Isaías 65:2 - Tayta Diosninchi Isquirbichishan

² Conträ ricacoj runacunatami witimunanpaj goyay-goyay maquëta macyarashcä. Chay runacunaga quiquincuna munashannöllami llutan caminupa aywarcaycan.

Isaías 65:2 ပူးပေါင်းရင်းမြစ်များ

Génesis 6:5

Tayta Dios ricaran runacuna pasaypa mana alli rurayllachöna cawashanta. Chay runacunaga yarparaycaran jucha rurayllapaj.

Salmos 36:4

Cämanchöpis yarpaycan mana allita rurayllatana. Llutan nänicho purejnöllami purircaycan. Mana alli ruraytaga manami cachaycunchu.

Salmos 36:5

Tayta Dios, cuyacoj cashayquimi ichanga syëlucama chayan. Alli cumlej cashayquega pucutaypita mas janajcamami chayan.

Proverbios 1:24

Yaparir yaparirmi gamcunataga shamunayquipaj willashcä. Chaypis manami cäsumashcanquichu.

Proverbios 16:29

Fiyu runaga amïguntapis engañanmi. Payga amïgunta llutanmanmi gaycun.

Isaías 1:2

Janaj pacha, cay pacha Tayta Dios cayno nishanta wiyay: «Wamräcunatami rucuyänancama uywashcä. Rucuyarcurnaga chiquicarcamashana.

Isaías 1:23

Mandajniquicunapis Tayta Diosta manami wiyacunchu. Paycunaga suwacunapa amiställanmi. Paycunaga munarcaycan pacayllapa päguta chasquiytami. Munarcaycan imapitapis imallatapis päganantami. Wacchacunataga manami alli arriglanchu. Biyüdacuna dimandacuptinpis manami cäsunchu.

Isaías 30:1

Tayta Diosmi nin: «¡Ay imanöraj canga mana wiyacoj wamräcuna! Mana tapucamayllapami jucwan-jucwan parlacusha. Chaynöpami jananman-jananman juchata rurarcaycan.

Isaías 30:9

Cay nasyun runacunaga mana wiyacoj llullami. Tayta Dios yachachishantapis manami wiyayta munanchu.

Isaías 55:7

Fiyu runacunaga mana allicunata ama rurachunnachu, mana allita rurananpäga ama yarpächunnachu. Tayta Diosman yapay cutichun. Chaura paypis cuyapangami. Payga amatar alli cashpanmi perdunacun.

Isaías 55:8

Tayta Dios cayno nin: «Noga yarpashäga manami gamcuna yarpashayquinöchu. Noga rurashäga manami gamcuna rurashayquinöpischu.

Isaías 63:10

Chaypis paycunaga Tayta Diospa contranmi ricacuran. Chaymi Santo Tayta Diosta rabyachiran. Chaynöpami Tayta Diosga paycunapaj rabyacurcuran. Nircur contran ricacur castigaran.

Isaías 66:18

Noga musyämi imano rurashantapis imano yarpaycashantapis. Chayamongapänami llapan nasyun runacunata, ima rimayta parlajcunatapis juc pachaman shuntanäpaj junaj. Paycunami shamushpan imano munayniyoj cashätapis ricamangapaj.

Isaías 66:3

Waquin runacunami ichanga aduramashpan töruta rupachinanpaj pishtan. Runa-masintapis wañuchin. Uyshata nogapaj pishtan. Allgutapis cuncanta milluypa wañuchin. Chaqui micuy ofrendancunatapis nogapaj churan. Nircorga cuchipa yawarnintapis churan. Aduramashpan insinsutapis rupachin. Nircorga ïdulucunatapis aduran. Chayno melanaypajcunata rurananpaj acrajcunaga chaycunata rurashpan fiyupa cushicun.

Isaías 66:4

Chayno rurajcunapäga nogapis ñacananpämi acrashaj. Chaymi paycunamanga fiyupa manchacushan cajtaraj chayachishaj. Chayno cananpäga camacächishaj gayaptëpis mana wiyamashanpitami, willapaptëpis mana tantiyacushanpitami. Paycunaga mana gustashä cajtami rurasha. Noga mana munashä cajtami acrashapis.»

Jeremías 18:12

Chaura paycuna nengapaj: ‹¡Imapänataj allitapis rurashaj! Nogacunaga quiquë munashäno goyäcushaj. Shongö mana allita yarpashanno imatapis ruracushaj› nir.»

Jeremías 3:17

«Chaymi chay wichanga Jerusalenta nenga ‹Tayta Diospa jamanan› nir. Chaymanmi rispitamar aduramänanpaj intëru nasyunpita runacuna shamongapaj. Mananami shongun yarpashancunata ruranganachu.

Jeremías 4:14

Chaura noganami nishäpaj: ‹Jerusalén runacuna jucha rurashayquicunapita arpinticuy. Chaynöparämi salbacunquipaj. ¿Imaycamaraj jucha rurayllapaj yarparcaycanqui?› nir.

Jeremías 5:23

Gamcunaga carcaycanqui mana wiyacoj upaman ticrashami. Chaymi nogata cachaycamar aywacushcanqui.

Jeremías 7:24

Ichanga paycuna mana wiyamashpan nishäta mana rurashachu. Chaypa ruquenga llutanta yarpashpanmi quiquincuna munashanno llutanta rurasha. Nogaman yäracamunanpa ruquenga jucmanna yäracurcaycan.

Números 15:39

Chay paychacunata ricashpayquimi gamcunaga yarpanquipaj llapan mandamintöcunata cumlinayquipaj cashanta. Chauraga quiquiquicunapa shonguyqui munashanta mananami ruranquipächu.

Mateo 15:19

Runacunaga shonguncho mana allicunata yarparmi runa-masinta wañuchin; majayoj caycarpis jucwan cacun; japalla caycarpis jucwan-jucwan puricun; suwacun; llullacun; jucpa washanta riman.

Mateo 23:37

«¡Ay imanöraj canqui Jerusalén! Tayta Diosga profëtancunata cachamuran. Paycunatami wañuchishcanqui. Waquintaga sajmar-ushashcanqui. Jerusalén, achca cutimi wamrayquicunata shuntayta munarä wallpa chipshancunata älan rurinman shuntashannöpis. Ichanga manami munashcanquichu.

Lucas 13:34

Chaypita Jesús wagar niran: «Ay imanöraj canqui Jerusalén. Tayta Diosga profëtancunata cachamuran. Paycunatami wañuchishcanqui. Waquintaga sajmar-ushashcanqui. Jerusalén, achca cutimi wamrayquicunata shuntayta munarä wallpa chipshancunata älan rurinman shuntashannöpis. Ichanga manami munashcanquichu.

Romanos 10:21

Ichanga Israel runacunapaj Tayta Diosninchi nishanta Isaías niran: «Conträ ricacoj runacunatami witimunanpaj waran-waran maquëta macyarashcä. Chay runacunaga quiquincuna munashannöllami llutan caminupa aywarcaycan.»

Romanos 2:5

Gammi ichanga canqui rumi shongu. ¿Imanirtaj jucha rurayta mana cacharinquichu? Jucha rurayta mana cachariptiquega Tayta Diosninchi fiyupa rabyar llapan juchayquipitami jusgar castigashunquipaj.

Deuteronomio 29:19

«Cay conträtuta chasquircur ama yarpaychu mana cumliptiquipis Tayta Dios mana castigashunayquipaj cashanta. Mana cumlerga juchayojmi canquipaj Tayta Dios llapayquita castigar ushacächishunayquipaj.

Deuteronomio 31:27

Nogaga musyänami mana wiyacoj, mana tantiyacoj runacuna cashayquita. Cawaycaptillänami fiyupa Tayta Diosta rabyachishcanqui ¡Wañucuptënaga imatanaraj ruranquipis!

Deuteronomio 9:7

«Chunyajcho Tayta Diosta rabyachishayquipita castigashushayquita imaypis ama gonganquichu. Egiptupita llojshimushayquipita-pachami gamcunaga payta mana wiyacunquichu.