Zacarías 9:14 - Tayta Diosninchi Isquirbichishan

¹⁴ Tayta Diosga acrashan runacunapa jananpami yurircamonga. Lëchancunatami räyutanöraj jitanga. Quiquin Tayta Diosmi tucanga trompëtata. Nircorga sur caj-läpita löcu wayra aywashannömi shamonga.

Zacarías 9:14 ပူးပေါင်းရင်းမြစ်များ

Job 37:9

Ura caj-läpitami löcu wayra shamun. Jana caj-läpitanami gasay chayamun.

Salmos 18:14

Lëchata jitajnöraj räyuchimusha. Chaura chiquimajcunataga machiypa-machir gueshpichiran.

Salmos 18:15

Tayta Dios piñacur, sinchipa pücariptin lamar rurin alayri ricacäcuran. Munduta tucnarajcunapis alayri ricacaran.

Isaías 18:3

Llapayquimi, intëru munducho tiyajcunaga ricanquipaj puntacho señalta churamushanta. Llapayquimi wiyanquipaj trompëta wagamushantapis.

Isaías 21:1

Lamar lädunpa caycaj Babilonia imano cananpäpis Tayta Dios ribilashanta Isaías cayno willacuran: Neguevpa päsar löcu wayra aywashannömi fiyupa manchacuypaj chaqui jirca nasyunpita illgächicoj suldärucuna aywaycämun.

Isaías 27:13

Chay junäga trompëtatami tucamongapaj. Chaura Asiriacho ogracasha caycajcunawan Egiptuman prësu aywasha caycajcunapis Jerusalenman shamongapaj fiyupa rispitädu lömacho Tayta Diosta adurananpaj.

Isaías 30:30

Asiriata ushananpaj shamur Tayta Diosga fiyupa manchariypaj munayniyoj busnintami wiyacächenga. Rabyashpanmi fiyupa castigangapaj räyuwan, löcu tamyawan, runtuwanpis ima-aycatapis ushacurcoj ninawannöraj.

Isaías 31:5

Imanömi äbi gueshwancho chipshan caycajta täpar jananpa tumapan, chaynömi Jerusalentaga munayniyoj Tayta Dios chapangapaj. Imapitapis ricanga, salbanga, washanga, libri cananpaj ima-aycapitapis jorgonga.»

Isaías 66:15

Tayta Diosga nina ratataycajchömi chayamongapaj. Carrëtancunapis caycan shucucuy wayra gachwaycajnömi. Payga fiyupa rabyasha cashpanmi nina ratataycajwanraj runacunata castigangapaj.

Habacuc 3:11

Fiyupa manchariypaj achicyaypa achicyaycaj lëchayquita ricashpan, achicyaypa achicyaycaj sabliquita ricashpan intiwan quillapis yagashanpita manami yagamunnachu.

Habacuc 3:14

Mandajnincunaga löcu tamyanömi cawalluncunawan muntädu shamuran. Paycunaga fiyupa rabyashami shamuran nogacunata wacpa caypa machiramänanpaj. Nogacunaga manami ima ruraytapis camäpacurächu. Gammi ichanga quiquinpa lëchancunawan wañurachishcanqui.

Zacarías 12:8

«Chay junäga noga Tayta Diosmi imapitapis chapäshaj Jerusalencho tiyajcunata. Chaycho tiyajcuna pishi callpa cajmi cangapaj ray David cashanno fiyupa sinchi. Davidpita mirar aywaj mandaycajcunanami canga Diosno, guërraman aywaycaj runacunapa ñaupanta aywaj anjilnëno.

Zacarías 14:3

Chayno ruraptinrämi quiquin Tayta Dios pillyanga chay nasyun runacunawan. Unaycuna guërracho pillyashannörämi pillyangapaj.

Zacarías 2:5

Tayta Diosmi nin: ‹Jerusalenpaga nogami cashaj intëru cantunpa nina ratataycaj curralninno. Paycunacho cashpänami musyachishaj munayniyoj cashäta› nir.»

Mateo 24:31

Sinchipa trompëta wagamuptin anjilnëcunata cachashaj intërupa aywananpaj. Paycunami llapan acrashä cajcunata may-chaypitapis shuntamonga.

Mateo 28:20

Gamcunata willapashä cajtaga wiyacunanpaj llapanta yachachinqui. Noganami gamcunata yan'gaycäshayquipaj cay pacha ushacänancamapis.»

Romanos 15:19

Chaynöpis runacuna tantiyacunanpämi Espíritu Santu yanapaycäman milagrucunata ruranäpaj. Chaynöpami Jesucristupa willacuyninta sumaj willacushcä Jerusalenpita gallaycur may-chaypapis Ilírico probinsyaman chayanäcama.

Hebreos 2:4

Chaycuna rasunpa cashanta quiquin Tayta Diosmi musyachimashcanchi milagrucunata rurachishpan, almiraypajcunata rurachishpan, acrashancunatapis yachayta gor Espíritu Santuta cachamushpan.

Josué 10:42

Chayno ushacächinanpaj Israel runacuna yäracushan Tayta Dios yanapaptinmi pachacarashanman mana cutiyllapa llapan chay runacunata ushacächiran.

Apocalipsis 6:2

Chaura ricarä juc yuraj cawalluta. Chay cawalluta muntaräga lëchata aptaraycaran. Paytami corönata goran. Chaura payga aywaran binsishanno yapay Tayta Diospa contran cajcunata llapanta binsinanpaj.