Amós 3:9 - Tayta Diosninchi Isquirbichishan

⁹ Willacojcuna, gamcuna willacuy Asdod runacunapa palasyuncunacho, Egiptucho caycaj palasyucunachöpis. Cayno niy: «Samaria jircacunaman shamuy-llapa, fiyupa mana allicunata Samariacho ruraycajta ricanayquipaj, alli runacunata ñacaycächejtapis ricanayquipaj.

Amós 3:9 ပူးပေါင်းရင်းမြစ်များ

2 Samuel 1:20

Filistea warmicuna mana cushicunanpaj, juchasapa warmicuna cushicuypita mana pinticachänanpaj Gat siudächo ama rimacuchunchu. Ascalonpa cällincunachöpis ama willacuychu.

Proverbios 1:13

Chayno rurarmi rïcuyäshun. Chaynöpami wasinchichöpis imapis mana pishëmäshunpächu.

Proverbios 11:16

Alli shongu warmiga rispitashami canga. Fiyu runaga rïcuyayllachömi cacun.

Eclesiastés 4:1

Chaypita ricarä cay pachacho imano ñacaycächejtapis. Ricashcä ñacajcuna wagaycajta. Wagaptinpis manami pipis shoganchu. Ñacachejcunaga firsapita imatapis rurachin. Chaypis ñacajcunataga manami pipis shoganchu.

Jeremías 31:5

Samaria partipa jircancunachömi übascunata yapay lantanquipaj. Übasta lantajcunaga wayushanta cushishami pallanquipaj.

Jeremías 46:14

«Egiptucho, Migdolcho, Menfischo, Tafneschöpis cayno willacuy-llapa: ‹¡Ricaj-ricajlla camaricushallana carcaycay! ¡Intëru ñaupayquipanami sabliwan wañuycächin!›

Jeremías 50:2

«Nasyuncunaman willacuy. Llapanta musyachiy. Señalpaj bandërata churay. Willapashätaga juctapis mana gongaypa willacuy. Cayno niy: ‹Babiloniataga maynami charisha. Bel diospis pengaychömi caycan. Marduc diosga fiyupa mancharishami caycan. Ïduluncunaga, manacaj diosnincunaga pengaychömi, mancharishami carcaycan.›

Ezequiel 36:8

«Gamcunami ichanga Israel jircacuna carcaycanquipaj jatusaj yöracuna juntasha. Jinachöpis wayuynincuna aypallami caycanga acrashä Israel runacuna micunanpaj. Israelcunaga cutimunanpänami carcaycan.

Ezequiel 37:22

Cay pachachöga juc nasyunlla cananpämi paycunata jucllachashaj. Rayninpis jucnayllanami canga. Mananami ishcay nasyunnachu canga. Ni ishcay raycunapis manami mandanganachu.

Oseas 7:1

acrashä runacunata jampiptë, Efrainpawan Samariapa juchancunaga alayrimi ricacan. Paycunaga llullacuyllapämi yachacasha carcaycan. Llapanpis suwallami. Wasicunamanpis suwacoj yagacaycärin. Runacunata imantapis cällicunacho guechun.

Amós 1:8

Asdod siudächo mandaycajtapis illgächishämi. Chaynömi rurashaj Ascalón siudächo mandaycajtapis. Llapan munaynëwanmi castigashaj Ecrón siudächo tiyajcunataga. Chayno castigaptëmi jucnaylla gueshpejllapis Filistea nasyun runaga wañonga.» Tayta Diosmi chayno nisha.

Amós 4:1

Sumaj wiyay Samaria warmicuna. Basán particho wäcacunano caycaj warmicuna wiyay cayno nishäta: Gamcunaga pobricunatami ñacaycächinqui. Pishëpacojcunatapis magar-ushaycanqui. Runayquicunatana «Bïnuta apamuy upyanäpaj» nircaycanqui.

Amós 5:11

Gamcunaga pobricunata manacajmanmi churarcaycanqui. Rïgupitapis impuestuta pägashunayquipämi nircaycanqui. Chayno cashayquipitami mana tiyanquipächu llagllasha rumicunapita wasicunata rurashayquichöpis. Chayno, manami upunquipächu bïnutapis lantashayqui übas wayushantaga.

Amós 6:1

¡Ay imanöraj canqui Sioncho goyaj autoridäcuna! ¡Ay imanöraj canqui Samariacho tiyaj mandajcuna! Gamcunaga charashayquiman yäracurmi munayniyoj-tucurcushcanqui. Gamcunamanmi Israelcunaga «yanapämay» nir aywarcaycämun.

Amós 6:3

Gamcunaga fiyupa ñacay junaj chayamunanpaj caycajta manami yarpayllapis yarpanquichu. Chaypis mana allita rurar masmi gayaycanqui chay ñacay junajta.

Amós 8:6

Rïgupa shojmapancunallatapis ranticushun. Pobricunataga rantishun. Pishipacojcunatana juc par llanguipa ruquin charicurcushun» nir.

Miqueas 6:10

Fiyu runacunapa wasinchöga ima-aycanpis caycan mana allita rurar shuntashallanmi. Chaynöpis chaychöga caycan chiquishä caj suwa tupullami.

1 Samuel 5:1

Filistea runacunaga Diospa babulninta Eben-ezercho guechurcur aparan Asdod siudäman.