Isaías 15:2 - Q'eqchi Bible

² Eb' li wankeb' Dibón xkoheb' chi yaab'ak sa' li tijob'aal wank chi tzuul; ut eb' laj Mohab xyot'e'k xch'ooleb' xb'aan li nimla rahilal li xe'xk'ul li tenamit Nebo ut Mádaba. Chixjunileb' xe'xjo li rismal xjolomeb' ut li xmacheb'.

Li Santil hu

² Eb li cuanqueb saꞌ li tenamit Dibón teꞌxic chi ya̱bac saꞌ li artal li cuan saꞌ xbe̱n bol. Eb li cuanqueb Moab rahak saꞌ xchꞌo̱leb ut teꞌya̱bak chirixeb li tenamit Nebo ut Medeba. Teꞌxbes lix jolomeb ut teꞌxjo lix macheb xban xrahil xchꞌo̱leb.

Isaías 15:2 ပူးပေါင်းရင်းမြစ်များ

Jeremías 48:1

Jo'ka'in kixye li Nimajwal Yos, li xYos laj Israel, chirixeb' laj Mohab: “Toq'ob' xaq ru li tenamit Nebo naq juk'ulk aj chik. Xsache'k xwankil ut x'eechaniik Kiriatáhin. Xutaanal xkanaak li kawub'resinb'il tenamit naq xjuk'e'k.

Levítico 21:5

“Ink'a' naru te'xb'es rismaleb' li xjolom, chi moko te'xk'os li xmacheb', chi moko te'xlet'exi xcha'aleb' li xjunxaqalil,

Jeremías 48:18

“Kub'sihomaq leewankil, ex aj Dibón, ut k'ojob'omaq eerib' sa' li pojtz', xb'aan naq chalk re sa' eeb'een laj sachonel ut xjuk'eb' chik leekawub'resinb'il ochoch.

Isaías 3:24

Sa' li kutan a'an cho'q reeqaj li sununkil b'an taawanq li chu; cho'q reeqaj li k'aamal sa', a' chik li k'aam taak'eemanq; cho'q reeqaj li te'ok ismal, job'il jolomej chik taawanq; cho'q reeqaj li chaab'il b'aatal, a' chik li q'es ruhil t'ikr taawanq; ut li ch'ina'usal taasutq'iiq cho'q xutaan.

Deuteronomio 34:1

Laj Moisés ki'elk sa' xtaq'ahil Mohab ut kitaqe'k sa' xb'een li tzuul Nebo, sa' xb'een Piská, sa' xka'yab'aal Jerikó, ut li Qaawa' kixk'ut chiru chixjunil li ch'och': chalen wan wi' Galahad toj sa' li ch'och' reheb' laj Dan,

Números 21:30

X'oso'k xwankilal Jesbón, chalen Nofaj toj Dibón, ut xqak'e xxamlel toj Mádaba”.

Ezequiel 7:18

Te'xk'e q'es ruhil t'ikr chirixeb' chi k'ajo'aqeb' xxiw; numtajenaqaq xxutaan ut joob'ilaq chik li xjolomeb'.

Jeremías 48:31

Jo'kan naq tinyaab'aq ut tintz'uyinq chirixeb' laj Mohab, taamayoq linch'ool chirixeb' laj Kir-Jaréset.

Jeremías 47:5

Eb' laj Gasa te'xjo xjolomeb' xb'aan li rahilal ut mem te'kanaaq eb' laj Askalón. Ut laa'ex li rela' eb' li winq ninqeb' xteram, toj jo'q'e teekanab' xlet'exinkil ru leetib'el?

Jeremías 7:29

At Jerusalén, set li rismal laajolom ut kut chi najt. Ayu chi yaab'ak sa' xb'eeneb' li t'ojoch aj b'ool. Xb'aan naq li Qaawa' yo xjosq'il rik'ineb' laakomonil; xtz'eqtaanaheb' ut xkanab'eb' xjunes chi junajwa.

Isaías 22:12

Sa' li kutan a'an li Nimajwal Yos xexb'oq chi yaab'ak ut chi q'oqonk, re teejo li rismal leejolom ut xk'eeb'al cherix li q'es ruhil t'ikr.

Isaías 16:12

Us ta te'xtawasi rib'eb' laj Mohab chi taqsink toj sa' xb'eeneb' li tzuul ut te'tijoq aran jo' ajwi' sa' li xtijob'aaleb', maak'a' rajb'al naq te'tz'aamanq te'elajinq.

Isaías 16:7

Jo'kan naq chixjunileb' laj Mohab te'yaab'aq chirix li xtenamiteb'; chi ra sa' xch'ooleb' te'jultiko'q reheb' li k'uluj yiib'anb'il rik'in uub' ke'xtzeka chaq aran Kir-Jaréset.

Isaías 15:3

Xe'xk'e q'es ruhil t'ikr chirixeb'; sa'eb' li k'ayiil ut sa' xb'eeneb' li ochoch chixjunileb' jiiq' wi' xch'ooleb' chi yaab'ak.

Isaías 14:31

Japomaq eere chi yaab'ak, ex tenamit aj Filistea, chexxiwaq chejunilex li wankex aran, xb'aan naq sa' xjayal chaq releb'l iq' yookeb' chi chalk k'iila o'q'ob' chi aj puub' kama' li sib', ut maajun nach'inank xch'ool sa' xyanqeb'.

Li xHu LAJ JOB 1:20

Toja' naq kixaqliik laj Job, kixq'ich li raq' ut kixjo li xjolom. Chirix chik a'an kiwiq'laak, kixchunub' rib' chiru ch'och'

Deuteronomio 14:1

“Laa'ex ralal xk'ajol li Qaawa' leeYos. Ink'a' teelet'exi leetib'el chi moko teejo b'ayaq leepekem yal sa' xk'ab'a' junaq kamenaq.

Números 32:38

Nebo, Bahal-Mehón (a'in yal jalb'ileb' xk'ab'a') ut Sibmá. Ut ke'xk'e xk'ab'a'eb' li tenamit ke'xwaklesi.

Números 32:3

—Li na'ajej Atarot, Dibón, Jaser, Nimrá, Jesbón, Elalé, Sibmá, Nebo ut Mehón,

Levítico 13:40

“Wi junaq winq taat'ane'q li rismal xjolom ut taakanaaq chi t'uru' li xjolom, ink'a' muxb'il li winq a'an.

Números 21:28

Xb'aan naq xlochk xxamlel Jesbón, yo chi k'atk li xtenamit laj Sijón: x'oso'k li tenamit Ar sa' xteepal Mohab, xchoqlenk li tzuul chire li nima' Arnón.

2 Samuel 10:4

Jo'kan naq laj Janún kixchapeb' laj k'anjel chiru laj David, kixset jun yiijach li xmacheb', kixq'ich li raq'eb' toj chi xko riteb' ut kixchaq'rab'iheb' chaq.

Jeremías 3:21

“Na'ab'imank xyaab' kuxej sa' xb'eeneb' li t'ojoch aj tzuul: a'aneb' laj Israel li yookeb' chi yaab'ak re xtz'aamankil xkuyb'al xmaakeb'. Xe'xjal xb'eheb' ut xinsachk sa' xch'ooleb'; xine'xtz'eqtaana laa'in li Qaawa', li xYoseb'.

Jeremías 47:2

Li Qaawa' kixye re chi jo'ka'in: “Sa' xjayal releb'l iq' xe'chalk chaq eb' laj Babilonia jo'eb' chaq li b'ut'iha'; nab'ut'unk li na'ajej jo'wi' chixjunil li wank chisa', naxsacheb' li tenamit ut eb' li xpoyanamil. Japaqeb' re xb'aan li rahilal chixjunileb' li poyanam, ut yalaq b'ar te'yaab'aq li tenamit.

Jeremías 48:35

“Tinram chiruheb' laj Mohab li xik chi tzuul chi mayejak ut chi k'atok pom chiruheb' li jalanil yos”, chan li Qaawa'.

Ezequiel 27:31

Te'xjo li xjolomeb' sa' aak'ab'a', te'xtiqib' rib' rik'in q'eqit'ikr ut tz'uynaqeb' chi yaab'ak chi k'ajo'aq xmayeb' li raanm.

Ezequiel 30:2

“At kaamel winq, aatinan sa' ink'ab'a' ut ye reheb': «Jo'ka'in xye li Qaawa': Yaab'anqex chirix li kutan chaalel,

Amós 8:10

Tink'e naq leeninq'e taakanaaq cho'q rahil ch'oolej ut chixjunil leeb'ich cho'q tz'uyink. Tink'e naq chejunilex teeb'at eerib' sa' q'es ruhil t'ikr ut teejo leejolom xb'aan xrahil eech'ool. Texyaab'aq jo' tawi' xkamk leeralal jun chirib'il, ut chixjunil junes rahilal toxraqe'q wi'.

1 Crónicas 19:4

Jo'kan naq laj Janún kixchapeb' laj k'anjel chiru laj David, kixjo li xmacheb', kixq'ich li raq'eb' toj chi xko riteb' ut kixchaq'rab'iheb' chaq.

Jeremías 49:3

“Yaab'anqex, ex aj Jesbón, xb'aan naq xsache'k li tenamit Ar. Japomaq eere chi yaab'ak, ex aj Rabá, k'ehomaq li q'es ruhil t'ikr cherix, tz'uyinqex ut ayuqex yalaq b'ar sa' xyanqeb' li tz'ak, xb'aan naq li yos Milkón taak'ame'q chi preexil rochb'eeneb' laj tij jo'wi' eb' li xninqal ru winq.