Jeremías 2:27 - Q'eqchi Bible

²⁷ «At inyuwa'», chankeb' re li jun tolol chi che'; «At inna'», chankeb' re li pek. Ut laa'in ink'a' nikine'xpatz' chi moko nikine'xk'oxla. Ab'an naq nachalk junaq rahilal sa' xb'eeneb', neke'xye we: «Kim chi qakolb'al».

Li Santil hu

²⁷ Nequeye “At inyucuaꞌ” re li yal cheꞌ. Ut nequeye ajcuiꞌ re li pec “La̱at nacatqꞌuehoc re inyuꞌam”. Niquine̱tzꞌekta̱na, abanan nak cuanquex saꞌ raylal nequetzꞌa̱ma chicuu nak texintenkꞌa.

Jeremías 2:27 ပူးပေါင်းရင်းမြစ်များ

Isaías 26:16

At Qaawa', xatqasik' naq yooko chi k'uluk rahilal ut ink'a' chik naqakuy li qarahob'tesinkil aab'aan.

Oseas 7:14

Moko anchaleb' ta xch'ool naq neke'tz'aamank chiwu naq yookeb' chi tz'uyink chiru li xch'aateb'. Yal re xtz'aamankil li triiw ut li b'iin naq neke'xlet'exi li xtib'eleb'. Chi jo'kan xe'xq'etq'eti rib' chiwu.

Oseas 5:15

“Chirix chik a'an tinsutq'iiq wi' chik sa' linna'aj, toj reetal te'xk'e reetal li xmaakeb' ut toline'xsik'. Naq wanqeb' sa' rahilal, relik chi yaal naq toline'xsik'”.

Ezequiel 23:35

“Jo'kan naq laa'in, li Qaawa', ninye chi jo'ka'in: Sa' xk'ab'a' naq xinaatz'eq chirix laach'ool ut xinaakanab', jo'kan naq taatoj rix laamaa'usilal ut laayib' aj b'aanuhom”.

Ezequiel 8:16

Moqon chik kinxk'am toj chiru li neb'aal wank chisa' li rochoch li Qaawa', ut kink'e reetal naq, sa' xyanq li artal rik'in li neb'aal, wankeb' oob' xka'k'aal chi winq, neke'rixkin li rochoch li Yos ut yookeb' chi ilok sa' xjayal releb'l saq'e, wiq'wookeb' chi xloq'oninkil ru li saq'e.

Jeremías 32:33

Us ta maajun sut xinkanab' xtijb'aleb' ut xq'usb'aleb', ink'a' xe'xk'ul ru li xtzolb'aleb'; ut a' chik lintz'eqtaanankil xe'xb'aanu ruuchil lintaaqenkil,

Jeremías 22:23

Anaqwan sa nakathilank sa' laawochoch li yiib'anb'il rik'in yaw li chalenaq Líbano; ab'anan tatyaab'aq naq tolatxtaw li rahilal, jo' naxk'ul li ixq ok re chi alank”.

Jeremías 18:17

Jo' naq nanume'k li iq' nachalk sa' releb'l saq'e, tincha'cha'iheb' laj Israel, naq te'eleliq chiruheb' li xik' neke'ilok reheb'. Ut ink'a' chik twuxtaana ruheb' naq taawulaq xkutankil li rahilal a'an”.

Jeremías 10:8

Chixjunileb' a'an jwal jipeb' ut memeb' chawu laa'at; junes memil neke'xtzol chirixeb' li che'il yos.

Jeremías 2:24

chanchanat li k'iche'il b'uur li naxchap raanil sa' li chaqich'och' ut maajun chik nachapok re naq yo ru. Yalaq ani nasik'ok re, sa' junpaat naxtaw; ut laj k'ol ink'a' naxb'ay rib' chi xtawb'al sa' xq'ehil ru.

Jeremías 3:9

Maak'a' xxutaan chi xmuxb'al rib'; ut kixtz'ajni ru chixjunil li tenamit naq ki'ok chi xloq'oninkil ru li yos yiib'anb'il rik'in pek ut che'.

Jeremías 30:7

Q'axal rahaq rilb'al li kutan a'an, jwal xiwajelaq jo' maajun wa ilb'il. A'an xkutankil li nimla rahil ch'oolej cho'q reheb' laj Jakob, ab'an te'xkoolan xnumsinkil li kutan a'an.

Jeremías 37:3

Laj Sedesías, li awab'ej, kixtaqla laj Jukal, ralal laj Selemías, ut laj Sofonías, ralal laj Mahasías laj tij, re xtz'aamankil a'in chiru laj Jeremías, li propeet: “Tijon chiqix chiru li Qaawa' li qaYos”, chankeb' re.

Daniel 9:7

«At Qaawa', aawe li tiikilal ut qe laa'o li xutaan anaqwan ut junelik. Xutaanal wanko laa'o laj Judá: eb' li wankeb' Jerusalén ut chixjunileb' laj Israel, eb' li wankeb' chi nach' ut eb' li wankatqeb' chi najt sa'eb' li tenamit xacha'cha'iheb' wi' xb'aan naq xe'q'etq'eto'k chawu.

Oseas 4:12

Lintenamit neke'patz'ok rik'in jun tolol chi che' ut li xxuq'eb' neke'sumenk reheb'. Xb'aan xmuxb'al li xpaab'aaleb' yo chi sachk lintenamit ut xe'xnajtob'resi rib' rik'in li Qaawa' li xYoseb'.

2 Crónicas 29:6

Xb'aan naq eb' li qana' qayuwa' ke'xq'etq'eti rib' ut ke'xb'aanu li ink'a' nawulak chiru li Qaawa' li qaYos; ke'xtz'eqtaana ut ke'xtz'eq chirix xch'ooleb' li rochoch li Yos.

Jeremías 42:2

rik'in laj Jeremías, li propeet, ut ke'xye re: “Naqatz'aama jun li usilal chawu: Tijon chiru li Qaawa' laaYos, chiqix laa'o li jun ch'inach'uuto xookanaak. K'ajo' qak'ihal junxil, ut anaqwan yookat chik rilb'al naq ink'a' chik k'iho.