Isaías 49:9 - Tayta Diosninchi Isquirbichishan

⁹ Prësucunatapis ‹Llojshicuy› ninquipaj. Chacaycho caycajcunatapis ‹Achicyajmanna llojshiy› ninquipaj. Chaura chay runacunaga tiyangapaj may nänipa ñaupanchöpis, may chaqui jircachöpis uywa alli guewata micojnömi.

Isaías 49:9 ပူးပေါင်းရင်းမြစ်များ

Salmos 102:20

Wañuchicänanpaj caycaj prësucuna llaquicuycajta wiyar salbaran.»

Salmos 146:7

Ñacaycajcunataga yanapanmi. Yargaypita caycajcunatanami micuyta tarichin. Prësu caycajcunatapis Tayta Diosga jorgunmi.

Salmos 22:26

Umildicunaga sacsananyajmi miconga. Sirbiyta munaycajcunaga Tayta Diosta alabanga. Chaura para-simrimi cawangapaj.

Salmos 69:33

Tayta Diosga wiyanmi pobricuna mañacushanta. Manami cachaycunchu prësu caycajcunataga.

Isaías 41:18

Yacu mana cashan jircacunachömi mayucunatapis yurichishaj. Guechwa ragran quinranchöpis pucyucunatami pashtachimushaj. Chunyaj chaqui jircacunatapis ishtanquimanmi ticrarachishaj. Yacu mana cashan jircacunapami mayu-mallwacunata aywachishaj.

Isaías 42:16

Gapracuna aywashanpaga chacaytapis achicyajmanmi ticrarachishaj. Jatun ragracunatapis pampamanna ticrarachishaj. Paycunataga pushashäpaj mana rejsishan nänicunapami, quichqui nänicunapami. Chaycunataga rasunpami rurashaj.

Isaías 42:7

Churashayqui gapracunata allchacächinayquipaj, prësucunatapis carsilpita jorgunayquipaj, chacajchöno caycajcunatapis achquimanno jorgunayquipaj.

Isaías 48:17

Gam Israelcunapa Santo Tayta Diosniquimi, salbashojniquimi cayno nin: «Nogami cä Tayta Diosniqui. Nogami yachachë gamcunapaj alli cajta. Nogami pushaycä munashä nänipa aywanayquipaj.

Isaías 5:17

Llapan siudäcunami juchusha quëdanga. Chay siudäcuna cashanchönami uyshacunata cabracunata michiconga.

Isaías 61:1

Tayta Dios acramasha captinmi Tayta Diospa Espiritonga nogacho caycan. Nogataga cachamasha pobricunata alli willacuyta willapänäpämi; llaquisha caycajcunata cushicachinäpämi; prësu caycajcunata librina cananpäna willapänäpämi; carsilcho wichgaraycajcunatapis jorgunäpämi;

Isaías 65:13

Chaymi Tayta Dios cayno nin: «Sirbimajcunapäga micunanpaj cangami. Gamcunami ichanga yargaycho canquipaj. Sirbimajcunapaga upunanpäpis cangami. Gamcunami ichanga yacunaypita ñacanquipaj. Sirbimajcunaga cushicongapämi. Gamcunami ichanga pengaycho canquipaj.

Isaías 9:2

Chacaycho puriycajcunami achicyajta ricärisha. Yanauyaycajcho tiyaycajcunapämi achicyacurcusha.

Ezequiel 34:23

Nogami camacächishaj juc uyshëru paycunata ricananpaj. Chay uyshëruga canga sirbimajnë Davidmi. Paytami churashaj japallan uyshërö cananpaj. Chauraga paynami michejnin canga.

Ezequiel 34:29

Paycunapäga fiyupami micuycunatapis wayuchishaj. Chaura yapayga mananami muchuycho cangapänachu. Ni juc-lä nasyun runacunapis manami asipangapänachu.

Joel 3:18

Chay wichanga intëru jircacunacho, intëru lömacunachöpis bïnuwan lëchi canga yacu-jina aypallami. Judächo caj ragracunapapis aypalla yacumi aywanga. Templöpitanami yacu pashtaycangapaj. Chaynami parguycangapaj Sitim guechwa pampata.

Levítico 25:54

«Chay watacunacho llojshinanpaj pägayta mana camäpacorga Cachaycunan wata chayamuptin wamrancunawan librimi llojshiconga.

Miqueas 5:4

Paynami marca-masincunataga Tayta Diospa munayninwan mandanga. Uyshëru uyshata michejnöpis ricanga. Chaura paycunaga allillanami goyangapaj. Chaynöga cangapaj intëru munducho paytana pï-maypis rispitaptinmi.

Lucas 1:79

Chaura payga chacaj pachacho achicyacurcojnömi canga. Payga salbangami wañuyman chayananpaj caycajcunata. Chaynöpami allina goyänanchïpaj pushamäshunpaj.»

Lucas 2:32

Payga achquinömi canga mana Israel runacunapäpis. Pay-raycumi acrashayqui Israelcunapis alli ricasha canga.»

Lucas 4:18

«Tayta Dios acramasha captinmi Tayta Diospa Espiritonga nogacho caycan. Nogataga cachamasha pobricunata alli willacuyta willapänäpämi; [llaquisha caycajcunata cushicachinäpämi;] prësu caycajcunata libri cananpäna willapänäpämi; gapracunatapis allchacächinäpaj; jucpa munaynincho ñacaycajcunatapis jorgunäpaj.

Juan 10:9

Nogami ichanga cancha puncu caycä. Pï-maypis noga puncupa yaycoj-cäga salbacongami. Chaura paycunaga yayconga llojshenga alli guewata tarinanpämi.

Juan 8:12

Chaypitaga runacunata Jesús niran: «Nogami cay pachacho caycaj runacunapäga achqui caycä. Chaymi nishäta wiyacojcunaga cawachicoj achquichöna goyanga. Manami chacaychönachu canga.»

Hechos 26:18

Nishäcunata willaptiquimi runacuna tantiyaconga. Chacaychöno cawananpa ruquenga achicyajchönöna cawanga. Satanaspa munaynincho cawashanpita Tayta Diospa maquinchöna cawanga. Nogaman yäracamashpanmi llapan juchanpita perdunasha canga. Chaynöpami Tayta Dios acrashancunawan iwal alli cawayta tarenga.›

Efesios 5:14

Chaymi llutan rurajcuna tantiyacunanpaj rimaypis cayno nin: «Puñuycajcuna ricchay. Wañushacuna caycashanpita jatarimuy. Jesucristunami achquipäshunquipaj.»

Efesios 5:8

Gamcunapis unayga chacajcho caycajnömi juchata rurar goyarayqui. Cananmi ichanga Jesucristuta chasquicur achicyajllacho caycajno cawaycanqui. Jesucristuta chasquicushana caycarga waran-waran pay munashannöna caway.

Deuteronomio 32:13

Nasyuncunacho altunnin jircacunapami llapanta binsichir pushamusha. Jircacunacho cajpa wayuynintami micunanpaj camariparan. Gagapita llojshimoj mishquitami upuchiran. Ranrapita llojshimoj asëtitami upuchiran.

Colosenses 1:13

Paymi salbamashcanchi chacajpa munaynincho caycajta. Nircorga Cuyay Wamranpa maquinmanna churamashcanchi.

1 Pedro 2:9

Gamcunami ichanga canqui Tayta Dios acracushan, sirbej cürancuna, payllapaj raquicushan nasyun runacuna, quiquin Tayta Diospa marcan runacuna. Paymi jucha ruraypitaga chacaypita-japuy achicyajmanno jorgamashcanchi. Chaymi Tayta Diosninchi almiraypajcunata rurashanta willacunayquipaj carcaycanqui.