Nehemías 8:3 - Q'eqchi Bible

³ Chalen hik'ho toj tuqtu wa'leb' kixyaab'asi xsa' li hu chiruheb' li winq, li ixq ut chixjunileb' li wankeb' xna'leb', sa' li neb'aal li wank chiru li Okeb'aal reheb' laj b'eelahom ha'. Q'es xxikeb' chixjunil li tenamit chi rab'inkil li xHuhil li Chaq'rab'.

Li Santil hu

³ Ut laj Esdras quiril xsaꞌ li hu chiruheb chixjunileb li cuanqueb saꞌ li neba̱l li cuan chiru li oqueba̱l bar nequeꞌnumeꞌ cuiꞌ li nequeꞌbelan haꞌ. Quixtiquib rilbal saꞌ li hu tzꞌi̱banbil cuiꞌ li chakꞌrab chalen ekꞌela toj quicuulac cuaꞌleb chiruheb chixjunileb li cuanqueb aran, joꞌ cui̱nk, joꞌ ixk, ut joꞌ ajcuiꞌ chiruheb li queꞌru xtaubal ru. Ut chixjunileb queꞌxcanab rib chirabinquil li cꞌaꞌru naxye saꞌ li chakꞌrab.

Nehemías 8:3 ပူးပေါင်းရင်းမြစ်များ

Apocalipsis 3:22

«Ani wank xxik, chirab'ihaq li naxye li Musiq'ej reheb' li Iklees»”.

Apocalipsis 2:29

Ani wank xxik, chirab'ihaq li naxye li Musiq'ej reheb' li Iklees».

1 Ts 2:13

Jo'kan naq laa'o ajwi' junelik nokooyoxink chiru li Yos xb'aan naq, jo'q'e xerab'i li Raatin li Yos xqapuktesi eere, xek'ul moko jo' ta raatin li winq, jo' b'an tz'aqal li xyaalalil, jo' raatin li Yos li yo chi k'anjelak rik'in xwankil sa' eeyanq laa'ex laj paab'anel.

Hechos 28:23

Ke'xxaqab' xkutankil rilb'al wi' chik laj Pablo ut, naq kiwulak xkutankil, q'axal naab'aleb' chik ke'chalk b'arwi' nahilank. Toja' naq laj Pablo kixtikib' xyeeb'al resil li xnimajwal awab'ejihom li Yos, yo chi xch'olob'ankil li yaal chiruheb' ut yalyo xq'e chi xq'unb'esinkil xch'ooleb' chirix li Jesus rik'in li naxye li xChaq'rab' laj Moisés ut eb' li Propeet: kixtikib' eq'la ut kiraqe'k ewu.

Hechos 17:11

Eb' a'in q'axal q'uneb' xch'ool chiruheb' li wankeb' Tesalónika: ke'xk'ulub'a li Aatin chi anchaleb' xch'ool, yookeb' chi xtz'ilinkil xsa' li Santil Hu rajlal kutan re rilb'al ma yaal li naxye laj Pablo.

Hechos 16:14

Yo ajwi' chi qab'inkil jun li ixq, xLidia xk'ab'a', chalenaq sa' li tenamit Tiatira, nak'ayink kaqi b'on re t'ikr, ut aj paab'anel. Li Qaawa' kixte li xch'ool re naq tixk'ulub'a li yo chi xyeeb'al laj Pablo.

Hechos 15:21

Xb'aan naq chalen chaq q'e kutan li xChaq'rab' laj Moisés nayaab'asimank rajlal sábado ut nach'olob'amank xyaalal sa'eb' li ch'utleb'aal kab'l, sa' li junjunq chi tenamit”.

Hechos 13:27

Eb' laj Jerusalén ut li xb'eenileb' ink'a' ke'xtaw ru ani li Jesus, ut, naq ke'xraq aatin sa' xb'een, kitz'aqlok ru xb'aaneb' li xtz'iib'ahom eb' li Propeet li nayaab'asimank rajlal sábado.

Hechos 13:15

Ut naq kiraqe'k xyaab'asinkil xsa' li Chaq'rab' ut eb' li Propeet, eb' li xb'eenil li ch'utleb'aal kab'l ke'xtaqla xyeeb'al reheb': —Ex qas qiitz'in, wi wank eeraatin re xwaklesinkil xch'ooleb' li tenamit, yehomaq.

San Lucas 19:48

Ab'anan ink'a' neke'xtaw chanru te'xb'aanu, xb'aan naq chixjunil li tenamit neke'ab'ink re ut q'es ruheb' rik'in li naxye.

San Lucas 8:18

“Chek'e b'i' reetal chanru nekex'ab'ink, xb'aan naq ani wank k'aru re, ruk' chik taak'eemanq re; ut ani maak'a' wank re, a' ajwi' li k'aru wank re naq naxk'oxla, taamaq'manq chiru”.

San Marcos 12:37

A' ajwi' laj David naxye Qaawa' re. Chan put ru naq ralalaq? Ut li k'iila tenamit neke'rab'i chi anchaleb' xch'ool.

Hechos 20:11

Naq kitaqe'k wi' chik, kixjachi li wa ut kiwa'ak. Toj najt chik kikanaak chi seeraq'ik laj Pablo, toj kisaqewk; toja' naq koho.

Hechos 20:7

Sa' li xb'een kutan re li xamaan ch'utch'uuko laa'o chi xjachb'al li Wa, wulajaq xxikik laj Pablo. A'in kixtikib' seeraq'ik rik'ineb' laj paab'anel, ab'anan kib'ayk chi aatinak toj tuqtu q'oqyink.

Nehemías 8:1

Sa' xwuq li po chixjunil li tenamit ke'xch'utub' rib' sa' junajil sa' li neb'aal li wank chire li Okeb'aal reheb' laj b'eelahom ha', ut ke'xye re laj Esdras laj tz'iib' naq tixk'am chaq xhuhil li xChaq'rab' laj Moisés li xk'ehom li Yos re te'xpaab' eb' laj Israel.

Nehemías 8:4

Laj Esdras laj tz'iib' wank chi xaqxo sa' xb'een jun li na'ajej najt xteram, li ke'xyiib' rik'in che' cho'q re li k'anjel a'an. Chi xk'atq laj Esdras wankeb' sa' xnim: laj Matatías, laj Sema, laj Anaías, laj Urías, laj Jilkías ut laj Mahasías; ut sa' xtz'e wankeb': laj Pedaías, laj Misael, laj Malkías, laj Jasún, laj Jasbadaná, laj Sakarías ut laj Mesulán.

Nehemías 8:5

Toja' naq laj Esdras, li wank taqe'q, kixte li hu chiru chixjunil li tenamit, ut naq kixte li hu, ke'xaqliik chixjunileb'.

Deuteronomio 31:9

Laj Moisés kixtz'iib'a li Chaq'rab' a'in ut kixq'axtesi reheb' laj tij, ralal xk'ajoleb' laj Leví, li neke'k'amok re li xLoq'laj Kaaxil li xSumwank li Qaawa'; kixk'e ajwi' reheb' chixjunileb' li xcheekel winqilal laj Israel.

Josué 8:35

Maajun junaq aatin re chixjunil li xtaqlahom laj Moisés ink'a' ta kiyaab'asimank chiruheb' chixjunil li xLoq'laj Ch'utameb' laj Israel; k'eeb'ileb' ajwi' sa' ajl eb' li ixq, eb' li kok'al ut eb' laj ab'l tenamit li wankeb' sa' xyanqeb' laj Israel.

Nehemías 8:18

Chiru wuqub' kutan ke'ninq'ehik; ut chalen sa' li xb'een kutan toj sa' xraqik, li ninq'e laj Esdras kixyaab'asi xsa' li xHuhil xChaq'rab' li Yos. Ut sa' xwaqxaq li kutan kiwank jun nimla ch'utam jo' chanru chaq'rab'inb'ileb' wi'.

Nehemías 10:29

ke'xjunaji rib' rik'ineb' li xkomoneb' ut eb' laj k'amol xb'eheb', ut ke'xye raatineb' sa' jurament naq junelik te'xpaab' li Chaq'rab' xk'ehom li Yos re laj Moisés laj k'anjel chiru. Ke'xye naq te'xyu'ami ut te'xk'anjela ru chixjunil li raatin, li xchaq'rab' ut li xtaqlahom li Qaawa' li qaYos.

Nehemías 13:1

Sa'eb' li kutan a'an kiyaab'asimank sa' xxikeb' li tenamit li xhu laj Moisés. Aran kitawmank naq eb' laj Amón ut eb' laj Mohab maajun wa taaruuq te'ok sa' xyanq xtenamit li Yos,