Isaías 14:30 - Tayta Diosninchi Isquirbichishan

³⁰ Pobricunapäga cangapämi uyshancunata michinanpaj guewapis. Imanpis mana caj runapis cushishami goyangapaj. Ichanga Tayta Dios camacächenga gam tiyashayqui nasyun runacuna yargaypita wañunanpaj. Cawaycar quëdaj cajcunatapis ushajpämi Tayta Dios wañuchenga.

Isaías 14:30 ပူးပေါင်းရင်းမြစ်များ

Job 18:13

Gueripäcuywan wallca wallcalla aychan shicwaycan. Wañuyman apacoj gueshyami cuerpuncunatapis ushaycan.

Isaías 11:4

Pipis mana yanapashancunata alli arriglanga. Nasyuncho caj pobricunatapis rispitacachenga. Paymi nenga ñacachicojcuna castigacänanpaj. Paypa jämaynenga espädanömi fiyucunata wañurachenga.

Isaías 29:19

Tayta Dios yanapaptinmi umildicunaga cushiconga. Pobricunapis cushishami goyangapaj Israelcuna sirbishan Santo Tayta Dios yanapaptin.

Isaías 3:14

Tayta Diosmi arriglananpaj gayachishpan dimanducho arriglajcunatawan mandajcunata nenga: «Gamcunami übas wertäno caycajcunatapis illgächishcanqui. Pobricunatapis suwapashcanqui. Suwacushayquicunatanami wasiquicunaman juntaycächinqui.

Isaías 3:15

¿Imanirtaj chaynöga acrashä runacunata ñacaycächinqui? ¿Imanirtaj pobricunata ñacachishcanqui?» Munayniyoj Tayta Diosmi chayno nishunqui.

Isaías 33:16

Chayno cawaj cajmi alli pachacho cawanga. Chay runaga goyanga gagacho rurasha caycaj pacacunachönömi. Chay runapaga micuyninpis yacupis manami pishengachu.

Isaías 37:30

Ray Ezequiastana Isaías niran: «Rasunpa cananpaj cashanta musyanayquipaj caynömi canga: «Cay watapis, watanpis gamcunaga micunquipaj quiquillan wiñacamoj micuy wayushantami. Watannin cajchönami ichanga mururcärirpis shuntanquipaj. Übasta lantarcurpis wayuyninta micunquipaj.

Isaías 5:17

Llapan siudäcunami juchusha quëdanga. Chay siudäcuna cashanchönami uyshacunata cabracunata michiconga.

Isaías 51:19

Ishcay castami disigrasya chayashurayqui: Nasyunniquita usharir chaycho ima-aycayqui cajtapis apacusha. Nasyunniquicho tiyaj runacunanami pillyachöpis y yargaypitapis wañusha. Gamtaga ¿pillaraj cuyapaycushunqui? ¿Pillaraj shogaycushunqui?

Isaías 8:21

Paycunaga fiyupa llaquicurmi, yargaypitami juc-läpita juc-läman purengapaj. Yargaycällarna fiyupa rabyacarcärengapaj. Raynintapis, «maldisyunädu cachun» nengapaj. Janajpa ricärir Tayta Diospa contranpis rimanga.

Isaías 9:20

Quiquinpa wamrancunata cada-ünun micucarcärin. Jucaj läduncho caycajta ultayllapa micucurcurpis yargaycanraj. Yapay jucaj läduncho caycajta micucurcurpis manami sacsanchu.

Sofonías 3:12

Gamcuna tiyashayquichöga cachaycushäpaj rispitacojcunatawan, alli runacunallatanami. Paycunaga nogallamannami yäracamongapäpis.