Apocalipsis 18:4 - Tayta Diosninchi Isquirbichishan

⁴ Chaynöpis yapay wiyarä janaj pachapita cayno nimojta: «Acrashä runacuna, chay siudäpita aywacuy pay juchata rurashanno mana ruranayquipaj, juchata rurashanpita castïgu chayashan gamcunata mana chayashunayquipaj.

Apocalipsis 18:4 ပူးပေါင်းရင်းမြစ်များ

Génesis 19:14

Chayno niptin Lotga aywaran mashan cananpaj caycajcunata willaj. Chayar paycunata niran: «Caypita juclla aywacushun. ¡Tayta Diosmi illgächej-aywan cay siudätaga!» Chayno niptin Lotpa mashan cananpaj caycajcunaga mana riguir asicuran.

Salmos 50:18

Suwacunatami alli jamachinqui. Majayoj caycar jucwan cacojcunawan iwalmi goturpanqui.

Isaías 48:20

Caldeacho caycaj Babiloniapita llojshicuy-llapa. Gueshpir aywacuy-llapa. Llojshicunanpaj caj willapataga fiyupa cushicur gayacuyparaj willacuy. Intëruman musyachiy. Cayno willacuy «¡Tayta Diosga salbashami sirbejnin Jacobpita mirajcunata!

Isaías 52:11

Chay Babiloniapita llojshicuyna-llapa. Ama yataychu imatapis ganrayächicoj cajtaga. Chaycho caycashayquipitaga llojshicuyna ari. ¡Tayta Diospa rispitädu cösancunata cutichejcunaga ganrayächicojcunata ama yataychu!

Jeremías 50:8

«¡Acrashä runacuna, Babiloniapita gueshpicuy-llapa! ¡Uyshacunata chïbu pushajno ñaupa-puntata llojshiy-llapa!

Jeremías 51:45

Acrashä runacuna chaypita llojshicuy. Cawayta munaj cäga cada-ünuyqui gueshpicuy, fiyupa rabyar nina ratarejno usharinäpaj caycajpita.

Jeremías 51:50

«Wañuchinacuypita gueshpir aywacoj cajcunaga mana ichiypa gueshpir aywacuy. May carucho caycashpayquipis noga Tayta Diosniquita yarpämay. Jerusalentapis ama gongaycuychu.

Jeremías 51:6

«¡Babiloniapitaga aywacuy! ¡Cawayta munaj cäga gueshpicuy! ¡Babilonia runacunapa juchanpitaga llapayqui ama wañuychu! Paycunata ayñita cutichinä junaj chayamushanami. Chaymi juchanman-tupu castigashaj.

Jeremías 51:9

Chaura waquin nasyun runacunaga Babiloniata jampiyta camasha. Ichanga manami allchacashanachu. Chaymi nin: ‹¡Cachaycäriyna! Llapanchi aywacushun nasyunninchïman-camana. Paycunapa juchanga syëlucamami chayasha. Chaymi paycunaga fiyupa castigasha canga› nir.

Mateo 23:30

Chayno rurar niycanqui: ‹Unay famillyanchïcuna cawashan wichan cawarga profëtacunata wañuchinanta michashwanmi caran.›

2 Corintios 6:17

Mastapis Tayta Diospa palabrancho nin: «Jucha rurajcunapitaga witicuy. Paycunapitaga llojshicuy. Ganra cajcunataga ama yataychu. Chayrämi chasquishayqui.

1 Timoteo 5:22

Mayur ermänu cananpaj jucllaga ama pimanpis maquiquita churaychu. Sumajraj musyapay imano goyashantapis. Juchata ruraycajta churarga gampis juchayojmi ricacunquipaj. Quiquiquipis Tayta Diosninchi munashannölla caway ari.

2 Juan 1:11

«Jamalläshun» nerga «allimi engañaycanqui» nej-japuymi caycan.