Job 11:7 - Tayta Diosninchi Isquirbichishan

⁷ «¿Tayta Dioslla musyashancunata gampis musyanquimanchuraj? ¿Yarpashancunatapis ushajpächuraj musyanquiman?

Job 11:7 ပူးပေါင်းရင်းမြစ်များ

Job 22:12

«Syëluchöga llapanpita mas altuchömi Tayta Dios caycan. Mas janajcho caj goyllarcunapis chaquin ur'gallanchömi caycan.

Job 26:14

Chayga ichicllata rurashan cajllami caycanpis. Raspilla wiyashallanchïmi caycanpis. ¿Piraj tantiyanman munayniyojpa räyun junrurumur imata nishantapis?»

Job 27:11

«Cananmi noga musyachishayqui Tayta Dios fiyupa munayniyoj cashanta, Munayniyoj Tayta Dios imata yarpaycashantapis.

Job 33:12

«Gam chayno rimashayquega manami rasunpachu. Diosga llapan runacunapitapis mas munayniyojmi.

Job 33:13

¿Imanirtaj Tayta Dioswan churacayta munanqui? Diosga imata rurashancunatapis manami pitapis willapanchu.

Job 35:5

Masqui syëluta ricäriy. Pucutayta ricärirpis masqui tantiyacuy ari. Chay pucutayga gampita may altuchöshi caycan.

Job 36:26

Diosga fiyupa munayniyojmi. Noganchëga manami imanöpa tantiyaytapis atipanchïchu. Ni manami musyanchïchu ayca watayoj cashantapis.

Job 37:23

Munayniyoj Tayta Dios rurashanta manami tantiyanchïchu. Payga caycan fiyupa callpayoj, alli arregluta rurajmi. Payga llapanta cumlej, pitapis mana ñacachejmi.

Job 37:5

Dios busninta junruruchimuptenga fiyupa almiraypämi ruracan. Payga tantiyayta mana atipashanchïcunatami ruran.

Job 42:3

Gamga tapumashcanqui ‹¿Pitaj gamga canqui yarpashäcunata manacajman churanayquipaj?› nir. Nogaga rimaycashcä mana tantiyashä cajcunatami. Rimaycashcä fiyupa almiraypaj cajcunapaj, mana tantiyaypaj cajpämi.

Job 5:9

¡Paymi ruran mana ricashanchi fiyupa almiraypajcunata! ¡Chaycunataga pipis manami tantiyanchu!

Salmos 139:6

Chayno nogapaj musyashayquega fiyupa almiraypämi. Chaycunataga manami tantiyaytapis atipächu.

Salmos 145:3

Tayta Diosga fiyupa munayniyojmi. Chaymi alabananchi camacan. Pay munayniyoj cashanga tantiyaytapis mana atipaypämi.

Salmos 77:19

Lamar gochapami nänita rurarirayqui. Aypalla yacu jananpami aywarayqui. Ichanga yupiquita manami pipis tariranchu.

Proverbios 30:4

¿Pitaj syëluman wichasha? ¿Syëlupita caymanpis pitaj urämusha? ¿Piraj llapan wayrata aptaranman? ¿Piraj lamar yacuta jacunwan guepinman? ¿Piraj camacächiran cay pachapa lindancunata? Llapan chaycunataga pipis rurashami canga. Quiquinta rejsir jutinta yachashpayquega mä willamay. Wamranpa jutintapis mä willamay.

Eclesiastés 3:11

Tayta Diosmi llapantapis camacächiran timpuncho cananpaj. Runatapis camaran shamoj watacunacho ima päsananpaj cajtapis yarpachacunanpaj. Chaypis runa manami tantiyayta atipanchu gallarinanpita ushanancama Tayta Dios camashancunata.

Eclesiastés 7:24

Yachaj cayta munayga fiyupa sasami. Pipis manami imano cashantapis tantiyayta atipanchu.

Isaías 40:28

Ichanga gamcuna ¿manachu musyanqui? ¿Manachu wiyashcanqui? Imaycamapis cawaj Tayta Dios mundu intëruta camäga manami yamacanchu, manami uticanpischu. Pay yarpashanga mana atipaypämi.

Mateo 11:27

Chaycho caycajcunatana niran: «Taytämi llapantapis munaynëman churamusha. Noga imano cashätapis taytallämi musyan. Pay imano cashantapis nogallami rejsë. Chaymi tantiyachishä cajcunalla musyan taytä imano cashantapis.

Romanos 11:33

Tayta Diosninchëga fiyupa cuyapäcojmi. Payga fiyupa yachajmi y musyajmi. Manami pay imata munashanta ni rurashantapis tantiyayta atipanchïchu.

1 Corintios 2:10

Noganchïtami ichanga Tayta Diosninchi Espíritu Santunwan musyachimashcanchi. Espíritu Santuga llapantami musyan. Tayta Diosninchi imano cashallantapis llapantami musyan.

1 Corintios 2:16

Tayta Diospa palabranchöpis caynömi niycan: Tayta Diostaga ¿piraj «manami chaynöchu» nisha? U ¿piraj «caynömi ruranchi» nir yachachisha? Noganchïmi ichanga Jesucristo yarpashanno yarpanchi.

Efesios 3:8

Tayta Diosman llapan yäracojcunapita mas mana bälej caycaptëpis Tayta Diosninchïmi cuyapämar acramasha mana Israel runacunaman Jesucristupa almiraypaj alli willacuyninta chayachinäpaj.