Amós 8:3 - Tayta Diosninchi Isquirbichishan

³ Chay castiganä junäga achcajmi wañonga. Wañojcunataga pacayllapami juc-läman jitariycärenga. Chaymi palasyucho cushicur cantananpa ruquenga llaquicuypitana wagayman churacangapaj.» Chayno cananpämi Tayta Dios nisha.

Amós 8:3 ပူးပေါင်းရင်းမြစ်များ

Salmos 39:9

Gam llapantapis camacächiptiquimi imatapis mana rimacurächu.

Isaías 37:36

Chay nishan chacayllami Tayta Diospa anjilnin chayaycur wañuchiran Asiria suldärucuna pachacaraycajta pachac pusaj chunca pichgan waranga (185,000) runacunata. Warannin tuta waquin suldärucuna riccharcamorga tariran wañusha mashtarpaycajtana.

Jeremías 22:18

Chaypitami Josiaspa wamran Judäpa raynin Joacimpaj Tayta Dios cayno nin: «Pay wañuptenga manami pipis wagangapächu. Manami pipis ‹¡Wauguillau! ¡Pañillau! ¡Ay taytallau! ¡Ay mandajnillau!› nir wagangapächu.

Lamentaciones 2:10

Cuyayllapaj Sión siudächo caj rispitädu auquincunapis upällallami pampacho jamarpaycan. Llaquicurmi umancunaman allpata wiñacurcaycan, gachga röpacunata jaticurcaycan. Jerusalén jipashcunaga pengay-tucushpanmi uysurpaycan.

Joel 1:11

Gamcuna, chacracho arojcuna, übasta cusichajcuna, llaquicushpayqui wagay-llapa. Cananga llapan murushayquicunapis yangallapämi casha. Manami wayushachu rïgupis ni sebädapis.

Joel 1:13

Tayta Diospaj ofrendata churanayquipaj chaqui micuypis ni bïnupis manami cannachu. Chaymi Tayta Diosta sirbir altarcho aroj cüracuna, llaquicushpayqui wagay, lütu car jaticunan röpacunata jaticuy.

Joel 1:5

Machasha puñuycajcuna ricchay. Bïnu upojcuna wagayna. Bïnuga manami cangapänachu.

Levítico 10:3

Chaypita Moisesna Aaronta niran: «Chayno päsananpaj captinmi Tayta Diosninchi niran: « ‹Ñaupäman yaycamojtaga Nogami tantiyachishaj santo captë wiyacamänanpaj. Acrashä Israelcunatami tantiyachishaj munayniyoj cashäta.› » Chayno niptin Aaronga imatapis mana rimacuranchu.

Amós 4:10

«Egiptuman yurichishäno castïgutami gamcunamanpis chayachimurä. Nogami camacächishcä gamcunacho caycaj mösucuna guërracho wañunanpaj. Camacächirä cawalluyquicunata chiquishojcuna guechurishushpayqui apacunanpaj. Nogami camacächirä pillyacho wañoj runacuna ismushan asyaytapis tiyarcaycashayquicho mayanayquipaj. ¡Chaypis gamcunaga manami nogaman yapay yäracamushcanquichu!» Tayta Diosmi chayno nisha.

Amós 5:16

Munayniyoj Tayta Diosga caynömi nin: «Läsacunachömi wagay canga. Cällicunachömi llaquicuypita gaparpanga. Chacracho arojcunatapis gayanga wagäshinanpaj. Pägapaj wagapacojcunatapis gayanga.

Amós 5:23

Noga wiyanäpitaga juc-lächo cantacuy chay alabansayquicunata. Arpayquicuna wagashantapis manami wiyayta munächu.

Amós 6:4

Cuyayllapaj llagllaypa adurnasha jamanacho wegurpaycanqui. Fistata rurar cushicushpayqui goyaycanqui. Carni-mallwacunata, werannin töru-mallwacunata micur jamarpaycanqui.

Amós 6:5

Arpacunatapis wagay-wagayllataraj tucarmi birsucunatapis mushojcunallata jorguycanqui. Instrumentucunatapis Davidnörämi tucuy-nirajta ruraycanqui.

Amós 6:8

Tayta Diosga quiquinpa jutinchömi jurasha. Munayniyoj Tayta Diosga caynömi nin: «Jacobpita mirar-aywajcuna alli-tucushanga fiyupami rabyachiman. Palasyuncunatapis melanäcömi. Chaypitami paycunataga siudänintinta cachapaycushaj chiquejcunapa munayninman.»

Amós 8:10

Fistata rurashancunatami ticrachishaj täpapacuyman. Wañojcunapänami cantangapis. Lütu röpatana jaticachishaj. Llaquicushan musyacänanpaj ajchanta rutucachishaj. Japallan wamranta ograycushanörämi waganga. Llapanpis canga pasaypa llaquicuyllami.»

Nahúm 3:3

Ricacanganami muntäducuna shamushanpis. Espäda achicyaypa achicyashanta, lansancuna chip-chipyashantapis ricay. Waranganpa waranganpami malubrashacunapis canga. Gotuyninpa-gotuyninpami wañushacunapis canga. Intëruchömi wañushacunaga mashtaräconga. Chayno captinmi mayman lluchcananpäpis mana jäcongachu.

Sofonías 1:7

Tayta Dios caynömi nin: «Upällalla cay-llapa. Jusganäpaj caj junäga chayaycämunnami. Chay junajpäga llapanpis camarishallanami caycan. Gayachishäcunapis chayamushanami.