Levítico 16:29 - Q'eqchi Bible

²⁹ “A'an a'in jun chaq'rab' xaqxooq xwankil chi junelik cho'q eere: sa' xlaje xb'e li xwuq li po, tento naq teeb'aanu ee'ayuun; maajun li k'anjel teeb'aanu, jo'keb' laj Israel, jo'keb' ajwi' laj ab'l tenamit li wankeb' sa' eeyanq,

Li Santil hu

²⁹ Aꞌin jun chakꞌrab tenebanbil saꞌ e̱be̱n ut cua̱nk chi junelic. Te̱ba̱nu la̱ex aj Israel joꞌ ajcuiꞌ eb li jalaneb xtenamit li cuanqueb saꞌ e̱ya̱nk. Saꞌ li laje̱b xbe li xcuuk li po te̱ba̱nu le̱ ayu̱n ut ma̱ jun li cꞌanjel te̱ba̱nu.

Levítico 16:29 ပူးပေါင်းရင်းမြစ်များ

Isaías 58:3

Ut neke'xye we: «K'a' aj e naq nokoo'ayuunik? Chi moko yookat rilb'al. Maak'a' na'ok wi' naq naqakub'si qawankil, wi ink'a' nakak'e sa' laach'ool», chankeb'. K'ehomaq reetal: naq nekex'ayuunik, laa'ex nekeb'aanu li k'aru nekeraj ut nekerahob'tesi chixjunileb' laj to' k'anjel.

Números 29:7

“Sa' ajwi' li lajeeb' xb'e li xwuq po, taawanq leeloq'laj ch'utam. Ink'a' textzekanq ut maajun taak'anjelaq chiru li kutan a'an.

Daniel 10:12

Toja' naq li winq kixye we: «Matxiwak, a Daniel. Chalen chaq sa' xtiklajik xayal aaq'e chi xtawb'al ru li moy u a'in ut xakub'si aawib' chiru laaYos. Jo'kan naq x'ab'iik laatij ut xinchalk laa'in chi xyeeb'al aawe li xsumehom li Qaawa'.

Isaías 58:5

Ma a'in tab'i' li ayuunik nawaj laa'in sa' li kutan naq li winq naxkub'si li xwankil? Nekexulub' leejolom kama' naxulq'iik li b'ayal, ut nekexwark chiru pop ut cha. Ma a'an nekeye «ayuunik» re, ut «kutan li nawulak chiru li Qaawa'»?

Salmos 35:13

Naq xe'yajerk eb' a'an, laa'in xink'e saak chiwix, xinyot' linch'ool rik'in ayuun, ut kok'aq xsa' yookin chi tijok sa' li waanm.

Levítico 23:36

Chiruheb' li wuqub' kutan a'an teek'at eemayej sa' xk'ab'a' li Qaawa', ut sa' xwaqxaq li kutan teeb'aanu jun eeloq'laj ch'utam ut teek'at junaq mayej chiru li Qaawa'. A'anaq jun kutan re sahil ch'oolej ut maajun kawil k'anjel teeb'aanu.

Levítico 23:21

“Sa' ajwi' li kutan a'an tento teeb'aanu junaq loq'laj ch'utam ut maajun junaq kawil k'anjel teeb'aanu. A'in jun chaq'rab' xaqxooq xwankil chi junelik cho'q eere laa'ex ut cho'q reheb' leeralal eek'ajol, yalaq ta b'ar wanqex.

Éxodo 20:10

ab'an li xwuq kutan a'an hilob'aal kutan sa' xk'ab'a' li Qaawa' laaYos. Maajun li k'anjel truuq taab'aanu: laa'at, laawalal, laarab'in, li winq ut li ixq li neke'k'anjelak chawu, laaketomq, chi moko laj ab'l tenamit li wank sa' eeyanq.

Hebreos 4:10

Xb'aan naq ani ak x'ok sa' li xhilob'aal li Yos, a'an nahilank chirix li xk'anjel, kama' ajwi' naq kihilank li Yos chirix li xk'anjel.

1 Corintios 11:31

Wi ta naqeek'a qib' chiqajunjunqal, ink'a' raj tqak'ul li ra.

Daniel 10:3

ink'a' kintzeka li sahil tzekemq, ink'a' kintiwok tib' chi moko kin'uk'ak b'iin, ink'a' kinyul wib' sa' sununkil b'an toj reetal kiraqe'k li oxib' xamaan.

Isaías 58:13

“Chawoxloq'i li kutan sábado ut matyakok sa' linsantil kutan. Chaye re li kutan a'an: «sahil kutan», «loq'laj kutan», cha'qat re li xsantil kutankil li Qaawa'; chawoxloq'i ut matxik chik b'araq, matyakok sa' li sábado chi moko taab'aanu li nakawaj aajunes aawib'.

Salmos 69:10

Xb'aan xraab'al laawochoch k'ajo' naq naxamnak linch'ool, ut sa' inb'een nanaqk li xmajewahomeb' li neke'hob'ok aawe.

Esdras 3:1

Sa' xwuq li po, naq eb' laj Israel wankeb' chik sa' li xtenamiteb', ke'xch'utub' rib' aran Jerusalén chi junajeb' xch'ool junajeb' xk'a'uxl.

1 Reyes 8:2

Ut chixjunileb' li xwinqilaleb' laj Israel ke'xch'utub' rib' rik'in laj Salomón li awab'ej. Chiru li po Etanín, a' li xwuq po, sa' xnimal li ninq'e,

Levítico 23:3

“Waqib' kutan tatk'anjelaq, ab'an sa' xwuq li kutan tathilanq, a'an hilob'aal kutan re jun loq'laj ch'utam. Yalaq b'ar wanqat, a'anaq hilob'aal kutan sa' xk'ab'a' li Qaawa'.

Éxodo 30:10

Jun sut chiru li chihab' laj Aharón tixtz'aama xkuyb'aleb' xmaak li tenamit, sa' xb'eeneb' li xxuk li artal a'in; rik'in xkik'el li mayejanb'il xul tixtz'aama aran xkuyb'aleb' li xmaak li tenamit jun sut chiru li chihab': jo'kan taa'uxmanq chi junelik. Q'axal q'axtesinb'ilaq re li Qaawa' li artal a'in”.

Éxodo 12:16

Sa' li xb'een li kutan chiwanq eeloq'laj ch'utam: jo'kanaq ajwi' sa' xwuq li kutan. Maajun k'anjel chi'uxmanq sa'eb' li kutan a'an; ka'ajwi' taaruuq xk'uub'ankil li tzekemq re li junjunq.

Hechos 27:9

Junxilaq chik a'an, naq xiw xiw chik li xik chiru ha' (xb'aan naq ak numenaq ajwi' xq'ehil li Ayuunik), ki'aatinak laj Pablo rik'ineb'

Éxodo 31:14

Cheroxloq'i b'i' li sábado xb'aan naq a'an loq' cho'q eere. Li taamuxuq re, taakamq. Chixjunil li taak'anjelaq sa' li kutan a'an, isinb'ilaq chi junajwa sa' li xtenamit.

Éxodo 31:15

Chiru waqib' kutan naru texk'anjelaq, ab'an li xwuq kutan a'an tz'aqal hilob'aal kutan, q'axtesinb'ilaq re li Qaawa'. Chixjunileb' li te'k'anjelaq sa' sábado, te'kamq».

Levítico 3:17

“A'an a'in jun chaq'rab' twanq chi junajwa cho'q reheb' li jar teep chi tenamit chaalel, yalaq b'ar wanqeb': ink'a' taatzekamanq li xeeb' chi moko li kik'”.

1 Samuel 7:6

Ke'xch'utub' rib'eb' laj Israel aran Mispá, ke'risi xha'eb' sa'atqeb' li kumb' ut ke'xhoy chiru li Qaawa' cho'q xmayejeb'. Ke'ayuunik chiru li kutan a'an ut ke'xye: “Xoomaakob'k chiru li Qaawa'”. Aran Mispá laj Samuel kikanaak cho'q aj k'amol xb'eheb' laj Israel.

Esdras 8:21

Aran chire li nima' Ahabá kinxaqab' jun li ayuun re xkub'sinkil qib' chiru li qaYos jo' ajwi' re xpatz'b'al naq maak'a' tqak'ul sa' li qab'eenik laa'o, eb' li qalal qak'ajol ut li k'aru wank qe.

Levítico 25:9

ut sa' li lajeeb' xb'e li xwuq po, sa' xkutankil li kuyuk sachok maak, teek'e chi yaab'asiik li xukub' sa' chixjunil li tenamit.