1 Samuel 24:4 - Biblia Dc en Mixe de Quetzaltepec

⁴ Tä ja David ja jyä'äy y'ënëmaayë: Tyam jëtu'un tniwä'äky ko ja Wintsën m'ënëmaayë ko ja mmëtsip nëjkxëp jëna'a tpëjktä'äky mteky'ix'am. Paaty tyam mijts ix tii mtunäämpy. Ënet ja David pyëti'ky ame'tsyë ets ojts wäänë tputsujkë ja Saúl ja nyijän, ni''ix a'ixë ojts tputsuky këtiipë y'ixëtëty.

Biblia Mixe de Quetzaltepec

⁴ Tä ja David ja jyä'äy y'ënëmaayë: Tyam jëtu'un tniwä'äky ko ja Wintsën m'ënëmaayë ko ja mmëtsip nëjkxëp jëna'a tpëjktä'äky mteky'ix'am. Paaty tyam mijts ix tii mtunäämpy. Ënät ja David pyëti'ky ame'tsyë ets ojts wäänë tputsujkë ja Saúl ja nyijän, ni''ix a'ixë ojts tputsuky këtiipë y'ixëtëty.

1 Samuel 24:4 ပူးပေါင်းရင်းမြစ်များ

2 Samuel 4:8

ets tkë'ë moja'antë ja David, ma ënety jam yajpaatyën Hebrón. Ko jam jyajtë tääts t'ënëmaaytyë: Yajkutujkpë, tyaa ëëts nmintë, yë'ëjës nmëmiintëp yë Is-boset yë kyëpajk, yë Saúl yë myaank, ja mëti'ipë ijty mëtsip'ajtëpën ets xëmë m'ixjëtity mpajëtityë. E jä'ä ko wa'ats yajnijawë ko yë Wintsën yë'ë winë tyuuntääpy, ix ojts y'ooky ja Saúl, e tyam näjyëtu'un ja y'u'unk y'ëna'k.

Job 31:31

Ko ijty tu'uk yë ja'ay, mëti'ipë tsënääpyën maas yë ntëjkën nëkoo ëxaty tuna'any yë jaaypyo'kxy,

Salmos 142:1

Mëkës yë Wintsën nmëkäjpxy, mëktä'äkyës n'amëtoy ets tmëët'atëty yë pa'ëyo'ow najts'ëyo'owën maas ëjtsën.

Salmos 57:1

Dios, mëti'ipës nTios'ajtypyën, mëët'at pa'ëyo'owën najts'ëyo'owën mëët ëjts, jam ma mijtsën jamës n'ixta'ay yë kuwa'anën. Jamës nnäyutsa'anyë ma mijts mkëwent'atyën koonëm ja ëyo'on jotmay nyaxëty.

Éxodo 21:13

E pën ka'ap ja myëku'uk tsokyëty të tyaj'ooky ets pën jëtu'un ënety ja Dios të timyajkutujkpë ets y'ookëty, ok ntuk'ëwaanëty ma nëjkx kyäktso'okyën.

1 Samuel 22:1

David ënätyë kyeky, jam ojts nyijkxy ma ja aankën mëti'ipë xyëëw'ajtyp Adulam. Ko jam ja y'äjty tnija'awëtyë ets ja jyiiky myëtu'uk, ënätyë ojts nyiminëtë.

1 Samuel 23:17

Tä t'ënëmaay: Ninu'un mkatsë'ëkëty David, jä'ä ko yë nteetyës ka'ap nijëna'a mpaatëtëty. Mijts kopkpëky ko jëna'a myajkutujkpë'atëty ma Israel kajpnën. Ëjts naxymyës nëjkx n'ity ma mkutujktaknën. Yë nteetyës, Saúl, wa'ats yë tyäty nyijawë ko jëtu'un jyata'any kyëpäta'any.

1 Samuel 23:7

Ja Saúl ojts yajtuknijawë ko ja David tam ënety yajpaaty Keilá, ets myääy tyäjy: Tëë yë Dios kyë'ëyäkyë maas ëjtsën, paaty yë të nyëjkxpë jam Keilá ets ni'ëtujkpety jam.

1 Samuel 24:10

Tyam tëë kë'ëm xy'ixy, mijts Wintsën, ko ka'apës mijts të nyaj'ooky. Yë Dios tëë mjakë'ëyäkyë ko tyam ojts të mjëtity jap aankjoty, kajxyëp tsyipëty jeexyë mijts të nyaj'ooky, e tëë mpokymye'kxy. Jä'ä ko tyaajës të nmay të ntajy ko mijts m'ëne'emy, Dios jëtu'un të mpëjktä'äkyë m'ënä'ämëty.

1 Samuel 24:18

tyamës të xytyuk'ixy, ko mijts jä'ä mtsojkpy wi'ixës mëpaat oy tsuj nyajpaatyën, jä'ä ko ix tëëjës yë Wintsën xyjyakë'ëyäky ma mijtsën etsës jeexyë të xyaj'ooky, e ka'apës të xyaj'o'knëpë.

1 Samuel 26:23

Ets Wintsën yë'ë kë'ëm y'ixëp pën oy në'ëye'eyp tu'uye'epy ets pën mëtëy winë tyuunpy. Yë Wintsën tëë tyam tjapëjktä'äky ëjts nkë'ëjotmës ja mëj'ënä'ämpë etsës jeexyë të nyaj'ooky të nyajtëkoy, ëjts ka'apës ja ëxëëk winma'any jëtu'un të npaaty, etsës nyaj'ook nyajtëkoyëty ja mëj'ënä'ämpë mëti'ipë ja Wintsën kë'ëm të twin'ixyën.