Jeremías 51:11 - Q'eqchi Bible

¹¹ Q'esnaaq ru'uj leesimaj ut kawresihomaq leech'iich' li nekekol wi' re leech'ool. Li Qaawa' xtoch' chaq li xch'ooleb' li awab'ej re Media re naq te'chalq chi xsachb'al ru Babilonia. A'an a'in li reeqaj tixb'aanu li Qaawa' naq ke'xjuk' li xsantil ochoch.

Li Santil hu

¹¹ Li Ka̱cuaꞌ xqꞌue saꞌ xchꞌo̱leb lix reyeb laj Media nak teꞌxsach ruheb laj Babilonia. Li Ka̱cuaꞌ tixqꞌue re̱kaj li queꞌxba̱nu re lix templo li Ka̱cuaꞌ. La̱ex aj Media, cauresihomak le̱ tzimaj ut cauresihomak le̱ chꞌi̱chꞌ li nequecol cuiꞌ re le̱ chꞌo̱l.

Jeremías 51:11 ပူးပေါင်းရင်းမြစ်များ

Jeremías 46:4

B'ak'omaq rix leekawaay ut taqenqex, laa'ex li nekexb'eek chirixeb'. K'ehomaq li nekekol wi' leejolom, mesomaq ru leejutz'ch'iich' ut k'ehomaq li nekekol wi' re leech'ool.

Jeremías 50:45

Ab'ihomaq li k'aru tinb'aanu reheb' laj Babilonia, chek'e reetal li k'aru xink'uub' xb'aanunkil reheb' laj Kaldeha: jukunb'il naq te'isiiq li kok'al sa' li tenamit a'an jo'qeb' li ral li karneer, ut te'oso'q rochb'een li raxpim neke'tzekank wi'.

Jeremías 50:9

K'ehomaq reetal, laa'in tintaqlaheb' chaq jun ch'uut chi ninqi tenamit, li wankeb' chaq sa' xjayal releb'l iq', re naq te'xsach ruheb' laj Babilonia. Te'xtzolob' chaq rib' ut tole'reechani. Eb' laj puub' a'an, jwal kaweb' rib', moko neke'kutuk ta simaj chi maak'a' rajb'al.

Jeremías 46:9

Taqlahomaqeb' chi yalok eb' li kawaay ut xchapaqeb' raanil chi kaw eb' li b'eleb'aal ch'iich'; xikaqeb' li jwal kaweb' rib' chi yalok: xchapaqeb' li xkolb'al rib' eb' laj Etiopía ut eb' laj Libia, jo' ajwi' eb' laj puub' aj Lidia li neke'kutuk chi chaab'il rik'in simaj.

Zacarías 14:12

Ut a'an a'in li raxkamk te'rahob'tesiiq wi' chixjunileb' li tenamit li ke'yalok rik'in Jerusalén: te'q'aaq li xtib'eleb' naq toj yo'yooqeb', ut te'q'aaq li xsa' ruheb' jo'wi' li ru'uj raq'eb' sa'eb' li re.

Zacarías 14:2

Sa' li kutan a'an laa'in tinch'utub'eb' chixjunil li tenamit re naq te'yaloq rik'in Jerusalén. Ut taa'eechaniiq li tenamit, taayamtesimanq xsa' eb' li ochoch, te'maakoniiq eb' li ixq, ut jun yiijacheb' li tenamit te'k'ame'q sa' najtil na'ajej. Yal jun ch'ina ch'uut aj chik te'kanaaq.

Jeremías 51:24

“Ab'anan cheru ajwi' laa'ex aj Judá tink'e reeqaj re Babilonia ut reheb' chixjunil laj Kaldeha li rahilal xe'xb'aanu re Sión -chan li Qaawa'-.

Jeremías 51:12

Taqsihomaq li eetalil naq tex'ok chi xjuk'b'al li xsuttz'akil Babilonia. K'ehomaq naab'aleb' laj puub' aran, xaqab'omaqeb' li te'k'aak'alenq ut kawresihomaq eb' li te'ramoq sa'atqeb' li b'e. Xb'aan naq li Qaawa' xk'uub'ank re a'in ut tixb'aanu li kixye chaq junxil chirixeb' laj Babilonia.

Jeremías 50:25

Li Qaawa' xte li xk'uuleb'aal ut xrisi chaq li taak'anjelaq re risinkil li xjosq'il, xb'aan naq li Nimajwal Yos wank xk'anjel sa' xyanqeb' laj Kaldeha.

Isaías 46:11

Sa' xjayal releb'l saq'e xinb'oq chaq jun li winq, li taachalq chaq sa' jun najtil tenamit jo' li t'iw ut tixb'aanu chixjunil li wajom. Ak jo'kan xinye, ut jo'kan tinb'aanu; kama'an xink'uub', ut jo'kan naq taa'uxmanq.

Isaías 45:5

Laa'in li Qaawa' ut maak'a' chik junaq; moko wank ta chik junaq yos chiwu laa'in. Xink'e aakawilal, us ta ink'a' nakanaw wu,

Isaías 45:1

Jo'ka'in kixye li Qaawa' re laj Siro, sik'b'il ru xb'aan cho'q awab'ej: “Laa'in xatinch'ilo chawuq' re xk'eeb'aleb' li tenamit rub'el laawankil ut re xjuk'b'aleb' xwankil eb' li awab'ej. Laa'in xinte chixjunileb' li okeb'aal ut maajun chik taatz'ape'q chawu.

Isaías 41:25

Xinsik' chaq ru sa' xjayal releb'l iq', ut yo chaq chi chalk; sa' xjayal releb'l li saq'e xinb'oq chaq rik'in li xk'ab'a'. A'an tixyeq'iheb' sa' roq eb' li awab'ej jo' li sulul, jo' naxb'aanu laj pak'onel naq naxyoq'le li seb' sa' roq.

Isaías 21:5

Ak xkawresiik li tzekemq, ak xhelmank li t'ikr chiru li meex, ak yo li wa'ak ut li uk'ak. Xaqlinqex chi yalok, ex aj jolominel, ut ji'omaq ru li ch'iich' nekekol wi' eerib'!

Isaías 21:2

Q'axal xiwajel rilb'al li moy u xk'utb'esiik chiwu: laj b'alaq' naxyal xq'e chi b'alaq'ik ut laj sachonel yo chi sachok. Ayuqex chi yalok, ex aj Elam! Sutomaq li tenamit, ex aj Media! Maak'a' chik ilok toq'ob'aal u anaqwan.

Isaías 10:26

Li Nimajwal Yos tixk'e reeqaj li rahilal xe'xb'aanu eere, jo' naq kixsacheb' ru laj Madián sa' li tzuul Horeb malaj jo' naq kixte li b'e sa' li palaw rik'in li xxuq' aran Ejiipt.

Esdras 1:1

Sa' li xb'een chihab' rokik laj Siro cho'q awab'ej re Persia, re naq taatz'aqloq ru li raatin li Qaawa' kixye chi xtz'uumal re laj Jeremías, li Qaawa' kixtoch' xch'ool laj Siro, awab'ej re Persia, re naq tixtaqla xpuktesinkil li chaq'rab' a'in chi yeeb'il ut chi tz'iib'anb'il, sa' chixjunileb' li na'ajej wankeb' rub'el li xwankil:

2 Crónicas 36:22

Sa' li xb'een chihab' rokik laj Siro cho'q awab'ej re Persia, re naq taatz'aqloq ru li raatin li Yos kixye chi xtz'uumal re laj Jeremías, li Qaawa' kixtoch' xch'ool laj Siro, awab'ej re Persia, re naq tixtaqla xpuktesinkil li chaq'rab' a'in chi yeeb'il ut chi tz'iib'anb'il, sa' chixjunileb' li na'ajej wankatqeb' rub'el li xwankil:

1 Crónicas 5:26

Jo'kan naq li xYos laj Israel kixtoch' xch'ool laj Pul, awab'ej re Asiria, naraj naxye naq laj Tiklat-Piléser, a' li kirisi sa' xna'ajeb' eb' laj Rubén ut aj Gad jo'wi' li xyiijachil xteepaleb' laj Manasés; ut kixk'ameb' aran Jalaj, Jabor, Jará, jo'wi' chire li nima' Gosán, b'arwi' wankeb' toj anaqwan.

1 Reyes 11:23

Jo'kan ajwi', li Qaawa' kixk'e naq laj Resón, ralal laj Eliadá, xik' taaril laj Salomón. Laj Resón a'an li ki'elelik chiru laj Hadadéser, laj eechal re, awab'ej re Sobá;

1 Reyes 11:14

Toja' naq li Qaawa' kixwaklesi chaq jun li winq Hadod xk'ab'a', Edom xtenamit, re xik' taaril laj Salomón. A'an xkomoneb' li ralal xk'ajol li awab'ej re Edom.

Levítico 26:25

Texinrahob'tesi rik'in q'esnal ch'iich' li taa'eeqajunq chirix li Sumwank; laa'ex texxik sa'atqeb' leetenamit re xkolb'al eerib', ab'an laa'in tintaqla chaq li raxkamk sa' eeyanq ut laa'ex texq'axtesiiq sa' ruq'eb' li xik' neke'ilok eere.

Jeremías 25:25

chixjunileb' li awab'ej re Simrí, eb' li awab'ej re Elam ut chixjunileb' laj Media;

Jeremías 46:3

“Kawresihomaq li ch'iich' nekekol wi' eerib' ut ayuqex sa' aanil chi yalok.

Jeremías 50:3

Xb'aan naq xchalk chaq sa' xjayal releb'l iq' jun tenamit li toljuk'uq re Babilonia. Maajun chik taawanq sa' li na'ajej a'an, chi moko poyanameb' chi moko xuleb'.

Jeremías 51:36

Jo'kan utan li Qaawa' kixye chi jo'ka'in: “Laa'in tin'okenq chawix ut tink'e reeqaj li rahilal x'uxmank aawe. Tink'eheb' chi chaqik li nima' ut li yu'amha' re Babilonia,

Daniel 5:30

Chiru ajwi' li q'oqyink a'an kikamsiik laj Baltasar, awab'ej re Kaldeha.

Joel 3:9

Yehomaq resil a'in sa' chixjunileb' li tenamit: Kawresihomaq eerib' chi yalok sa' xk'ab'a' li Qaawa', ch'utub'omaqeb' li jwal kaweb' rib'; chalqeb' chixjunileb' li yo'oon wankeb' chi yalok.

Joel 3:10

Yiib'omaq cho'q q'esnal ch'iich' leepikleb' ch'och' ut k'ehomaq leesetleb' k'im cho'q jutz' ch'iich'; che'xyehaq eb' li maak'a' xmetz'ew: “Jwal kaw wib' laa'in”.