Apocalipsis 7:15 - Biblia Dc en Mixe de Quetzaltepec

¹⁵ Paaty jam y'itë ma ja kutujktaknën ma ja Dios y'u'unyën, xëënaxy tsunaxy ja Dios tmëtuntë ma ja Dios ja tyëjkën. Yë'ë ijx'ijtëtëp këwent'ajtëtëp mëti'ipë u'unyääpyën ma kutujktaknën.

Biblia Mixe de Quetzaltepec

¹⁵ Paaty jam y'itë ma ja kutujktaknën ma ja Tios y'u'unyën, xëënaxy tsunaxy ja Tios tmëtuntë ma ja Tios ja tyëjkën. Yë'ë ijx'ijtëtëp këwent'ajtëtëp mëti'ipë u'unyääpyën ma kutujktaknën.

Apocalipsis 7:15 ပူးပေါင်းရင်းမြစ်များ

1 Reyes 6:13

ëjts nän nëjkxëpës jëtu'un winë ntuny tä ja David ojts ntukwinwanënës mëët mijts; ëjts tsëënëpës yë'ë ma ja Israel ja nyaax kyajpnën ets ka'apës nijëna'a n'ëxmatsa'antë.

1 Crónicas 23:25

Tëë ënety ja David y'ënä'äny: Yë Wintsën, mëti'ipë y'ëwtajtëpën yë Israel ja'ayëty, tëë ja akujk'at jotkujk'ajtën tmo'oy ja nyaax kyajpn ets tëë kë'ëm ja tsyënaaytyakn twin'ixy ko jam y'ita'any Jerusalén.

Éxodo 29:45

Ëjtsës kë'ëm jam timyajpaataanp ma Israel ja'ayëtyën ets ëjtsës xyTios'atëp.

Ezequiel 37:27

Ëjts yajpaataanpës ma yë'ëjëtyën, ëjts nëjkx xyTyios'atë ets yë'ëjëty nëjkxëpës nkajpniwa'any.

Juan 1:14

Mëti'ipë yajtijpën Aaw Ayuk, yë'ë awinpijt naaxwiinyëtë ja'ay ets ojts jyuuky'äty ma ëëtsajtëmën. Tëë n'ijxëm ja myëj'ajt y'oyajtën ets ja myëj'ajt jyääntyajtën mëti'ipë ja Dios Teety tu'kpajk Y'u'unk'ajtypyën, mëët mëj'äämpy ja tsojkën ja'awën ets ja tëyajtën.

1 Corintios 3:16

¿Këtii xynyijawëtë ko miitsëty, jëtu'un yë Dios myajnaxëtë ijxtëm tu'uk yë tsajptëjkënë ets ko ja Kënu'kxymyëkajtën yë'ë jap tsënääpy ma miitsëtyënë?

2 Corintios 6:16

Ka'ap tjëkyepy tu'ukyë yajpaatëty yë Dios yë jyëën tyëjk mëët yë awinax. Jä'ä ko jëtu'un ja Juukpyë Dios xyajwa'anëmë tsyënaaytyaknën. Jëtu'un ijxtëm ja Dios y'ënä'änyën: Tsëënëjaanpës ets juuky'ataanpës ma yë'ëjëtyën, yë'ëjës xyWyintsën'attëp, ets yë'ëjës nja'ay'attëp.

Hebreos 12:2

Mpëjktakëm ja njoot'ajt nwinma'any'ajtëmë ma Jesusën, jä'ä ko yë'ë yäjkpy ets yajkä'pxyp ja nmëpëjkën'ajtëm. Ëyoow ja Jesús kruutskëjxm, ka'ap tmëjpëjktäky ja tsëtyu'un ko y'o'ky, jä'ä ko nyija'ap ënety ko ok y'ita'any ja xoontakën; tëë nyaaxweetsy aka'any'äämpy ma ja Dios ja kyutujktaknën.

Hebreos 8:1

Yë'ë kopkpëky mëti'ipës tyam nnikajpxtëpën: Ko ja nTeety'ajtëm mëti'ipë nyiwintsën'ajtypyën ja teetytyëjk, tëë jam tsajpjotm nyaaxweetsy, a'oytsyow ma ja Dios ja kyutujktaknën.

Apocalipsis 11:19

Ënet ja Dios ja tyëjk y'ëwatsy jam tsajpjotm ets n'ijxyës jap ja kaaxë mëti'ipë myë'ijtypyën ja käjpxytyu'unën, ënät ja wëtsuk të y'ëtëtstä'äky, ja aaw ayuk të yajmëtoy, ja ënääw të y'ënaantä'äky, të tyëkë ja naaxwiinyëtë yu'kxpë, të tsyëyuuypyiky ets të tyëkë mëk tëtsntuupë.

Apocalipsis 13:6

Jëtu'un tjantytyuuny, myëkajpxtëkooy ja Dios ets tni'ojëy ëxëëkjaty ja jyëën tyëjk ets mëti'ipë tsajpjotm ijtëpën.

Apocalipsis 20:10

Ets ja mëjku'u mëti'ipë ënety të twin'ëënyën ja mayjyä'äy, nän jap ja yajkujëpijpëy ma ja mejy tyoyën mëët ja azufre, ma ënety të yajkupipëtën ja mëj jëyujk mëët ja mëti'ipë ja Dios kyäjpxynyajxpë nätyijëpën. Japts y'ëyowëty xëmëkyëjxm, xëënaxy tsuunaxy.

Apocalipsis 21:22

Ni ma kajpn jëtu'un të nka'ixyës ja tsajptëjk ma Dios yajwintsë'ëkën, jä'ä ko ja Dios mëti'ipë maaytyääyëpën winë ets ja mëti'ipë yajtijpën Kupixyny U'unk, yajwintsë'këtëp jä'ä oymyaajëty.

Apocalipsis 22:3

Ka'ap jam tii mëti'ipë yajkajpxpojkxpën. Ja Dios ets ja mëti'ipë yajtijpën Kupixyny U'unk, jä'ä ja kyutujktakn jam itëp ets ja tyuunpëtëjk jam y'ëwtatëtëty.

Apocalipsis 22:5

Ka'ap ja kootspë jam y'ita'any ets mëti'ipë ënety jam tsënaaytyëpën, ka'ap ja kutë'kxn tyajmëyata'antë, ni ja xëëw'an, jä'ä ko ja Wintsën, yë'ë jam kutë'kxëtëp ets yajkutukëtëp xëmëkyëjxm.

Apocalipsis 4:4

Ma ja kutujktaknën, jam n'ijxyës na'ëwtity i'px taxk ja kutujktakn. Jamts ja mëjja'aytyëjk ni''i'px taxk y'u'unyëtë aak poop xoxyëty ets aak pu'ts pujxn kyujup'ajtëp.

Apocalipsis 4:8

Aak tëtujk ja kyäkn tmëët'atë nitu'ukjaty. Nëkëjxy'tsyow ets käkn pa'tkë'ppaat ja wyiin tmëët'atë. Xëëny koots ja Dios tja'amyätstë ets y'ëna'antë: Wa'ats, wa'ats, wa'ats ja Wintsën, Dios Mëti'ipë Maaytyääyëpën Winë; tëëpë y'ityën, mëti'ipë tää'ajtpën ets mëti'ipë itaanpën.

Apocalipsis 4:9

Ko ja nimajktaxkpë ja juuky'ajtpë tmëjjaw tjaantyjawëtë, twintsë'ëkëtë ets tkukajpxëtë ja mëti'ipë u'unyääpyën jam kutujktaknjotm ets mëti'ipë juukyajtpën xëmëkyëjxm,

Apocalipsis 7:9

Ko jëtu'un y'ëkjajty, ënätës n'ijxy ja nimayjyä'äy, mëti'ipë tso'ontëpën wiink naax wiink kajpn ets wiink aaw wiink ayuk kyajpxtëp. Jam tyänëtë ma ja kutujktaknën ets ma ja Kupixynyën, nimay yajxon ka'ap tjëkyepy nmëtyo'owmëty. Poop xoxyëty, kum aay myënëjkxtëp.