Isaías 29:1 - Tayta Diosninchi Isquirbichishan

¹ «¡Ay imanöraj canqui Davidpa siudänin Ariel! ¡Ay imanöraj canqui David pachacushan Jerusalén siudä! Chay siudächo tiyajcunaga cada wata fistata rurar cushicushpanmi goyarcaycan.

Isaías 29:1 ပူးပေါင်းရင်းမြစ်များ

2 Samuel 5:9

Nircur Davidga chay siudächo tiyacuycuran. Jutintana churaparan «Davidpa siudänin» nir. Pata chaquinpitapis pergata jatarachiran. Intëru cantunpa curalachiran.

Isaías 29:13

Tayta Dios nin: «Cay runacunaga shimillanwanmi sirbiman. Janan shongullami alabaman. Shongunchöga juctami yarparcaycan. Nogata aduraycämashanga caycan runacuna yarpaynillanpita nishancunallami. Paycunaga runa yachachishannöllami aduraycäman.

Isaías 29:9

¡Ariel runacuna, gamcunaga jinalla goyarcaycay mana tantiyacuypa! ¡Gaprano, imatapis mana ricajno goyarcaycay! ¡Machächicojta mana upusha caycashpayquicunapis machasha runano tapraycachaycanqui!

Isaías 31:9

Paycunapa pacacunanpis manchariyllawanmi juchucäconga. Capitannincunapis bandërancunata cachaycur gueshpir aywaconga.» Chayno cananpäga Tayta Diosmi nisha. Payga chiquejcunata castigananpaj camarishanami caycächin Sioncho nina rataycajta, Jerusalenchöna rataycaj jurnïllata.

Isaías 5:12

Gamcuna fistata rurashayquichöga arpa, guitärra, tamburcuna, pincullucuna wagashallanmi wiyacaycanpis. Chay fista rurashayquichöga bïnupis aypallanpami ushacan. Ichanga manami yarpachacunquicunachu Tayta Dios ruraycashanpäga. Manami tantiyacunquipischu Tayta Dios camaricuycashantaga.

Isaías 66:3

Waquin runacunami ichanga aduramashpan töruta rupachinanpaj pishtan. Runa-masintapis wañuchin. Uyshata nogapaj pishtan. Allgutapis cuncanta milluypa wañuchin. Chaqui micuy ofrendancunatapis nogapaj churan. Nircorga cuchipa yawarnintapis churan. Aduramashpan insinsutapis rupachin. Nircorga ïdulucunatapis aduran. Chayno melanaypajcunata rurananpaj acrajcunaga chaycunata rurashpan fiyupa cushicun.

Jeremías 7:21

Israelcunapa munayniyoj Tayta Diosninmi nin: «Gamcuna munashpayquega sïguir ofrendayquicunata churaycay. Nogapa jutëcho uywacunatapis sïguir pishtay. Nircur chaycunapa aychantapis melanänayquicama micuy.

Oseas 5:6

Sacrifisyuta nogapaj rupachinanpaj uyshancunata, wäcancunata apacurcurmi Nogata ashimashpan purengapaj. Chayno ashimashpanpis manami tarimangapächu. Chaynöga canga noga cachaycushana captëmi.

Oseas 8:13

Paycunaga amatarmi munan uywacunata pishtapämayta. Nircur pishtashan uywacunapa aychantaga micucarcärin. Noga Tayta Diosga manami cushicöchu chayno rurashanpita. Mana allita rurashancunatami yarpäshaj. Juchanpita castigashpämi Egiptuman cutichishaj.

Oseas 9:4

Tayta Diostaga bïnutapis manami garanquipänachu. Uywacunatapis manami pishtapanquipänachu. Micushayqui tantaga canga wañupacur micunan tantanöllanami. Pipis chay tantata micoj cäga ganranami cangapaj. Chay tantataga quiquiquicunallami micunquipaj. Manami allichu canga Tayta Diosta garanayquipäga.

Levítico 23:4

«Gamcuna waquin fistacunata rurarpis aduramänayquipaj rispëtuwan shuntacanqui.

Hebreos 10:1

Moisés isquirbishan laycunaga mas alli caj chayamunanpaj cajpa llantuyninnöllami. Chaymi wata-wata uywacunata juchancunapita rupaycächiptinpis runataga mana rucachishachu.