Jeremías 6:7 - Tayta Diosninchi Isquirbichishan

⁷ Pucyupita yacu llojshimojnömi Jerusalenpitaga mana allicuna intëruman mashtacaycan. Chay siudäpitaga imaypis wiyacaycämun mana alli ruraycunallami, pillyallami. Chaymi imaypis ricaycä nanaywan gaparpaycajllata, rachir-ushashallata.

Jeremías 6:7 ပူးပေါင်းရင်းမြစ်များ

Proverbios 4:23

Ima-aycayquitapis cuydashayquipita masta cuyday shonguyquicho yarpashayquicunata. Yarpashayqui imanöpis cashanpitami goyanqui allipis u mana allipis.

Isaías 1:6

Chaqui-puntayquipita umayquicama manami sänuga canquinachu. Intëruyquipis gueri-guerillanami, goyuy-goyuyllami, däñashallami caycanqui. Manami pipis jampipäshurayquichu ni watapäshurayquipischu. Nanayniqui chawananpaj asëtiwan manami pipis churapäshurayquichu.

Isaías 57:20

Fiyu runacunami ichanga carcaycan lamar pullchajyar mana chawajno. Wayra pullchajyächiptin mitutawan ganracunata lamar jitarimushannömi caycan.

Isaías 59:6

Chay llicapitaga manami röpata ruranchu. Chay awashanwanga manami pipis jananta chapacunchu. Paycunaga wañuchicuyllatami arun.

Jeremías 20:8

Imaypis nogaga willapä, «Fiyupa ñacaycunami canga. Llapanmi ushacanga» nillarmi. Gam willamashayquita willapaptëmi runacunaga tucuyta gayapäman, manacajman churaman.

Jeremías 30:12

«Noga Tayta Diosmi cayno në: «Gueriquega manami imanöpapis allchacannachu. Nanächicuycashayquipäga manami jampi canchu.

Jeremías 30:13

Manami pipis canchu gamta ricashunayquipäga. Manami pipis canchu gueriquita jampipäshunayquipäga. Manami jampipis canchu allchacänayquipäga.

Jeremías 30:15

Nanaycäshushayquipaj manana jampi caycaptenga ¿imapänataj nanächicur gaparaycanqui? Gamtaga castigashcä yupaytapis mana atipaypaj juchata rurashayquipitami, fiyupa mana allicunata rurashayquipitami.

Jeremías 32:31

Cay siudächo tiyayta gallarishanpita-pachami canancama pasaypa rabyachimasha. Chaypitami caycho tiyajcunataga ushajpaj usharishaj.

Jeremías 8:22

Galaadchöga ¿manachuraj ima jampillapis can? Chaychöga ¿manachuraj pillapis jampicoj can? ¿Imanir-raj marca-masëcuna mana allchacanchu?

Ezequiel 21:29

Gamcuna ricapacushayquega manami rasun cajchu. Musyacojniquicunapis llullacuyllapami willaycäshunqui. Gamcunaga wañuchicoj runacunami canqui. Chaypitami örayqui chayamushana. Sabliga cuchongapaj gamcunapa cuncayquitami.

Ezequiel 24:7

Oxidasha mancanöga caycanqui siudächo pasaypa wañuchinacuylla captinmi. Wañuchicushan yawarpis manami allpachöchu mashtaraycan allpawan tacucäcunanpäga. Chaypa ruquenga allpaynaj gaga jananchömi mashtaraycan.

Ezequiel 45:9

«Noga, Tayta Diosmi në: ¡Israel mandajcuna, amana mana alli cajtaga ruraynachu ni pitapis ama ñacachiynachu! ¡Llapantapis ruray rasun cajta, alli cajllatana! ¡Acrashä runacunapa chacranta ama guechuychu! Noga Tayta Diosmi chayno në.

Ezequiel 7:11

Pï-maypis mana allillatana ruraycan. Ichanga paycuna manami jucnayllapis quëdangachu. Ni ima-aycanpis manami quëdangachu.

Ezequiel 7:23

«Nasyun intërucho wañuchinacuyllanami caycan. Siudächo tiyajcunaga intëruchömi mana allillatana rurarcaycan. Chaymi paycunapaj cadinata camariy.

Sofonías 3:1

¡Ay imanöraj canqui mana wiyacoj Jerusalén siudä! Gamcunaga fiyupa juchasapami carcaycanqui. Pï-maytapis ñacachiyllachömi aruycanqui.