën, mëti'ipë ojts tukwinwanën mëët ja aaw ayuk ja kutujkënmëëtpë ja Abraham, Isaac ets Jacob mëti'ipë miits m'ap'ajt m'ok'ajtëpën.

Deuteronomio 31:7

Ënet ja Moisés tmëjwooy ja Josué ets t'ënëmaay, ma ënety jam të nyiye'eypyätën ja Israel ja'ayëty: amëk jotmëk timyajpaat, mijts jëtu'un tyam mpatëp ets xywyoownëjkxëty ya'atë naax kajpn jam ma ja it naaxwiinyëtën mëti'ipë ojts ja Wintsën tukwinwanën ja m'ap m'okëty. E mijts jëtu'un tyam mpatëp ets tääpë yë naax kajpn xynyiwa'kta'ajëty.

Deuteronomio 34:4

Tä ja Wintsën y'ënëmaayë: Ya'atë it ya'atë naaxwiinyëtë jëtu'un ojts ntukwinwanëtës yë Abraham, Isaac ets Jacob ets n'ënëmaaytyës yë y'u'unk y'okëty yë'ë nëjkx ya'atë naaxwiinyëtë tjä'ä'atë. Täätsës të ntuknipëjktaakë, ko mijts oy je'eyë jëkäm xyjyaaknajts'ixëty, jä'ä ko ka'ap nëjkx jam m'ëk ja'ajnë.

Josue 1:6

Jotkujk ets jotmëk mtimnyäyjyawëtëty, jä'ä ko mijts nëjkx xyajwä'kxy ja it naaxwiinyëtë ma ya'atë naax kajpnën, yë'ëjës ntukwinwa'anëy ja m'ap m'okëty koos n'ënëmaaytyë ko ja kyuma'ayën nmo'oja'antës.

Jueces 2:1

Ënet ojts tu'uk yë Dios yë kyukäjpxy jam tsyoony Guilgal ets ojts nyijkxy Boquim, jam t'ënëmaay ja Israel ja'ayëty: Ëjts miits të njuutë jap Egiptë ets yaa të nyajmintë ma ya'atë it naaxwiinyëtën mëti'ipës ojts ja m'ap m'ok ntukwinwanëtën: Ja käjpxytyu'unën mëti'ipë të ntu'unëmën ka'ap ja nijëna'a nyaj'atëkoyä'änyës,