Jeremías 6:19 - Tayta Diosninchi Isquirbichishan

¹⁹ Mundu intëru sumaj wiyay. Cay runacunamanga fiyupa mana allitami apamushaj. Chayga canga mana allita yarpashanpitami. Paycunaga willapashäcunata manami wiyacushachu. Laynëcunatapis manami cäsushachu.

Jeremías 6:19 ပူးပေါင်းရင်းမြစ်များ

Proverbios 15:26

Mana allita rurayta yarpajcunataga Tayta Dios melanäcunmi. Allillata yarpar parlaj runacunami ichanga cushicachin.

Proverbios 28:9

Pipis Tayta Diospa layninta cumliyta mana munaj cajtaga mañacuptinpis Tayta Diosga manami yanapangachu.

Isaías 1:2

Janaj pacha, cay pacha Tayta Dios cayno nishanta wiyay: «Wamräcunatami rucuyänancama uywashcä. Rucuyarcurnaga chiquicarcamashana.

Isaías 5:24

Chaypitami nina ogshata rupacurcushanno, chaqui öjacunatapis ushacurcushanno gamcunapis ushacanquipaj. Sapinpita ismoj lantacunanömi, ismuptin waytancuna allpaman ticrashannömi ticranquipaj. Chaynöga canquipaj munayniyoj Tayta Dios yachachishushayquita mana wiyacushayquipitami, Santo Tayta Diospa layninta mana cäsushayquipitami.

Isaías 59:7

Mana allita rurananpäga apuraypa apurarmi cörrin. Alli runata wañuchinanpaj rasyaylla aywan. Wañuchicuyllapämi yarparcaycan. Paycuna purishanpaga mana allita rurashallanmi caycan.

Isaías 66:18

Noga musyämi imano rurashantapis imano yarpaycashantapis. Chayamongapänami llapan nasyun runacunata, ima rimayta parlajcunatapis juc pachaman shuntanäpaj junaj. Paycunami shamushpan imano munayniyoj cashätapis ricamangapaj.

Jeremías 11:11

Chaypitami paycunataga fiyupa ñacachishaj. Chay ñacaypitaga manami imanöpapis gueshpengapächu. ‹Salbaycamay› nir mañacamaptinpis manami yanapäshäpächu. Noga Tayta Diosmi chayno në.

Jeremías 15:6

Gamcunami cachaycamashcanqui. Gamcunami chiquicarcamashcanqui. Chayno cashayquipita mana awantarnami castigar illgächishayqui. Noga Tayta Diosmi chayno në.

Jeremías 17:10

Nogami ichanga llapanpa shongun imano yarpaycashatapis musyä. Nogaga cada-ünuntami imanöpis cashanpita, imanöpis rurashanpita pägunta gö.»

Jeremías 19:15

«Gam Israelcunapa munayniyoj Tayta Diosniquimi nin: Gamcunaga imatapis mana musyaj upanömi ricacushcanqui. Nogapa palabrätaga manami wiyacushcanquinachu. Chaypitami cay siudäta, bisïnun marcacunatapis musyachishä castïgucunawan castigashaj.»

Jeremías 19:3

Cayno ninqui: ‹Judá nasyunpa raynincuna, Jerusalén runacuna, wiyay-llapa. Llapanpaj munayniyoj Tayta Diosga caynömi nin: Cay nasyunmanga fiyupa ñacaytami chayachimushaj. Chaymi wiyaj cajpaga rinrinpis nanangaraj.

Jeremías 21:14

Chaymi imatapis rurashayquimanno castigashayqui. Ima-aycayquitapis rupaycachishämi. Llapantami ninaga rupacurcongapaj. Noga Tayta Diosmi chayno në.»

Jeremías 22:29

¡Cay pachacho caycaj runacuna wiyay Tayta Dios nishanta!

Jeremías 29:19

Chaynöga paycunaman castïgu chayanga sirbimaj profëtacunawan yaparir-yaparir willachiptëpis mana wiyacushanpitami. Gamcunaga chay-jina willachiptëpis manami wiyacurayquichu. Noga Tayta Diosmi chayno në.»

Jeremías 4:14

Chaura noganami nishäpaj: ‹Jerusalén runacuna jucha rurashayquicunapita arpinticuy. Chaynöparämi salbacunquipaj. ¿Imaycamaraj jucha rurayllapaj yarparcaycanqui?› nir.

Jeremías 4:16

Jerusalencho tiyajcunata, waquin nasyun runacunatapis willay fiyupa caru nasyunpita contrancuna aywaycämushanta. Paycunaga Judá nasyunman magaj yaycunanpämi büllata ruraraycar aywarcaycämun.

Jeremías 4:4

Jerusalén runacuna, Judá runacuna cuerpullayquichöga ama señalacuychu. Chaypa ruquenga rumi shonguyquitapis camariy conträtuta rurar parlashanchïta cumlinayquipaj. Chayno mana ruraptiquega illajpitami fiyupa rabyacurcushaj. Rabyacurcuptëga manami pipis allchacächimangapächu. Nina ratariptin pipis upichiyta mana camäpacushannömi ricacushaj.

Jeremías 49:37

Contrancunapa ñaupanchömi Elamcunaga manchariywan sicsicyarcaycanga. Paycunamanga mana allicunatami chayachishaj. Paycunapaj rabyasha caycashäpitapis chayrämi allchacäshaj. Ushajpaj illgächinäpämi guërrawan wañuchichishaj. Noga Tayta Diosmi chayno në.

Jeremías 6:10

Chaura noga nirä: «¿Pitaraj nishaj? ¿Pitaraj willapäshaj? ¿Piraj wiyamanga? Paycunaga imatapis mana wiyananpaj rinrincuna chapashami caycan. Tayta Diospa palabranpaj paycunaga asicunmi. Paycunaga manami wiyaytapis munanchu.

Jeremías 6:18

Chaypita cananga llapan nasyuncuna wiyay. Musyay acrashä runacuna imano cananpaj cajtapis.

Jeremías 8:5

Chayno caycaptenga Jerusalén runacuna ¿imanirtaj llutanpa purircaycanqui? ¿Imanirtaj nogapa conträ ricacushcanqui? Gamcunaga mana wiyacojmi ricacushcanqui. Nogaman cutimuytapis mana munanquinachu.

Jeremías 8:9

Chaypitami chay musyaj-yachajcunaga pengaycho cangapaj. Trampaman yaycusha animalnöpis mancharenga. Noga nishätaga manacajmanmi churasha. Chauraga ¿imanöpataj yachaj canga?

Daniel 9:11

Gam yachachimashayquita Israelcunaga llapanëmi mana wiyacushcächu. Nishayquicunatapis manami cumlishcäcunachu. Nogacunaga ricaycämaptiquimi fiyupa mana allita rurashcäcuna. Chaynöpami canan nogacunamanga maldisyun chayamasha sirbishojniqui Moisés isquirbishan laycho niycashanno.

Oseas 10:13

Ichanga alli cajta ruranayquipa ruquin mana alli rurayllachömi cashcanqui. Cuyanacur alli goyänayquipa ruquin wañuchinacuyllachömi cashcanqui. Nogaman yäracamunayquipa ruquin llullacullar goyashcanqui. Chaynöga goyashcanqui pillyapaj caj carrëtayquicunaman yäracushpayquimi, pillyäshishoj piyunniqui aypalla caycajman yäracushpayquimi.

Oseas 4:6

«Acrashä runacunaga manami mayganpis ‹gammi Diosnë canqui› nimashachu. Chaypitami paycunaga ushacaycan. Ni gamcunapis cüracuna manami ‹Diosnë› nimashcanquinachu. Chaypitami mana munänachu cürä canayquitapis. Gamcunaga yachachicuynëta gongaycärishcanquimi. Chaynöllami nogapis gongaycushaj gamcunapita mirar aywajcunata.

Amós 2:4

Tayta Diosga caynömi nin: «Judá nasyun runacunaga aypallatanami mana allita rurasha. Paycunaga manami wiyacushachu yachachicuynëcunata. Laynëcunacho niycashancunatapis manami cäsushachu. Chaypa ruquenga papänincuna adurashan ïdulucunallatami adurasha. Chaypitami castigänillataga mana cachaycushächu.

Miqueas 1:2

Tayta Dios rimachiptin Miqueas cayno niran: «Llapaniqui runacuna wiyay. Intëru nasyuncho tiyajcuna wiyashpayqui sumaj tantiyacuy-llapa. Munayniyoj Tayta Diosmi rispitädu Templunpita-pacha nishunquipaj juchata rurashayquicunata.

Miqueas 6:2

Mundu mana cuyucunanpaj tucnaraycaj simintuncunapis puntacunapis sumaj wiyay-llapa. Acrashä runacunatami jusgaj-aywä. Israel runacunatami imata rurashallantapis jorgapaj-aywä.

Juan 12:48

Manacajman churamajcunata, rimashäta mana wiyacojcunataga jucmi jusgangapaj. Llapan rimashäcunami fisyuchöga jusganga.

Hechos 8:22

Llutanta yarpänayquipa ruquenga Tayta Diosta mañacuy perdunashunayquipaj. Capaschari perdunashunquimanpis.

Deuteronomio 30:19

Bindisyunta chasquir alli cawanayquipaj cajta, maldisyunasha car mana alli cawanayquipaj cajta canan junaj acray. Canan acrashayquitaga syëlupis cay pachapis testïgumi caycan. Chauraga alli cawanayquipaj cajta acray ari gamcunapis gamcunapita mirajcunapis alli cawanayquipaj.

Deuteronomio 32:1

«Syëlu wiyay rimashäta. Cay pacha wiyay imata niycashätapis.

Deuteronomio 4:26

Canan junaj gamcunata niycashätaga janaj pachapis cay pachapis wiyaycanmi. Nishäcunata mana wiyacorga Jordán chimpan nasyuncho tiyarcaycashpayqui illajpitami ushajpaj illganquipaj. Mananami unaycamaga tiyanquipänachu.

1 Samuel 15:23

Brüju rurajcunanömi fiyupa juchata ruran Tayta Diosta mana wiyacojcunaga. Ïdulucunata rispitajnömi Tayta Diosta mana wiyacojcunaga juchata ruran. Gamtapis mana wiyacushayquipitami ray caycashayquipita Tayta Diosga jitarishunqui.»

1 Samuel 15:26

Samuelga niran: «Manami gamwanga cutishunchu. Gamga manami cumlishcanquichu Tayta Dios nishanta. Chaymi cananga gamtapis mana munashunquinachu Israelcunapa raynin canayquita.»