San Lucas 13:34 - Q'eqchi Bible

³⁴ “At Jerusalén, Jerusalén, li nakakamsiheb' li propeet ut nakakuteb' chi pek li taqlanb'ileb' chaq aawik'in! K'ajo' naq xwaj raj xch'utub'ankileb' laawalal aak'ajol, kama' junaq kaxlan naxkupuheb' li ral rub'el li xxik', ut ink'a' xeraj!

Li Santil hu

³⁴ Ex aj Jerusalén, la̱ex nequecamsiheb li profeta ut nequecuti chi pec eb li nequeꞌtakla̱c e̱riqꞌuin xban li Dios. Nabal sut raj xcuaj e̱colbal joꞌ nak naxchꞌutubeb li ral li caxlan rubel lix xicꞌ. Abanan la̱ex incꞌaꞌ xeraj.

San Lucas 13:34 ပူးပေါင်းရင်းမြစ်များ

Hechos 7:52

Ma wank junaq propeet li ink'a' xik' ki'ile'k xb'aaneb' leena' leeyuwa'? Eb' a'an ke'xkamsi li yookeb' chaq chi xyeeb'al resil chi junxilaj li xk'ulunik li Tiik xch'ool, a' li xeq'axtesi ut xekamsi laa'ex anaqwan.

Isaías 30:15

Jo'ka'in kixye li Qaawa', li xSant laj Israel: “Sutq'inqex chaq, xaqxooq leeroyb'enihom wik'in, ut texkole'q. Wi texwanq sa' xyaalal chi k'ojk'ooq leeraanm, teetaw xkawub' leech'ool”. A'ut laa'ex xetz'eqtaana li waatin

San Lucas 23:28

Ab'an li Jesus kixsutq'isi rib' chi rilb'aleb' ut kixye: —Ex rixqilal Jerusalén, mexyaab'ak chiwix, yaab'anqex b'an cherix laa'ex ut chirix leeralal eek'ajol.

San Lucas 19:44

tate'xmuch'i chiru ch'och' laa'at ut eb' laawalal aak'ajol li wanqeb' aawik'in, ut ink'a' te'xkanab' pek chi xb'een pek, xb'aan naq ink'a' xak'e reetal li honal xat-ula'aniik wi'”.

Zacarías 1:4

Meeb'aanu jo' ke'xb'aanu eb' leemama' leerixa'an, li ke'aatinaak xb'aaneb' li propeet li ke'wank junxil, re raj naq te'xkanab' xb'aanunkil li maa'usilal ut li yib' aj na'leb'; ab'an ink'a' ke'raj wab'inkil chi moko inpaab'ankil -chan li Nimajwal Yos-.

Oseas 11:7

Lintenamit jwal kaw xch'ooleb' chintz'eqtaanankil; us ta neke'xpatz' xk'ab'a' laj Bahal, ab'an maajun natenq'ank reheb'.

Oseas 11:2

A'ut naq q'axal kinra, jwal kixnajtob'resi chik rib' wik'in: lintenamit neke'mayejak chiruheb' laj Bahal ut neke'xk'at xpom chiruheb' li jalanil yos.

Jeremías 6:16

Jo'ka'in kixye li Qaawa': “Xaqlinqex sa'atqeb' li b'e ut ilonqex, patz'omaq chirixeb' li najter b'e b'ar wank li b'e chaab'il; a'an li b'e teek'am re naq sa chik texwanq”. A'ut eb' a'an ke'xye: “Ink'a' naqaj xik sa' li b'e a'an”, chankeb'.

Jeremías 2:30

Maak'a' rajb'al naq xeb'inq'us chi kaw leeralal eek'ajol, xb'aan naq ink'a' xe'xtaw ru. Laa'ex xekamsi chi ch'iich' eb' li propeet jo' naq li kaqkoj naxt'upi li xtzak.

Salmos 36:7

li xtiikilal laach'ool chanchan xterameb' li ninqi tzuul, ut laak'uub'ahom chanchan xchamal li nimla palaw. At Qaawa', laa'at nakat-ilok reheb' li poyanam ut eb' li xul.

Li xHu LIX RUT 2:12

Li Qaawa' chik'ehoq aawe reeqaj li chaab'il k'anjel xab'aanu! A' taxaq li Qaawa', xYos laj Israel, li rub'el li xwankil xulaak'e aawib' chi xmuheela, chiq'ajkamunq aawe jo' aak'ulub', chan.

San Mateo 22:6

ut eb' li junch'ol chik ke'xchapeb' li xmoos li awab'ej, ke'xhob'eb' ut ke'xkamsiheb'.

San Mateo 22:3

Kixtaqlaheb' li xmoos chi xb'oqb'aleb' li rula', a'ut eb' a'an ink'a' ke'raj chalk.

Lamentaciones 1:16

Jo'kan naq ninyot'e'k chi yaab'ak, nat'ululnak xya'al li wu, xb'aan naq maajun nak'ojob'ank inch'ool; maa'ani naru nak'ehok xkawub' li waanm. Q'axal ra xe'kanaak eb' li walal ink'ajol, xb'aan naq eb' li xik' neke'ilok qe xe'xq'ax qu.

Isaías 50:2

K'a'ut naq maajun xintaw naq xink'ulunk chekolb'al? K'a'ut naq ink'a' xineesume naq xexinb'oq? Malaj ut xek'oxla naq ink'a' tinruuq eekolb'al ut maak'a' inwankil re eerisinkil sa' li rahilal? Yal rik'in jun chi aatin ninye, nachaqik li palaw, ut eb' li roq nima' joxk' neke'kanaak; eb' li kar neke'kamk xb'aan li chaqi'eel ut neke'q'aak xb'aan xmajelal li ha'.

Salmos 91:4

A'an taamuheelanq aawe rub'el li xkupuhom; rub'el li xxik' taataw xkolb'al aawib': li xtiikilal xch'ool naxk'e aakawilal ut kolb'a ib'.

Salmos 81:13

Jo'kan naq xeb'inkanab' sa' xkawilal li xjolomeb' re naq te'xb'aanu li x'alaak sa' xch'ooleb'.

Salmos 57:1

Re li xjolomileb' laj b'ichanel. “Matsachok”. Xsaalm laj David, naq ki'elelik chiru laj Saúl ut koxmuq rib' sa' li ochoch pek.

Nehemías 9:30

Chiru k'iila chihab' kakuyeb', kak'e xna'leb'eb' rik'in laamusiq' ut chi xtz'uumal reheb' laapropeet. Ab'an eb' a'an ink'a' ke'ab'ink; jo'kan naq kaq'axtesiheb' sa' ruq'eb' li tenamit wankeb' sa' ruuchich'och'.

Jeremías 35:14

Eb' laj Jonadab, li ralal laj Rekab, xe'xpaab' li xchaq'rab'ihom li xxe'toonil yuwa'eb' ut chalen toj anaqwan ink'a' neke'uk'ak b'iin, xb'aan naq neke'xk'e sa' xch'ooleb' li raatin li xxe'toonil yuwa'eb'. Laa'in ajwi' k'iila sut xinye eere k'aru teeb'aanu, ab'anan tik ink'a' nikineepaab'.

Jeremías 26:23

Eb' a'an ke'risi chaq laj Urías aran Ejiipt ut ke'xk'am chaq chiru laj Johakín, li awab'ej, ut a'in kixk'e chi kamsiik ut chi kute'k sa' xyanqeb' li k'iila kamenaq.

Salmos 149:2

Chisaho'q sa' eech'ool chejunilex aj Israel: a'an laj yoob'tesihom eere. Sahoqex laa'ex ralal xk'ajol Sión, xb'aan naq a'an leeRey!

Nehemías 9:26

“Ab'anan chirix a'an ke'xq'et laawaatin, ke'xq'etq'eti rib' chawu ut ke'xtz'eqtaana laachaq'rab'. Ke'xkamsiheb' li propeet li ke'xch'olob' chiruheb' naq te'sutq'iiq wi' chik aawik'in, ut k'ajo' naq kate'xmajewa.

Deuteronomio 32:29

Wi ta wank xna'leb'eb', te'xtaw raj ru, te'xk'e raj reetal k'aru te'oso'q wi'.

Deuteronomio 5:29

Us rajan naq junelik taxaq jo'kanaqeb' li xch'ool re woxloq'inkil ut xpaab'ankil chixjunileb' linchaq'rab'. Chi jo'kan wanqeb' xsahilaleb' xch'ool eb' a'an ut eb' li ralal xk'ajol chi junelik.

Apocalipsis 11:8

Ut li xch'och'el sululeb' a'an te'kanaaq sa'eb' li xaalib'e re li xNimal Tenamit li naxk'ab'a'in Sodoom malaj Ejiipt chi jalb'il ru xyaalalil; aran ajwi' kik'ehe'k chiru krus li xQaawa'eb' a'an.

Hechos 8:1

Laj Sawlo kixk'ul xch'ool naq kikamsiik laj Esteban. Sa' li kutan a'an ke'xtikib' xrahob'tesinkil li Iklees li wank Jerusalén, ut chixjunileb' ke'xcha'cha'i rib'eb' sa' xsutam Judea ut Samaria, ka'ajeb' chik eb' li apóstol ke'kanaak.

Hechos 7:59

Ut naq yookeb' chi xteninkil chi pek, laj Esteban jo'ka'in kitijok: “At Qaawa' Jesus, chak'ul linmusiq'”, chan.

San Lucas 15:28

“Kichalk ut xjosq'il li asb'ej ut ink'a' kiraj ok. Ki'elk chaq li xyuwa' ut kixtikib' relajinkil ru.

Joel 2:23

Ex aj Sión, chisaho'q leech'ool ut sahoqex rik'in li Qaawa' leeYos. Xb'aan naq A'an nak'ehok eere leetzekemq chi tz'aqal rik'in xtaqlankil chaq li hab' sa' xq'ehil, kama' chaq junxil.

Lamentaciones 4:13

Xmaakeb' li propeet ut li xmaa'usilaleb' laj tij, sa' li tenamit Jerusalén xhoye'k xkik'el li maak'a'eb' xmaak.

Salmos 17:8

Chinaakol taxaq kama' nakaraheb' xsa' laawu, chinaakupu taxaq rub'el xnimal aawankil.

Jeremías 35:17

«Jo'kan utan laa'in, li Nimajwal Yos, li xYos laj Israel, ninye chi jo'ka'in: Tintaqla chaq sa' xb'eeneb' laj Judá ut eb' laj Jerusalén chixjunil li rahilal inyehom chaq resil, xb'aan naq xe'waatina ut ink'a' xine'xpaab', xinb'oqeb' ut ink'a' xine'xsume»”.