Jueces 6:22 - Q'eqchi Bible

²² Toja' naq laj Jedehón kixk'e reetal naq a'an pe' li x'ánjel li Qaawa', ut kixye re: “Toq'ob' wu, at inQaawa'! Xwil li x'ánjel li Qaawa' chi tz'aqal re ru!”, chan.

Li Santil hu

²² Laj Gedeón quixqꞌue retal nak relic chi ya̱l aꞌan lix ángel li Ka̱cuaꞌ Dios ut cꞌajoꞌ nak quixucuac. Quixye: —At nimajcual Dios, la̱in xcuil ru chi tzꞌakal la̱ ángel, chan.

Jueces 6:22 ပူးပေါင်းရင်းမြစ်များ

Génesis 32:30

Laj Jakob kixk'e cho'q xk'ab'a' li na'ajej a'an Penuel, xb'aan naq kixye: “Xwil ru li Yos ut xkole'k linyu'am”.

Éxodo 33:20

Ab'an ninye aawe naq li xnaq' wu ink'a' tatruuq chi rilb'al, xb'aan naq maajun naru rilb'al chi toj tkanaaq chi yo'yo”.

Deuteronomio 5:26

K'a' tawi' chi winqul jo' laa'o xrab'i xyaab' xkux li qayo'yookil Yos chi aatinak chaq sa' li xam ut xkanaak chi yo'yo?

San Juan 12:41

A'in kixye laj Isaías xb'aan naq kiril li xnimal xloq'al ut ki'aatinak chirix.

San Juan 1:18

Li Yos maajun sut ki'ile'k ru xb'aan anihaq: li K'ajolb'ej jun chirib'il li kisutq'iik rik'in li Yuwa'b'ej, a'an kolk'utb'esinq re chiqu.

Deuteronomio 5:24

ut keye we: «K'e reetal, li Qaawa' li qaYos xk'ut chiqu li xloq'al ut li xnimal xwankil ut xqab'i xyaab' li xkux sa' li xam. Sa' li kutan a'in xqil naq li Yos truuq traatina li winq ut a'in toj tyo'yooq.

Deuteronomio 5:5

Sa' li kutan a'an laa'in wankin sa' yiib'ej rik'in li Qaawa' ut laa'ex, re xq'axtesinkil eere li raatin, xb'aan naq laa'ex yo eexiw chiru li xam ut ink'a' kextaqe'k chiru li tzuul. A'aneb' a'in li aatin kixye:

Génesis 16:13

Toja' naq lix Agar kixk'e “laa'at li Yos li na'ilok we” cho'q xk'ab'a' li Yos ki'aatinank re, xb'aan naq kixye sa' xch'ool: “Arin xwil ru li na'ilok we”.

Jueces 6:23

Kichaq'ok li Qaawa' ut kixye: “Li tuqtuukilal chiwanq aawik'in. Matxiwak, moko tatkamq ta”, chan.

Génesis 32:31

Yo chi elk li saq'e naq laj Jakob ki'elk sa' li na'ajej Penuel; ab'an nayeeqan aj chik li ra'.