Jeremías 50:2 - Tayta Diosninchi Isquirbichishan

² «Nasyuncunaman willacuy. Llapanta musyachiy. Señalpaj bandërata churay. Willapashätaga juctapis mana gongaypa willacuy. Cayno niy: ‹Babiloniataga maynami charisha. Bel diospis pengaychömi caycan. Marduc diosga fiyupa mancharishami caycan. Ïduluncunaga, manacaj diosnincunaga pengaychömi, mancharishami carcaycan.›

Jeremías 50:2 ပူးပေါင်းရင်းမြစ်များ

Salmos 64:9

Chayrämi Tayta Diosta llapan rispitanga. Tayta Dios imata rurashancunatapis willaconga. Tantiyaconga Tayta Dioslla llapantapis camacächishanta.

Salmos 96:3

Pay munayniyoj cashanta nasyuncunaman willacuy. Fiyupa almiraypajta rurashancunatapis marcacunaman willacuy.

Salmos 97:7

Pengay-tucushami canga ïdulucunata adurajcunaga. Ïduluncunallawanmi paycunaga alli-tucusha. Llapan dioscunapis Tayta Diostaga rispitanmi.

Isaías 12:4

Chayrämi ninquipaj: «Tayta Diosta agradësicuy. Paypaj willacuy. Imata rurashantapis intëru marcacunaman willacuy. Tantiyachiy Tayta Dioslla llapanpita mas munayniyoj cashanta.

Isaías 13:2

¡Jachaynaj gala puntacho señalta jawiy pillyayta gallaycärinanpaj! ¡Suldärucunata niy pillyaj yaycunanpaj! ¡Yaycunan puncupa Babiloniapa mandajnincuna yaycunanpaj maquiquiwan sëñata ruray-llapa!

Isaías 21:9

Parninpa-cama cawallucuna carrëtan garachasha aywaycämojtami ricaycä. Aywaycämojcuna nisha: ‹¡Canan Babiloniataga illgarachengami! Ïduluncunapis llapanmi agullasha pampacho mashtarpaycanga› nir.»

Isaías 37:19

Runacuna ‹diosnë› nishancunatapis rupargärachisha. Chaycunaga manami rasunpa dioschu caran. Chaycunaga guerupita, rumipita runacuna rurashallanmi casha. Chaynöpami illgächishapis.

Isaías 39:1

Chay wichan Baladanpa wamran Merodac-baladán Babiloniapa raynin mayaran Ezequías fiyupa gueshyashanpita allchacashantana. Chaura cachancunawan cartata apachiran. Garaynintapis apachiran.

Isaías 46:1

Bel diosga uysucäcunmi. Nebo diospis tunicunmi. Chay dios-niraj ïdulucunataga uywacunaman cargacurcur-rämi apan. Chaycunaga fiyupa lasarmi uywacunata uticächin.

Isaías 48:20

Caldeacho caycaj Babiloniapita llojshicuy-llapa. Gueshpir aywacuy-llapa. Llojshicunanpaj caj willapataga fiyupa cushicur gayacuyparaj willacuy. Intëruman musyachiy. Cayno willacuy «¡Tayta Diosga salbashami sirbejnin Jacobpita mirajcunata!

Isaías 48:6

Chaycunataga llapantami wiyashcanqui, ricashcanqui. Chauraga ¿manachu willacunquiman ‹au rasunpami chayno casha› nir? «Cananga willapäshayqui mushoj willapacunatanami, manaraj musyashayquicunatami.

Jeremías 10:11

Ïdulucunata adurajcunata cayno niy: «Cay pachatapis syëlutapis mana ruraj dioscunaga llapanmi cay pachapita illganga. Ni jucnayllapis cay pachachöga manami cangapänachu.»

Jeremías 10:15

Chay mana bälej ïdulucunaga manacajllami. Chaycunataga Tayta Diosmi castïgu junaj illgächenga.

Jeremías 31:10

Nasyuncunata Tayta Dios nin: «Noga imata nishätapis wiyay. Nircur lamar cantunpa carucho tiyajcunata willapay. Willapar ninqui: ‹Israel runacunataga Diosmi intëruman mashtacächiran. Cananga shuntaycushpannami ricanga uyshëru uyshancunata ricashanno.›

Jeremías 4:16

Jerusalencho tiyajcunata, waquin nasyun runacunatapis willay fiyupa caru nasyunpita contrancuna aywaycämushanta. Paycunaga Judá nasyunman magaj yaycunanpämi büllata ruraraycar aywarcaycämun.

Jeremías 4:6

Bandërayquicunawan sëñata ruray Sión caj-läman. Ama wiyaraychu-llapa. Mayman pacacunayquipäpis ashiy-llapa. Nortipitami apamushaj wañuchicojcunata. Chauraga fiyupa ñacaymi canga.

Jeremías 46:14

«Egiptucho, Migdolcho, Menfischo, Tafneschöpis cayno willacuy-llapa: ‹¡Ricaj-ricajlla camaricushallana carcaycay! ¡Intëru ñaupayquipanami sabliwan wañuycächin!›

Jeremías 50:46

Babilonia chayno ushacaptenga intëru nasyun runacunami manchariywan sicsicyanga. ‹Washaycamay› nir gaparashanpis intëru nasyuncunamanmi wiyacangapaj.»

Jeremías 51:12

¡Babiloniapa curralninta juchuchej yaycunanpaj sëñata ruray! ¡Suldärucunatapis sumaj camacächiy! ¡Ricchacojcunata churay! ¡Wañuchinayquipaj pacacuy-llapa! Noga imano ruranäpäpis yarpashätaga Babiloniacho tiyajcunapaj camacächishcänami.

Jeremías 51:27

«¡Nasyuncunacho bandëracunata awiy Babiloniaman pillyaj yaycunanpaj! ¡Trompëtata tucashpayqui nasyuncunacho tiyajcunata ushajpaj camaricachiy! ¡Babiloniaman pillyaj aywananpaj shacyächiy Araratcho, Minicho, Askenazcho caycaj raycunata! ¡Pillyacho mandananpaj juc capitanta churay! Muntädu aywaycajcunata gaycuy aypalla chüpacacuna aywaycajtanöraj.

Jeremías 51:31

Jucpis-jucpis gatinayllanpa willacojcuna Babiloniapa rayninman aywan llapan siudänincunata juccunana charicarcärishanta willananpaj.

Jeremías 51:44

«Babiloniapa diosnin Belta castigashämi. Llapan micushancunatapis gumitachimushämi. Chaura maygan nasyunpis mananami masga payman aywangapänachu. ¡Ni Babiloniapa pergancunapis ichiraycäga manami quëdangachu!

Jeremías 51:47

Chaynömi chayamongapaj Babiloniacho caycaj ïdulucunata ushajpaj illgächinäpaj caycaj junaj. Chayrämi nasyun intëru pengaycho ricaconga. Wañushacunapis llapan siudänincunachömi mashtarpanga.

Jeremías 51:52

Juc junajmi ichanga Babiloniacho caycaj ïdulucunata illgächishaj. Chaura malubracusha caycajcunaga nasyun intërucho nanaywan gaparpangapaj.

Jeremías 51:8

Ichanga illajpitami Babilonia tunisha ushacajpaj. ¡Paypaj llapaniqui wagay! Jampicunawan jampiy. Capaschari allchacanmanpis.

Jeremías 52:31

Judäpa raynin Joaquín jutiyojta Babiloniaman prësu apashan quimsa chunca ganchis (37) watatana ushaycaptin chunca ishcay (12) quilla ishcay chunca ganchis (27) junajnincho Babiloniacho ray cayta gallaycuran Evil-merodac jutiyojna. Payga Joaquinta cuyaparan. Chaymi carsilpita jorgachiran.

Jeremías 6:18

Chaypita cananga llapan nasyuncuna wiyay. Musyay acrashä runacuna imano cananpaj cajtapis.

Daniel 1:2

Tayta Diosnami camacächiran Joacimta Nabucodonosor prësu charinanpaj, chayno Templucho caj cösacunatapis ushajpaj-japuy apacunanpaj. Nabucodonosorga runacunatapis Babiloniaman prësu apacuran. Babiloniachöna Tayta Diospa Templunpita apashan cösacunatapis churaran diosnincunapa templuncho ima-aycanpis churaraycashan cajman.

Daniel 3:14

rayga tapuran: «¿Rasunchu gamcuna mana aduranquichu nogapa diosnëcunata, ni goripita rurachishätapis?

Sofonías 2:11

Llapan dioscunata illgächishpan chay nasyun runacunataga Tayta Dios fiyupami mancharachengapaj. Intëru munducho tiyajcunapis Tayta Diosllatanami adurangapaj. Chaura may-chaychöpis payllanami adurasha cangapaj.

Apocalipsis 18:2

Chay anjilmi sinchipa nimuran: «¡Ushacashanami Babilonia! ¡Ushacashanami jatuncaray siudä! Cananga dyablucunallanami chaycho tiyaycan. Chaychöga ganra äbicunallanami, asyaj animalcunallanami tiyaycan.