Isaías 45:19 - Tayta Diosninchi Isquirbichishan

¹⁹ Noga manami pacayllapaga parlächu. Ni chacaj pachacunachöpis manami parlächu. Jacobpita mirajcunata nogaga manami nishcächu: ‹Imapis mana cashancunacho ashimay› nir. Noga Tayta Diosga rasun cajllatami parlä. Alli cajllatami musyachë.

Isaías 45:19 ပူးပေါင်းရင်းမြစ်များ

1 Crónicas 28:8

«Cananga Tayta Dios acrashan Israelcuna shuntacashami carcaycanchi. Tayta Diosga canan wiyaycämanchïmi. Tayta Diospa mandamintuncunataga mana cachaycuypa cumlinqui. Chaynöpami cay cuyayllapaj nasyonga quiquiquicunallapaj canga. Gamcuna wañucurpis wamrayquicunatana cachapaycunquipaj imaycamapis paycunapa cananpaj.

2 Crónicas 15:2

Asata tariparcur niran: «Ray Asa, Judäcuna, Benjamincuna llapayqui wiyamay. Tayta Diosman yäracuptiquega Tayta Diospis gamcunawanmi caycan. Pay munashanno goyaptiquega yanapäshunquimi. Payta gongaycäriptiquimi ichanga cachaycushunquipaj.

2 Crónicas 7:14

Chaypis acrashä runacuna llaquicushpan ruwacur mañacamuptin, jucha ruraynincunata cachaycuptenga, syëlucho caycashäpita wiyashäpämi. Juchancunapitapis perdunashämi. Chauraga llapanpis yapay allillanami goyangapaj.

Esdras 8:22

Fiyu runacunapita chapämänanpaj muntädu suldärucuna yan'gämänanpaj rayta ruwacuytaga fiyupami pengacurä. Raytaga maynami nirä «Dios chapämangami payta adurajcunataga. Diosta mana wiyacojcunatami ichanga fiyupa rabyawan castigan» nir.

Salmos 12:6

Tayta Diosga aunishancunata cumlinmi. ¡Tayta Dios aunishancunaga caycan ganchis cuti chulluchiptin ganra ushajpaj llojshishan gorinömi!

Salmos 24:6

Chayno alli car-rämi cawanan Tayta Diosta sirbiyta munajcunaga, Jacobpa Diosninpa ñaupancho goyayta munajcunaga. Selah

Salmos 69:13

Chaypis, Tayta Dios gamllatami mañacaycämö. Yanapäcoj cashpayqui juclla salbaycamay ari. Cuyacoj cayniquipa yanapaycamay ari.

Salmos 69:32

Chayta ricar ñacarcaycaj pobricunaga fiyupami cushiconga. Dios munashanno goyajcunapis cushishami goyangapaj.

Salmos 78:34

Castigaptinrämi paycunaga Tayta Diosman yäracoj. Chayno ruraptinrämi arpinticur Tayta Diosta ashej.

Salmos 9:10

Tayta Dios, gamta rejsishoj cäga gammanmi yäracun. Gamman yäracamojtaga manami cachaycunquichu.

Proverbios 1:21

May-chaychöpis achca runa cashanchömi willacuycan. Siudäman yaycuna puncucunachöpis willacuycanmi:

Proverbios 15:8

Fiyu runacunapataga imata goptinpis Tayta Dios manami chasquinchu. Quiquin Tayta Dios munashanno cawajcuna mañacuptinmi ichanga cushicun.

Proverbios 30:5

Tayta Diosga imapitapis chapanmi payman yäracojcunataga. Payga aunishanta llapantapis cumlinmi.

Proverbios 8:6

Wiyamay-llapa. Fiyupa allicunatami willapäshayqui. Dios munashan cajcunatami yachachishayqui.

Isaías 1:15

Gamcuna maquiquita jogaricurcur mañacamaptiquipis gamcunapitaga juc-läpami ticracurë. Yaparir-yaparir mañacamuptiquipis Nogaga mananami wiyashänachu. Gamcunapaga maquiquipis wañuchicushayqui yawarllami caycan.

Isaías 43:12

Nogaga salbanäpaj cashantami willacachirä. Nircorga willacachishänöllami salbashcä. Manami juc runacuna ‹diosnë› nishanchu salbashurayqui. Noga salbashätaga gamcuna musyarcaycanquimi.

Isaías 44:8

Ichanga balurchay, ama manchacuychu. Nogami chayno nirä. Chaycunataga unaynami willacachirä. Gamcunami testïgöpis carcaycanqui. Nogapita mas juc diosga manami canchu. Manami mas juc canchu chapäshunayquipäga. Juctaga manami rejsëchu.»

Isaías 45:23

Nogaga jutëchömi jurashcä. Alli cajta ruranäpämi jurarä. Chayno nishäga cumlicangami. Nogata rispitamashpan llapanmi gongurpacamongapaj. Pï-may runacunapis nogapa jutëchömi juranga.

Isaías 45:25

Noga yanapaynëpami Israelcunaga alliman chayanga. Chaymi yanapashäpita cushiconga.»

Isaías 48:16

Witimuy-llapa nishäta wiyanayquipaj. Gallarinanpita-pachapis nogaga manami imaypis pacayllapaga parlashcächu. Ima captinpis nogaga chaychömi caycarä.» Cananga Tayta Diosmi espiritunta nogaman churarcur cachamasha.

Isaías 63:1

«Juc runami Edomcho caycaj Bosra siudäpita aywaycämun. Röpanpis pucaman tiñisha aywaycämun. Achicyaypa achicyaycaj röpan jatisha aywaycämun. Payga fiyupa munayniyojmi aywaycämun. ¿Piraj chay aywaycämöga?» «Noga llapantapis alli arriglajmi aywaycämö. Salbanäpäpis munayniyoj caycajmi aywaycämö.»

Isaías 65:9

Israelpita mirajcunatami, Judäpita mirajcunatami acrashaj achca puntayoj nasyuncho tiyananpaj. Chay sirbimajcunanami chay nasyuncho tiyanga.

Isaías 8:19

Ichanga runacuna nishunquipaj: «Almata tapucuy. Tapucuy shap-shapyayllapa parlaj musyacojcunata» nir. ¿Imanirtaj runacunaga wañojcunapa almanta tapucun? Chaypa ruquin runaga ¿manachu Tayta Diosta tapucunman?

Jeremías 2:31

«Canan wichan caycaj runacunapis sumaj tantiyacuy Tayta Dios willacaycächishanta. Israelcuna, gamcunapäga ¿chunyaj jircachu cashcä? ¿Chacajno llantuy ñitishachu cashcä? ¿Imanirtaj nogapaj nircaycanqui ‹Nogacunaga manami pipa munayninchöpis cächu. Manami yapay gammanga yäracamushänachu› nir?

Amós 5:4

Tayta Diosga Israelcunata caynömi nin: «Nogaman shacamuy-llapa. Chauraga cawanquipämi.

Juan 18:20

Jesús niran: «Nogaga manami imatapis pacayllapa yachachishcächu. Sinagogacunacho, Templucho yachachiptë llapan runacunami wiyamasha.

Juan 7:26

Cananga llapanpa ñaupancho yachachiptinpis manami pipis rimapanchu. ¿Tayta Dios cachamushan Cristo cashantachuraj mandaj Israelcunapis tantiyacusha?

Juan 7:28

Jesusga Templupa sawannincho yachaycächishancho wiyaran chayno parlarcaycajta. Chaymi sinchipa niran: «Achyä, gamcunaga rejsimanquichari; maypita cashätapis musyanquichari. Ichanga noga manami quiquëpa munaylläpitachu shamushcä. Chaypa ruquenga Tayta Dios cachamaptinmi shamushcä. Paytaga gamcuna manami rejsinquichu.

Deuteronomio 29:29

«Imatapis mana musyashanchi cajtaga quiquin Tayta Diosnillanchïmi musyan. Canan wiyashanchi mandamintuncunata, laynincunatami ichanga musyachimashcanchi noganchi wamranchïcuna imaypis cumlinanchïpaj.

Deuteronomio 32:4

Paymi imapitapis chapämajninchi. Pay rurashancunaga fiyupa allimi. Imatapis allillatami ruran. Payga manami imaypis llullacunchu. Payga llapantapis allimi rican. ¡Alli cajtami ruran; rasun cajllatami riman!

Santiago 4:3

Mañacurpis mañacurcaycanqui shonguyqui yarpashanno manacajcunallacho ushanayquipämi. Chaymi imatapis mana tarinquichu.