Deuteronomio 8:2 - Tayta Diosninchi Isquirbichishan

² Tayta Dios chuscu chunca (40) wata chunyajpa purichishushayquita ama gongaychu. Chaychömi payga llaquicachishushpayqui, imacunachöpis ñacachishushpayqui musyapäshurayqui yarpayniquicuna imano cashantapis, mandamintuncunata rasunpa cumlinayquipaj mana cumlinayquipaj cashantapis.

Deuteronomio 8:2 ပူးပေါင်းရင်းမြစ်များ

Génesis 22:1

Chaypita achca watatanaga Abrahamta Dios musyapayta munaran. Chaymi Diosga gayaran «¡Abraham!» nir. Chaura Abrahamga niran: «Caychömi caycä» nir.

2 Crónicas 32:31

Caru Babiloniapita-pacha mandajcuna cachata cachamuran Ezequiasman watucoj, Judá nasyuncho imano milagru päsashantapis musyacachaj. Ezequías imano yarpashantapis musyananpämi Tayta Diosga quiquillanta cachaycuran.

2 Crónicas 33:12

Fiyupa ñacashpanrämi Manasesga Tayta Diosta mañacuran. Chayrämi unay caj awiluncuna rispitashan Tayta Diospa ñaupancho arpinticuran.

2 Crónicas 33:19

Tayta Diosta mañacushan, Tayta Dios imano yanapashan, ima-ayca juchata rurashan, may puytush lömacunacho capillacunata rurachishan, manaraj arpinticur Asera diosa-niraj ïdulucunata, waquin ïdulucunata mayman churashanpis willapancunaga isquirbiraycan profëtacunapa willapan isquirbiraycashanchömi.

Nehemías 9:19

Cuyapäcoj cashpayquimi chunyajchöga mana cachaycurayquichu. Pucutaypis caminuta rejsichinanpaj manami junajpa illgaranchu. Nina achquipis manami illgaranchu chacaypa caminuta rejsichinanpaj.

Job 33:17

Chaynöga ruran mana allita ruraycashanta cachaycunanpaj, manana alli-tucoj cananpaj.

Salmos 103:2

Almantïmi Tayta Diosta alabashaj. Yanapämashancunataga manami gongächu.

Salmos 106:7

Unay caj awilöcuna Egiptucho cashpan manami tantiyacuranchu fiyupa almiraypajcunata rurashayquita. Fiyupa cuyacoj cashayquitami gongaycäriran. Nircur Puca Lamar cantunchömi gampa contrayqui ricacuran.

Salmos 136:16

Chunyaj chaqui jircapa acrashan runacunata pushaj Tayta Diosta agradësicuy-llapa. Pay cuyacoj cashanga imaycamapis chaynöllami.

Salmos 77:11

Unay watacunacho Tayta Diosninchi almiraypajcunata rurashallantami yarparäshaj.

Salmos 81:7

Fiyupa llaquicur mañacamaptiquimi nogaga salbarä. Pucutay rurincho räyuycajpitami gamcunataga willapämurä. Imano yäracaycämashayquitapis Meriba yacu ñaupanchömi gamcunataga musyaparä. Selah

Éxodo 15:25

Chaura Moisesga Tayta Diosta mañacuran yanapänanpaj. Mañacuptin Tayta Diosga juc yörata ricachiran. Chayta Moisés yacuman jitarpuran. Chaura yacuga upunanpaj allina ticracuriran. Chaychömi Tayta Diosga Israelcuna imano cawananpäpis laycunata willaparan. Wiyacunanpaj cashanta mana wiyacunanpaj cashantapis paycunata mayaparan.

Éxodo 16:35

Chaynömi Israelcunaga manäta micuran chuscu chunca (40) watantin Canaán nasyunman chayanancama.

Éxodo 16:4

Chaymi Tayta Diosga Moisesta niran: «Janajpitami tantata tamyatano shicwachimushaj. Chaura paycunanami tiyaycashanpita aywar waran-waran shuntamonga chay junaj micunan aypajllata. Cananmi musyashaj noga nishäta cumlishanta mana cumlishantapis.

Éxodo 20:20

Chaura Moisesga runacunata niran: «Ama manchacuychu. Tayta Diosga shamusha gamcunata musyapäshunayquipämi, payta rispitashpayqui juchata mana ruraypa cawanayquipämi.»

Proverbios 17:3

Goritawan guellaytaga rasunpa alli cashanta chulluchiyparämi rejsin. Runacuna yarpaycashantapis Tayta Diosmi rejsin.

Isaías 2:17

Alli-tucojcunawan ollgojcunaga pasaypa manacajman churashami cangapaj. Chay junäga Tayta Diosllami fiyupa munayniyoj cashpan rispitasha canga.

Jeremías 2:6

Egiptupita jorgamusha caycaptë, chunyaj jircapa pushamusha caycaptë, fiyu chaqui jircapa, yacuynaj jircapa pushamusha caycaptë, pï-maypis mana tiyashan jircapa, pipis mana purinan jircapa pushamusha caycaptëpis paycunaga manami yarpachacuranchu noga munashäno cawananpaj.

Ezequiel 20:19

Nogami Tayta Diosniqui cä. Laynë nishanta, mandamintöcunata mana cachaycuypa cumliy.

Amós 2:10

Israelcuna, gamcunatami ichanga Egiptupita jorgamurä. Amorreo runacuna tiyashan nasyunta gamcunata goycunäpaj chuscu chunca (40) watatarämi chunyajpa pushamur chayachimurä.

Números 14:33

Wamrayquicunanami chuscu chunca (40) wata uywancunata ricallar chunyaj jirca-quinraypa goyanga. Chayno paycuna ñacanga gamcuna mana wiyacamashayquipitami. Puriycällarmi canan rucu cäga llapayqui ushacanquipaj.

Lucas 18:14

Chaymi impuestuta cobräga perdunashana wasinman cutisha. Fariseo cajtami ichanga Tayta Dios mana perdunashachu. «Alli-tucoj cäga manacajman churashami cangapaj. Manacajman churasha caycajcunami ichanga alliman churasha cangapaj.»

Juan 2:25

Manami nistajchu runacuna willanantaraj. Payga quiquinmi musyaycaran runacunapa shongun imano yarpaycashantapis.

Deuteronomio 1:3

Egiptupita llojshicamushanga caran chuscu chunca (40) watana. Chay wata chunca quilla gallaycunan junajcho Moisesga Tayta Dios willapashancunata Israelcunata willaran.

Deuteronomio 1:33

Paymi ñaupanchïta aywashpan mayman chayananchïpaj, maycho toldunchïcunata ichichinanchïpäpis tantiyachimaranchi. Chacaypaga nina rataycajwan maypa aywanayquipäpis ricachishurayqui. Junajpana pucutaywan ricachishurayqui.

Deuteronomio 13:3

ama chasquipanquichu. Chay runata chasquipänayquipa ruquenga tantiyanqui Tayta Dios musyapaycäshushayquita. Paymi musyayta munaycan llapan shonguyquicunawan, llapan buluntäniquicunawan payta cuyashayquita u mana cuyashayquitapis.

Deuteronomio 2:7

«Llapan rurashayquichömi Tayta Diosga bindisyunta gosha-cashunqui. Chuscu chunca (40) watantinnami cay chunyajpa puriptiqui yan'gaycäshunqui. Gamcunata ricaycäshunqui imapis mana päsashunayquipaj. Chaymi mana imapis pishëshurayquichu.

Deuteronomio 29:5

Chuscu chunca (40) watami chunyajpa gamcunata pushamushcä. Chay watacunacho manami mayganiquipapis ushacashachu röpayqui ni llanguiquipis.

Deuteronomio 32:7

«Mä yarpachacuriy. Unay imano cashantapis tantiyacuriy. Taytayquicunata, auquincunata tapucuy.

Deuteronomio 7:18

¡Imano captinpis paycunata ama manchacunquichu! Chaypa ruquenga yarpay faraontawan Egipto runacunata Tayta Dios imano rurashantapis.

Deuteronomio 8:16

Chunyajcho micunayquipäpis manäta camaripäshurayqui. Chay micuytaga manami unay caj famillyayquicunapis rejsiranchu. Chunyaj chaqui jircapa chayno pushamushurayqui manami ñacanallayquipächu, man'chäga payman yäracur cawanayquipämi. Paymi musyayta munaran mandamintuncunata cumlinayquipaj u mana cumlinayquipaj cashantapis.

Santiago 1:3

Ñacaycunata päsar-rämi yachacunchi llapan shongunchïwan masta Tayta Diosman yäracuyta.

Santiago 4:10

Ama alli-tucuychu. Chayrämi Tayta Diosninchi alliman churashushpayqui yanapäshunquipaj.

Santiago 4:6

Tayta Diosninchëga fiyupami cuyapämanchi. Chaymi palabranchöpis cayno niycan: «Tayta Diosninchi manami yanapanchu alli-tucojcunataga. Umildicunatami ichanga cuyapar yanapan.»

1 Pedro 1:7

Ichanga tucuy ñacaycunata päsar ichipaptinchïrämi Tayta Diosninchïman yäracushanchi musyacan. Gori alli cashanta musyanapäga ninawanrämi chulluchinchi. Chaynömi gamcunapis ñacar-raj Tayta Diosman mas yäracunqui. Gamcuna yäracushayquega goripita masmi bälin. Chaymi imano ñacarpis llapan shonguyquipa yäracuptiquega Jesucristo cutimushpan alli cawayman churashunquipaj.

Apocalipsis 2:23

Paycunapa wamrancunatana gueshyachishaj wañuyman chayananpaj. Chayrämi yäracamajcunaga musyanga llapan runapa yarpayninta, shongunta noga musyashäta. Nogaga imanöpis rurashanpitami cada runata cutichishaj.

Jueces 2:22

Chayno rurashpanmi Tayta Diosga Israelcunata musyapayta munaran. Unay caj awiluncunano Tayta Dios nishanta cumlishanta u manana cumlishantapis musyapaytami munaran.

Jueces 3:4

Chay runacunawanmi Tayta Diosga musyapayta munaran Israelcunata unay caj famillyancunata Moisés yachachishancunata cumlishanta mana cumlishantapis ricananpaj.