Oseas 2:20 - Tayta Diosninchi Isquirbichishan

²⁰ Nogaga mana cachaypanami chararäshayquipaj. Chaymi nogapis gampana cashäpaj. Nogatanami ‹Tayta Diosnë› nimanquipaj.

Oseas 2:20 ပူးပေါင်းရင်းမြစ်များ

Génesis 9:10

Büquipita llapan casta llojshej animalcunawanpis conträtutami rurashun. Conträtuta rurashanchëga canga llapan casta äbicunapaj, uywana caj animalcunapaj, chucaru caj animalcunapaj, mundu intërucho caj animalcunapäpis.

Isaías 2:4

Tayta Diosmi arriglanga llapan nasyun runacunata. Nircorga paynami chiquinacuycaj nasyun runacunata nenga imano goyänanpäpis. Chaura chay runacunaga sablincunatapis ticrachenga rëjancunamanmi. Tucsicuna lansancunatapis ticrachenga ösincunaman. Juc nasyunpa contran mananami maygan nasyun runacunapis yapayga aywanganachu pillyacunancunawan. Chayno captin mananami guërrapäpis yachachinaconganachu.

Isaías 62:4

Runacuna mananami yapayga «Cacharisha» nishunquipänachu. Chaypa ruquenga «Tayta Dios fiyupa cuyashan» nishunquipänami. Tiyashayqui partitapis mananami «Illgächisha» nenganachu. Chaypa ruquenga «Tayta Diospa majan» nenganami.

Jeremías 24:7

Noga Tayta Dios cashätami tantiyachishaj. Chaura paycuna canga noga acrashä runacuna. Nogana cashaj paycunapa Diosnin. Chaynöga canga llapan shongunpa nogaman yapay yäracamuptinnami.

Jeremías 30:10

«Noga Tayta Diosmi në: «Jacobpita mirar aywaj Israelcuna, ama manchacuychu. Sirbimajcuna ama manchariychu. Caru nasyunman apashushayquipitami gamcunata y llapan wamrayquicunata jorgamushayquipaj. Chaypitaga allinami goyäcunquipaj. Alli goyäcuptiqui pipis manami manchachishunquipänachu.

Jeremías 32:41

Alli goyänanpaj paycunata yanapashpämi cushicushaj. Llapan shongöwan cuyashpämi paycunata cay nasyunman tiyachishaj.

Jeremías 9:24

Ichanga pipis cushicuchun nogata rejsimashanpita, nishäta rurashanpita, Noga Dios cashäta musyashanpita. Cushicuchun cay pachacho pï-maytapis cuyashäta, allita rurashäta, rasun cajta rurashäta musyashanpita. Chayno caj runami ichanga nogata cushicachiman.» Tayta Diosmi chayno nisha.

Ezequiel 16:62

Gamwanga yapaymi conträtuta rurashunpaj. Chaura gamcuna musyanquipaj noga Tayta Dios cashäta.

Ezequiel 16:8

« ‹Chaypitaga, ñaupayquipa yapay päsarä. Chaychöga jatuntana ricarä. Chay öraga allina caycarayqui majayoj canayquipaj. Chauraga gamwan camacashpanchi cäpäta mashtarcamur galalla caycaptiqui chaparcurä. Nircur alli goyänapaj parlaranchi. Chay örapita-pachami nogapana cashcanqui. Noga Tayta Diosmi chayno në.

Ezequiel 34:25

« ‹Uyu uyshano caycaj acrashä runacunawanmi alli parlacushaj allillana goyänanpaj. Israel nasyunpitaga micucoj animalcunata illgächishämi. Chaura paycunaga jäcoj intëru jircacunacho mana manchacuypana tiyacongapaj. Munticunachöpis puñucongapaj.

Ezequiel 34:27

Frütacunapis alli wayonga. Chacracho micuycunapis allimi wayonga. Chaura paycunaga mana yarpachacuypana quiquinpa chacrancho goyäconga. Acrashä runacunataga jäpa runacunapa maquincho caycajtami salbashaj. Chayrämi musyangapaj noga Tayta Diosnin cashäta.

Ezequiel 38:23

Chayno rurarmi waquin nasyun runacunataga musyachishaj munayniyoj, Santo Dios cashäta. Chaura achca nasyun runacunami rejsimanga. Chaynöpami paycunaga musyanga noga Tayta Dios cashäta.»

Oseas 13:4

Tayta Diosmi acrashan runacunata nin: «Nogami Egiptucho cashayquipita-pachapis Diosniqui cä. Nogapita mas juctaga ama pitapis ‹Diosnë› niychu. Nogallami cä gamcunata salbäga.

Oseas 2:19

Chaypitaga nogapanami imaycamapis canquipaj. Maquëcho captiquimi imaypis gamcunata cuyashayqui. Manami yapapacuyllä warmichu canquipaj, sinöga lijïtimu caj warmëmi.

Oseas 6:6

Nogaga munä gamcuna rasunpa cuyamänayquitami. Manami munächu imatapis nogata garamänayquitaga. Nogaga munä ‹Diosnë› nimänayquitami. Manami munächu sacrifisyupaj uywacunata nogapaj apamunayquita.

Levítico 26:5

Rïguyquipis aypangapaj übas pogumunancamami. Übasnami aypangapaj murupacunayquicama. Sumaj micushami cawanquipaj. Nasyunniquichöpis allimi goyäcunquipaj.

Levítico 26:6

Tiyashayqui nasyunchöga jaucallami goyäcunquipaj. Mishquilla puñucunquipaj. Nogami chapäshayqui micucoj animalcunapita. Wañuchinacuypis manami cangachu.

Miqueas 4:3

Tayta Diosmi jusganga llapan nasyun runacunata. May carucho caycaj nasyuncunatapis imano cananpäpis nenga. Chaura chay runacunaga sablincunatapis rëjamanmi ticrachenga. Tucsicuna lansancunatapis ösimannami ticrachenga. Juc nasyunwan juc nasyun manami guërrata ruranganachu. Guërrapäpis manami yachachinaconganachu.

Zacarías 9:10

Nogami illgächishäpaj Efraín trïbupa pillyapaj caj carrëtancunata, Jerusalencho caj cawallucunata, pillyananpaj caycaj lëcha jitacunancunata. Shamoj rayga willacongapaj intëru nasyuncho alli goyay cananpämi. Mandangapis jatun lamarpita Cachi lamarcamami. Mandangapaj Éufrates mayupita mundupa jucaj cuchuncama.

Mateo 11:27

Chaycho caycajcunatana niran: «Taytämi llapantapis munaynëman churamusha. Noga imano cashätapis taytallämi musyan. Pay imano cashantapis nogallami rejsë. Chaymi tantiyachishä cajcunalla musyan taytä imano cashantapis.

Lucas 10:22

Chaycho caycajcunatana niran: «Taytämi llapantapis munaynëman churamusha. Noga imano cashätapis taytallämi musyan. Pay imano cashantapis nogallami rejsë. Chaymi tantiyachishä cajcunalla musyan taytä imano cashantapis.»

Juan 17:3

Imaycamapis cawayta tarinanpäga riguinan rasunpa japallayqui Dios cashayquitami, cay pachaman cachamushayqui Cristo noga cashätapis.

Juan 8:55

Gamcunaga payta manami rejsinquichu. Nogami ichanga rejsë. ‹Mana rejsëchu› nerga gamcunanöpis llullami cäman. Nogaga rasunpami rejsë. Chaymi pay nimashantaga llapanta wiyacö.

2 Corintios 4:6

Cay munduta camashpanpis quiquin Diosmi niran: «Chacaj caycashanpita achicyächun». Paymi achicyajno caycaj alli willacuyninta nogacunapa shongöman churasha. Chaynöpami nogacunaga Jesucristuta ricar achqui achicyajnöpis musyaycächë Diosninchi alli cashanta.

Filipenses 3:8

Chaypis manami chayllachu. Jesucristuman yäracur cawashämanga manami imapis tincunchu. Payman yäracushpämi llapantapis cachaycushcä. Jesucristo salbamashanta musyarmi chaycunataga manacajtanöna ricä.

Colosenses 1:10

Chaynami pay munashanno imaypis cawanquipaj. Gamcunaga cawanquipaj Tayta Diosta manchapacurmi, pay munashanta rurarmi.

2 Timoteo 1:12

Chayno willacushäpitami canan ñacaycä. Chaypis manami pengacöchu. Noga musyämi piman yäracushätapis. Willacuptë paymi munayninwan yanapämanga shuntacamänan junajcama.

Hebreos 8:11

Noga pï cashätapis musyananpaj mananami jucnin-jucninpis yachachinacongapänachu. Noga pï cashätapis mas jatunpita tacshacama llapannami musyangapaj.

1 Juan 4:6

Noganchïmi ichanga Diospa wamran canchi. Diosman yäracoj cajcunaga willapashanchïta wiyacamanchïmi. Mana yäracojcunami ichanga mana wiyamanchïchu. Chaynöpami rejsishun Tayta Diospa Espiritunpa munayninwan pï rimaycashanta y anticristupa munayninwan pï rimaycashantapis.

1 Juan 5:20

Musyanchïmi Tayta Diospa Wamran Jesús cay pachaman shamushanta. Paymi tantiyachimashcanchi Tayta Diosta rejsinapaj. Cananga Wamran Jesucristuman yäracurnami cawaycanchi. Paymi caycan mana ushacaj cawayta tarichicoj quiquin Dios.