Oseas 14:3 - Q'eqchi Bible

³ Eb' laj Asiria ink'a' naru nokoohe'xkol, chi moko too'eleliq chirixeb' li kawaay; ink'a' chik tqaye «At qaYos» re li xqak'uub' rik'in quq', xb'aan naq ka'ajwi' aawik'in, at Qaawa', naxtaw ruxtaanankil ru li neb'a'yox”.

Li Santil hu

³ La̱o xkaqꞌue retal nak eb laj Asiria incꞌaꞌ naru toeꞌxcol, chi moco naru toeꞌxcol li cacua̱y re pletic. Chi moco takaye chic “at kadios” reheb li yal nakayi̱b riqꞌuin kukꞌ. At Ka̱cuaꞌ, caꞌaj cuiꞌ a̱cuiqꞌuin cꞌojcꞌo̱k kachꞌo̱l xban nak la̱at li nacat-uxta̱nan ruheb li nebaꞌ, chaꞌkex re li Ka̱cuaꞌ.

Oseas 14:3 ပူးပေါင်းရင်းမြစ်များ

Salmos 68:5

Chexb'ichanq sa' xk'ab'a' li Qaawa' ut chexwajb'aq chiru, chete li b'e chiru li nachalk sa' choql. A'an Qaawa' naxk'ab'a'in; sahoqex rik'in.

Salmos 10:14

Laa'at aawilom chik li xmaa'usilal ut li xq'etq'etil; nakawil re xk'eeb'al sa' tojb'amaak. Li q'axal xtoq'ob'aal ru naxq'axtesi rib' rub'el laawoq rub'el laawuq', laa'at nakattenq'ank re li neb'a'yox.

Oseas 14:8

Ut laj Efraín tixye: «K'a' te'waj wi' laa'in eb' li yal k'oxlanb'il yos?». Laa'in nin'ilok ut ninkolok aawe; laa'in chanchanin jun toon chi saqichaj jwal raxrax ru. Laa'in nink'ehok aawe chi uuchink”.

Oseas 5:13

“Naq laj Efraín tixk'e reetal li xyajel ut laj Judá taaril li xtiq'ilal, toja' naq laj Efraín taaxik Asiria ut laj Judá tixpatz' xtenq'ankil re li nimajwal awab'ej; ab'an a'an ink'a' taaruhanq chi xk'irtasinkileb' chi moko xb'anb'aleb'.

Oseas 2:17

Twisi sa' xch'ool li xk'ab'a'eb' laj Bahal ut maajoq'e chik tixpatz'eb' -chan li Yos-.

Isaías 31:1

Ra chaalel sa' xb'eeneb' li neke'xik Ejiipt chi xpatz'b'al xtenq'ankileb', eb' li neke'xk'ojob' xch'ooleb' chirix li xk'iila kawaayeb' ut b'eleb'aal ch'iich'eb', eb' li kaweb' xch'ool xb'aan naq naab'aleb' naq neke'b'eek chirix kawaay, ab'anan ink'a' neke'xsik' li Qaawa' ut maak'a' royb'enihomeb' rik'in li xSant laj Israel.

Isaías 30:16

ut xeye chi jo'kan: “Ink'a', jwal us too'eleliq chirix kawaay”. Us b'i', elelinqex! Xeye ajwi': “Too'eleliq sa' b'eleb'aal ch'iich' li kaw neke'xik”. Us a'an, jo'kanaqeb' ajwi' li te'aanilasinq eere!

Salmos 33:17

Maak'a' na'ok wi' li kawaay re li kolb'a ib'; us ta q'axal nim li xkawilal, ink'a' truuq taakoloq.

San Juan 14:18

“Ink'a' texinkanab' eejunes jo' maak'a' leena' leeyuwa': tinchalq wi' chik eerik'in.

Oseas 12:1

Eb' laj Efraín maak'a' xyaalal li neke'xb'aanu; rajlal kutan neke'xsik' xtenq'ankileb' sa' jalanil tenamit. Nanumtaak li xtik'ti'eb' ut li elq'ak neke'xb'aanu, neke'xk'e rib' sa' aatin rik'ineb' laj Asiria ut neke'k'amok aseeyt aran Ejiipt”, chan li Yos.

Oseas 8:9

Laj Efraín xkoho Asiria chi xpatz'b'al xtenq'ankil, jo' junaq b'uur li naxb'eeni rib' sa' junesal na'ajej; ut xtoj rik'in xsimaatan re naq wanq ani taarahoq re!

Oseas 8:6

Li wakax xeyiib' laa'ex aj Samaria, moko Yos ta; a'an yal xyiib'ahom laj tenol ch'iich', ut taaputz'iiq chi junwaakaj.

Oseas 7:11

Laj Efraín jo' jun li mukuy maak'a' xna'leb', ink'a' naxnaw k'oxlak: naxpatz' xtenq'ankil re Ejiipt ut naxik rik'ineb' laj Asiria.

Ezequiel 37:23

Ink'a' chik te'xmux rib'eb' rik'in xloq'oninkil ru eb' li jalanil yos, jo' ajwi' rik'in xb'aanunkil li tz'i'b'eetal ut li maa'usilal. Teb'inkol chiru li q'etb'a aatin xe'maakob'k wi' ut tinch'ajob'resiheb' chiru chixjunileb' li maak: a'anaqeb' lintenamit ut laa'inaq li xYoseb'.

Ezequiel 36:25

Texinkirkisi chi chaab'il ha', ut ch'ajob'resinb'il chik texkanaaq; twisi eerik'in chixjunil leemaa'usilal ut texinch'ajob'resi re naq ink'a' chik teeloq'oniheb' li jalanil yos.

Isaías 36:8

Us b'i', yalomaq eeru rik'in li awab'ej re Asiria, linwa'chin: tink'e oob' o'q'ob' (2,000) aakawaay, ma taataweb' tana oob' o'q'ob' (2,000) chi winq li te'b'eeq chirixeb'.

Isaías 31:3

Eb' laj Ejiipt a'an yal winqeb' ut moko yoseb' ta; ut li xkawaayeb' a'an yal tib'elejeb', moko musiq'ejeb' ta. Naq li Qaawa' tixye' li ruq', taatichk'oq laj tenq'anel ut taat'ane'q li natenq'aak; wotz te'oso'q chi junajwa.

Isaías 30:2

Neke'xik Ejiipt chi ink'a' neke'xye we; neke'xpatz' xtenq'ankileb' re laj Parahón ut neke'xsik' xkolb'aleb' rub'el xwankil Ejiipt.

Isaías 27:9

Ab'anan taakuymanq taasachmanq li xmaak laj Jakob, wi a'an tixputz'i chixjunileb' li artal jo' na'uxk re li xpekul li chun, ut maajunaq chik li pek, li che' malaj tijob'aal neke'loq'oniik wi' eb' li jalanil yos.

Isaías 2:20

Sa' li kutan a'an te'xrumi eb' li jalanil yos chiruheb' li ch'o ut chiruheb' laj tz'uum xik', a'eb' li yos xe'xyiib' rik'in oor ut plaat re xloq'oninkileb' ru.

Isaías 1:29

Relik chi yaal naq texxutaanaq xb'aan naq xeloq'oni li ji, ut texkaqo'q chi rilb'al li xna'ajeb' li uutz'u'uj li jwal xerahi ru.

Salmos 146:9

li Qaawa' naxkoleb' laj ab'l tenamit, naril li neb'a'yox ut li xmalka'an, ab'an naxpo' xk'a'uxl li ink'a' us xna'leb'.

Salmos 146:3

Meesik' xk'ojob'ankil eech'ool rik'ineb' li xninqal ru winq: a'an yal winqeb', ut ink'a' naru texkole'q xb'aaneb'.

2 Crónicas 16:7

Sa'eb' li kutan a'an laj Jananí, li propeet, koho rik'in laj Asá, awab'ej re Judá, ut kixye re: “Laa'at xakawu aach'ool rik'in li awab'ej re Aram, ut ink'a' rik'in li Qaawa' laaYos; jo'kan naq eb' laj puub' aj Aram xe'xkol rib' chawu.

Deuteronomio 17:16

Ab'anan li awab'ej a'an ink'a' tixloq' naab'aleb' li xkawaay, chi moko tixtaqlaheb' li rech tenamitul aran Ejiipt re xk'ihob'resinkileb' li xkawaay, xb'aan naq li Qaawa' ak xyehom eere: «Maajun wa chik texsutq'iiq sa' li b'e a'in», chan.

Zacarías 13:2

“Sa' li kutan a'an tinsachi li xk'ab'a'eb' li jalanil yos, sa' xteepal Judá, re naq maajun chik taajultikanq reheb'. Tinsacheb' ajwi' li propeet aj b'alaq' ut eb' li maa'us aj musiq'ej -chan li Nimajwal Yos-.

Jeremías 49:11

«Kanab'eb' chinch'oolani eb' laaneb'a'yox, ut k'ojk'ooq xch'ool eb' li xmalka'an chiwix»”.

Oseas 4:12

Lintenamit neke'patz'ok rik'in jun tolol chi che' ut li xxuq'eb' neke'sumenk reheb'. Xb'aan xmuxb'al li xpaab'aaleb' yo chi sachk lintenamit ut xe'xnajtob'resi rib' rik'in li Qaawa' li xYoseb'.

Oseas 13:2

Ut toj yookeb' ajwi' chi maakob'k anaqwan! Neke'xha'lesi li plaat re xyiib'ankileb' li jalanil yos; neke'xyiib' li xjalam uheb' jo' chanru neke'raj: chixjunil a'an yal xk'uub'ahom junaq aj tenol ch'iich' ut neke'xye naq yos, neke'mayejak chiru ut neke'xtz'ub' li xjalam u jun li wakax!

Jonás 2:10

Toja' naq li Qaawa' kixtaqla li nimla kar chi xxa'wankil laj Jonás chi ch'och'el.