Sofonías 1:18 - Tayta Diosninchi Isquirbichishan

¹⁸ Tayta Dios jusganan junäga manami runata salbangapächu guellaynin ni gori charashanpis. Tayta Dios rabyasha caycashanga ninanörämi nasyun intëruta usharengapaj. Cay pachacho tiyajcunataga llapantami juc guepishtayllacho usharengapaj.

Sofonías 1:18 ပူးပေါင်းရင်းမြစ်များ

Génesis 6:7

niran: «¡Imapäraj runata rurarä! Cananga rurashä runacunata ushajpaj illgächishaj. Illgächishaj llapan animalcunata garachaypa purejcunatawan päriypa purejcunatapis.»

1 Reyes 14:22

Roboam ichanga Tayta Diosta mana wiyacur juchallata ruraran. Tayta Diosta fiyupa rabyachiran, unay caj awiluncuna juchata rurashanpitaga mas piyur-raj.

Job 21:30

‹Dios rabyashpan castigaptinpis fiyucunataga manami chayanchu› nir.

Job 3:15

guellayta goritapis palasyunman juntachicoj mandajcunawan iwal.

Salmos 78:58

Mana sirbej altarta puytush lömacunacho rurar, ïdulucunata adurashpan Tayta Diosta rabyachiran.

Salmos 79:5

Tayta Dios, ¿imay-yajraj rabyashalla caycanqui? ¿Imayraj rabyashayqui päsacanga?

Proverbios 11:4

Fisyu chayamushan junäga ima riquësanpis manami chapangachu. Juchaynaj limyumi ichanga wañuypitapis salbaconga.

Proverbios 18:11

Rïcu runaga yarpan imapis mana chayanantami. Yarpan ima-aycanpis siudäta intërunpa curalaraycajno chapänanpaj cashantami.

Isaías 1:24

Chaypitami, Israelcunapa munayniyoj Tayta Diosnin cayno nin: «Cananmi ichanga chiquimajcunataga jusgashayqui imallata rurashayquipitapis. Gamcunataga ayñitami cutichishayqui.

Isaías 10:17

Israelcunapaj achquino caycaj Santo Tayta Diosmi nina rataycajmanno ticracurengapaj. Nircorga juc junajllachömi Asiria runacunata illgarachengapaj cashata shatata nina rupacurcushanno.

Isaías 10:3

Chayno car gamcunaga ¿imataraj ruranquipaj jusgashushayqui öra? Carupita castïgu chayashuptiqui ¿pitaraj mañacunqui? Riquësayquicunatapis ¿maymanraj churanqui?

Jeremías 7:20

Chaymi fiyupa rabyasha caycashä päsananpaj caycho tiyarcaycaj runacunata castigaj-aywä. Castïgu chayanga llapan uywancunaman, llapan yöracunaman, llapan micuynincunamanpis. Chaynöpami rabyashäga cangapaj nina ratarir mana upejno.»

Jeremías 7:34

Judá nasyuncho caj llapan siudäcunacho, Jerusalén cällicunacho cushicuy fista cajpis manami cangapänachu. Manami pipis casaray fistacho birsonganachu. Nasyun intërumi chunyaj ricacongapaj.»

Jeremías 9:11

Tayta Dios nin: «Jerusalentaga ticrachishaj ranramanmi. Chaura jirca allgucunapa tiyanallannami canga. Judächo caycaj siudäcunata ticrachishaj chunyajmanmi. Chaura manami pï runapis tiyanganachu.»

Ezequiel 16:38

Chaycho jusgarmi castigashayquipaj majayoj caycar majayojcunawan cacojtano, wañuchicojtano. Nircorga fiyupa rabyasha cashpämi wañunayquipaj nishaj.

Ezequiel 23:25

Chaynöpami fiyupa rabyasha caycashäta gamcho päsacächishaj. Paycunanami fiyupa ñacachishunquipaj. Sengayquicunata, rinriquicunata rogurgärenga. Cawaycar quëdajcunatanami cuchuypa wañuchishunquipaj. Wamrayquicunata ollguta warmitapis guechushunquipaj. Chayno caycaptillayquimi cawaycar quëdaj cajcunataga nina rupar ushacurcushunquipaj.

Ezequiel 7:11

Pï-maypis mana allillatana ruraycan. Ichanga paycuna manami jucnayllapis quëdangachu. Ni ima-aycanpis manami quëdangachu.

Ezequiel 7:19

Guellaynincunatapis cällicunamanmi mashtarenga. Goritapis mana bälej ganratanömi jitarenga. Rabyar castigashä öraga manami salbangachu guellayninpis, ni gorinpis. Chaycunataga manami micongapächu; ni sacsangapäpischu. Paycunaga gorita guellayta charayta munayllawanmi jucha ruraymanpis chayasha.

Ezequiel 7:5

«Noga, Tayta Diosmi në: ‹Gamcunamanga gatinayllanpami disigrasya chayamoj aywan.

Sofonías 1:11

Mactes baryucho tiyaycajcunaga llapaniqui gaparpay. Chay junäga llapan nigusyanticunami wañongapaj. Llapan guellayta rucajcunami illgangapaj.

Sofonías 1:15

Chay junäga Tayta Dios fiyupa rabyashami caycanga. Chay junäga canga fiyupa llaquicuy junajmi, ima-aycapis ushacänan, illgänan junajmi, fiyupa yanauyaycaj chacaymi.

Sofonías 2:2

Shuntacay juc junaj illgänanpaj caycaj päjatano manaräpis jitarishuptiqui, Tayta Dios rabyashan gamcunaman ninano manaraj chayamuptin, Tayta Diospa fiyupa castïgun manaraj chayamuptin.

Sofonías 3:8

Chaymi gamcunaga ichicllata shuyaycäriy jusganä junajcama. Noga Tayta Diosmi në: Achca nasyun runacunata, raycunata shuntanäpämi yarpachacushcä. Shuntarcurnami rabyasha caycashäta paycunacho gasarpachishaj. Rabyashäga caycan rataycaj ninanörämi. Nina ratariycajno rabyasha caycashäwan castigaptë munducho cäga ushajpaj illgächishami canga.

Mateo 16:26

Chaura rïcuyar cay pachacho ima-aycata charaptinpis ushacänan caycaptenga ¿rïcu cashan bälinchuraj? U ¿Tayta Diospa ñaupanman chayananpäpis rïcu caynin allichuraj canga?

1 Corintios 10:22

¿Tayta Diosninchïta rabyachiytachu munarcaycanqui? ¿Noganchëga paypita mas munayniyojchu canchi?

Deuteronomio 31:17

Chaura nogapis paycunapaj fiyupami rabyacurcushäpaj. Manana yanapäshänachu. Paycuna ñacaptinpis mananami imapis gocamanganachu. Fiyupa ñacar llaquicur-rämi nenga: ‹¿Manachuraj cayno päsaycämanchi Tayta Diosninchi manana yanapämasha?› nir.