1 Reyes 21:25 - Biblia Dc en Mixe de Quetzaltepec

²⁵ Ka'ap ojts maa jëtu'unpë yajkutujkpë nijëna'a tyuny, mëti'ipë ojts yi'iyë tyo'oxytyëjk nyätyuk'ëne'emyën, ijxtëm yë Ahab tyuunën yë tyo'oxytyëjk Jezabel ets je'eyë ojts nëkoo tii ëxëëkjaty tyuktuuntëkoyë jam Wintsën wyintum.

Biblia Mixe de Quetzaltepec

²⁵ Ka'ap ojts maa jëtu'unpë yajkutujkpë nijëna'a tyuny, mëti'ipë ojts yi'iyë tyo'oxytyëjk nyätyuk'ëne'emyën, ijxtëm yë Ahab tyuunën yë tyo'oxytyëjk Jezabel ets je'eyë ojts nëkoo tii ëxëëkjaty tyuktuuntëkoyë jam Wintsën wyintum.

1 Reyes 21:25 ပူးပေါင်းရင်းမြစ်များ

1 Reyes 21:20

Tä ja Ahab t'ëtsooy ja Elías: ¿Tyamës nijawë ko mijts, nmëtsiptëmës jëtu'un të xypyääty? Jëtu'un, tëë yam npaaty, jëtu'un y'ëtsooy ja Elías. Jä'ä ko mijts nitii oy xykyatuny, aakyë'ë mtuumpy ka'apë myëtëyëtyën Wintsën wyintum.

Proverbios 22:14

Yë wiink to'oxytyëjk jëtu'un npëjktakmëty tä mëjjutën ma kyuka'anaxtën yë ja'ayëty mëti'ipë Dios të tpokyën.

Eclesiastés 7:26

Tëës npaaty tu'uk yë winma'any mëti'ipë yajma'typën yë juukyajtën: tu'uk yë to'oxytyëjk mëti'ipë yë jot winma'any je'eyë tyuk'ëyi'kpyën ets tyajjaty yë aaw jot tsumpyën xotypyën. Mëti'ipë ja'ay jyä'ämyejtsypyën yë Dios kyukä'äkëp yë jëtu'unpë, e mëti'ipë najtspëkë ja'ay'ajtpën poj'am jam kya'ajëty.

Romanos 6:19

Jëtu'unës nmëtyä'äky ijxtëm miits mja'ay'atën yaa naaxwiiny, ko ëmaay paki'ix myajpaatë, ko ka'ap oy xyjyä'äkyukëtë ya'atë jëtu'unpë winma'any. Jëtu'un ijxtëm miits ijty xykyë'ëyaktën ja mjot mnini'kxëty ma ja ëxëëkpën; jëtu'un tyam xykyë'ëyaktëty ja mjot mnini'kxëty ma ja oypyë ja nipaye'eyënën ets wa'ats mjuuky'attëty.

Hechos 14:2

Ja jutiis ja'ayëty mëti'ipë ka'ap myëpëktën ojts t'akajpxëtë ja ja'ay mëti'ipë ka'ap jyutiis'atën ets tyajwinmaaytyëkajtstë ets tmëtsiptsoontëty ja mëti'ipë ënety të myëpëktën.

1 Reyes 21:7

Ënet ja Jezabel, mëti'ipë ja Ahab tyo'oxytyëjk'ajtypyën y'ëtsoowë: Yaa Israel, mijts yaa m'ënä'ämp ¿këtiijë? Kay uuk akujk jotkujk. Ëjts nija'ap wi'ixës yam tääpë Nabot y'uvëkam mpatës ets mijts xyjyä'ä'atëty.

Hechos 6:12

Tääts ja naax kajpn tyajjoot'anpëjktë ets ja mëjja'aytyëjkëty ets ja tsajptëkotyëtë yaj'ijxpëjkpëtëjkëty ets tmajtstë ja Esteban. Tääts ojts tyajnëjkxtë ma ja tsajptëkotyëtë yajjuntë'ajtpën.

Isaías 52:3

Jä'ä ko yë Wintsën jëtu'un y'ënä'äny: Ëjts nitu'kjënu'unën të nka'ëxajës ko ojts myajnitooktë, tyam nän nitu'kjënu'unën kyatsokyë ets nyaj'ëwaatsëpëtsëmtëty.

Isaías 50:1

Jëtu'un ja Wintsën y'ënä'äny: Miitsëty këtii m'ëna'antëty ko paatyës ja Israel kajpn të n'ëxmatsy, mëti'ipë miits mtaak'ajtëpën ëkë paatyës të ntooky ma wiink kajpnën jä'äkyëjxm koos ënety pën nmënu'kxy'äty. Miitsëty paaty të myajtooktë wiink naax wiink kajpn jä'äkyëjxm ko të mpokytyuntë; ja Israel kajpn paaty të yaj'ëxmatsy jä'ä ko miitsëty je'eyë të mkäjpxykyumëtoownaxtë.

2 Reyes 23:25

Ka'ap ojts nitu'uk jëtu'unpë yajkutujkpë y'ëk'ijnë tä ja Josías ëmuumtu'ukjot jyotwinpijtyën ets ja Wintsën tmëtuuny winë aaw winëjot ets mëët tu'kë'ëyë ja jyot wyinma'any; jëtu'un tä ja tëyajtën myinyën kuja'ay mëti'ipë ja Moisés yajmooyën.

2 Reyes 17:17

Ojts ja y'u'unk y'ëna'k tyajnitooynyëtë, tyajknëtë ets wyintsë'kën'atëty, ojts tjajtnëtë wi'ix winë tnajtsjawëtëtyën ets ojts tnija'awënyëtë wi'ix ja kë'ë tyajmëtya'aktëtyën, tuunëtë tkajpxnëtë ja ëxëëkpë, mëti'ipë ja Wintsën ojts tukyajjoot'anpëktën.

1 Reyes 19:2

Ënet ja Jezabel ënätyë tkejxy tu'uk ja kukäjpxy ma ja Elías jam yajpaatyën ets t'ënëëmëty: Pën mijts mxëëwajtyp Elías ëjts jä'äs nxëëwajtyp Jezabel. Ëjts mëj këjääjës yë wintsëntëjk xytyukpoky'atëty ko mijts ka'ap jëpom ya'atpë horë näjyëtu'un mjatëty mkëpätëty tä yë Baal yë myëtuunpëtëjk të xytyunyën.

1 Reyes 18:4

paaty ko ojts ja Jezabel may tyaj'ooky ja ja'ayëty mëti'ipë ja Wintsën myëtuuntëpën, yë Abdías, may ojts tyajtso'oky yë Wintsën mëtuunpëty, wëxtyikxy majkjaty tpëjktäky ets tyu'ty, yë'ë tyim yajkaay.

Romanos 7:14

Nnija'awëm ëëtsajtëm ko yë ënä'ämën ka'ap yaj'ixy, e ëjts jä'äs ko npokyjyä'äyëty, paatyës jëtu'un nyajpaaty pokyjotm ijxtëm tu'uk ja ja'ayën mëti'ipë juy tookyën.

Apocalipsis 2:20

E jam tu'uk mëti'ipës ka'ap n'oy'ixyën: ko mijts jam xyaj'ity yë to'oxytyëjk Jezabel, mëti'ipë nätyijëpën Dios ayuk kajpxnajxpë. Yë y'ijxpëjkën tyukwin'e'empy ja mëpëjkpëtëjk ko y'ënä'äny ko ka'ap pyokyëty oy xim yam ja ye'etyëjk ëkë ja to'oxytyëjk tmëët'atëty ets oy tjë'kxtëty mëti'ipë tëë yajtukwintsë'ëkën ja awinax.

1 Reyes 18:18

Ëjts ka'apës ni pën n'ëxëëk wiinkajpxë, jëtu'un t'ëtsooy yë Elías; mijtsën tëy, mëët yë mja'ay, mëët ko ja Wintsën ja y'ënä'ämën tyiyajtën të xy'ijxmajtsnëtë ets jä'ä oy xymyëjja'awënëtë ja ka'apë Wyintsënëtyën tä ja Baal ja y'awinaxën.

1 Reyes 22:52

Yë'ë ëxëëk ojts winë tuny Wintsën wyintum, jä'ä ko jä'ä ojts ja ëxëëk tu'u tpëky mëti'ipë ja tyeety tyaak pyanëjkxtën ets mëti'ipë ojts näjyëtu'un tpanëjkxtëkën ja Jeroboam, yë myaank yë Nabat, ko tyajpokytyuuny ja Israel kajpn.

2 Reyes 9:34

Tä ja Jehú ojts nyijkxy kääpyë ukpë. Ok ja Jehú ojts tni'ënä'ämë: Nëjkx tääpë, to'oxytyëjk yë nyini'kx yajnaaxtëjkëtë, wi'ix njaaktimtyu'unmëty, yë'ë yajkutujkpë ijty nëëx'ajtëp.

Éxodo 34:16

Ets ni yë'ë mëpaat tkayajpëk tkayaj'uuktë yë nyëëxëty mëët mijts yë mmaankëty, jä'ä ko ënety tuntë tkajpxtë ja ëxëëkpë jam ma ja wyintsënëty t'ëwtatën, tsojk näjyëtu'un ja m'u'unkëty y'ëtëtsta'aktëty.

1 Reyes 16:25

Yë Omri, ëxëëk ojts winë tuny, ka'ap ninu'un Wintsën oy t'ijxy, jaakwäänëni'ik ëxëëk winë tuuny këtiinëm jyëtu'unëty ja yajkutujkpëtëjk mëti'ipë ënety të tyuntën,

1 Reyes 22:53

Ojts näjyëtu'un t'ëwtajnë ja Baal ets ojts twinkoxtënaaynyë, jëtu'un tä ënety ja tyeety të y'ëti'ityën, tyajjoot'anpëjky ja Wintsën, mëti'ipë jam yaj'ëwtajtpën Israel.

2 Reyes 9:22

Ko ja Joram t'ijxy ja Jehú, tä t'ënëmaay: ¿Wi'ix Jehú oypyë myajmiinpyë, ëkë mtsiptunaanpë? Tä ja Jehú y'ëtsooy: ¿Wi'ix yjyää'atëty ja jotkujk'ajtën, pën mijts yë mtaak, Jezabel, je'eyëm tuun'ëtë'ëtsy ja ëxëëkpë, ma ja wiink tios t'ëwtatyën ets ma ja myëku'uk tpatoy tpanaxyën?

Nehemías 13:26

Yë'ë jëtu'un ojts yë Salomón tpoky'äty mëti'ipë yajkutujkën ma Israel kajpnën. E oy nja'ijxmëty ja yajkutujkpë Salomón ka'ap pën myëpatë ijxtëm yë'ë yajkutujkyën ets ko ja nTios'ajtëmë mëk tsyojkë jya'awëy ets pyëjktakë ma ja Israel kajpnën ets jam yajkutukëty, e oy jyajëtu'un'ajty yë to'oxytyëjkëty mëti'ipë wiink naax wiink kajpn yajtso'onën yë'ëtsën ojts yajpokytyunyë.