Eclesiastés 11:8 - Tayta Diosninchi Isquirbichishan

⁸ Pipis achca wata cawaj cäga achicyaj pachacho cashanyaj llapan tarishanta cushicur micuchun upuchun. Ichanga yarparächun wañorga chacaycho aypalla wata cananpaj cajta, imapis shamoj watacho cajcunaga yangalla cananpaj cajta.

Eclesiastés 11:8 ပူးပေါင်းရင်းမြစ်များ

Job 10:21

Chaypitaga imaypis mana cutimojnami aywacushaj. Aywacushaj yanauyaycaj chacaymannami.

Job 10:22

Chay pachaga caycan yana mancapa siquinno yanauyaycajmi, pasaypa mana allimi. Chaychöga manami achquipis canchu.»

Job 14:10

Runami ichanga imaypis mana cutimunanpäna wañucun. Wañorga ¿maymantaj chayan?

Job 14:12

runapis wañorga manana imaypis cawarimunnachu. Syëlu caycashancamaga runa pamparashanpita manami jatarimongarächu. Puñuycajno caycashanpita manami ricchamongarächu.

Job 15:23

Paycunaga micuyta ashirmi purin. Musyannami paycunapäga pacha chacacäcunanpaj cashanta.

Job 18:18

Cay pachapitaga jitarenga. Achicyajcho caycajtapis chacajmanmi gaycurenga.

Salmos 49:20

Runaga may-jina rïcu carpis para-simriga manami cawanchu. Uywacunanöllami wañun.

Eclesiastés 11:2

Nasyunman mana allicuna chayamunanpaj cashantaga manami musyanquichu. Chaymi charashayquitaga puydishayquipita runacunata goycuy.

Eclesiastés 2:15

Chaymi nirä: «Mana tantiyacoj upata päsashannölla nogatapis päsamänan caycaptenga yachaj cashäpis ¿imapätaj bälenga?» nir. Chaymi tantiyacushcä chaypis yangalla cashanta.

Eclesiastés 2:17

Chaymi caway bïdapäga fiyupa rabyashcä. Cay pachacho ima rurashäpis casha melanäcushallämi. Rasunpaga llapanpis yangallami. Wayrata chariyta munajnöllami caycanchi.

Eclesiastés 2:19

Payga yachajchush u mana yachajchush cacongapis. Ichanga paymi cay pachacho fiyupa ñacar arur yachaj car rurachishäcunata charicurconga. Chaypis yangallami.

Eclesiastés 2:26

Paymi yachayta gomanchi, tantiyachimanchi, cushicachimanchi alli ricashan cajtaga. Juchata rurajcunatami ichanga ñacar ima-aycatapis fiyupa cuestajcunata shuntananpaj cachaycun. Nircur chay runacunaga shuntashancunata cachapaycun Tayta Dios alli ñawinpa ricashan caj runacunapäna. Chaypis yangallami, wayrata chariyta munashanchïnöllami.

Eclesiastés 4:16

Aypalla runacuna rispitar alli ricasha captinpis mas guepatanaga «manami allichu mandasha» nenganami. Chaypis caycan yangallami, wayrata chariyta munashanchïnöllami.

Eclesiastés 4:8

Japallan runa arun mana jamaypa, amïgun, ni wamrancuna, ni wauguincunapis mana caycaptin. Chay runa ima-aycatapis masta mastami munaycan. Nircur chay runa yarpachacun «Chay-jina ¿pipäraj arö? ¿Imanirtaj gustashätaga mana rurächu?» nir. Chay-jina ñacashanpis yanga-yupayllami.

Eclesiastés 6:11

Maychöpis achcata parlashanchöga mana cumbënejcunallatami riman. Chayno parlarga mananami ni ima allitapis jorgunchïchu.

Eclesiastés 6:6

Chay runa ishcay waranga wata cawasha carpis ima charashantapis manami ushanmanchu caran. Imano captinpis wañorga juc pachallamannami llapanpis aywan.

Eclesiastés 7:14

Chaymi alli goyay cashan junajcunaga cushisha goyay. Mana alli goyay junajcuna chayamuptin sumaj yarpachacuy. Ishcantapis Tayta Diosmi camacächisha. Chaynöpami runaga tantiyacun shamoj watacunacho ima päsananpaj cashantapis mana musyaycar.

Eclesiastés 8:12

Nogaga yarparä Tayta Diosta sirbir rispitajcunalla alli cawashantami. Yarparä Tayta Diosta mana manchacuptin fiyucunapäga imapis mana alli chayamunan cashanta; llantuy päsacojno rätulla cawashanta. Chaypis juchata ruraj cäga jinalla juchata ruraycarpis achca watami cawarcaycan.

Eclesiastés 8:15

Chaymi në: «cushisha goyayllami mas alliga caycan» nir. Cay pachacho cawashancama runaga micunman, upunman, cushicur goyanman. Juc rätulla cawayta Tayta Dios goshanchöga llapanta arur ñacashanpita chayno goyänallanpämi allëga caycan.

Eclesiastés 9:7

Chaymi cawashayquicamaga micuyniquitapis cushisha mishquilla micuy. Bïnutapis cushisha upuy. Alli rurashayquicuna Tayta Diospäga allimi casha.

Jeremías 13:16

Yanauyaycaj chacaj pachaman Tayta Dios manaraj chayachishushayquicama payta rispitay. Yanauyaycaj chacayta chayachimuptenga jircacunachöpis tacacanquipämi. Tayta Diosta rispitay shuyaraycashayqui achquita manaraj chacajman ticrachiptin.

Joel 2:2

Chay junäga canga yanauyaycaj chacaymi, pucutay juntashami, gontaynöraj chacashami. Pacha wararcuptin inti ratamur mashtarcojnömi puntacunapapis chüpacacunaga aypalla munayniyoj suldärucunano juntacuyconga. Chaynöga manami unay caranchu. Chaynöga manami ni imaypis canganachu.

Mateo 22:13

Chaura uywaynincunata nisha: ‹Cay runapa chaquinta maquinta manyarcur jitariy jawa chacajman. Chaychömi wagashpan quiruntapis uchur ñacanga›.

Juan 12:35

Chayno niptin Jesús niran: «Nogami achqui caycä. Ishcay-quimsa junajllanami gamcunacho caycäshaj. Cay pachacho cashäcama nogaman yäracamuy. Nogaman yäracamorga manami chacäpacunquipächu. Chaypa ruquenga achicyajcho puriycajnömi canquipaj. Chacajcho purejcunaga maypa aywashantapis manami musyanchu.» Chayno nircur Jesús aywacuran. Nircur runacunapitaga pacayllapana goyäcuran.

Deuteronomio 32:29

Canan nishäcunata ojalä tantiyacunman ichanga. Ushacänanpaj cashanta cuentata gocuptin allimi canman.

Judas 1:18

«Ushanan junajcunaga yurimongapaj asipäcojcuna, Diosta ashllejcunami. Paycunaga Tayta Diosta wiyacunanpa ruquin quiquincuna munashannömi juchata rurallar cawanga.»