Santiago 5:11 - Tayta Diosninchi Isquirbichishan

¹¹ Noganchëga musyanchïmi Tayta Diosninchi munashanno mana yamacaypa goyajcuna cushisha cananpaj cashanta. Tantiyacuy Job fiyupa ñacarpis mana yamacaypa Tayta Diosninchïman yäracushanta. Chayno yäracuptinmi Tayta Diosninchi cuyapäcoj cashpan payta yanaparan. Tayta Diosninchëga noganchïtapis mana gongaypami imaypis cuyapämanchi.

Santiago 5:11 ပူးပေါင်းရင်းမြစ်များ

1 Crónicas 21:13

Chaura Davidga Gadta niran: «Cananga manami ima niytapis camäpacöchu. Mas alli canman Tayta Dios munashanno castigamaptinmi. Payga fiyupa cuyapäcojmi. Manami munächu runacunapa maquincho ñacaytaga.»

2 Crónicas 30:9

Gamcuna Tayta Diosta yapay yarpashpayqui mañacuptiquega wauguiquicunata, wamrayquicunata prësu apaj juc-lä nasyun runacunapis cuyapashpan cachaycäramongami cay nasyunman cuticamunanpaj. Tayta Diosninchëga cuyapäcojmi, fiyupa allimi. Yäracuptinchëga manami wasguipämäshunchu.»

Nehemías 9:17

Paycunata salbanayquipaj milagrucunata rurashayquitapis gongaycärirmi yachachishayquicunataga manana rurarannachu. Chayno mana wiyacoj cashpanmi paycunaga churacarcäriran juc mandajninta yapay uyway cananpaj Egiptuman cutichinanpaj. Chaypis gamga canqui Tayta Dios llapantapis perdunaj, alli, cuyapäcoj, jucllaga mana rabyacojmi. Chaymi paycunataga mana cachaycushcanquichu.

Nehemías 9:31

Cuyapäcoj cashpayquimi ushajpäga mana illgächishcanquichu, ni gongaycushcanquipischu. Gamga fiyupa cuyapäcoj Tayta Diosmi canqui.

Job 1:1

Uz partichömi juc alli runa tiyaran. Llapan shongunpa Tayta Diosllata sirbej. Mana alli ruraycunataga amatar manchacoj. Paypami jutin caran Job.

Job 1:2

Wamrancuna caran quimsa warmi, ganchis ollgu.

Job 2:10

Chaura Job niran: «¡Diosman mana yäracoj warmicuna-niraj rimaycanqui! Tayta Dios ima-aycatapis tarichimashaga cushishami goyashcanchi. ¿Imanirtaj mana awantashwanchu mana allicuna chayamashapis?» Chayno mana allicuna chayaycaptinpis Jobga manami juchata ruraranchu ni parlayllapapis.

Job 23:10

Paymi ichanga musyaycan imano goyashätapis. Juchäta ashiptinpis gori limyuyashanömi quëdashaj.

Salmos 103:13

Juc runa wamranta alli ricashannömi Tayta Diospis Payta rispitajcunataga alli ricamanchi.

Salmos 103:8

Tayta Diosga cuyapäcojmi alli shongumi. Payga juclla mana rabyacoj, amatar cuyacojmi.

Salmos 116:5

Tayta Diosga allita rurajmi, cuyapäcojmi. Tayta Diosninchëga alli shongumi.

Salmos 119:132

Tayta Dios, rispitashojcunataga allimi ricanqui. Chayno nogatapis cuyapämashpayqui alli ricaycamay ari.

Salmos 145:8

Tayta Diosga fiyupa alli, cuyapäcojmi. Payga juclla manami rabyacunchu. Payga fiyupa cuyacojmi.

Salmos 37:37

Masqui ricay juchaynaj runata, Dios munashanno goyaj runata. Chay runaga shamoj watacunacho allillami goyanga.

Salmos 51:1

Tayta Dios, gamga cuyapäcojmi canqui. Cuyapaycamay ari. Alli shongumi canqui. Juchäcunata perdunaycamay ari.

Salmos 78:38

Imano captinpis Tayta Diosga cuyaparanmi. Juchancunapita perdunaran. Chaynöpami ushajpäga mana illgächiranchu. Achca cutimi rabyashpanpis pasinsacuran. Rabyarpis mana castigaranchu.

Salmos 86:15

Tayta Dios, chaypis gamga canqui alli shongumi, cuyapäcojmi, pasinsacojmi, cuyacojmi, rasun cajta rurajmi.

Salmos 86:5

Tayta Dios, gamga canqui allimi, imapitapis perdunajmi. Amatarmi cuyanqui gamman mañacamojcunataga.

Salmos 94:12

Tayta Dios, cushishami cawanga imano cawananpäpis piñacushayqui runaga. Cushishami cawanga Layniquita yachachishayqui runaga.

Éxodo 34:6

Moisespa ñaupanpa päsashpan Tayta Diosga cayno niran: «¡Nogaga Tayta Diosmi cä! ¡Nogaga Tayta Diosmi cä! Cuyapäcoj, alli shongu Diosmi cä. Jucllaga imapitapis mana rabyacojmi cä. Pasaypa cuyacojmi cä. Rasun cajta rurajmi cä.

Eclesiastés 7:8

Aruyta ushaymi mas alli, aruyta gallaycunanpitaga. Imapitapis pasinsacuymi mas alli mana pasinsayoj cananpitaga.

Isaías 63:7

Nogaga Tayta Dios cuyapäcoj cashantami parlayta munä. Tayta Diosga noganchïpaj ima-aycatapis rurashami. Israel runacunata fiyupami cuyapasha. Cuyacoj cashpan yanapämashanpitami payta alabayta munä.

Isaías 63:9

Llapan ñacaycunapitami runacunataga salbaran. Paycunata salbananpäga manami anjilnintachu cachamuran. Chaypa ruquenga quiquin Tayta Diosmi cuyapäcoj cashpan paycunata salbaran. Paymi jatarcachishpan margacurcur shuntasha. Imaypis chaynömi yanapasha.

Lamentaciones 3:22

Tayta Dios cuyacoj cashanga manami imaypis ushacanchu. Cuyapäcoj cayninpis manami ushacanchu.

Daniel 9:9

Tayta Dios, gammi canqui cuyapäcoj, perdunacoj. Ichanga nogacuna gampa contrayquimi ricacurä.

Joel 2:13

Tayta Diostana wiyacuy. Röpayquicunata rachinayquipa ruquenga llapan shonguyquipa arpinticuy. Tayta Diosga amatar allimi; fiyupa cuyapäcojmi; pasinsacojmi; fiyupa cuyacojmi. Arpinticuptenga castigananpaj caycashanchöpis manami castigannachu.

Jonás 4:2

Chaymi Tayta Diosta mañacushpan niran: «Tayta Dios, willacoj aywanäpaj wasëcho caycajta gayamaptiqui nogaga maynami musyarä cuyapäcoj cashayquita. Chaypitami Tarsisman aywacuyta munarä. Nogaga musyämi gam fiyupa cuyapäcoj alli cashayquita, jucllaga rabyayta mana yachashayquita. Chaymi castiganayquipaj willacarcachirpis cuyapanqui.

Miqueas 7:18

«Gamnöga manami juc Dios canchu. Gamga perdunanquimi mana allita rurajtapis. Chaynöpis gonganquimi nogacuna wallcalla quëdaj acrashayqui runacuna juchata rurashäta. Imaycamapis manami rabyashallaga cacunquichu. Gamga nogacunata cuyamashayquita musyachimanquimi.

Números 14:18

‹Jucllaga manami rabyacöchu. Amatar cuyacojmi cä. Mana allita rurajcunata, mana wiyacojcunata perdunä. Chaypis juchayojcunataga castigä maman-taytanta, wamranta, willcanta mas willcan cajtapis› nir.

Mateo 10:22

Noga-jananmi pï-maypis chiquishunquipaj. Chayno chiquishuptiquipis ushanancama nogaman yäracamaptiquega salbashami canquipaj.

Lucas 1:50

Pay munashanno cawajcunata Diosninchëga imaycamapis cuyapangami.

Lucas 11:10

Mañacoj cäga chasquinmi. Ashej cäga tarinmi. Gayacur puncuta tacaj cajtaga quichapanmi.

Lucas 6:36

Tayta Diosninchi cuyapäshushayquino gamcunapis cuyapay pï-maytapis.

Romanos 2:4

¿U Tayta Dios cuyapäcoj, pasinsacoj, alli captinchu yarpanqui mana castigashunayquipaj cashanta? Payga cuyapäshushpayquimi munan jucha rurashayquipita arpinticur pay munashannöna cawanayquita.

Efesios 1:6

Chaynöga rurasha cuyapämashanchïpita imaypis Tayta Diosninchïta alabananchïpämi. Cuyay wamran-raycumi Tayta Diosga chasquimashcanchi.

Efesios 2:4

Ichanga Tayta Diosninchi fiyupa cuyapäcoj carmi cuyapämashcanchi.

Hebreos 10:39

Noganchëga manami guepaman cutejcunano infiernuman gaycusha cananchïpächu caycanchi. Chaypa ruquenga Jesucristuman yäracushanchïpitami salbashana caycanchi.

Hebreos 3:14

Imaycamapis Jesucristuman yäracur pay munashanno cawashpanchëga paypa yanapajninmi caycanchi. Chaymi mana cachaypa payman yäracorga noganchïpis payno cashunpaj.

Hebreos 3:6

Jesusmi ichanga mana capuralnachu. Payga quiquinpa wasinchöna caycan Tayta Diospa wamran cashpanmi. Noganchïpis Jesusman mana yamacaypa yäracur nishancunata imaypis cumlerga Tayta Diospa wamrannami caycanchi.

Santiago 1:12

Cushishami goyanga ima chayamuptinpis Tayta Diosman sïguir yäracojcunaga. Sïguir yäracuptenga Tayta Diosninchïmi aunishannölla premyuta gonga. Llapan cuyajcunallatami chay mana ushacaj caway premyutaga gonga.

Santiago 1:2

Ermänucuna, ima ñacayman chayarpis ama llaquicuychu; chaypa ruquenga cushisha goyay-llapa.

1 Pedro 1:13

Chaura sumaj tantiyacurir Tayta Diosninchi munashanno mana yamacaypa caway. Ama gongaychu Jesucristo cutimur Tayta Diosninchïpa ñaupanman pushashunayquipaj cashanta.

1 Pedro 3:14

Allita ruraycarpis ñacar-imarga cushicuy. Pitapis ama manchacuychu. Ama llaquicuychu.

2 Pedro 2:9

Chaynöpami musyanchi yäracojcunataga Tayta Diosninchi salbashanta. Juchasapacunatami ichanga ñacaycächin. Y fisyu junajpis ñacayman gaycurenga.