Isaías 53:11 - Tayta Diosninchi Isquirbichishan

¹¹ Ñacashanpitaraj chaycunata ricar fiyupami cushicongapaj. Tayta Diosta sirbëga achcajtami salbangapaj. Payga achcajpa juchantami apanga.

Isaías 53:11 ပူးပေါင်းရင်းမြစ်များ

Isaías 42:1

Tayta Diosmi cayno nin: «Caychömi caycan sirbimajnë. Paytaga nogami yanapaycä. Paytaga nogami acrashcä. Paypämi nogaga fiyupa cushicö. Paymanmi espiritöta churashcä. Chaymi llapan nasyuncunacho alli goyay cananpaj arriglanga.

Isaías 45:25

Noga yanapaynëpami Israelcunaga alliman chayanga. Chaymi yanapashäpita cushiconga.»

Isaías 49:3

Paymi nimaran: «Israel, gamga sirbimajnëmi canqui. Gampitami nogaga alabasha cashaj.»

Isaías 52:13

Sirbejninpaj Tayta Diosga caynömi nisha: «Sirbimajnëga allichömi llojshenga. Fiyupa rispitashami y may-chaychöpis rejsishami canga.

Isaías 53:12

Chaypitami paytaga Tayta Dios mas alliman churanga. Chaychöga munayniyojcunawan iwalmi alli cajta chasquengapaj. Chaynöga chasquengapaj wañushanpitami, juchayojcunano ñacashanpitami. Rasunpa payga aypalla runacunapa juchantami aparan. Juchayojcunapäpis ruwacur mañacusha.

Isaías 53:8

Imatapis mana allita mana ruraycaptinmi jusgananpaj prësu apasha. Paytaga manami pipis washaranchu. Paypäga manami pipis yarpachacuranchu. Paytaga juchanchïcunapitami wañuchiran.

Daniel 12:3

Musyaj-yachaj runacuna allita yachachishpan willapajcunaga syëlu achicyashannörämi achicyaypa-achicyar carcaycangapaj. Para-simrimi goyllarcunano achicyaypa-achicyaycangapaj.

Daniel 9:24

«Ganchis chunca semänami camacächisha caycan nasyunniquipäwan rispitädu siudäniquipäga. Chaypitanaga jucha ruray manami canganachu. Mana alli ruraycunapis illganganami. Jucha rurashancunapitapis perdunashanami canga. Imaycamapis alli goyayllana canga. Suyñur ricashayquinömi llapan nishancuna cumlenga. Diospaj acrashanpis cangapaj fiyupa rispitäduna.

Mateo 20:28

Gamcunaga canquiman noga Destinädu Runano. Nogaga manami waquinno sirbisha canäpächu shamushcä. Chaypa ruquenga waquinta sirbejmi shamushcä. Wañuchimaptin bïdäwanmi pägashaj aypallata salbanäpaj.»

Lucas 22:44

Fiyupa llaquicushpan llapan shongunpa mastaraj Tayta Diosta mañacuran. Südayninpis yawarnöraj pampaman juturan.]

Juan 12:24

Sumaj tantiyacuy. Musyashanchïnöpis rïgu muruta mana pampaptinchëga manami wiñamunchu. Pampaptinchïmi ichanga wiñamur achcata wayun.

Juan 16:21

Musyanchïmi nanay chariptin warmicuna llaquicushanta. Wamran yuriptinnami ichanga cushicur mana yarpannachu nanaywan gueshyacushantapis.

Juan 17:3

Imaycamapis cawayta tarinanpäga riguinan rasunpa japallayqui Dios cashayquitami, cay pachaman cachamushayqui Cristo noga cashätapis.

Romanos 4:24

Noganchïpäpis rimaycanmi. Noganchïtapis allimi ricamäshun taytanchi Jesucristuta cawarachimoj Tayta Diosman yäracushaga.

Romanos 5:9

Cananga Jesucristo wañushanpitami Tayta Dios allina ricamanchi. ¿Chaychuraj castïgunpita mana salbamashwanchu?

1 Corintios 6:11

Gamcunapis unayga chayno jucha rurajmi carayqui. Cananmi ichanga juchayquicunapita mayllashanöna caycanqui. Tayta Diosninchïmi Tayta Jesucristu-raycu, Espíritu Santu-raycu perdunashurayqui. Pay munashannöllana cawanayquipaj acracushurayqui. Alli ñawinwanna ricaycäshunqui.

2 Corintios 4:6

Cay munduta camashpanpis quiquin Diosmi niran: «Chacaj caycashanpita achicyächun». Paymi achicyajno caycaj alli willacuyninta nogacunapa shongöman churasha. Chaynöpami nogacunaga Jesucristuta ricar achqui achicyajnöpis musyaycächë Diosninchi alli cashanta.

Gálatas 4:19

Wamräcuna, warmi gueshyacur ñacashannömi nogapapis gamcunapaj shongö nanaycan Jesucristo munashanno cawanayqui junajcama.

Hebreos 12:2

Tayta Diosman chayno yäracur cawananchïpäga Jesucristo imano cawashantapis ricacushun. Juchayoj runatano pengaypaj cruscho wañuchinanpaj cashanta musyarpis payga Tayta Dios munashannömi cawaran. Imano ñacarpis Tayta Dios munashanno cawaran syëlucho cushisha imaycamapis cawananpaj cashanta musyarmi. Cananga cawarircamur Tayta Diospa derëchu caj-lädunchönami mandananpaj jamaraycan.

Hebreos 9:28

Jesucristupis juc cutillami wañuran llapanta juchancunapita perdunananpaj. Cay pachaman yapay cutimushpanga mananami runacunata juchanpita perdunangapächu. Chaypa ruquenga cutimonga payman yäracur shuyaraycajcunata pushacunanpänami.

1 Pedro 2:24

Juchaynaj caycarpis Jesucristo cruscho wañuran juchata rurashanchïpita perdunashana cananchïpämi, Tayta Diosninchi munashannöna cawananchïpämi. Payta däñar-ushashanpitami noganchëga allchacashana caycanchi.

1 Pedro 3:18

Jesucristupis juchanchi-raycumi juc cutilla wañusha Tayta Diospa ñaupanman chayachimänanchïpaj. Payga juchaynaj caycarmi juchasapacunapa ruquinchi wañusha. Wañuptinpis Espíritu Santumi cawarachimuran.

2 Pedro 3:18

Chaypa ruquenga cuyapäcoj Taytanchi Jesucristo munashanno cawanayquipaj sumaj yachacuy-llapa. ¡Payga imaycamapis alabasha cachun! Amén.

1 Juan 2:1

Wamräcunano caycajcuna, caycunataga isquirbimö juchata mana ruranayquipämi. Jucha rurayman chayaptinchi-ima ichanga juchaynaj abogädunchi caycan Tayta Diospa ñaupancho faburninchi ichinanpaj. Payga Jesucristumi.

2 Juan 1:1

Tayta Dios acrashan warmi y wamrancuna: Noga mayur ermänumi cartata apaycächimö. Gamcunataga llapan shongöpami cuyä. Manami nogallachu cuyä, man'chäga Tayta Diospa willacuyninta chasquicojcunapis cuyashunquimi.

2 Juan 1:3

Chayno captinmi Tayta Diosninchïta y Wamran Jesucristutapis mañacuycä cuyapäshunayquipaj, llapan juchayquicunata perdunashunayquipaj y alli cawayta goycushunayquipäpis.