Apocalipsis 17:3 - Q'eqchi Bible

³ Toja' naq li ánjel kinxk'am sa' musiq'ej sa' li chaqich'och', ut aran kiwil jun li ixq k'ojk'o sa' xb'een jun li josq' aj xul kaq rix, nujenaq chi k'ab'a'ej re majewank, wank wuqub' xjolom ut lajeeb' xxukub'.

Li Santil hu

³ Saꞌ li visión li quixcꞌutbesi chicuu li Santil Musikꞌej, quicuil nak li ángel quinixcꞌam saꞌ jun li naꞌajej bar ma̱cꞌaꞌ cuan. Aran quicuil li ixk chunchu chirix jun li joskꞌ aj xul cak rix. Tzꞌi̱banbil nabal li a̱tin chirix re xmajecuanquil li Dios. Cuan cuukub xjolom ut cuan laje̱b xxucub.

Apocalipsis 17:3 ပူးပေါင်းရင်းမြစ်များ

Apocalipsis 12:3

Toja' naq kik'utunk jun chik eetalil sa' choxa: jun li nimla k'anti' kaq rix, wank wuqub' xjolom ut lajeeb' xxukub', ut sa' xb'eeneb' li xjolom wankeb' wuqub' lemtz'il koroon.

Apocalipsis 17:18

Ut li ixq xawil ru, a'an li Nimla Tenamit li wank xwankil sa' xb'eeneb' li awab'ej re li ruuchich'och'”.

Apocalipsis 12:6

A'ut li ixq ki'elelik toj sa' li chaqich'och' b'ar wi' wank xna'aj kawresinb'il xb'aan li Yos: aran taach'oolaniiq chiru oxk'aal xka o'q'ob' kutan (1,260).

Apocalipsis 17:4

Li ixq a'an tiqto rik'in t'ikr kaqmoqin ut kaqjorin xb'onol, nalemtz'unk ru rik'in oor, rik'in tertookil pek ut lemtz'il q'ol. Wank sa' ruq' jun li sek' oor nujenaq rik'in li xyiib'etalil ut xtz'ajnil li xmuxb'al rib';

Apocalipsis 12:14

Ab'an li ixq kik'ehe'k re xkab'ichaleb' li xxik' li nimla t'iw, re taaxik'anq toj sa' li xna'aj, sa' li chaqich'och', najt rik'in li nimla k'anti'. Ut aran tento taach'oolaniiq chiru wank xka chihab'.

Daniel 7:25

tixmajewa li Nimajwal Yos ut tixrahob'tesiheb' li sik'b'ileb' ru xb'aan li Qaawa'. Tixyal xjalb'al li Chaq'rab' jo' ajwi' li xkutankileb' li ninq'e, ut li xtenamit li Yos te'wanq rub'el xwankil chiru wan xka chihab'.

Daniel 7:20

Kinpatz' ajwi' li xyaalalil li lajeeb' chi xukub' li wank sa' xjolom, jo' ajwi' li xyaalal li xukub' jun chik kiyo'laak ut kirisiheb' li oxib' chik, wank xsa' ru ut tz'i'b'eetal na'aatinak, chi k'ajo' xnimal chiruheb' li xkomon.

Daniel 7:8

“Toj yookin ajwi' chi rilb'aleb' li xukub', ut kiwil naq jun chik xukub' ki'elk chaq sa' xyanqeb' li xkomon. A'an kach'in, ut ke'isiik oxib' li xukub' li kiwil xb'enwa re naq wanq xna'aj li toje' xyo'laak. Li xukub' a'in wank xsa' ru jo' xsa' ruheb' li poyanam, ut rik'in li xtz'uumal re q'axal tz'i'b'eetal na'aatinak.

Apocalipsis 21:10

Ut sa' musiq'ej kinxk'am sa' xb'een jun li nimla tzuul, najt xteram, ut kixk'ut chiwu li santil tenamit Jerusalén, yo chaq chi kub'eek sa' choxa rik'in li Yos,

Ezequiel 8:3

Li winq a'an kinxchap chi rismal linjolom. Toja' naq li xmusiq' li Yos kinxtaqsi sa' iq' ut, sa' moy u, kinxk'am sa' li tenamit Jerusalén, toj wan wi' rokeb'aal li xneb'aalil li rochoch li Qaawa', sa' xjayal releb'l iq', b'arwi' wank li jalam u li nachiq'ok xjosq'il li Qaawa'.

Ezequiel 11:24

Ut li xmusiq' li Yos kinxtaqsi ut kinxk'am wi' chik Babilonia, b'arwi' wankeb' laj Israel li ke'k'ame'k chi preexil. Chixjunil a'in kik'ulmank sa' moy u, sa' xk'ab'a' li xmusiq' li Yos. Moqon chik kisachk chiwu li moy u,

2 Ts 2:4

a' laj Xik'il Uuchinel. A'an naxnimob'resi rib' sa' xb'een chixjunil li wank xk'ab'a' li Yos malaj naloq'onimank sa' ruuchich'och', toj reetal toxk'ojlaaq sa' rochoch li Yos ut tixxaqab' rib' xjunes jo' Yos.

Ezequiel 3:12

Toja' naq li xmusiq' li Yos kinxwaklesi ut kiwab'i jun xyaab' kuxej chiwix jo' li kawil hiik, yo chi xyeeb'al: “Chinimaaq ta xloq'al li Qaawa' yalaq b'ar”, chan.

Cantares 8:5

Ani a'an li yo chaq chi taqe'k sa' li chaqich'och', q'alq'o chaq xb'aan li winq narahok re? Rub'el xche'el li mansaan xatwajsi chaq, b'arwi' xatsiyaak xb'aan laana', sa' li na'ajej b'arwi' xatsiyaak ut xat-alaak.

Apocalipsis 1:10

Sa' xkutankil li Qaawa', kinreechani li Musiq'ej ut kiwab'i chiwix jun kawil xyaab' kuxej, kama' xyaab' li tronpeet, yo chi xyeeb'al we:

Daniel 11:36

«Li awab'ej re Siria tixb'aanu li k'aru taaraj xb'aanunkil; tixnimob'resi rib', tixk'e xwankil sa' xb'een chixjunileb' li yos ut tixmajewa li tz'aqal Yos. Jwal us taa'elq toj reetal li Yos tixk'ut li xnimal xjosq'il, xb'aan naq li ak xyeemank xb'aan li Qaawa', taa'uxq.

2 Reyes 2:16

“K'e reetal, sa' qayanq laa'o aj k'anjel chawu wankeb' lajeeb' roxk'aal chi winq. Kanab'eb' chi xik chi xsik'b'al laj tzolol aawe. Mare anchal li xmusiq' li Qaawa' xolxk'am ut xo'xkut sa' xb'een junaq tzuul malaj sa' junaq na'ajej taq'a ru”. Ke'sumeek: “Maajun chetaqla”.

1 Reyes 18:12

Naq tin'elq chawu, li xmusiq' li Qaawa' tatxk'am sa' junaq na'ajej li ink'a' ninnaw laa'in. Ut naq akaq xo'inye re laj Ajab naq wankat arin, taachalq li awab'ej chasik'b'al; ab'anan ink'a' tatxtaw, jo'kan naq tinxkamsi. Laa'in ninpaab'ank chiru li Qaawa' chalen chaq sa' insaajilal.

Apocalipsis 4:2

Sa' junpaat kinreechani li Musiq'ej, ut xwil jun li nimajwal k'ojarib'aal wan chaq sa' choxa, ut jun li k'ojk'o sa' xb'een li k'ojarib'aal.

Hechos 8:39

Naq ke'elk sa' li ha', li xMusiq' li Qaawa' kixsaapu laj Felipe ut ink'a' chik ki'ile'k ru xb'aan li xnimal ru winq. Ut a'in kixchap wi' chik xb'e chi sa sa' xch'ool,

San Mateo 27:28

Ke'risi li raq' ut ke'xk'e jun li kaqi t'ikr chirix.

Apocalipsis 18:12

a' li oor, plaat, tertookil pek ut lemtz'il q'ol, liino ut púrpura, seda ut kaqjorinkil t'ikr, jo'wi' chixjunil chik li k'iila paay chi sununkil che', chixjunil li k'a'aq re ru yiib'anb'il rik'in marfil, chixjunil li k'a'aq re ru yiib'anb'il rik'in chaab'il che', q'anch'iich', ch'iich' ut mármol;

Apocalipsis 18:16

“Toq'ob' ru, toq'ob' ru li Nimla Tenamit, tiqto rik'in liino, kaqjorinkil ut kaqmoqinkil t'ikr! Toq'ob' ru li nalemtz'unk rik'in oor, tertookil pek ut lemtz'il q'ol!