1 Reyes 4:25 - Biblia Dc en Mixe de Quetzaltepec

²⁵ Mapaat ja Salomón jyuuky'äjtyën, yë Israel ja'ayëty ets Judá ja'ayëty jampë Dan yajpaatën ets tyimja'ty jam Beerseba aak jotkujk y'ijtë; nitu'ukjaty aak kyë'ëmtuunk tyuunk'ajtëp; nyiyu'ujëtëp ja higo kepy ets ja parrë.

Biblia Mixe de Quetzaltepec

²⁵ Mapaat ja Salomón jyuuky'äjtyën, yë Israel ja'ayëty ets Judá ja'ayëty jampë Dan yajpaatën ets tyimja'ty jam Beerseba aak jotkujk y'ijtë; nitu'ukjaty aak kyë'ëmtuunk tyuunk'ajtëp; nyiyu'ujëtëp ja higo kepy ets ja parrë.

1 Reyes 4:25 ပူးပေါင်းရင်းမြစ်များ

Miqueas 4:4

Oy nëjkx jyuuky'atë yë ja'ayëty ets ka'ap nëjkx tsyë'ëkëtë jyawëtë; nëjkxëp yë ja'ayëty pyo'kxtë pyëktë kepypya'tkë'ëy ma higos pa'tkën ëkë ma tsatym kyepy nyinikën. Yë Wintsën, yë'ë kë'ëm të y'ënä'äny, mëti'ipë maaytyääyëpën winë.

Zacarías 3:10

Ko ënety jëtu'un ja xëëw po'o tukja'ty, jotkujk nëjkx mjuuky'atë nixim niyam, ka'ap tiitsip y'ita'any ets nëjkx xytyukxoonta'aktë ja mtsatymkyamëty ets m'higuerë kamëty. Ëjts Wintsën, mëti'ipë maaytyääyëpën winë, ëjts ënaanp.

2 Reyes 18:31

këtii xymyëpëktëty. Yë Asiria yajkutujkpë paatyës të xykyexy ets miits n'ënëëmëtëty ets xytyuntëty tu'uk yë näykyajpx'oyë mëët yë'ë ets m'ëna'antëty ko ka'ap ntsiptuna'antë ets tu'k'ëtëyë je'eyë jam mtimnyäykyuwanëtëty ma Asiria ja'ayëtyën; jëtu'un ja mkam mtu'ujëty je'eyëm xymyëët'atëty ets xyjyë'kxtëty xypyëktëty ja mëti'ipë të xypyän të xykyojtën.

Jueces 20:1

Ënet ja Israel ja'ayëty tëkokyë tyu'ukmujktaaytyë mëti'ipë tso'ontëpën Dan, Beerseba ets Galaad, jëtu'un nyämyujkëtë tu'kja'aypyën jam Mizpá, Wintsën wyintuuy.

Ezequiel 38:11

Nëjkxëp m'ëna'any: Yë'ëjës yam nitëkëjäämpy yë kajpn ka'apë myäyën nyäkyuwa'anëtëty, ma tsyëënëtën yë ja'ay akujk jotkujk ets ka'apë tii tmaytyë tajtën, tu'kë'ëyë ja naax kajpn mëti'ipë ka'ap nyapotsyëtyën, ka'apë nyi'akajën ets ka'apë tmëëtëtyën mëti'ipë yajtukjëkojtë'kpën.

Isaías 60:18

Ma mnaax mkajpnën ka'ap nëjkx nijëna'a y'ëkyajmëtoownë jëën tsip, ka'ap nëjkx naax kajpn y'ëkkutëkooynyë ets xit ko'ow y'ëkjajnë; jä'ä nëjkx ja mpotsy yajtijy yajnitsokpë ets ja mtëjk'aaw mëjpëjktakën.

2 Samuel 24:15

Ënet ja Wintsën ojts tnajtskäxë ja pa'am ëyo'on jä'ä jopy, ma ja Israel kajpnën, tyimtso'ontäky jam Dan ets tyimja'ajty jam Beerseba, jä'ä ja ja'ay niwinë y'o'ktë nitëkë'px majk.

2 Samuel 17:11

E mijts mëti'ipë ntukwinjawëjäämpyën, mëti'ipë jeexyë mëpaat xytyunyën, nikë yajmujkta'a tëkokyë yë ja'ay mëti'ipë jam tsënaaytyëpën Dan ets jampaat Beerseba, ko yë'ëjëty nyämyukëtëty yajxon ënety nimay nyäpyatënëtë jëtu'un tä yë nëë ajinën ets mijts kë'ëm ya'atë tsip mtimwyinwowëp.

1 Samuel 3:20

Tu'kë'ëyë ja naax kajpy jampë yajpaatën ma Dan y'itjotmën ets ma txëëwatyën Beerseba ojts tnijawëtë ko yë Samuel yë'ë ënety tu'uk mëj Dios mëtuunpë mëti'ipë nyikajpxëpën ja Wintsën ja y'aaw y'ayuk jëwyiin jëyëjp.

1 Crónicas 22:9

E nëjkxëp tu'uk yë mmaank y'ity, mëti'ipë jotkujk yajpaatammpën ets ka'ap tiitsip tpaata'any; ëjts kë'ëm ntuknipëjktaakëjäämpy ets ka'ap nëkoo myëtsip yajjotkëxëtëty. Paatykyëjxm txëëwata'any Salomón. Ma ënety yë'ë tyunyën akujk jotkujk nëjkx ja naax kajpn yajpaaty.

Isaías 36:16

këtii xymyëpëktëty. Yë yajkutujkpë, Asiria ja'ay, jëtu'un m'ënë'ëmxëtë ets mëët ja tsip xykyajpx'oyëtëty ets tu'k'utëyë je'eyë mtimnyäkyë'ëyakëtëty, jëtu'unts xyjyë'kxtëty xypyëktëty ja mkë'ëmtsatym mëti'ipë të xynyiyu'ujëtën ets ja xe'enky tsya'am xyjyë'kxtëty mëti'ipë mkamjotm myaj'itëpën ets akujk jotkujk xy'uuktëty xypyëktëty ja nëë mëti'ipë të xynyipotsëtën.

Ezequiel 39:26

Nëjkxëpës nyajtso'onta'atë ma wiink naax wiink kajpn yajpaatën ets ma myëtsip yë nyaax kyajpnëtyën, ënät nëjkx jyuuky'atë jotkujk kyë'ëm naaxjoty kyë'ëmkajpnjotyëty ma ka'ap pën y'ëtsë'ëkëtëty. Jëtu'un nyaj'ixëtëtyës ja nwa'ats'ajtënës ets may ja naax kajpn t'ixtëty. Yë Israel ja'ayëty myëtänëjantëp yë ëyo'on ko ënety të xykyäjpxy kumëtoownaxtës.