Isaías 4:2 - Tayta Diosninchi Isquirbichishan

² Chay junajmi Israelcho cawaycar quëdajcunapäga Tayta Dios chillguichimushan canga cuyayllapaj camaraj, fiyupa cushicunanpaj. Micuy pogojcunapis cangapaj paycuna fiyupa cushicunanpaj, rispitasha cananpaj.

Isaías 4:2 ပူးပေါင်းရင်းမြစ်များ

Salmos 67:6

Chacrachöga allimi micuycuna wayusha. ¡Tayta Diosninchïmi bindisyunta gomashcanchi!

Salmos 72:16

¡Cay nasyunchöga rïgu amatar wayuchun! ¡Intëru jircacunachöpis juntasha cachun! Libanuchöno rïgucuna wiñachun. Runacunapis aypalla mirachun jirca jachacunanöraj cananpaj.

Éxodo 28:2

Wauguiqui Aarón rispitädu cüra cashpan jaticunanpaj rurachinqui cuyayllapaj camarajlla röpata.

Isaías 11:4

Pipis mana yanapashancunata alli arriglanga. Nasyuncho caj pobricunatapis rispitacachenga. Paymi nenga ñacachicojcuna castigacänanpaj. Paypa jämaynenga espädanömi fiyucunata wañurachenga.

Isaías 26:1

Chay junäga cay alabansatami Judá nasyun runacuna cantangapaj: «Noganchïpa siudäninchëga sumaj curalashami. Tayta Diosga salbamänanchïpaj rurasha ishcay ayway pergatami.

Isaías 27:6

Shamoj watacunachöga Jacobpita miraj Israelcuna tacyangami. Paycunaga guerunömi chillguenga y waytanga. Wayuynenga intëru nasyunpämi aypanga.

Isaías 30:23

Murushayqui micuyniquicuna alli wiñamunanpämi Tayta Diosga tamyachimongapaj. Chaura chacrapis rïguyquita allimi wayuchengapaj. Chay wichanga uywayquicuna micunanpäpis achcami guewa canga.

Isaías 45:8

«Chauraga syëlu quichacäcuptin bindisyunta mashtamushaj. Chaycunaga cangapaj shullay shicwamojno, pucutaypita tamyamojnömi. Chaycunata allpachöga cushishami chasquenga. Chaynöpami salbacoj cashäga imapis wayojno achcaman miranga. Chaynönami alli cajllata ruraypis waytajno canga. Chaycunataga noga Tayta Diosmi camacächë.

Isaías 53:2

Tayta Diosga munasha mallwa lanta wiñar chaqui allpaman sapichashanno sirbejnin wiñanantami. Payga manami cuyayllapaj buyna-mösupischu caran. Manami ricapänapänöpischu caran.

Isaías 60:15

Unayga cacharishami quëdarayqui. Chiquishami carayqui. Japallayquimi quëdarayqui. Cananmi ichanga noga churashayquipaj imaycamapis allicho canayquipaj. Para-simri cushisha goyänayquipämi camacächishaj.

Isaías 60:21

«Marcayquichöga alli runacunallanami tiyanga. Chaychöga paycunallami imaycamapis tiyacongapaj. Paycunami caycan lantashä lantapita chillguimojcunaga. Paycunataga quiquëmi churashcä munayniyoj cashäta juccunata musyachinäpaj.

Isaías 61:11

Imanömi chacracho muru pashtamun, wertachöpis imanömi lanta chillguir wiñan, chaynömi Tayta Diosga camacächenga rasun caj alli ruraytana yapay gallaycunanpaj, alabansacunatapis cantananpaj. Chaytaga llapan nasyun runacunami ricanga, wiyanga.

Jeremías 23:5

«Juc junäga Davidpita lijïtimu mirar aywajnami ray cangapaj. Payga alli yachaj cayninwanmi mandangapaj. Cay nasyunchöga alli cajllatanami rurangapäpis.

Jeremías 33:15

Chay junajcuna chayamuptenga camacächishaj Davidpita lijïtimu mirar aywaj ray cananpämi. Payga mandangapaj rasun cajta, alli cajllata rurarmi.

Jeremías 44:14

Judäpita aywacur Egiptucho wallcajllapis caycäga manami ni jucnayllapis cawaycar quëdangachu. Tiyananpaj Judäman may-jina cutiyta munarpis manami cutenganachu. Juc ishcay gueshpir aywacojcunallami cutirpis cutenga.› »

Jeremías 44:28

Egiptucho wañuypita gueshpiycur Judá nasyunman cutejcunaga juc ishcayllami canga. Chaura Egiptuman tiyaj shacamojcunapäga mä imanöshi canga. Noga nishächush u paycuna nishanchush cumlenga.

Ezequiel 34:29

Paycunapäga fiyupami micuycunatapis wayuchishaj. Chaura yapayga mananami muchuycho cangapänachu. Ni juc-lä nasyun runacunapis manami asipangapänachu.

Ezequiel 36:8

«Gamcunami ichanga Israel jircacuna carcaycanquipaj jatusaj yöracuna juntasha. Jinachöpis wayuynincuna aypallami caycanga acrashä Israel runacuna micunanpaj. Israelcunaga cutimunanpänami carcaycan.

Ezequiel 7:16

Waquenga mancharisha palumanöpis jircacunaman, puntacunaman gueshpir pacaconga. Gueshpejcunapis juchanpita llapanmi wañonga.

Joel 2:32

Chayno captinpis nogaman yäracamushpan mañacamaj cäga salbashami canga. Sión lömacho, Jerusalenchömi acrashä cajcunaga salbacongapaj.»

Joel 3:18

Chay wichanga intëru jircacunacho, intëru lömacunachöpis bïnuwan lëchi canga yacu-jina aypallami. Judächo caj ragracunapapis aypalla yacumi aywanga. Templöpitanami yacu pashtaycangapaj. Chaynami parguycangapaj Sitim guechwa pampata.

Abdías 1:17

«Sión lömacho ichanga waquin acrashä runacuna cawaycar quëdangapaj. Chaypitaga Jacobpita mirar aywajcuna chacrancunata yapay shuntangami.

Zacarías 3:8

Josué, sumaj wiyamay. Gamga caycanqui mandaj cürami. Gamno caycaj cüra-masiquicunapis wiyacuchun ari. Gamcunaga acrashä runacunapaj caycanqui juc señalmi: Sirbimajtami yöra chillguimojtanöpis yurichimushaj.

Zacarías 6:12

Nircur ninqui: ‹Munayniyoj Tayta Diosga caynömi nin: «Chellguej» jutiyoj runaga quiquinpa sapinpita chillguircurmi Tayta Diospa Templunta jatarachenga.

Zacarías 9:17

¡Chaura ima alli, ima cuyayllapäraj canga chay nasyonga! Rïgupis, bïnupis aypalla captinmi ollgupis warmipis wamracuna cuyayllapaj alli wiñanga.

Malaquías 3:17

Munayniyoj Tayta Dios nin: «Juc junäga paycuna yapay acrashä runacunanami cangapaj. Juc tayta imanömi sirbej wamranta cuyapan, chaynömi nogapis paycunata cuyapäshaj.

Mateo 24:22

Acrashan runacunata cuyaparmi Tayta Diosga chay ñacay junajcunata wallcayächenga. Man'chäga manami pipis salbacunmanchu.

Lucas 21:36

Chaymi gamcunaga mayaj-mayaj camaricushalla carcaycay. Imay örapis Tayta Diosta mañacuycay ‹Gueshpinäpaj yanapaycallämay› nir. Chaymi castigasha canayquipa ruquenga noga Destinädu Runapa ñaupächöna cushisha carcaycanquipaj.»

Juan 1:14

Camacächej Palabraga runamanmi ticraran. Nircur nogacunawanmi cay pachacho goyaran. Paywan purirmi ricarä Tayta Diospa japallan wamran cashpan munayniyoj caycajta. Chaynöpami ricarä payga cuyapäcoj cashanta; rasun cajllata rimaj cashanta.

2 Corintios 4:6

Cay munduta camashpanpis quiquin Diosmi niran: «Chacaj caycashanpita achicyächun». Paymi achicyajno caycaj alli willacuyninta nogacunapa shongöman churasha. Chaynöpami nogacunaga Jesucristuta ricar achqui achicyajnöpis musyaycächë Diosninchi alli cashanta.

2 Pedro 1:16

Jesucristo munayniyoj cutimunanpaj cashanga manami ninshi-ninshillachu. Chaypa ruquenga quiquëcunami ricashcä munayniyoj cashanta.