1 Reyes 12:20 - Tayta Diosninchi Isquirbichishan

²⁰ Israelcunaga Jeroboam cutimushanta musyaycärir gayachiran llapan runacuna shuntacasha caycashanman shamunanpaj. Chayaycuptin churaran llapan Israel caj runacunapa raynin cananpaj. Israel cäga mana ni jucnayllapis quëdaranchu Davidpa cajman guellicunanpaj. Chaura Judá trïbu cajllatanami Davidpita mirar aywaj cäga mandaycaran.

1 Reyes 12:20 ပူးပေါင်းရင်းမြစ်များ

2 Samuel 20:2

Chaura Israelcunaga Davidta cachaycärir llapan aywacuran. Bicripa wamran Sebatana gaticurcuran. Judá casta cajcuna ichanga Jordán mayupita-pacha asta Jerusalencama rayninta mana cachaypa yan'garan.

1 Reyes 11:13

Papäniqui-raycumi, acrashä Jerusalén siudä-raycumi llapantaga mana guechushächu. Juc trïbu cajllatami Israeltaga cachapaycushaj.»

1 Reyes 11:26

Nabatpa wamran Jeroboampis ray Salomonpa contran ricacuran. Ray Salomonpaga Jeroboam caran mandäshejninmi. Payga caran Efraín casta Sereda siudäpita. Mamanga caran biyüda Zerúa.

1 Reyes 11:32

Sirbimajnë David-raycu, acrashä Jerusalén siudä-raycumi Salomontaga cachapaycushaj juc trïbullata.

1 Reyes 11:35

Wamrantami ichanga llapanta guechushäpaj. Nircorga gamtami goycushayquipaj chunca trïbutaga mandanayquipaj.

1 Reyes 11:36

Juc trïbullatami Salomonpa wamrantaga cachapaycushaj, sirbimajnë Davidpa castan Jerusalencho achicyaj pachata ricar mandaycänanpaj. Chay siudätami acrashcä imaycamapis tiyanäpaj.

1 Reyes 11:37

Gammi canquipaj norte caj-läman raquicaj Israelcunapa raynin. Shonguyqui yarpashannömi mandanquipaj.

1 Reyes 12:17

Roboamga Judá particho tiyaj Israelcunata jinallami mandaycaran.

2 Reyes 17:21

Davidpita mirar aywajcunataga Israelcunapita raquisha caran. Israelcunaga raynin cananpaj churacarcärisha caran Nabatpa wamran Jeroboamta. Paynami Israelcunataga Tayta Diosta gongaycachiran fiyupa juchata rurachishpan.

Oseas 11:12

Tayta Dios nin: «Efraín runacunaga tucuynöpami llullapämasha. Israel runacunaga tucuynöpami manacajcunata nimasha. Judá runacunaga noga Tayta Diosninta gongaycamashami. Cananga ïdulucunatana mana cachaypa adurarcaycan.

Oseas 8:4

Paycunaga nogata mana tapucamayllapami raynincunata churacarcärisha. Noga mana auniycaptëmi mandajnincunatapis churacarcärisha. Guellaynincunatawan gorincunata shuntarcur ïduluncunata ruracarcärisha. Chaynöpami paycunaga mana alliman chayanga.

1 Samuel 10:24

Samuelnami runacunata niran: «Cananga ricashcanquinami-llapa rayniquipaj Tayta Dios acrashanta. ¡Manami pipis paymanga tincunchu!» Chaura llapan Israelcuna nipäcuran: «¡Bïba rayninchi!»